Ang Bug-os nga Pagsalig Kang Jehova Maghatag ug Kasegurohan
Ang Bug-os nga Pagsalig Kang Jehova Maghatag ug Kasegurohan
“Si Jehova magpatalinghog sa dihang magatawag ako kaniya.”—SAL. 4:3.
1, 2. (a) Unsang peligrosong kahimtang ang giatubang ni David? (b) Unsang mga salmo ang atong hisgotan?
TAASTAAS nang panahon nga si Haring David nagmando sa Israel, apan siya karon nag-atubang ug peligrosong kahimtang. Ang iyang anak nga si Absalom nagdeklarar sa iyang kaugalingon nga hari mao nga si David napugos sa pagbiya sa Jerusalem. Giluiban usab siya sa iyang sinaligang magtatambag, ug karon, uban sa pipila ka maunongong higala, siya mitungas sa Bukid sa Olibo nga naghilak ug nagtiniil. Dugang pa, si Simei, nga sakop sa usa ka banay sa balay ni Haring Saul, nagbato ug nagsaliyab ug abog kang David samtang nagtunglo kaniya.—2 Sam. 15:30, 31; 16:5-14.
2 Palabihon na lang kaha ni David nga mamatay tungod sa kaguol ug kaulawan? Dili, kay siya misalig kang Jehova. Dayag kini sa ikatulong Salmo, nga gikomposo ni David nga nag-asoy sa iyang kahimtang. Siya usab ang misulat sa ikaupat nga Salmo. Ang maong mga salmo nagpahayag nga dunggon ug tubagon gayod sa Diyos ang mga pag-ampo. (Sal. 3:4; 4:3) Kini nagpasalig usab kanato nga si Jehova magauban sa iyang matinumanong mga alagad adlaw ug gabii, nga magapaluyo ug magahatag kanilag kalinaw ug kasegurohan. (Sal. 3:5; 4:8) Busa, atong hisgotan kining duha ka salmo ug susihon kon sa unsang paagi kini mohatag ug kasegurohan ug modasig kanato nga mosalig sa Diyos.
‘Daghan ang Motindog Batok Kanato’
3. Ingon sa gipaila sa Salmo 3:1, 2, unsay kahimtang ni David?
3 “Ang kasingkasing sa mga tawo sa Israel nagpaluyo na kang Absalom,” matod sa usa ka mensahero. (2 Sam. 15:13) Kay natingala kon sa unsang paagi nakuha ni Absalom ang maong pagpaluyo, si David nangutana: “Oh Jehova, nganong midaghan man ang akong mga kaaway? Nganong daghan man ang mitindog batok kanako? Daghan ang nagaingon bahin sa akong kalag: ‘Walay kaluwasan alang kaniya pinaagi sa Diyos.’” (Sal. 3:1, 2) Daghang Israelinhon ang nagtuo nga dili luwason ni Jehova si David gikan kang Absalom ug sa iyang mga tigpaluyo.
4, 5. (a) Sa unsa nakaseguro si David? (b) Unsay kahulogan sa ekspresyong “ang Usa nga moisa sa akong ulo”?
4 Apan si David wala mahadlok kay siya bug-os misalig sa Diyos. Siya miawit: “Apan ikaw, Oh Jehova, maoy usa ka taming nga nagalibot kanako, akong himaya ug ang Usa nga moisa sa akong ulo.” (Sal. 3:3) Nakaseguro si David nga panalipdan siya ni Jehova ingon nga ang taming magpanalipod sa usa ka sundalo. Oo, ang tigulang nga hari mikalagiw, nga nagtabon sa iyang ulo ug nagduko tungod sa kaulawan. Apan ibalik sa Labing Hataas ang kanhing madungganong kahimtang ni David. Tabangan siya ni Jehova sa pagtindog nga tul-id aron maisa pag-usab ang iyang ulo. Si David masaligon nga ang Diyos motubag kaniya. Susama ba niana ang imong pagsalig kang Jehova?
