Giila Mo ba ang Ebidensiya sa Paggiya sa Diyos?

ANG mga Israelinhon ug mga Ehiptohanon wala pa sukad makakitag sama niadto. Sa paggula sa mga Israelinhon sa Ehipto, usa ka haligi nga panganod ang nag-uban kanila sa maadlaw ug usa ka haligi nga kalayo sa magabii. Pagkakahibulongan! Apan diin kadto gikan? Unsay katuyoan niadto? Ug, paglabay sa mga 3,500 ka tuig, unsay atong makat-onan sa panghunahuna sa Israel bahin sa “haliging kalayo ug sa panganod”?—Ex. 14:24.

Ang Pulong sa Diyos nagpadayag sa tinubdan ug katuyoan sa haligi, nga nag-ingon: “Si Jehova nag-una kanila sa maadlaw diha sa usa ka haligi nga panganod aron sa pagtultol kanila sa agianan, ug sa magabii diha sa usa ka haligi nga kalayo aron sa paghatag kanila ug kahayag sa paglakaw sa maadlaw ug sa magabii.” (Ex. 13:21, 22) Gigamit ni Jehova nga Diyos ang haligi nga kalayo ug panganod aron giyahan ang iyang katawhan sa paggawas sa Ehipto ug latas sa kamingawan. Kinahanglang andam silang mosunod niana. Sa dihang ang migukod nga kasundalohan sa Ehipto hapit nang moatake sa katawhan sa Diyos, ang haligi nagpataliwala sa duha ka grupo, nga nagpanalipod sa mga Israelinhon. (Ex. 14:19, 20) Bisag ang haligi wala magtultol sa laktod nga dalan, ang pagsunod sa giya niana maoy bugtong paagi aron makaabot ang Israel sa Yutang Saad.

Ang haligi maoy pasalig sa katawhan sa Diyos nga si Jehova nag-uban kanila. Kadto naghawas kang Jehova, ug usahay siya nakigsulti kanila gikan niini. (Num. 14:14; Sal. 99:7) Dugang pa, ang panganod nagpaila nga si Moises ang gipili ni Jehova nga manguna sa nasod. (Ex. 33:9) Sa susama, ang kataposang narekord nga pagpakita sa panganod nagpamatuod nga si Josue ang gitudlo ni Jehova nga kapuli ni Moises. (Deut. 31:14, 15) Sa pagkatinuod, ang malamposong panaw sa mga Israelinhon nagdepende sa ilang pag-ila sa ebidensiya sa paggiya sa Diyos ug sa pagsunod niana.

Wala na Nila Pabilhi ang Ebidensiya

Sa dihang unang nakita sa mga Israelinhon ang haligi, seguradong nahingangha sila. Apan ikasubo nga bisag kanunay silang nakakita sa milagro, kadto wala makatukmod kanila nga padayong mosalig kang Jehova. Daghang higayon nga gisalikway nila ang paggiya sa Diyos. Sa dihang gigukod sila sa kasundalohan sa Ehipto, wala sila mosalig sa gahom ni Jehova sa pagluwas. Hinunoa, gibasol nila ang alagad sa Diyos nga si Moises nga kono gidala sila didto aron mangamatay. (Ex. 14:10-12) Human sila maluwas latas sa Pulang Dagat, sila nagbagulbol batok kang Moises, Aaron, ug kang Jehova tungod kay naghunahuna nga wala silay makaon ug mainom. (Ex. 15:22-24; 16:1-3; 17:1-3, 7) Ug pipila ka semana human niana, ilang gipugos si Aaron sa paghimog bulawan nga nating baka. Tiaw mo kana! Sa usa ka bahin sa kampo, ang mga Israelinhon nakakita sa haliging kalayo ug panganod—ang dakong ebidensiya sa Usa nga nagpagawas kanila gikan sa Ehipto—ug duol ra didto, sila misugod sa pagsimbag way-kinabuhing idolo, nga nag-ingon: “Kini mao ang imong Diyos, Oh Israel, nga nagpagawas kanimo gikan sa yuta sa Ehipto.” Pagkadili-matinahorong mga buhat!—Ex. 32:4; Neh. 9:18.

