Gidumtan Mo ba ang Pagkamalapason?

“Gidumtan mo [Jesus] ang pagkamalapason.”—HEB. 1:9.

1. Unsay gitudlo ni Jesus bahin sa gugma?

SA PAGPASIUGDA sa kahinungdanon sa gugma, si Jesu-Kristo miingon sa iyang mga disipulo: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:34, 35) Si Jesus nagsugo sa iyang mga sumusunod nga magpakitag masakripisyohong gugma sa usag-usa. Kana nga gugma mahimong ilang ilhanan. Giawhag usab sila ni Jesus: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.”—Mat. 5:44.

2. Unsay angayng dumtan sa mga sumusunod ni Kristo?

² Si Jesus wala lamang magtudlo sa iyang mga disipulo bahin sa gugma, kondili nagtudlo usab kanila kon unsay dumtan. Kini ang giingon bahin kang Jesus: “Gihigugma mo ang pagkamatarong, ug gidumtan mo ang pagkamalapason [pagkadaotan].” (Heb. 1:9; Sal. 45:7) Kini nagpakita nga kinahanglang ugmaron nato dili lamang ang gugma sa pagkamatarong kondili ang  pagdumot usab sa sala, o pagkamalapason. Matikdi nga si apostol Juan miingon: “Ang tanan nga nagpakasala nagabuhat usab ug kalapasan, ug busa ang sala maoy kalapasan.”—1 Juan 3:4.

3. Bahin sa pagdumot sa pagkamalapason, unsang mga bahin sa kinabuhi ang hisgotan niining artikuloha?

³ Nan angayng suknaon sa mga Kristohanon ang kaugalingon, ‘Gidumtan ko ba ang kalapasan?’ Atong susihon kon sa unsang paagi atong ikapakita ang pagdumot sa kon unsay daotan sa upat ka bahin sa kinabuhi: (1) atong tinamdan sa alkoholikong ilimnon, (2) sa okultismo, (3) sa imoralidad, ug (4) niadtong nahigugma sa pagkamalapason.

Ayaw Paulipon sa Bino

4. Nganong si Jesus may kagawasan sa pagsulti sa dihang nagpasidaan batok sa pagpalabig inom?

⁴ May mga higayon nga si Jesus miinom ug bino, kay nag-isip niana nga gasa sa Diyos. (Sal. 104:14, 15) Apan, wala niya abusohi ang maong gasa pinaagi sa pagpalabig inom. (Prov. 23:29-33) Busa si Jesus may kagawasan sa pagsulti sa dihang nagtambag batok sa maong buhat. (Basaha ang Lucas 21:34.) Ang pag-abuso sa alkoholikong ilimnon motultol sa ubang seryosong sala. Busa, si apostol Pablo misulat: “Ayaw kamo pagkahubog sa bino, nga niini adunay unodnong pagpatuyang, kondili magmapuno sa espiritu.” (Efe. 5:18) Iyang gitambagan usab ang edarang mga babaye sa kongregasyon nga dili ‘magpaulipon sa daghang bino.’—Tito 2:3.

5. Unsang mga pangutana ang mahimong isukna sa kaugalingon niadtong moinom ug alkoholikong ilimnon?

⁵ Kon moinom kag alkoholikong ilimnon, maayong suknaon ang kaugalingon: ‘Ang ako bang tinamdan bahin sa pagpalabig inom sama sa kang Jesus? Kon kinahanglan kong motambag sa uban bahin niini, ako ba may kagawasan sa pagsulti? Moinom ba ko aron malimtan ang mga problema o aron marelaks? Unsa ka daghan ang akong mainom kada semana? Unsay akong reaksiyon kon may moingon nga daghan na kog nainom? Mangatarongan ba ko o masuko?’ Kon kita magpaulipon sa bino, maapektohan ang atong katakos sa pagpangatarongan ug sa paghimog maalamong desisyon. Ang mga sumusunod ni Kristo naningkamot sa pagpanalipod sa ilang katakos sa panghunahuna.—Prov. 3:21, 22.

Likayi ang Okultismo

6, 7. (a) Unsay gihimo ni Jesus bahin sa mga pangatake ni Satanas ug sa mga demonyo? (b) Nganong kaylap kaayo ang okultismo karon?

⁶ Sa dinhi si Jesus sa yuta, iyang gisupak si Satanas ug ang mga demonyo. Iyang gisuklan ang dayag nga mga pag-atake ni Satanas sa iyang pagkamaunongon. (Luc. 4:1-13) Giyagyag usab niya ang malansisong paningkamot sa pag-impluwensiya sa iyang panghunahuna ug mga lihok. (Mat. 16:21-23) Gitabangan usab ni Jesus ang mga tawong takos sa paglingkawas sa gahom sa mga demonyo.—Mar. 5:2, 8, 12-15; 9:20, 25-27.

