Gipabilhan Mo ba ang Imong mga Panalangin?

KAY milagrosong giluwas sa pagkaulipon sa Ehipto, ang mga Israelinhon nalipay kay sila may kagawasan na sa pagsimba kang Jehova. (Ex. 14:29–15:1, 20, 21) Apan wala madugay, nausab ang ilang tinamdan. Misugod sila pagreklamo sa ilang kahimtang. Ngano? Kay ang ilang hunahuna napokus na sa mga kalisdanan sa pagpuyo sa kamingawan, imbes sa nahimo ni Jehova kanila. Sila miingon kang Moises: “Nganong kami inyong gipagawas sa Ehipto aron lamang mamatay sa kamingawan? Kay walay tinapay ug walay tubig, ug ang among kalag giluod na niining dulumtanang tinapay [mana].”—Num. 21:5.

Kasiglohan sa ulahi, si Haring David sa Israel miawit: “Kon bahin kanako, sa imong mahigugmaong-kalulot ako misalig; magmalipayon unta ang akong kasingkasing diha sa imong kaluwasan. Magaawit ako kang Jehova, tungod kay siya nagaganti kanako.” (Sal. 13:5, 6) Si David wala malimot sa mga buhat sa mahigugmaong-kalulot ni Jehova kaniya. Hinunoa, siya kanunayng namalandong niana. (Sal. 103:2) Si Jehova nagapanalangin usab kanato, ug maalamon nga atong pabilhan ang iyang nahimo alang kanato. Busa, atong hisgotan ang pipila sa mga panalangin sa Diyos nga atong napahimuslan karon.

“Pagkasuod Kang Jehova”

Ang salmista miawit: “Ang pagkasuod kang Jehova ila sa mga nahadlok kaniya.” (Sal. 25:14) Pagkadakong pribilehiyo nga ang dili-hingpit nga mga tawo makabatog suod nga relasyon kang Jehova! Apan, komosta kon kita puliki sa adlaw-adlawng kalihokan nga diyutay na lang kitag panahon alang sa pag-ampo? Hunahunaa kon unsa unyay mahitabo sa atong maayong relasyon kang Jehova. Isip atong Higala, gidahom ni Jehova nga kita mosalig kaniya ug mopahayag sa atong gibati diha sa pag-ampo, nga isulti ang atong mga kahadlok,  tinguha, ug kabalaka. (Prov. 3:5, 6; Filip. 4:6, 7) Busa angay natong hunahunaon ang kalidad sa atong mga pag-ampo.

Sa dihang ang batan-ong Saksi nga si Paul namalandong bahin sa iyang mga pag-ampo, nakaamgo siya nga kinahanglan kanang pauswagon. * Siya miingon, “Nabatasan nako ang paggamit sa samang mga pulong sa dihang ako mag-ampo kang Jehova.” Sa gisusi ni Paul ang maong ulohan sa Watch Tower Publications Index, iyang nasayran nga may mga 180 ka pag-ampo nga natala sa Bibliya. Ang mga alagad ni Jehova sa karaang panahon nagpahayag sa ilang mga pagbati. Si Paul miingon: “Pinaagi sa pagpamalandong sa mga panig-ingnan sa Bibliya, nakakat-on ko nga magmaespesipiko sa pag-ampo. Kini nakatabang nako sa pagpahayag sa akong mga pagbati kang Jehova. Karon makalipay nga masuod kaniya diha sa pag-ampo.”

“Pagkaon sa Hustong Panahon”

Ang laing panalangin nga gihatag ni Jehova kanato mao ang daghang kamatuoran nga atong nakat-onan sa Kasulatan. Samtang nagpahimulos kita sa dagayang espirituwal nga pagkaon, may rason kita sa ‘paghugyaw sa kalipay tungod sa maayong kahimtang sa kasingkasing.’ (Isa. 65:13, 14) Apan, kinahanglan kitang magbantay batok sa dili-maayong mga impluwensiya nga makapawala sa atong kadasig sa kamatuoran. Pananglitan, ang pagpamati sa apostatang propaganda makaapekto sa atong panghunahuna ug dili na kita makapabili sa espirituwal nga “pagkaon sa hustong panahon” nga gitagana ni Jehova pinaagi sa “matinumanon ug maalamong ulipon.”—Mat. 24:45-47.

Si André, nga nag-alagad sa daghang katuigan, may pait nga kasinatian kay nadani sa apostatang panghunahuna. Iyang gibati nga dili peligroso ang daklit nga pagtan-aw sa Web site sa mga apostata. Siya nahinumdom: “Sa sinugdan, nadani ko sa giingon sa mga apostata nga kamatuoran kono. Sa padayon nakong pagsusi niini, gibati nako nga husto ra ang pagbiya sa organisasyon ni Jehova. Apan sa ulahi, samtang nagdukiduki ko bahin sa argumento sa mga apostata batok sa mga Saksi ni Jehova, akong naamgohan nga malinglahon kaayo ang bakak nga mga magtutudlo. Sa pagkatinuod, ang giingon nila nga ‘lig-ong ebidensiya’ maoy impormasyon nga gihatagan nilag laing kahulogan. Busa, mibalik ko sa pagbasa sa atong publikasyon ug pagtambong sa tigom. Wala madugay akong naamgohan nga dako kaayo ang nawala kanako.” Ikalipay nga si André mibalik sa kongregasyon.

