Salig Kang Jehova Samtang Nagkaduol ang Kataposan

“Salig kamo kang Jehova sa tanang panahon.”—ISA. 26:4.

1. Unsay kalainan tali sa mga alagad sa Diyos ug sa mga tawo sa kalibotan?

KITA nagkinabuhi sa kalibotan diin minilyon ang wala na mahibalo kon kinsa o unsay saligan, tungod tingali kay may nakapasakit o nakapahigawad nila sa daghang beses. Pagkalahi sa mga alagad ni Jehova! Kay giniyahan sa kaalam sa Diyos, dili gayod nila ibutang ang ilang pagsalig niining kalibotana o sa “mga hamili.” (Sal. 146:3) Hinunoa, ilang gisalig kang Jehova ang ilang kinabuhi ug kaugmaon, kay nahibalo nga Siya nahigugma kanila ug kanunayng nagtuman sa iyang Pulong.—Roma 3:4; 8:38, 39.

2. Sa unsang paagi gipamatud-an ni Josue ang pagkakasaligan sa Diyos?

² Si Josue sa karaang panahon nagpamatuod sa pagkakasaligan sa Diyos. Sa hinapos sa iyang kinabuhi, iyang gisultihan ang mga Israelinhon: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo.”—Jos. 23:14.

3. Unsay gipadayag sa ngalan sa Diyos bahin kaniya?

³ Tumanon ni Jehova ang iyang mga saad, dili lang tungod sa iyang gugma alang sa iyang mga  alagad kondili tungod ug alang sa iyang ngalan. (Ex. 3:14; 1 Sam. 12:22) Bahin sa balaang ngalan, ang pasiuna sa The Emphasized Bible ni J. B. Rotherham naghisgot nga ang ngalan sa Diyos maoy usa ka saad ug nagpadayag sa iyang katakos nga mopahiuyon sa bisan unsang kahimtang aron matuman ang iyang katuyoan. Kini nagpadayag sa iyang pipila ka hiyas ug motabang kanato sa paghinumdom kaniya. Sa maong Ngalan, ang Diyos magmatinumanon sa tanang panahon ug dili gayod niya kini igakaulaw.

4. (a) Unsay giawhag kanato sa Isaias 26:4? (b) Unsay hisgotan niining artikuloha?

⁴ Pangutan-a ang imong kaugalingon: ‘Nailhan ba gyod nako si Jehova aron ako bug-os mosalig kaniya? Segurado ba ko sa akong kaugmaon, kay nahibalo nga kontrolado sa Diyos ang tanan?’ Ang Isaias 26:4 nag-ingon: “Salig kamo kang Jehova sa tanang panahon, kay anaa kang Jah Jehova ang Bato sa mga panahong walay tino.” Tinuod, ang Diyos dili milagrosong mangilabot sa kinabuhi sa mga tawo karon sama sa panagsa niyang gihimo sa panahon sa Bibliya. Bisan pa niana, siya kasaligan sa “tanang panahon” kay siya “ang Bato sa mga panahong walay tino.” Sa unsang paagi ang atong kasaligang Diyos nagtabang sa iyang matinumanong mga magsisimba karon? Atong hisgotan ang tulo ka paagi: Siya magpalig-on kanato sa dihang mangayo kitag tabang sa pagsukol sa tentasyon, magpaluyo kanato sa dihang mag-atubang kitag pagsupak o kawalay-interes, ug magdasig kanato sa dihang daghan kitag gikabalak-an. Samtang atong susihon ang maong mga kahimtang, palandonga kon sa unsang paagi nimo mapalig-on ang imong pagsalig kang Jehova.

Salig sa Diyos sa Dihang Tentalon

5. Sa unsang bahin nga ilabinang masulayan ang atong pagsalig sa Diyos?

⁵ Dali kitang mosalig kang Jehova kon bahin sa iyang saad nga paraiso o pagkabanhaw kay kita nangandoy niana. Apan tingali mas malisdan kitang mosalig kaniya kon bahin sa pagsunod sa iyang moral nga mga sukdanan, nga bug-os kombinsido nga ang pagsunod niana maoy matarong ug nga kana moresulta sa tumang kalipay. Si Haring Solomon nagtambag: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Prov. 3:5, 6) Matikdi ang paghisgot sa “mga dalan” ug “mga alagianan.” Oo, ang atong tibuok nga pagkinabuhi—dili lang ang atong Kristohanong paglaom—angayng magpasundayag sa atong pagsalig sa Diyos. Sa unsang paagi nato ikapakita ang maong pagsalig sa dihang adunay mga tentasyon?