5 Ang mga pulong ni David nga “ang Usa nga moisa sa akong ulo” nagpaila nga si Jehova motabang kaniya. Ang Bag-ong Maayong Balita Biblia nag-ingon: “Apan ikaw, O GINOO, ang taming ko kanunay sa mga katalagman; gihatagan mo akog kadaogan ug gipahiuli mo kanako ang kadasig.” Bahin sa ekspresyong “ang Usa nga moisa sa akong ulo,” usa ka reperensiya nag-ingon: “Sa dihang iisa sa Diyos . . . ang ‘ulo’ sa usa, Siya maghatag ug paglaom ug kasegurohan sa maong tawo.” Kay napugos sa pagbiya sa iyang trono, may katarongan si David nga maguol. Apan, ang ‘pag-isa sa iyang ulo’ moresulta sa pagkahibalik sa iyang kaisog, kompiyansa, ug bug-os nga pagsalig sa Diyos.
‘Si Jehova Motubag!’
6. Nganong nakaingon si David nga ang iyang pag-ampo gidungog gikan sa balaang bukid ni Jehova?
6 Kay may pagsalig kang Jehova ug nahibalo nga Siya motubag sa mga pag-ampo, si David mipadayon: “Sa akong tingog motawag ako kang Jehova, ug siya motubag kanako gikan sa iyang bukid nga balaan.” (Sal. 3:4) Agig pagtuman sa sugo ni David, ang arka sa pakigsaad, nga nagsimbolo sa presensiya sa Diyos, gidala ngadto sa Bukid Zion. (Basaha ang 2 Samuel 15:23-25.) Busa, haom ang pag-ingon ni David nga ang iyang pag-ampo gidungog gikan sa balaang bukid ni Jehova.
7. Nganong si David wala mahadlok?
7 Kay nakaseguro nga dili kawang nga moampo sa Diyos, si David wala mahadlok. Hinunoa, siya miawit: “Kon bahin kanako, ako mohigda aron ako makatulog; ako tino nga mahigmata, kay si Jehova nagpadayon sa pagpaluyo kanako.” (Sal. 3:5) Bisan sa magabii, nga sagad moatake ang kaaway, si David dili mahadlok nga matulog. Siya nakaseguro nga siya makamata, kay sumala sa iyang kasinatian ang Diyos motabang gayod kaniya. Mobati usab kita niana kon mosubay kita “sa mga dalan ni Jehova” ug dili mobiya kaniya.—Basaha ang 2 Samuel 22:21, 22.
8. Sa unsang paagi gipakita sa Salmo 27:1-4 nga si David misalig sa Diyos?
8 Ang kompiyansa ug bug-os nga pagsalig ni David sa Diyos dayag diha sa lain pa niyang salmo, diin nasulat kining mga pulonga: “Si Jehova mao ang akong kahayag ug ang akong kaluwasan. Kinsa man ang akong kahadlokan? Si Jehova mao ang salipdanan sa akong kinabuhi. Kinsa man ang akong kalisangan? . . . Bisan pag ang mga nagkampo magpatindog ug tolda batok kanako, ang akong kasingkasing dili mahadlok. . . . Usa ka butang ang gipangayo ko kang Jehova—kini ang akong pagapangitaon, nga makapuyo ako sa balay ni Jehova sa tanang adlaw sa akong kinabuhi, aron sa pagtan-aw sa pagkakahimut-anan ni Jehova ug sa pagtan-aw nga mapabilhon sa iyang templo.” (Sal. 27:1-4) Kon kana usab ang imong pagbati ug kon itugot sa imong kahimtang, ikaw regular nga motambong sa mga tigom uban sa isigkamagsisimba ni Jehova.—Heb. 10:23-25.
9, 10. Bisan pa sa mga pulong sa Salmo 3:6, 7, nganong makaingon kita nga si David dili mapanimaslon?
9 Bisag si David nagsagubang sa pagluib ni Absalom ug sa pagkadili-maunongon sa daghan, siya miawit: “Dili ako mahadlok sa tinagpulo ka libo ka tawo nga milikos batok kanako. Tindog, Oh Jehova! Luwasa ako, Oh Diyos ko! Kay pagahampakon mo sa apapangig ang tanan kong mga kaaway. Ang mga ngipon sa mga daotan imong pungagon.”—Sal. 3:6, 7.