⁷ Human maentrono si Jesus ingong Hari niadtong 1914, iyang gihinloan ang mga langit sa daotang impluwensiya ni Satanas ug sa mga demonyo. Tungod niana, si Satanas labi pang determinado kay sukad masukad sa ‘pagpahisalaag sa tibuok gipuy-ang yuta.’ (Pin. 12:9, 10) Busa dili kita matingala nga kaylap ug nagkadaghan ang nadani sa okultismo. Unsay atong buhaton aron mapanalipdan ang kaugalingon?

8. Unsang pagsusi-sa-kaugalingon ang angayng himoon sa matag usa bahin sa pagpilig kalingawan?

⁸ Ang Bibliya tin-aw nga nagapasidaan sa  kapeligrohan sa espiritismo. (Basaha ang Deuteronomio 18:10-12.) Karon, si Satanas ug ang mga demonyo nag-impluwensiya sa hunahuna sa mga tawo pinaagi sa mga pelikula, libro, ug elektronikong mga dula nga nagpasiugda sa okultismo. Busa, sa dihang magpilig kalingawan, angayng pangutan-on ang kaugalingon: ‘Sa miaging mga bulan, nalingaw ba ko sa mga pelikula, salida sa TV, elektronikong mga dula, libro, o komiks nga nagpasiugdag espiritismo? Nasabtan ko ba nga hinungdanong isalikway ang okultismo, o gibalewala ko lang ang kapeligrohan niana? Nakapamalandong ba ko kon unsay bation ni Jehova sa akong gipili nga kalingawan? Kon natugotan ko ang mga impluwensiya ni Satanas nga mosulod sa akong kinabuhi, ang akong gugma kang Jehova ug sa iyang matarong nga mga prinsipyo magtukmod ba kanako nga molihok dayon ug bug-os nga magsalikway niana?’—Buh. 19:19, 20.

Pamatia ang Pasidaan ni Jesus Bahin sa Imoralidad

9. Sa unsang paagi maugmad sa usa ang gugma sa pagkamalapason?

⁹ Si Jesus nagtuboy sa sukdanan ni Jehova bahin sa seksuwal nga moralidad. Siya miingon: “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.” (Mat. 19:4-6) Nahibalo si Jesus nga ang makita sa atong mga mata makaapektar sa atong kasingkasing. Busa, siya miingon diha sa iyang Wali sa Bukid: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mat. 5:27, 28) Kadtong wala manumbaling sa pasidaan ni Jesus nag-ugmad gayod sa gugma sa pagkamalapason.

10. Pag-asoy ug kasinatian nga nagpakita nga ang usa makalingkawas sa pornograpiya.

¹⁰ Si Satanas nagpasiugda sa seksuwal nga imoralidad pinaagi sa pornograpiya. Ang presenteng sistema sa mga butang gilunopan niini. Kadtong nagtan-awg pornograpiya malisdan sa pagpapas sa imoral nga mga hulagway sa ilang hunahuna. Mahimo pang maadik sila niana. Tagda ang nahitabo sa usa ka brader. Siya miingon: “Sekreto kong nagatan-awg pornograpiya. May mga panghanduraw ko nga abi nakog dili ra makaapektar sa akong pag-alagad kang Jehova. Nahibalo ko nga sayop ang maong mga buhat apan nagtuo ko nga ang akong pag-alagad dalawaton gihapon sa Diyos.” Unsay nakapausab sa tinamdan sa brader? Matod niya: “Bisag kadto lisod kaayo, akong gitug-an sa mga ansiyano ang akong problema.” Ngadtongadto ang brader nakahunong ra sa maong mahugaw nga bisyo. “Human nako mahinloi ang akong kinabuhi sa maong sala,” siya miadmitir, “sa kataposan gibati ko nga akong nabatonan ang hinlong tanlag.” Kadtong nagdumot sa pagkamalapason angayng makat-on sa pagdumot sa pornograpiya.

11, 12. Sa unsang paagi ikapakita nato nga atong gidumtan ang pagkamalapason maylabot sa pagpilig musika?