“Tibuok Kapunongan sa mga Igsoon”

Ang atong mahigugmaon, nagkahiusang panag-igsoonay maoy panalangin gikan ni Jehova. (Sal. 133:1) May maayong rason nga si apostol Pedro misulat: “Pagbaton ug gugma alang sa tibuok kapunongan sa mga igsoon.” (1 Ped. 2:17) Ingong bahin sa Kristohanong panag-igsoonay, nakabenepisyo kita sa kalulot ug pagpaluyo sa espirituwal nga mga amahan,  inahan, igsoong lalaki ug babaye sa kongregasyon.—Mar. 10:29, 30.

Bisan pa niana, madaot usahay ang atong relasyon sa mga igsoon tungod sa lainlaing kahimtang. Pananglitan, ang usa daling mapikal sa kahuyangan sa usa ka igsoon ug mahimong hinawayon kaniya. Kon mahitabo kini, dili ba maayong hinumdoman nga si Jehova nahigugma sa iyang mga alagad bisan pa sa ilang kahuyangan? Dugang pa, “kon kita moingon: ‘Kita walay sala,’ kita nagpahisalaag sa atong kaugalingon ug wala kanato ang kamatuoran.” (1 Juan 1:8) Dili ba angay kitang “magpadayon sa pag-antos sa usag usa ug kinabubut-on nga magpasaylo sa usag usa”?—Col. 3:13.

Ang batan-ong si Ann nakakat-on sa pagpabili sa Kristohanong panag-ubanay human lamang sa pait nga kasinatian. Sama sa mausikong anak sa ilustrasyon ni Jesus, siya mibulag sa Kristohanong kongregasyon. Sa ulahi, siya nakaamgo ug mibalik sa kamatuoran. (Luc. 15:11-24) Unsay nakat-onan ni Ann sa maong kasinatian? Siya miasoy: “Karon nga nahibalik na ko sa organisasyon ni Jehova, gipabilhan ko ang tanang igsoon bisan pa sa ilang kahuyangan. Sa nangagi, dali ra kong manaway nila. Apan karon, dili gyod nako tugotan nga may makahikaw kanako sa mga panalangin nga akong natagamtam taliwala sa mga igsoon. Walay bisan unsang butang sa kalibotan ang ikabaylo sa atong espirituwal nga paraiso.”

Magmapasalamaton sa Imong mga Panalangin

Ang atong paglaom sa Gingharian sa Diyos ingong solusyon sa tanang problema sa katawhan maoy bililhon kaayong bahandi. Sa dihang nabatonan nato kini nga paglaom, ang atong kasingkasing nahupngan ug apresasyon! Mibati kita sama sa magpapatigayon sa sambingay ni Jesus nga ‘nagbaligya sa tanang butang nga iyang nabatonan’ aron mapalit ang “usa ka perlas nga bililhon kaayo.” (Mat. 13:45, 46) Si Jesus wala mag-ingon nga ang magpapatigayon nawad-ag apresasyon sa perlas. Sa susama, dili gayod nato wad-on ang atong apresasyon niining talagsaong paglaom.—1 Tes. 5:8; Heb. 6:19.

Tagda ang panig-ingnan ni Jean, kinsa nag-alagad kang Jehova sa kapig 60 ka tuig. Siya miingon: “Ang nakatabang nako sa paghinumdom kanunay sa Gingharian sa Diyos mao ang paghisgot niini sa uban. Inigkakita nako sa ilang reaksiyon sa pagkahibalo bahin sa Gingharian, ako madasig. Sa dihang mabag-o ang kinabuhi sa usa ka estudyante sa Bibliya tungod sa kamatuoran, makahunahuna ko, ‘Pagkabililhon sa kamatuoran nga kinahanglan nakong ipaambit sa uban!’”

Daghan kitag rason nga magmapasalamaton sa espirituwal nga mga panalangin nga atong natagamtam. Bisag nagsagubang tingalig mga pagsulay sama sa pagsupak, sakit, pagkatigulang, depresyon, pagbangotan, ug kalisod sa panginabuhi, kita nahibalo nga kini temporaryo lamang. Ubos sa Gingharian sa Diyos, ang espirituwal nga mga panalangin madugangan ug pisikal nga mga panalangin. Ang mga pag-antos karon mahanaw na sa bag-ong sistema sa mga butang.—Pin. 21:4.

Sa pagkakaron, magmapasalamaton kita sa atong espirituwal nga mga panalangin ug ipakita ang apresasyon sama sa salmista kinsa miawit: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo. Sa dihang buot ko nga isaysay ug hisgotan sila, daghan pa sila kay sa akong ikabatbat.”—Sal. 40:5.

[Footnote]

[Hulagway sa panid 18]

Panahon sa pagsulay, makadawat kitag espirituwal nga tabang