6. Sa unsang paagi nato mapalig-on ang atong determinasyon nga isalikway ang daotang panghunahuna?

⁶ Ang pagpahilayo sa daotan magsugod diha sa hunahuna. (Basaha ang Roma 8:5; Efeso 2:3.) Nan, sa unsang paagi nimo mapalig-on ang imong determinasyon nga isalikway ang daotang panghunahuna? Tagda kining lima ka paagi: 1. Pag-ampo alang sa tabang sa Diyos. (Mat. 6:9, 13) 2. Palandonga ang mga pananglitan sa Bibliya niadtong wala mamati kang Jehova ug niadtong namati. Dayon matikdi kon  unsay ilang gidangatan. * (1 Cor. 10:8-11) 3. Hunahunaa ang mental ug emosyonal nga kaguol nga bation nimo ug sa imong mga minahal tungod sa sala. 4. Hunahunaa kon unsay bation sa Diyos sa dihang ang iyang alagad makahimog seryosong sala. (Basaha ang Salmo 78:40, 41.) 5. Handurawa ang kalipay ni Jehova sa dihang ang iyang maunongong magsisimba mosalikway sa daotan ug mobuhat kon unsay husto, sa publiko man o sa pribado. (Sal. 15:1, 2; Prov. 27:11) Ikaw usab makapakita sa imong pagsalig kang Jehova.

Salig sa Diyos sa Dihang Mag-atubang sa Kawalay-Interes ug Pagsupak

7. Unsang mga pagsulay ang giatubang ni Jeremias, ug unsay iyang gibati usahay?

⁷ Daghang igsoon ang nag-alagad sa lisod kaayong mga teritoryo. Si propeta Jeremias nag-alagad sa susamang kahimtang—magubtanong kataposang mga adlaw sa gingharian sa Juda. Kada adlaw gisulayan ang iyang pagtuo kay matinumanon niyang gimantala ang mensahe sa paghukom sa Diyos. May panahon gani nga ang iyang maunongong sekretaryo nga si Baruk mireklamo nga gikapoy na. (Jer. 45:2, 3) Nahigawad ba si Jeremias? Hinuon, may panahon nga siya naluya. “Tinunglo ang adlaw nga akong natawhan!” siya mituaw. “Nganong migula pa ako gikan sa tagoangkan mismo aron makita ang kahago ug kaguol ug nga ang akong mga adlaw matapos lamang sa kaulawan?”—Jer. 20:14, 15, 18.

8, 9. Uyon sa Jeremias 17:7, 8 ug Salmo 1:1-3, unsay kinahanglang buhaton aron kita padayong magpatunghag maayong bunga?

⁸ Si Jeremias wala mohunong. Siya padayong misalig kang Jehova. Ingong resulta, nasinati sa matinumanong propeta ang katumanan sa mga pulong ni Jehova sa Jeremias 17:7, 8: “Bulahan ang tawo nga lig-on ug lawas nga nagbutang sa iyang pagsalig kang Jehova, ug kansang pagsalig mao si Jehova. Ug siya mahimo gayod nga sama sa usa ka kahoy nga gitanom sa daplin sa mga tubig, nga nagpakuyanap sa iyang mga gamot sa daplin mismo sa sapa; ug dili siya makakita inig-abot sa kainit, hinunoa ang iyang mga dahon molambo gayod. Ug sa tuig sa hulaw siya dili mabalaka, ni siya mohunong sa pagpamunga.”

⁹ Sama sa usa ka mabungahong kahoy nga “gitanom sa daplin sa mga tubig,” si Jeremias ‘wala gayod mohunong sa pagpamunga.’ Wala siya magpaapekto sa mga nagbiaybiay kaniya. Hinunoa, siya miunong sa Tuboran sa nagahatag-ug-kinabuhi nga “tubig” ug nagtuman sa tanang gisugo ni Jehova kaniya. (Basaha ang Salmo 1:1-3; Jer. 20:9) Pagkamaayong panig-ingnan si Jeremias alang kanato, ilabina niadtong nag-alagad sa lisod nga mga teritoryo! Kon kanay imong kahimtang, padayon sa pagsalig kang Jehova, nga motabang kanimo aron makalahutay ka sa “pagpahayag sa dayag sa iyang ngalan.”—Heb. 13:15.

10. Unsang mga panalangin ang atong nabatonan, ug unsay angayng ipangutana sa kaugalingon?

¹⁰ Si Jehova naghatag kanatog daghang butang aron makasagubang kita sa kalisdanan niining kataposang mga adlaw. Usa niana mao ang kompletong Pulong sa Diyos, nga tukmang gihubad sa nagkadaghang pinulongan. Siya nagtagana ug dagayang espirituwal nga pagkaon sa hustong panahon pinaagi sa matinumanon ug maalamong ulipon nga matang. Ug siya nagtagana usab kanatog makapalig-ong panag-ubanay uban sa dakong panon sa isigkamagtutuo panahon sa mga tigom ug asembliya. Gipahimuslan mo ba ang maong mga tagana? Ang tanan nga nagpahimulos niana “managhugyaw sa kalipay tungod sa maayong kahimtang sa kasingkasing.” Apan kadtong wala mamati sa Diyos “managtuaw tungod sa kasakit sa kasingkasing ug . . . motiyabaw tungod sa bug-os nga pagkahugno sa espiritu.”—Isa. 65:13, 14.

