Ayaw Palimbong sa Sayop nga Pangatarongan

“UNSA kining imong gibuhat?” Ang Diyos nangutana kang Eva human siya mokaon sa gidiling bunga. “Ang halas—kini naglimbong kanako ug busa ako mikaon,” siya mitubag. (Gen. 3:13) Si Satanas, ang malinglahong halas nga nagdani kaniya sa pagsupak sa Diyos, gitawag sa ulahi nga “orihinal nga halas, . . . nga nagpahisalaag sa tibuok gipuy-ang yuta.”—Pin. 12:9.

Kini nga asoy sa Genesis naghubit kang Satanas ingong tiglingla, nga nagsabwag ug kabakakan aron malimbongan ang dili mabinantayon. Si Eva nalingla gayod. Apan, dili ta angayng maghunahuna nga si Satanas lang ang makapahisalaag kanato. Ang Bibliya nagpasidaan usab sa kapeligrohan sa ‘paglimbong sa atong kaugalingon pinaagi sa bakak nga pangatarongan.’—Sant. 1:22.

Daw imposible nga malimbongan nato ang atong kaugalingon. Apan, may katuyoan ang Diyos sa pagpasidaan kanato. Busa atong tagdon kon sa unsang paagi mahimong malimbongan nato ang atong kaugalingon ug unsang sayop nga pangatarongan ang makapahisalaag kanato. Usa ka pananglitan sa Bibliya ang makatabang kanato.

Leksiyon sa Paglimbong sa Kaugalingon

Sa mga 537 W.K.P., si Ciro nga Bantogan sa Persia nagmando nga papaulion ang binihag nga mga Hudiyo sa Babilonya ngadto sa Jerusalem ug tukoron pag-usab ang templo. (Esd. 1:1, 2) Pagkasunod tuig, sumala sa katuyoan ni Jehova, ilang gitukod ang pundasyon sa bag-ong templo. Ang mga Hudiyo nalipay ug nagdayeg kang Jehova kay gipanalanginan ang pagsugod niining hinungdanong proyekto. (Esd. 3:8, 10, 11) Apan wala madugay, gisupak ang ilang pagtukod ug sila nangaluya. (Esd. 4:4) Mga 15 ka tuig human sa ilang pagbalik, ang kagamhanan sa Persia nagdili sa tanang pagpanukod sa Jerusalem. Miabot sa Jerusalem ang mga opisyales sa rehiyon ug “gipahunong [ang mga Hudiyo] pinaagig kusog sa hinagiban.”—Esd. 4:21-24.

Tungod sa maong pagbabag, sayop nga nangatarongan ang mga Hudiyo. “Ang panahon wala pa moabot, ang panahon sa pagtukod sa balay ni Jehova,” sila miingon sa ilang kaugalingon. (Hag. 1:2) Ilang gihunahuna nga dili pa gusto sa Diyos nga matukod dayon ang templo. Inay mangitag paagi sa pagtuman sa kabubut-on sa Diyos, ilang gihunong ang pagtukod sa templo ug nagpokus hinuon sa pagpanindot sa ilang mga balay. Si propeta Haggeo nagsaway kanila: “Panahon na ba alang kaninyo nga kamo magapuyo sa inyong mga balay nga plinigohan, samtang [ang templo ni Jehova] guba?”—Hag. 1:4.

Unsang leksiyon ang atong makat-onan? Tungod sa sayop nga panghunahuna bahin sa panahon nga gitakda sa Diyos, kita mahimong mawad-ag pagpabili sa espirituwal nga mga buluhaton ug magpokus na hinuon sa personal nga mga interes. Sa pag-ilustrar, handurawa nga moabotay ang imong mga bisita. Lagmit mapuliki ka sa pagpangandam alang sa ilang pag-abot. Apan, nakadawat kag mensahe nga malangan ang imong mga bisita. Mohunong ka ba sa pagpangandam?