10 Si David dili mapanimaslon. Kon ang iyang kaaway ‘pagahampakon sa apapangig,’ Diyos ang mobuhat niana. Kay naghimog kaugalingong kopya sa Balaod, si Haring David nahibalo nga si Jehova miingon: “Akoa ang panimalos, ug ang bayad.” (Deut. 17:14, 15, 18; 32:35) Ang Diyos usab ang magbuot kon iyang ‘pungagon ang ngipon sa daotan.’ Ang pagpungag sa ilang ngipon nagpasabot nga dili na sila makapahinabog kadaot. Nahibalo si Jehova kon kinsa ang daotan kay “siya nagatan-aw sa kasingkasing.” (1 Sam. 16:7) Pagkamapasalamaton nato nga ang Diyos nagalig-on sa atong pagtuo ug nagahatag kanatog kusog aron makabarog batok sa usa nga daotan, si Satanas, kinsa hapit nang itambog sa kahiladman nga samag nagangulob apan way-ngipong leyon nga takos sa kalaglagan!—1 Ped. 5:8, 9; Pin. 20:1, 2, 7-10.
“Iya ni Jehova ang Kaluwasan”
11. Nganong angay natong iampo ang atong mga isigkamagtutuo?
11 Nasayod si David nga si Jehova lamang ang makahatag sa kaluwasan nga iya gayong gikinahanglan. Apan ang salmista wala lamang maghunahuna sa kaugalingon kondili naghunahuna usab sa katawhan ni Jehova sa katibuk-an. Haom lamang nga gitapos ni David ang iyang salmo niining mga pulonga: “Iya ni Jehova ang kaluwasan. Ang imong panalangin anaa sa ibabaw sa imong katawhan.” (Sal. 3:8) Tinuod, bug-at kaayo ang mga problema ni David, apan siya naghunahuna sa katawhan ni Jehova ug nagmasaligon nga ang Diyos magpanalangin kanila. Dili ba angay usab natong hunahunaon ang atong mga isigkamagtutuo? Angay nato silang ilakip sa atong mga pag-ampo, nga maghangyo kang Jehova sa paghatag kanila sa iyang balaang espiritu aron makabaton silag kaisog ug kompiyansa sa pagmantala sa maayong balita.—Efe. 6:17-20.
12, 13. Unsay nahitabo kang Absalom, ug unsay reaksiyon ni David?
12 Makauulaw ang kamatayon ni Absalom—usa ka pasidaan alang niadtong magdaogdaog sa uban, ilabina sa mga dinihogan sa Diyos, sama kang David. (Basaha ang Proverbio 3:31-35.) Sa gubat nga nahitabo, napildi ang kasundalohan ni Absalom. Siya mikalagiw sakay sa iyang mula apan ang iyang bagang buhok nasangit sa sanga sa dakong kahoy. Siya nagbitay didto—buhi apan walay mahimo—ug gipatay siya ni Joab pinaagi sa pagtaroy ug tulo ka udyong diha sa iyang kasingkasing.—2 Sam. 18:6-17.
13 Nalipay ba si David sa gidangatan sa iyang anak? Wala. Hinuon, siya nagbahasbahas nga naghilak, ug mituaw: “Anak ko nga Absalom, anak ko, anak ko nga Absalom! Oh ako na lang unta ang namatay, ako mismo, inay ikaw, Absalom nga anak ko, anak ko!” (2 Sam. 18:24-33) Ang mga pulong lang ni Joab ang nakapaamgo kang David nga sobra ra ang iyang pagbangotan. Pagkamakapasubo sa gidangatan ni Absalom, kansang hakog nga ambisyon nagtukmod kaniya sa pagpakigbatok sa iyang amahan—ang dinihogan ni Jehova—nga misangpot sa iyang kaalaotan!—2 Sam. 19:1-8; Prov. 12:21; 24:21, 22.
Si David Nagpahayag Pag-usab sa Iyang Pagsalig sa Diyos
14. Unsay ikaingon bahin sa Salmo 4?
14 Sama sa ikatulong Salmo, ang ikaupat maoy tim-os nga pag-ampo ni David nga nagpamatuod sa iyang bug-os nga pagsalig kang Jehova. (Sal. 3:4; 4:3) Lagmit gikomposo kini ni David aron ipahayag ang iyang kahupayan ug pagpasalamat sa Diyos human mapakyas ang pagrebelde ni Absalom. O tingali iya kining gisulat alang sa mga Levihanong mag-aawit. Kon unsa man ugaling, ang pagpamalandong niini makapalig-on sa atong pagsalig kang Jehova.