Ang rebelyosong mga buhat sa Israel nagpasundayag sa ilang pagsalikway sa giya ni Jehova. Ang ilang espirituwal nga panglantaw mao ang hinungdan sa problema, dili ang ilang literal nga panan-aw. Sila nakakita sa haligi, apan wala na nila pabilhi ang kahulogan niadto.  Bisag ang ilang mga buhat ‘nakapasakit sa Balaang Usa sa Israel,’ si Jehova maluluy-ong naggiya kanila pinaagi sa haligi hangtod ang Israel nakaabot sa Yutang Saad.—Sal. 78:40-42, 52-54; Neh. 9:19.

Tan-awa ang Ebidensiya sa Paggiya sa Diyos Karon

Sa modernong panahon usab, si Jehova kanunayng naggiya sa iyang katawhan. Ingon nga wala pasagdi ni Jehova ang mga Israelinhon nga mangita sa ilang kaugalingong dalan, kita usab wala pasagdi nga mangita sa atong kaugalingong dalan paingon sa gisaad nga bag-ong kalibotan. Si Jesu-Kristo ang gitudlo nga Lider sa kongregasyon. (Mat. 23:10; Efe. 5:23) Siya nagdelegar ug awtoridad sa matinumanong ulipon nga matang nga gilangkoban sa dinihogan-sa-espiritu nga matinumanong mga Kristohanon. Sa baylo, ang maong ulipon nga matang, nagtudlog mga magtatan-aw sa Kristohanong kongregasyon.—Mat. 24:45-47; Tito 1:5-9.

Sa unsang paagi nato matino kon kinsa ang matinumanong ulipon, o piniyalan nga matang? Matikdi ang paghubit mismo ni Jesus: “Kinsa sa pagkatinuod ang matinumanong piniyalan, ang usa nga maalamon, kinsa itudlo sa iyang agalon sa pagdumala sa iyang pundok sa mga tig-alagad aron sa pagpadayon paghatag kanila sa ilang taganang pagkaon sa hustong panahon? Malipayon kanang ulipona, kon sa pag-abot sa iyang agalon makaplagan siya nga nagabuhat sa ingon!”—Luc. 12:42, 43.

Busa, ang piniyalang matang maoy ‘matinumanon,’ nga dili gayod mobiya kang Jehova, kang Jesus, sa kamatuoran sa Bibliya, o sa katawhan sa Diyos. Kay “maalamon,” ang piniyalan nagpakitag maayong panghukom sa pagdumala sa hinungdanong buluhaton sa pagsangyaw sa “maayong balita sa gingharian” ug paghimog “mga tinun-an sa katawhan sa tanang kanasoran.” (Mat. 24:14; 28:19, 20) “Sa hustong panahon,” ang piniyalan masinugtanong nagtagana sa makapahimsog nga espirituwal nga pagkaon. Ang pag-uyon ni Jehova madayag diha sa pag-uswag sa gidaghanon sa mga alagad, sa paggiya diha sa importanteng mga desisyon, sa tin-awng pagsabot sa mga kamatuoran sa Bibliya, sa mga panalipod batok sa mga kaaway, ug sa kalinaw sa hunahuna ug kasingkasing.—Isa. 54:17; Filip. 4:7.

Sunda ang Paggiya sa Diyos

Sa unsang paagi nato ikapakita nga atong gipabilhan ang giya sa Diyos? Si apostol Pablo miingon: “Magmasinugtanon kamo sa mga nagapanguna kaninyo ug magmapinasakopon.” (Heb. 13:17) Dili kanunayng sayon ang pagbuhat niana. Sa pag-ilustrar: Ibutang ta nga ikaw Israelinhon sa panahon ni Moises. Human sa dugaydugay nga pagbaktas, ang panganod mipondo. Unsa ka dugay ang pagpondo? Usa ka adlaw? Usa ka semana? Daghang bulan? Maghunahuna ka tingali, ‘Habwaon ba nako ang tanan nakong gamit?’ Una, ipagawas ra tingali nimo ang kinahanglanong mga butang. Apan paglabay sa pipila ka adlaw, kay gikapoy na sa pagpangukay sa imong mga butang, imo nang habwaon ang tanan. Apan sa hapit ka nang mahuman niana, imong nakita nga mipataas ang haligi—ug kinahanglang manghipos ka na sab! Dili kana sayon. Bisan pa niana, ang mga Israelinhon kinahanglang “mobiya dayon.”—Num. 9:17-22.

