Higugmaa ang Pagkamatarong sa Tibuok Mong Kasingkasing

“Gihigugma mo ang pagkamatarong.”—SAL. 45:7.

1. Unsay makatabang nato sa pagsubay sa “mga alagianan sa pagkamatarong”?

PINAAGI sa iyang Pulong ug balaang espiritu, si Jehova nagagiya sa iyang katawhan sa “mga alagianan sa pagkamatarong.” (Sal. 23:3) Tungod sa pagkadili-hingpit, kita lagmit motipas sa maong alagianan. Nagkinahanglag panlimbasog aron makabalik sa pagbuhat kon unsay matarong. Unsay makatabang aron kita molampos? Sama kang Jesus, angay natong higugmaon ang pagbuhat kon unsay matarong.—Basaha ang Salmo 45:7.

2. Unsa ang “mga alagianan sa pagkamatarong”?

² Unsa ang “mga alagianan sa pagkamatarong”? Ang alagianan maoy hiktin nga dalan. Ang maong “mga alagianan” gipasukad sa sukdanan ni Jehova sa pagkamatarong. Sa Hebreohanon ug Gregong pinulongan, ang “pagkamatarong” nagtumong sa kon unsay “matul-id,” nga nagkahulogan sa estriktong pagsunod sa moral nga mga prinsipyo. Sanglit si Jehova mao “ang puloy-anang dapit sa pagkamatarong,” ang iyang mga magsisimba nalipay nga mosalig kaniya sa paglagda sa matul-id nga alagianan nga angay nilang sundon.—Jer. 50:7.

3. Sa unsang paagi mas makat-on kita bahin sa pagkamatarong sa Diyos?

³ Pinaagi lamang sa tibuok kasingkasing nga panlimbasog sa pagsunod sa iyang matarong nga sukdanan nga kita bug-os makapahimuot sa Diyos. (Deut. 32:4) Kana magsugod sa pagkat-on kutob sa maarangan bahin kang Jehova nga Diyos gikan sa iyang Pulong, ang Bibliya. Kon mas daghan kitag makat-onan bahin kaniya, nga mas masuod kita kaniya adlaw-adlaw, mas higugmaon nato ang iyang pagkamatarong. (Sant. 4:8) Kinahanglang magpagiya usab kita sa inspiradong Pulong sa Diyos sa atong paghimog importanteng mga desisyon.

Pangitaa ang Pagkamatarong sa Diyos

4. Unsay nalangkit sa pagpangita sa pagkamatarong sa Diyos?

⁴ Basaha ang Mateo 6:33. Ang pagpangita sa pagkamatarong sa Diyos naglangkit ug labaw pa kay sa pagsangyaw sa maayong balita sa Gingharian. Aron ang atong sagradong pag-alagad mahimong dalawaton kang Jehova, ang atong panggawi matag adlaw kinahanglang uyon sa iyang hataas nga sukdanan. Unsay angayng himoon sa tanan nga nagapangita sa pagkamatarong ni Jehova? Sila kinahanglang “magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.”—Efe. 4:24.

5. Unsay makatabang nato sa pagbuntog sa kahigawad?

⁵ Samtang nanlimbasog kita sa pagsunod sa matarong nga sukdanan sa Diyos, usahay mahigawad kita tungod sa atong kahuyangan. Unsay makatabang nato aron mabuntog ang kahigawad ug makakat-on sa paghigugma ug pagbuhat sa pagkamatarong? (Prov. 24:10) Kinahanglang regular kitang mag-ampo kang Jehova “uban ang matinuoron nga kasingkasing diha sa bug-os nga pagsalig sa pagtuo.” (Heb. 10:19-22) Kita man dinihogang Kristohanon o may yutan-ong paglaom, nagpasundayag kitag pagtuo sa halad lukat ni Jesu-Kristo ug sa iyang pagabuhaton isip Hataas nga Saserdote. (Roma 5:8; Heb. 4:14-16) Ang benepisyo sa giulang dugo ni Jesus giilustrar sa unang isyu niining magasina. (1 Juan 1:6, 7) Ang artikulo nag-ingon: “Tinuod nga dihang tan-awon ang eskarlata  o pulang butang pinaagi sa pulang bildo diha sa kahayag, ang butang daw puti; busa, bisag eskarlata o pula ang atong mga sala, sa dihang tan-awon kana sa Diyos pinaagi sa dugo ni Kristo, kana isipong puti.” (Hulyo 1879, p. 6) Pagkatalagsaon nga kita gitubos ni Jehova pinaagi sa halad lukat sa iyang minahal nga Anak!—Isa. 1:18.