15. Nganong masaligon kitang makaampo kang Jehova pinaagi sa iyang Anak?
15 Gipahayag pag-usab ni David ang iyang bug-os nga pagsalig sa Diyos ug nga ang iyang mga pag-ampo pagatubagon. Siya miawit: “Sa dihang magatawag ako, tubaga ako, Oh Diyos ko nga matarong. Sa kasakitan itagana kanako ang haluag nga luna. Pakitai akog pabor ug dungga ang akong pag-ampo.” (Sal. 4:1) Makaseguro usab kita niana kon atong buhaton ang matarong. Kay nahibalo nga si Jehova, ang “matarong nga Diyos,” nagapanalangin sa iyang matarong nga katawhan, kita masaligong makaampo kaniya pinaagi sa iyang Anak uban ang pagtuo sa halad lukat ni Jesus. (Juan 3:16, 36) Kana makahatag gayod ug kasegurohan kanato!
16. Unsay lagmit nga hinungdan sa kahigawad ni David?
16 Usahay, makasinati kitag malisod nga kahimtang nga makawala sa atong kompiyansa. May panahon nga nahitabo kini kang David, kay siya miawit: “Kamong mga anak sa mga tawo, hangtod kanus-a nga ang akong himaya pasipalahan, samtang kamo nagpadayon sa paghigugma sa walay-pulos nga mga butang, samtang kamo nagpadayon sa pagpangita ug kabakakan?” (Sal. 4:2) Ang ekspresyong “mga anak sa mga tawo” nagtumong sa katawhan nga dili-maayog binuhatan. Ang mga kaaway ni David ‘nahigugma sa walay-pulos nga mga butang.’ Ang New International Version naghubad niini: “Hangtod kanus-a kamo maghigugma sa dili-tinuod ug mangita sa bakak nga mga diyos?” Bisag mahigawad kita tungod sa ginabuhat sa uban, padayon kitang mag-ampo nga tim-os ug bug-os mosalig sa bugtong matuod nga Diyos.
17. Ipatin-aw kon sa unsang paagi kita mogawi nga nahiuyon sa Salmo 4:3.
17 Ang pagsalig ni David sa Diyos dayag niining mga pulonga: “Busa hibaloi nga si Jehova makaila gayod sa tawo nga maunongon kaniya; si Jehova magpatalinghog sa dihang magatawag ako kaniya.” (Sal. 4:3) Ang kaisog ug bug-os nga pagsalig kang Jehova gikinahanglan aron makapabiling matinumanon kaniya. Pananglitan, gikinahanglan sa Kristohanong pamilya ang maong mga hiyas sa dihang mapalagpot ang usa ka dili-mahinulsolong paryente. Ang Diyos magpanalangin niadtong magmaunongon kaniya ug sa iyang mga dalan. Sa baylo, ang pagkamaunongon ug bug-os nga pagsalig kang Jehova maghatag ug kalipay sa iyang katawhan.—Sal. 84:11, 12.
18. Kaharmonya sa Salmo 4:4, unsay atong himoon kon kita gisultihan o gibuhatag dili maayo?
18 Komosta kon may nakapasilo kanato? Kita magpabiling malipayon kon sundon nato ang giingon ni David: “Mapikal kamo, apan ayaw pagpakasala. Makigsulti kamo sa inyong kasingkasing, diha sa inyong higdaanan, ug maghilom kamo.” (Sal. 4:4) Kon kita gisultihan o gibuhatag dili maayo, dili kita magpakasala pinaagi sa pagpanimalos. (Roma 12:17-19) Mahimo natong ipahayag ang atong gibati diha sa pag-ampo una matulog. Kon ato kanang iampo, lagmit mausab ang atong hunahuna ug matukmod kita sa pagpasaylo tungod sa gugma. (1 Ped. 4:8) Makaiikag ang tambag ni apostol Pablo niining bahina, nga lagmit gibase sa Salmo 4:4: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.”—Efe. 4:26, 27.