Nan, unsay atong reaksiyon sa dihang makadawat kitag instruksiyon gikan sa Diyos? Maningkamot ba ta nga ipadapat “dayon” kana? O magpadayon sa pagbuhat sa atong naandan? Pamilyar ba ta sa bag-ong instruksiyon bahin sa pagdumalag pagtuon sa Bibliya, pagsangyaw sa mga tawong langyaw ug pinulongan, regular nga pagpakig-ambit sa pamilyahanong pagsimba, pagkooperar sa Hospital Liaison Committee, ug sa hustong panggawi panahon sa kombensiyon? Gipabilhan usab nato ang paggiya sa Diyos kon modawat kitag tambag. Sa paghimog importanteng mga desisyon, dili kita mosalig sa kaugalingong kaalam kondili modangop kita kang Jehova ug sa iyang organisasyon alang sa giya. Ug sama sa usa ka bata nga mangitag proteksiyon sa iyang ginikanan  panahon sa bagyo, kita usab mangitag proteksiyon sa organisasyon ni Jehova sa dihang ang samag-bagyong mga problema mohapak kanato.

Siyempre, kadtong nagapanguna sa yutan-ong bahin sa organisasyon sa Diyos dili hingpit—sama kang Moises. Bisan pa niana, ang haligi nagsilbing ebidensiya nga siya gitudlo ug giuyonan sa Diyos. Matikdi usab nga dili ang matag Israelinhon ang magbuot kon kanus-a sila mobiya. Hinunoa, ang katawhan mobiya “sumala sa sugo ni Jehova pinaagi kang Moises.” (Num. 9:23) Busa si Moises, kinsa gigamit sa Diyos sa pagtultol sa katawhan, maoy lagmit nagpahibalo kanila kon kanus-a mobiya.

Karon, ang piniyalan ni Jehova naghatag ug tin-awng pahibalo sa dihang panahon na sa paglihok. Sa unsang paagi? Pinaagi sa mga artikulo sa Bantayanang Torre ug Atong Ministeryo sa Gingharian, bag-ong mga publikasyon, ug mga pakigpulong sa asembliya ug kombensiyon. Ang instruksiyon ipahibalo usab sa mga kongregasyon pinaagi sa mga nagapanawng magtatan-aw, mga sulat, o mga pagbansay sa mga brader nga may katungdanan sa kongregasyon.

Tin-aw ba nimong nailhan ang ebidensiya sa paggiya sa Diyos? Gigamit ni Jehova ang iyang organisasyon aron giyahan ang iyang katawhan latas sa kataposang mga adlaw niining samag kamingawan nga daotang kalibotan ni Satanas. Ingong resulta, atong natagamtam ang panaghiusa, gugma, ug kasegurohan.

Sa dihang ang Israel nakaabot sa Yutang Saad, si Josue miingon: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo.” (Jos. 23:14) Sa susama, ang katawhan sa Diyos karon seguradong makaabot sa gisaad nga bag-ong kalibotan. Apan, ang atong pagkaatua didto nagdepende sa atong mapainubsanong pagsunod sa paggiya sa Diyos. Busa, hinaot nga padayon kitang moila sa ebidensiya sa paggiya ni Jehova!

[Mga hulagway sa panid 5]

Ang organisasyon ni Jehova nagagiya kanato karon

Mga giluwatan sa kombensiyon

Teokratikanhong tunghaan

Pagbansay sa dili pa magsangyaw