Salig sa Diyos sa Dihang Magsagubang ug mga Kabalaka

11, 12. Tungod sa mga problema sa kalibotan, unsay maalamon natong buhaton?

¹¹ Ingon sa gitagna, ang katawhan makasinatig  nagbahabaha nga mga problema. (Mat. 24:6-8; Pin. 12:12) Kon mahitabo ang literal nga baha, ang kasagarang reaksiyon mao ang pagdangop sa mas habog nga dapit o pagsaka sa atop. Sa susama, samtang nagkagrabe ang mga problema sa kalibotan, minilyon ang midangop sa inilang pinansiyal, politikal, o relihiyosong mga institusyon, ingon man sa siyensiya ug teknolohiya. Apan, walay usa niini ang makahatag ug tinuod nga kasegurohan. (Jer. 17:5, 6) Sa laing bahin, ang mga alagad ni Jehova adunay seguradong dangpanan—“ang Bato sa mga panahong walay tino.” (Isa. 26:4) Ang salmista miingon: “[Si Jehova] ang akong bato ug ang akong kaluwasan, ang akong luwas nga hataas nga dapit.” (Basaha ang Salmo 62:6-9.) Sa unsang paagi ang maong Bato mahimong atong dangpanan?

¹² Kita magpabiling suod kang Jehova sa dihang atong sundon ang iyang Pulong, nga sagad sukwahi sa tawhanong kaalam. (Sal. 73:23, 24) Pananglitan, ang mga tawong naimpluwensiyahan sa tawhanong kaalam mahimong moingon: ‘Usa lang ang imong kinabuhi; pahimusli kana.’ ‘Pagbaton ug maayong karera.’ ‘Pangitag daghang kuwarta.’ ‘Palit ani, palit ana.’ ‘Biyahe; adto sa lainlaing lugar.’ Sa laing bahin, ang diyosnong kaalam nahiuyon niini nga tambag: “Kadtong nagagamit sa kalibotan manig-ingon kanilang wala magagamit niini sa bug-os; kay ang talan-awon niining kalibotana nagakausab.” (1 Cor. 7:31) Sa susama, si Jesus nagtambag kanato sa pag-una kanunay sa intereses sa Gingharian ug sa ingon magtigom ug ‘mga bahandi sa langit,’ diin kini dili makawat.—Mat. 6:19, 20.

13. Maylabot sa 1 Juan 2:15-17, unsay angay natong ipangutana sa kaugalingon?

¹³ Ang imo bang tinamdan bahin sa “kalibotan” ug sa “mga butang nga anaa sa kalibotan” nagpasundayag sa imong bug-os nga pagsalig sa Diyos? (1 Juan 2:15-17) Mas tilinguhaon ug importante ba kanimo ang espirituwal nga mga bahandi ug pribilehiyo sa pag-alagad kay sa mga butang nga ginatanyag sa kalibotan? (Filip. 3:8) Nanlimbasog ka ba nga mahuptan ang ‘yano nga mata’? (Mat. 6:22) Siyempre, dili buot sa Diyos nga ikaw mahimong iresponsable, ilabina kon ikaw ulo sa pamilya. (1 Tim. 5:8) Apan siya nagdahom nga ang iyang mga alagad bug-os nga mosalig kaniya—dili sa himalatyong kalibotan ni Satanas.—Heb. 13:5.

14-16. Sa unsang paagi nakabenepisyo ang pipila sa paghupot ug ‘yano nga mata’ ug pag-una sa intereses sa Gingharian?

¹⁴ Tagda ang pananglitan ni Richard ug Ruth nga may tulo ka anak. “Gibati ko nga mas dako pa ang akong mahimo sa pag-alagad kang Jehova,” miingon si Richard. “Hamugaway ang akong kinabuhi apan daw salin lang ang ginahatag ko kang Jehova. Human sa pag-ampo ug pagpamalandong sa among kahimtang, nagkasabot mi ni Ruth nga hangyoon ang akong superbisor nga upat na lang ka adlaw ko motrabaho kada semana—bisag lisod niadto ang ekonomiya. Giaprobahan ang akong hangyo, ug gisugdan ko ang bag-ong eskedyul sulod sa usa ka bulan.” Unsa nay gibati karon ni Richard?