19. Sa unsang paagi ang Salmo 4:5 makatabang kanato may kalabotan sa atong espirituwal nga mga halad?
19 Aron ipasiugda kon nganong kinahanglang mosalig sa Diyos, si David miawit: “Ihalad ang mga halad sa pagkamatarong, ug salig kang Jehova.” (Sal. 4:5) Ang halad sa mga Israelinhon may bili lamang kon husto ang ilang motibo. (Isa. 1:11-17) Aron dawaton sa Diyos ang atong espirituwal nga mga halad, kinahanglang husto usab ang atong motibo ug bug-os kitang mosalig kaniya.—Basaha ang Proverbio 3:5, 6; Hebreohanon 13:15, 16.
20. Unsay gipaila sa ekspresyong ‘kahayag sa nawong ni Jehova’?
20 Si David mipadayon: “Daghan ang nagaingon: ‘Kinsa ang magpakita kanato sa maayo?’ Ibanwag ang kahayag sa imong nawong ibabaw kanamo, Oh Jehova.” (Sal. 4:6) ‘Ang kahayag sa nawong ni Jehova’ nagpaila sa iyang pag-uyon. (Sal. 89:15) Busa sa dihang si David miampo: “Ibanwag ang kahayag sa imong nawong ibabaw kanamo,” iyang gipasabot nga ‘pakitai kamig pag-uyon.’ Kon kita mosalig kang Jehova, atong maangkon ang iyang pag-uyon ug kita magmalipayon samtang nagatuman sa iyang kabubut-on.
21. Unsay segurado natong masinati kon bug-os kitang makigbahin sa espirituwal nga pagpangani karon?
21 Kay naglaom sa kalipay nga labaw pa nianang sa ting-ani, si David miawit kang Jehova: “Ikaw makapalipay gayod sa akong kasingkasing labaw pa kay sa panahon nga midaghan ang ilang lugas ug ang ilang bag-ong bino.” (Sal. 4:7) Ato gayong masinati ang dakong kalipay kon bug-os kitang makigbahin sa espirituwal nga pagpangani karon. (Luc. 10:2) Uban sa ‘daghang molupyo sa nasod’ sa mga dinihogan kinsa nagadumala karon, kita malipay samtang nagkadaghan ang ‘mga mangangani.’ (Isa. 9:3) Ikaw ba bug-os nakigbahin sa buluhatong pagpangani karon?
Magpadayon Uban ang Bug-os nga Pagsalig sa Diyos
22. Uyon sa Salmo 4:8, unsay kahimtang sa mga Israelinhon sa dihang ilang gisunod ang Balaod sa Diyos?
22 Gitapos ni David kini nga salmo niining mga pulonga: “Sa kalinaw mohigda ug matulog ako, kay ikaw lamang, Oh Jehova, ang nagpapuyo kanako sa kasegurohan.” (Sal. 4:8) Sa dihang gituman sa mga Israelinhon ang Balaod ni Jehova, sila may pakigdait sa Diyos ug may kasegurohan. Pananglitan, ‘ang Juda ug Israel nagpuyo sa kasegurohan’ panahon sa paghari ni Solomon. (1 Hari 4:25) Bisag gihulga sa kaawayng mga nasod, kadtong misalig sa Diyos nakasinatig pakigdait. Sama kang David, hinanok ang atong pagkatulog kay ang Diyos naghatag kanatog kasegurohan.
23. Unsay atong masinati kon bug-os kitang mosalig sa Diyos?
23 Kita angayng magpadayon sa pag-alagad kang Jehova nga masaligon. Hinaot nga mag-ampo usab kita uban ang pagtuo aron atong masinati “ang kalinaw sa Diyos nga labaw sa tanang panghunahuna.” (Filip. 4:6, 7) Pagkadakong kalipay ang atong matagamtam! Ug kon padayon kitang mosalig kang Jehova sa bug-os, tino nga atong maatubang ang umaabot uban ang kasegurohan.
Unsay Imong Tubag?
• Unsay giatubang ni David tungod kang Absalom?
• Sa unsang paagi ang Salmo 3 maghatag ug kasegurohan?
• Sa unsang mga paagi ang Salmo 4 magpalig-on sa atong pagsalig kang Jehova?
• Sa unsang paagi kita makabenepisyo kon bug-os kitang mosalig sa Diyos?
[Mga Pangutana sa Pagtuon]
[Hulagway sa panid 29]
Bisag mikalagiw tungod kang Absalom, si David misalig kang Jehova
[Mga hulagway sa panid 32]
Bug-os ka bang nagasalig kang Jehova?
