Palandonga ang Nahimo ni Jehova Alang Kanimo

HUMAN sa pagkabanhaw ni Jesus, duha sa iyang mga tinun-an nagbaktas gikan sa Jerusalem paingon sa Emmaus. Ang Ebanghelyo ni Lucas nag-asoy: “Samtang sila nagkokabildohay ug naghisgot, si Jesus miduol ug milakaw kuyog nila; apan ang ilang mga mata napugngan sa pagkaila kaniya.” Dayon, si Jesus miingon: “‘Unsa kining mga butanga nga inyong gilantugian samtang kamo nanglakaw?’ Ug sila nanghunong nga masulub-on ang mga nawong.” Nganong nasubo man sila? Nagtuo sila nga niadtong panahona ipahigawas ni Jesus ang Israel gikan sa pagmando sa Hentil, apan wala kana mahitabo. Gipatay hinuon si Jesus. Busa, sila nasubo.—Luc. 24:15-21; Buh. 1:6.

Si Jesus nangatarongan kanila. “Sugod kang Moises ug sa tanang Manalagna gibadbad niya kanila ang mga butang maylabot sa iyang kaugalingon diha sa tibuok nga Kasulatan.” Gani, may daghang panghitabo nga hinungdanon ug makapalig-on sa pagtuo sa panahon sa ministeryo ni Jesus! Samtang namati sila sa pagpatin-aw ni Jesus, ang ilang kasubo gipulihan sa kalipay. Pagkagabii, sila miingon: “Dili ba ang atong mga kasingkasing nagdilaab man samtang nakigsulti siya kanato sa dalan, samtang iyang gibuksan sa bug-os ang mga Kasulatan kanato?” (Luc. 24:27, 32) Unsay atong makat-onan sa reaksiyon sa mga tinun-an ni Jesus?

Unsay Epekto Kon Dili Matuman ang Atong Gidahom?

Ang duha ka tinun-an nga nagbaktas paingon sa Emmaus nasubo kay wala matuman ang ilang gidahom. Nasinati nila ang gihubit sa Proverbio 13:12: “Ang pagdahom nga nalangan makapasakit sa kasingkasing.” Sa susama, ang pipila nga matinumanong nag-alagad kang Jehova sa daghang katuigan naghunahuna nga ang “dakong kasakitan” angay nga hagbay rang nahitabo. (Mat. 24:21; Pin. 7:14) Dili ikatingala nga sa makadiyot makapasubo ang maong wala matuman nga pagdahom.

Hinumdomi nga nahibalik ang kalipay niadtong duha ka tinun-an human sila tabangi ni Jesus sa pagsentro sa ilang hunahuna sa mga tagna nga natuman—bisan sa ilang panahon. Kita usab magmalipayon ug  makabuntog sa mga kahigawad sa susamang paagi. Ang eksperyensiyadong ansiyano nga si Michael miingon: “Ayaw pagpokus sa kon unsay wala pa himoa ni Jehova. Hinuon, palandonga kon unsa na ang iyang nahimo.” Pagkamaayong tambag!

Kon Unsa ang Nahimo ni Jehova

Tagda ang pipila ka talagsaong butang nga nahimo na ni Jehova. Si Jesus miingon: “Siya nga magpasundayag ug pagtuo kanako, siya maghimo usab sa mga buhat nga akong ginahimo; ug pagahimoon niya ang mga buhat nga labaw pa niini.” (Juan 14:12) Karon, ginabuhat sa mga alagad sa Diyos ang kinadak-ang buluhaton sa mga Kristohanon. Kapin sa pito ka milyon ang naglaom nga maluwas sa dakong kasakitan. Wala pa sukad masukad nga may ingon ka daghang matinumanong alagad ni Jehova nga aktibo diha sa daghang kanasoran! Sa pagkatinuod, gitabangan ni Jehova ang iyang mga alagad sa pagbuhat sa “mga buhat nga labaw pa,” ingon sa gitagna ni Jesus.

Unsa pay nahimo ni Jehova alang kanato? Iyang gipahinabo nga ang mga tawong matinud-anog-kasingkasing mogula sa daotang kalibotan, ingnon ta, ug makasulod sa espirituwal nga paraiso nga iyang gimugna. (2 Cor. 12:1-4) Palandonga ang pipila ka bahin sa maong paraiso nga iyang gitagana kanato. Pananglitan, tan-awa ang imong librarya o ang sa Kingdom Hall. Paklia ang Watch Tower Publications Index o buksi ang Watchtower Library sa imong kompiyuter. Pamati sa rekording sa usa ka drama. Hinumdomi ang imong nadungog ug nakita sa miaging kombensiyon. Dugang pa, palandonga ang atong makapalig-ong pagpakig-uban sa kaigsoonan. Pagkamahinatagon ni Jehova sa pagtagana kanatog dagayang espirituwal nga pagkaon ug mahigugmaong mga igsoon—usa gayod ka espirituwal nga paraiso!

Si salmista David miingon: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo.” (Sal. 40:5) Oo, pinaagi sa pagpamalandong sa katingalahang mga butang nga nahimo na ni Jehova kanato ug sa iyang mahigugmaong mga hunahuna kanato, kita mas malig-on aron padayong makaalagad nga matinumanon sa atong langitnong Amahan, si Jehova.—Mat. 24:13.

[Hulagway sa panid 31]

Gitabangan ni Jesus ang iyang mga tinun-an sa pagpamalandong sa nahimo ni Jehova kanila

[Hulagway sa panid 32]

Hinumdomi ang imong nadungog ug nakita sa miaging kombensiyon