Susiha ang Imong Espirituwal nga Armadura

6. Nganong hinungdanon nga susihon nato ang atong espirituwal nga armadura?

⁶ Kinahanglang magsul-ob kita kanunay sa “panagang sa dughan sa pagkamatarong,” kay kini usa ka hinungdanong bahin sa espirituwal nga armadura gikan sa Diyos. (Efe. 6:11, 14) Kita man bag-ong nabawtismohan o dugay nang nag-alagad, angayng susihon nato matag adlaw ang atong espirituwal nga armadura. Ngano? Kay ang Yawa ug ang mga demonyo gitambog na dinhi sa yuta. (Pin. 12:7-12) Si Satanas nasuko, ug siya nahibalo nga hamubo na lang ang iyang panahon. Busa, iyang gipangusgan ang pag-atake sa katawhan sa Diyos. Ato bang gipabilhan ang kahinungdanon sa pagsul-ob sa “panagang sa dughan sa pagkamatarong”?

7. Unsay angay natong buhaton kon atong giila nga nagkinahanglan kita sa “panagang sa dughan sa pagkamatarong”?

⁷ Ang panagang sa dughan manalipod sa literal nga kasingkasing. Tungod sa atong pagkadili-hingpit, ang atong simbolikong kasingkasing lagmit mahimong malimbongon ug desperado. (Jer. 17:9) Sanglit ang atong kasingkasing makiling sa pagbuhat ug daotan, kinahanglan kining bansayon ug disiplinahon. (Gen. 8:21) Kon giila nato nga atong gikinahanglan ang “panagang sa dughan sa pagkamatarong,” dili nato kini tangtangon bisan sa makadiyot pinaagi sa pagpahimulos sa kalingawan nga gidumtan sa Diyos; ni maghanduraw kitag daotang buhat. Dili kita mag-usik ug daghang oras sa pagtan-awg TV. Hinuon, padayon kitang manlimbasog sa pagbuhat kon unsay makapahimuot kang Jehova. Bisan kon kita matumba tungod sa pagpadaog sa dili-matarong ug unodnong panghunahuna, makabangon kita pag-usab sa tabang ni Jehova.—Basaha ang Proverbio 24:16.

8. Nganong kita nagkinahanglan sa “dakong taming sa pagtuo”?

⁸ Nahilakip sa atong espirituwal nga armadura ang “dakong taming sa pagtuo.” Kini “makapalong sa tanang nagdilaab nga mga udyong sa daotan.” (Efe. 6:16) Ang pagtuo ug bug-os-kasingkasing nga gugma kang Jehova makatabang nato sa pagbuhat sa pagkamatarong ug sa pagpabilin sa dalan ngadto sa walay-kataposang kinabuhi. Kon kita mas nahigugma kang Jehova, mas mapabilhan nato ang iyang pagkamatarong. Apan komosta ang atong tanlag? Sa unsang paagi makatabang kini sa atong panlimbasog sa paghigugma sa pagkamatarong?

Hupti ang Maayong Tanlag

9. Unsay kaayohan sa paghupot ug maayong tanlag?

⁹ Panahon sa atong bawtismo, kita mihangyo kang Jehova ug “maayong tanlag.” (1 Ped. 3:21) Kay kita nagpasundayag ug pagtuo sa lukat, ang dugo ni Jesus nagtabon sa atong mga sala ug busa nabatonan nato ang maayong baroganan atubangan sa Diyos. Apan,  aron magpabilin sa maong baroganan, atong huptan ang maayong tanlag. Kon usahay tulisokon kita sa atong tanlag, angay kitang magpasalamat nga kini naglihok sa tukmang paagi. Ang maong pagtulisok nagpasabot nga ang atong tanlag wala makubali o mahabol maylabot sa matarong nga mga dalan ni Jehova. (1 Tim. 4:2) Apan ang tanlag may dugang papel alang niadtong nagtinguha sa paghigugma sa pagkamatarong.

10, 11. (a) Pag-asoy ug eksperyensiya nga magpakita kon nganong kinahanglang sundon ang binansay-sa-Bibliya nga tanlag. (b) Nganong ang paghigugma sa pagkamatarong makapalipay kanato?

¹⁰ Kon makabuhat kitag daotan, ang atong tanlag mahimong maghukom o maghasol nato. May usa ka batan-on nga mitipas sa “mga alagianan sa pagkamatarong.” Siya naadik sa pornograpiya ug migamit ug marijuana. Siya mibating sad-an sa dihang nagtambong sa tigom ug mibating salingkapaw sa dihang nagsangyaw, busa mihunong siya pagtambong ug pagsangyaw. “Apan,” siya miingon, “wala ko magdahom nga hasolon ko sa akong tanlag.” Siya midugang, “Ang akong hinungog nga pagkinabuhi gidangtag mga upat ka tuig.” Dayon, nakahunahuna siya sa pagbalik sa kamatuoran. Bisag nagtuo nga dili dunggon ni Jehova ang iyang pag-ampo, siya miampo gihapon ug nangayog pasaylo. Wala dangtig napulo ka minutos, ang iyang inahan miabot ug midasig kaniya sa pagtambong pag-usab sa tigom. Siya miadto sa Kingdom Hall ug mihangyo sa usa ka ansiyano nga tun-an siya sa Bibliya. Wala madugay, siya nabawtismohan ug nagpasalamat kang Jehova sa pagluwas sa iyang kinabuhi.