Hinumdomi nga si Haggeo ug Zacarias nagpahinumdom sa mga Hudiyo nga gusto gihapon ni Jehova nga tukoron ang templo sa walay langan. “Magmalig-on, kamong tanang katawhan sa yuta, . . . ug magtrabaho kamo,” si Haggeo miawhag. (Hag. 2:4) Kinahanglan nilang ipadayon ang pagtukod sa templo, nga  mosalig sa tabang sa espiritu sa Diyos. (Zac. 4:6, 7) Kini ba nga pananglitan makatabang nato nga malikayan ang sayop nga konklusyon bahin sa adlaw ni Jehova?—1 Cor. 10:11.

Pulihig Maalamong Pangatarongan ang Sayop nga Pangatarongan

Sa ikaduhang sulat ni apostol Pedro, iyang gihatagag pagtagad ang gitakdang panahon ni Jehova sa pagtukod sa “bag-ong mga langit ug usa ka bag-ong yuta.” (2 Ped. 3:13) Siya miingon nga ang pipila ka mabiaybiayon nagpatunghag pagduhaduha kon ang Diyos ba mangilabot sa kalihokan sa mga tawo. Sila nangatarongan nga wala ray mahitabo, nga ang ‘tanang butang nagpadayon nga mao ra gayod sukad sa sinugdan sa kalalangan.’ (2 Ped. 3:4) Gisupak ni Pedro ang maong sayop nga pangatarongan. Siya misulat: “Ginapukaw ko ang inyong tin-awng mga gahom sa panghunahuna agig usa ka pahinumdom.” Iyang gipahinumdoman ang mga isigka-Kristohanon nga sayop ang mga mabiaybiayon. Ang Diyos kaniadto nangilabot sa kalihokan sa katawhan, nga nagpahinabog lunop sa tibuok yuta.—2 Ped. 3:1, 5-7.

Si Haggeo sa susama nag-awhag sa naluyang mga Hudiyo niadtong 520 W.K.P. Siya mitambag: “Palandonga ang inyong mga dalan.” (Hag. 1:5, Ang Balaang Kasulatan) Aron matukmod sa paghunahuna, iyang gipahinumdoman ang iyang isigkamagsisimba sa mga katuyoan ug saad sa Diyos sa Iyang katawhan. (Hag. 1:8; 2:4, 5) Wala madugay human niana, gipadayon ang pagtukod—bisag gidili kadto. Sa makausa pa, ang mga magsusupak misulay sa pagpahunong sa proyekto, apan wala sila molampos. Ang pagdili giwagtang, ug sa lima ka tuig natapos ang templo.—Esd. 6:14, 15; Hag. 1:14, 15.

Pagpamalandong sa Atong mga Dalan

Posible ba nga mahisama kita sa mga Hudiyo sa adlaw ni Haggeo, nga maluya kon motungha ang mga kalisdanan? Kon mahitabo kana, lagmit dili na kita magmasiboton sa pagsangyaw sa maayong balita. Apan, unsa kahay makapaluya kanato? Tingali nag-antos kita sa inhustisya niining kalibotana. Hunahunaa si Habacuc, kinsa nangutana: “Hangtod kanus-a ako magpakitabang kanimo una ka mamati, una ka magluwas kanamo gikan sa kapintasan?” (Hab. 1:2, Today’s English Version) Tungod sa gihunahuna sa pipila nga pagkalangan, ang usa ka Kristohanon mahimong dili na mobati nga dinalian ang buluhaton ug himoong prioridad ang pagbatog komportableng kinabuhi. Posible ba nga mahitabo kana kanimo? Kon atong sundon ang maong panghunahuna, gilimbongan nato ang atong kaugalingon. Pagkamaalamon nga sundon ang tambag sa Kasulatan nga ‘mamalandong sa atong mga dalan’ ug ‘magpukaw sa atong tin-awng mga gahom sa panghunahuna’! Makapangutana kita, ‘Angay ba kong matingala nga hangtod karon wala pa malaglag kining daotang sistema sa mga butang?’