¹¹ Ang musika ug ang liriko niini makaimpluwensiyag dako sa atong emosyon ug busa, sa atong simbolikong kasingkasing. Ang musika mismo gasa sa Diyos ug dugay nang bahin sa  matuod nga pagsimba. (Ex. 15:20, 21; Efe. 5:19) Apan ang daotang kalibotan ni Satanas nagpasiugdag musika nga nagtuboy sa imoralidad. (1 Juan 5:19) Unsaon nimo pagkahibalo kon makadaot ba o dili ang musika nga imong gipaminawan?

¹² Pangutan-a ang kaugalingon: ‘Ang mga awit ba nga akong gipamati nagpasiugda sa pagpatay, panapaw, pakighilawas, ug pasipala? Kon akong basahon ngadto sa usa ka tawo ang liriko sa pipila ka awit, siya ba maghunahuna nga gidumtan ko ang kalapasan, o ang mga pulong niana magpadayag nga nahugawan na ang akong kasingkasing?’ Dili kita makaingon nga kita nagdumot sa kalapasan kon sa samang higayon kita namati ug musika nga nagtuboy niini. Si Jesus miingon: “Ang mga butang nga nagagula sa baba maoy gikan sa kasingkasing, ug kanang mga butanga makapahugaw sa tawo. Pananglitan, nagagula gikan sa kasingkasing ang daotang mga pangatarongan, mga pagbuno, mga pagpanapaw, mga pakighilawas, mga pagpangawat, bakak nga mga pagpamatuod, mga pasipala.”—Mat. 15:18, 19; itandi ang Santiago 3:10, 11.

Batoni ang Tinamdan ni Jesus Niadtong Nahigugma sa Pagkamalapason

13. Unsay panghunahuna ni Jesus niadtong naanad na sa pagpakasala?

¹³ Si Jesus miingon nga siya mianhi aron sa pag-awhag sa mga makasasala o mga malapason sa paghinulsol. (Luc. 5:30-32) Apan, unsay iyang panghunahuna niadtong naanad na sa pagpakasala? Si Jesus naghatag ug bug-at nga pasidaan batok sa ilang impluwensiya. (Mat. 23:15, 23-26) Siya tin-aw usab nga miingon: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit. Daghan ang moingon kanako nianang adlawa [sa dihang ang Diyos maghukom na], ‘Ginoo, Ginoo, wala ba kami managna sa imong ngalan, ug naghingilin sa mga demonyo sa imong ngalan, ug naghimog daghang gamhanang mga buhat sa imong ngalan?’” Apan, iyang isalikway kadtong dili-mahinulsolong nagbuhat sa pagkamalapason, nga nag-ingon: “Pahilayo gikan kanako.” (Mat. 7:21-23) Nganong makadawat sila sa maong paghukom? Kay sila nagpasipala sa Diyos ug nagdaot sa uban pinaagi sa ilang mga kalapasan.

14. Nganong ipalagpot sa kongregasyon ang dili-mahinulsolong mga makasasala?

¹⁴ Ang Pulong sa Diyos nagsugo nga ipalagpot sa kongregasyon ang dili-mahinulsolong mga makasasala. (Basaha ang 1 Corinto 5:9-13.) Gikinahanglan kini tungod sa tulo ka rason: (1) aron dili mapasipalahan ang ngalan ni Jehova, (2) aron dili mahugawan ang kongregasyon, ug (3) aron tabangan ang makasasala nga maghinulsol kon posible.

15. Kon buot natong magmaunongon kang Jehova, unsang mga pangutana ang atong isukna sa kaugalingon?

¹⁵ Ang imong panghunahuna bahin niadtong naanad na sa pagpakasala sama ba sa kang Jesus? Angay natong palandongon kining mga pangutanaha: ‘Makig-uban ba ko niadtong napalagpot o nadis-asosyet sa kongregasyon? Komosta man kon siya imong paryente nga dili na ninyo ipon sa pagpuyo?’ Kana mahimong dakong pagsulay sa atong gugma sa pagkamatarong ug pagkamaunongon sa Diyos. *

16, 17. Unsang suliran ang giatubang sa usa ka Kristohanong inahan? Unsay nakatabang kaniya sa pagsunod sa kahikayan sa pagpalagpot sa dili-mahinulsolong makasasala?

 ¹⁶ Tagda ang kasinatian sa usa ka sister nga may hingkod nang anak lalaki nga sa miagi nag-alagad kang Jehova. Apan sa ulahi, nagkinabuhi siyang malapason ug wala maghinulsol. Busa, napalagpot siya sa kongregasyon. Ang sister nahigugma kang Jehova, apan siya nahigugma usab sa iyang anak ug nalisdan kaayo sa pagpadapat sa Kasulatanhong sugo nga likayan ang pagpakig-uban kaniya.