¹¹ Dili ba makapalipay kaayo ang pagbuhat kon unsay matarong? Samtang kita mahigugma sa pagkamatarong ug mas bug-os nga magpadapat niana, mas malipay kita sa pagbuhat kon unsay makapahimuot sa atong langitnong Amahan. Hunahunaa ra gud! Haduol na ang adlaw nga ang tanan mobatig lunlon kalipay tungod sa ilang tanlag; sila hingpit nga magbanaag sa larawan sa Diyos. Busa, atong isilsil sa atong kasingkasing ang gugma sa pagkamatarong ug kana makapalipay kang Jehova.—Prov. 23:15, 16.

12, 13. Sa unsang paagi mabansay nato ang atong tanlag?

¹² Sa unsang paagi mabansay nato ang atong tanlag? Sa dihang magtuon kita sa Kasulatan ug binase-sa-Bibliya nga mga basahon, angayng hinumdoman nga “ang kasingkasing sa matarong nagapamalandong aron sa pagtubag.” (Prov. 15:28) Tagda kon unsa ka mapuslanon kini sa dihang mag-atubang kitag mga isyu bahin sa panarbaho. Kon ang usa ka matang sa trabaho dayag nga supak sa Kasulatan, ang kadaghanan nato mosunod dayon sa direksiyon sa matinumanon ug maalamong ulipon. Apan, kon dili tino ang tubag sa pangutana bahin sa panarbaho, angayng susihon ang mga prinsipyo sa Bibliya nga mapadapat ug mag-ampo bahin niana. * Lakip niana ang prinsipyo nga likayan ang pagsamad sa tanlag sa uban. (1 Cor. 10:31-33) Ilabinang magmahunahunaon  kita sa mga prinsipyong nalangkit sa atong relasyon sa Diyos. Kon si Jehova tinuod kanato, kita mangutana, ‘Makapasakit ba kang Jehova ang akong trabaho?’—Sal. 78:40, 41.

¹³ Sa dihang mangandam alang sa Pagtuon sa Bantayanang Torre o Pagtuon sa Kongregasyon sa Bibliya, angayng hinumdoman nga kinahanglang pamalandongon ang impormasyon nga gitun-an. Badlisan lang ba dayon nato ang tubag sa usa ka pangutana ug modiretso sa sunod parapo? Kanang paagiha sa pagtuon dili makapalalom sa atong gugma sa pagkamatarong o makapahait sa atong tanlag. Aron mahigugma nato ang pagkamatarong, angayng magkugi kita sa pagtuon ug mamalandong sa atong nabasa sa Pulong sa Diyos. Angay kitang manlimbasog aron makakat-on sa paghigugma sa pagkamatarong sa tibuok natong kasingkasing!

Gigutom ug Giuhaw sa Pagkamatarong

14. Unsay buot ni Jehova nga Diyos ug ni Jesu-Kristo nga atong bation bahin sa atong sagradong pag-alagad?

¹⁴ Buot ni Jehova nga Diyos ug ni Jesu-Kristo nga malipay kita sa atong sagradong pag-alagad. Unsay makaamot sa atong kalipay? Siyempre, ang gugma sa pagkamatarong! Sa Wali sa Bukid, si Jesus miingon: “Malipayon kadtong gigutom ug giuhaw sa pagkamatarong, sanglit sila pagabusgon.” (Mat. 5:6) Unsay kahulogan niini alang niadtong nagtinguha sa paghigugma sa pagkamatarong?

15, 16. Sa unsang paagi matagbaw ang espirituwal nga kagutom ug kauhaw?

¹⁵ Ang kalibotan nga atong gipuy-an gimandoan sa usa nga daotan. (1 Juan 5:19) Bisan diin sa kalibotan, atong mabasa sa mantalaan ang mga balita sa grabeng kapintasan ug kabangisan. Ang pagpamintas sa tawo sa iyang isigkaingon makapatugaw sa tawong matarong. (Eccl. 8:9) Kadtong nahigugma kang Jehova nahibalo nga siya lamang ang makatagbaw sa espirituwal nga kagutom ug kauhaw sa mga tawong nagtinguha sa pagkat-on sa pagkamatarong. Sa dili madugay, laglagon ang mga dili-diyosnon, ug busa ang mga nahigugma sa pagkamatarong dili na mobatig kasakitan tungod sa daotang mga buhat sa mga malapason. (2 Ped. 2:7, 8) Pagkamakapahupay unya niana!