Yugto nga Gitagna sa Bibliya

Tagda ang mga pulong ni Jesus bahin sa kataposan niining sistema sa mga butang. Ang asoy ni Marcos bahin sa tagna ni Jesus sa kataposang  mga adlaw nagpakita nga si Jesus balikbalik nga nagtambag kanato nga magtukaw. (Mar. 13:33-37) Atong makaplagan ang susamang pasidaan diha sa tagna nga naghubit sa dakong adlaw ni Jehova, ang Armagedon. (Pin. 16:14-16) Nganong balikbalik ang maong pasidaan? Gikinahanglan kana tungod kay sa daw dugay nga paghulat, ang mga tawo basig dili na mobati nga hamubo na ang panahon.

Giilustrar ni Jesus nga kinahanglan kitang magtukaw samtang maghulat sa kataposan sa sistema sa mga butang. Iya kanang gipakasama sa tagbalay kansang balay gilungkab. Unsa untay iyang mahimo aron malikayan kadto? Ang pagtukaw sa tibuok gabii. Gitapos ni Jesus ang maong ilustrasyon pinaagi sa pagtambag kanato: “Pamatud-i . . . ninyo nga kamo andam, tungod kay sa takna nga wala ninyo hunahunaa, ang Anak sa tawo moabot.”—Mat. 24:43, 44.

Gipakita sa maong ilustrasyon nga kinahanglang maghulat kita, bisan sa taastaas nga panahon. Dili ta angay nga sobrang mabalaka nga basig magdugay pa kining daotang sistema kay sa atong gidahom. Dili nato limbongan ang atong kaugalingon pinaagi sa sayop nga pangatarongan nga ‘ang panahon ni Jehova wala pa moabot.’ Kana makapalong sa atong kasibot sa pagsangyaw sa maayong balita sa Gingharian.—Roma 12:11.

Pagwagtang sa Sayop nga Pangatarongan

Bahin sa sayop nga pangatarongan, mapadapat ang prinsipyo sa Galacia 6:7: “Ayaw pagpahisalaag . . . Kay bisan unsay ginapugas sa usa ka tawo, kini usab iyang anihon.” Kon ang usa ka luna dili tamnan, kini tuboag sagbot. Sa susama, kon dili nato pukawon ang atong gahom sa panghunahuna, ang sayop nga pangatarongan mogamot sa atong hunahuna. Pananglitan, basig moingon ta, ‘Moabot man gyod ang adlaw ni Jehova—pero madugaydugay pa tingali.’ Kana moresulta sa pagrelaks-relaks diha sa atong teokratikanhong mga buluhaton. Ngadtongadto, mawala ang atong kasibot sa pagsimba. Nan, dili kita makabantay sa pag-abot sa adlaw ni Jehova.—2 Ped. 3:10.

Apan, ang sayop nga pangatarongan dili makagamot sa hunahuna kon kanunay natong pamatud-an sa atong kaugalingon ang “maayo ug dalawaton ug hingpit nga kabubut-on sa Diyos.” (Roma 12:2) Ang regular nga pagbasa sa Pulong sa Diyos makatabang pag-ayo niining bahina. Ang Kasulatan makapalig-on sa atong kombiksiyon nga si Jehova kanunayng molihok sa gitakdang panahon.—Hab. 2:3.

Ang atong pagtuon, pag-ampo, regular nga pagtambong sa mga tigom, ug pagsangyaw, uban ang mahigugmaong mga buhat, magtabang kanato nga ‘kanunayng maghunahuna sa presensiya ni Jehova.’ (2 Ped. 3:11, 12) Makita ni Jehova ang atong pagkamabinantayon. Si apostol Pablo nagpahinumdom kanato: “Dili kita mohunong sa pagbuhat ug maayo, kay sa takdang panahon kita moani kon kita dili molunga.”—Gal. 6:9.

Dili karon ang panahon nga magpalimbong sa sayop nga pangatarongan nga nalangay ang adlaw ni Jehova. Hinunoa, kini ang panahon nga bug-oson nato ang atong kasingkasing, kay ang adlaw ni Jehova haduol na.

[Hulagway sa panid 4]

Giawhag ni Haggeo ug Zacarias ang mga Hudiyo sa pagtukod

[Hulagway sa panid 5]

Unsay untay mahimo sa tagbalay kon siya nahibalo nga moabot ang kawatan?