¹⁷ Unsay imong itambag sa maong sister? Usa ka ansiyano ang mitabang kaniya sa pag-amgo nga nasabtan ni Jehova ang iyang kaguol. Giawhag siya sa brader sa paghunahuna sa kaguol nga gibati ni Jehova sa dihang may mga manulonda nga mirebelde. Ang ansiyano miingon nga bisag nahibalo si Jehova kon unsa ka makapaguol ang maong kahimtang, gibaod niya nga ipalagpot ang dili-mahinulsolong makasasala. Gidawat niya ang mga pahinumdom ug maunongong gisunod ang kahikayan sa pagpalagpot. * Ang maong pagkamaunongon makapalipay sa kasingkasing ni Jehova.—Prov. 27:11.

18, 19. (a) Unsay gipamatud-an sa dili nato pagpakig-uban sa mamumuhat ug kalapasan? (b) Unsay moresulta kon kita magmaunongon sa Diyos ug sa iyang kahikayan?

¹⁸ Kon nag-atubang kag susamang kahimtang, hinumdomi nga si Jehova nakasabot niana. Kon dili ka makig-uban sa napalagpot o nadis-asosyet, imong gipakita nga gidumtan mo ang tinamdan ug mga buhat nga maoy hinungdan sa pagpalagpot. Apan, gipakita usab nimo nga imong gihigugma ang nakasala ug nagtinguha ka sa iyang kaayohan. Kon magmaunongon ka kang Jehova, mas dako ang purohan nga ang gidisiplina maghinulsol ug mobalik kang Jehova.

¹⁹ Ang usa nga napalagpot ug napasig-uli sa ulahi misulat: “Ako nalipay nga tungod sa paghigugma ni Jehova sa iyang katawhan, iyang giseguro nga mahuptang hinlo ang iyang organisasyon. Ang mga tagagawas mahimong mag-isip niini nga estrikto kaayo, apan gikinahanglan gayod kini ug maoy pagpasundayag sa gugma.” Sa imong hunahuna, siya ba makahinapos niana kon ang iyang pamilya ug mga igsoon sa kongregasyon kanunayng nakig-uban kaniya bisag napalagpot na siya? Ang atong pagpaluyo sa Kasulatanhong kahikayan sa pagpalagpot magpamatuod nga atong gihigugma ang pagkamatarong ug giila nga si Jehova ang may katungod sa paghatag ug mga lagda sa panggawi.

“Dumti ang Daotan”

20, 21. Nganong hinungdanon nga kita makakat-on sa pagdumot sa pagkamalapason?

²⁰ “Hupti ninyo ang maayong panghunahuna, magmabinantayon,” mipasidaan si apostol Pedro. Ngano? Kay ang “inyong kaaway, ang Yawa, nagasuroysuroy sama sa usa ka leyon nga nagangulob, nga nagapangitag matukob.” (1 Ped. 5:8) Posible ba nga ikaw ang matukob? Depende kini kon imo ba gayong gidumtan ang pagkamalapason.

²¹ Ang pagkat-on sa pagdumot sa daotan dili sayon. Kita natawong makasasala, ug nagkinabuhi sa kalibotang nagdasig sa pagtagbaw sa unodnong mga tinguha. (1 Juan 2:15-17) Apan, pinaagi sa pagsundog kang Jesu-Kristo ug pag-ugmad sa halalom nga gugma kang Jehova, maugmad nato ang pagdumot sa pagkamalapason. Magmadeterminado kita sa ‘pagdumot sa daotan,’ nga may bug-os nga pagsalig nga si Jehova “nagabantay . . . sa mga maunongon kaniya; siya nagaluwas kanila gikan sa kamot sa mga daotan.”—Sal. 97:10.

[Mga footnote]

Unsay Imong Tubag?

• Unsay makatabang nato sa pagsusi sa atong tinamdan sa alkoholikong ilimnon?

• Unsa ang mga paagi aron mapanalipdan kita batok sa okultismo?

• Nganong peligroso ang pornograpiya?

• Sa unsang paagi ikapakita nato ang pagdumot sa pagkamalapason kon kita may minahal nga napalagpot?

[Mga Pangutana sa Pagtuon]

[Hulagway sa panid 29]

Kon moinom kag alkoholikong ilimnon, unsay angay nimong tagdon?

[Hulagway sa panid 30]

Pagbantay sa yawan-ong impluwensiya diha sa kalingawan

[Hulagway sa panid 31]

Unsa nga gugma ang ginaugmad sa tigtan-awg pornograpiya?