¹⁶ Ingong mga alagad ni Jehova ug mga sumusunod ni Jesu-Kristo, kita nahibalo nga “pagabusgon” ang tanang gigutom ug giuhaw sa pagkamatarong. Sila bug-os nga matagbaw sa kahikayan sa Diyos sa bag-ong mga langit ug bag-ong yuta diin “magpuyo ang pagkamatarong.” (2 Ped. 3:13) Busa dili kita angayng mahigawad o matingala nga ang pagkamatarong nahanaw gumikan sa pagpanglupig ug kabangisan niining kalibotan nga gimandoan ni Satanas. (Eccl. 5:8) Si Jehova, ang Labing Hataas, nahibalo kon unsay nagakahitabo ug sa dili madugay luwason niya kadtong nahigugma sa pagkamatarong.

Benepisyo sa Paghigugma sa Pagkamatarong

17. Unsay pipila ka benepisyo sa paghigugma sa pagkamatarong?

¹⁷ Ang Salmo 146:8 nagpasiugda sa talagsaong benepisyo sa pagsubay sa alagianan sa pagkamatarong. Ang salmista miawit: “Si Jehova nahigugma sa mga matarong.” Tiaw mo kana! Ang Soberano sa uniberso nahigugma kanato kay kita nahigugma sa pagkamatarong! Tungod sa gugma ni Jehova, makasalig kita nga itagana niya ang atong materyal nga panginahanglan kon atong unahon ang intereses sa Gingharian. (Basaha ang Salmo 37:25; Proverbio 10:3.) Sa kataposan, ang tibuok yuta pagapuy-an sa mga nahigugma sa pagkamatarong. (Prov. 13:22)  Ang ganti sa kadaghanang alagad sa Diyos tungod sa pagbuhat sa pagkamatarong mao unya ang di-masukod nga kalipay ug walay-kataposang kinabuhi sa matahom nga paraisong yuta. Bisan karon, kadtong nahigugma sa pagkamatarong sa Diyos gigantihag kalinaw sa hunahuna nga makaamot sa panaghiusa sa ilang pamilya ug sa kongregasyon.—Filip. 4:6, 7.

18. Unsay padayon natong buhaton samtang nagpaabot sa adlaw ni Jehova?

¹⁸ Samtang nagpaabot kita sa dakong adlaw ni Jehova, kinahanglang magpadayon kita sa pagpangita sa iyang pagkamatarong. (Sof. 2:2, 3) Busa, atong ipasundayag ang tim-os nga gugma alang sa matul-id nga mga dalan ni Jehova. Kana naglakip sa pagsul-ob sa “panagang sa dughan sa pagkamatarong” aron mapanalipdan ang atong simbolikong kasingkasing. Kinahanglang huptan usab nato ang maayong tanlag—nga makapalipay kanato ug sa atong Diyos.—Prov. 27:11.

19. Unsay determinado natong buhaton, ug unsay hisgotan sa sunod artikulo?

¹⁹ Ang ‘mga mata ni Jehova nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.’ (2 Cron. 16:9) Makapahupay gayod kana samtang atong ginabuhat ang matarong bisan pa sa nag-usbaw nga kawalay-kasegurohan, kabangis, ug pagkadaotan niining gubot nga kalibotan! Tinuod, ang daghang katawhan nga nahimulag sa Diyos dili makasabot sa atong matarong nga mga dalan. Apan makabaton kitag daghang benepisyo kon sundon ang pagkamatarong ni Jehova. (Isa. 48:17; 1 Ped. 4:4) Busa, uban ang bug-os nga kasingkasing, magmadeterminado kita nga padayong higugmaon ug buhaton ang pagkamatarong. Apan ang pagbaton ug bug-os nga kasingkasing naglakip usab sa pagdumot sa pagkamalapason. Ang sunod artikulo magpakita kon unsay kahulogan niini.

[Footnote]

Unsay Imong Tubag?

• Nganong ang pagpabili sa lukat gikinahanglan sa paghigugma sa pagkamatarong?

• Nganong kinahanglang magsul-ob kita sa “panagang sa dughan sa pagkamatarong”?

• Sa unsang paagi mabansay nato ang atong tanlag?

[Mga Pangutana sa Pagtuon]

[Hulagway sa panid 26]

Ang nabansay nga tanlag makatabang sa pagsulbad sa mga isyu bahin sa panarbaho