¹⁵ “Namenosan ug 20 porsiyento ang akong suweldo,” matod niya, “apan karon duna koy ekstrang 50 ka adlaw sa usa ka tuig sa pagpakig-uban sa akong pamilya ug sa pagbansay sa mga bata. Nadoble ang akong oras sa pagsangyaw,  natriple ang akong gidumalahag pagtuon sa Bibliya, ug mas nakapanguna ko sa kongregasyon. Kay mas daghan na kog panahon alang sa mga bata, si Ruth makaoksilyare payunir matag karon ug unya. Determinado ko nga padayong masunod ang maong eskedyul.”

¹⁶ Si Roy ug Petina, nga may menor-de-edad pa nga anak babaye, nagpakunhod sa panahon sa ilang trabaho aron makapayunir. “Tulo ra ka adlaw kada semana ang akong trabaho,” matod ni Roy, “ug si Petina duha ka adlaw. Gikan sa usa ka balay, kami mibalhin sa gamayng apartment, nga mas daling maatiman. Sa wala pa miy anak, kami mga payunir, ug wala gyod mawala ang among tinguha sa pagpayunir. Busa sa nanagko na ang among mga anak, kami mibalik sa pagpayunir. Dili kabayrag salapi ang mga panalangin nga among nadawat.”

Itugot nga “ang Kalinaw sa Diyos” Magbantay sa Inyong Kasingkasing

17. Tungod sa kawalay-kasegurohan sa kinabuhi, sa unsang paagi ang Kasulatan nakahupay kanimo?

¹⁷ Walay usa kanato ang nahibalo kon unsay mahitabo ugma, kay ang “panahon ug ang wala damhang panghitabo” modangat kanatong tanan. (Eccl. 9:11) Apan kana dili angayng maghanaw sa atong kalinaw sa hunahuna karon, ingon sa nasinati niadtong walay suod nga relasyon sa Diyos. (Mat. 6:34) Si apostol Pablo misulat: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.”—Filip. 4:6, 7.

18, 19. Sa unsang mga paagi ang Diyos naghupay kanato? Iilustrar.

¹⁸ Daghang igsoon nga nakasinatig mga pagsulay ang nakabatog kalinaw sa hunahuna gikan kang Jehova. Ang usa ka sister miingon: “Balikbalik kong gihadlok sa usa ka siruhano aron magpaabonog dugo. ‘Unsa gud ning binuang nga dili ka magpaabonog dugo?’ siya miingon kanako. Niadto ug sa ubang higayon hilom kong miampo kang Jehova, ug nakabaton kog kalinaw sa hunahuna. Ako nalig-on sama sa usa ka bato. Bisag luya kay ubos ang akong dugo, nakadepensa ko sa akong baroganan base sa Kasulatan.”

¹⁹ Ang Diyos usahay motaganag gikinahanglang tabang pinaagi sa makapahupayng mga pulong sa isigkamagtutuo o sa espirituwal nga pagkaon sa hustong panahon. Lagmit nakadungog ka nga miingon ang usa ka igsoon: “Kining artikuloha mao gyod ang akong gikinahanglan. Gisulat gyod ni para nako!” Oo bisag unsay atong kahimtang o panginahanglan, ipakita ni Jehova ang iyang gugma kanato kon kita mosalig kaniya. Total, kita iyang “mga karnero,” ug kita gitawag sa iyang ngalan.—Sal. 100:3; Juan 10:16; Buh. 15:14, 17.

20. Nganong ang mga alagad ni Jehova magapuyo sa kasegurohan sa dihang laglagon ang kalibotan ni Satanas?

²⁰ Sa haduol na nga “adlaw sa mabangis nga kasuko ni Jehova,” ang tanang butang nga gisaligan sa kalibotan ni Satanas pagalaglagon. Ang bulawan, plata, ug ubang katigayonan dili makapanalipod kanato. (Sof. 1:18; Prov. 11:4) Ang bugtong dangpanan mao ang atong “Bato sa mga panahong walay tino.” (Isa. 26:4) Busa ipasundayag nato ang bug-os nga pagsalig kang Jehova pinaagi sa pagsunod sa iyang matarong nga kasugoan, pagmantala sa mensahe sa Gingharian bisan pag makaatubang ug kawalay-interes o pagsupak, ug pagtugyan sa tanan natong kabalaka kaniya. Samtang kita nagbuhat niini, kita “magapuyo sa kasegurohan ug dili matugaw sa kalisang sa katalagman.”—Prov. 1:33.

[Footnote]

Makapatin-aw Ka Ba?

Sa unsang paagi kita makasalig sa Diyos

• sa dihang tentalon?

• sa dihang mag-atubang ug kawalay-interes o pagsupak?

• sa dihang magsagubang ug mga kabalaka?

[Mga Pangutana sa Pagtuon]

[Hulagway sa panid 13]

Ang pagsunod sa mga sukdanan sa Diyos motultol sa kalipay

[Hulagway sa panid 15]

‘Si Jehova ang Bato sa mga panahong walay tino’