Kinsa ang Labing Importante sa Imong Kinabuhi?
Kinsa ang Labing Importante sa Imong Kinabuhi?
“Ikaw lamang ang Labing Hataas ibabaw sa tibuok nga yuta.”—SAL. 83:18.
1, 2. Bahin sa atong kaluwasan, nganong dili igo nga makaila lamang sa ngalan ni Jehova?
LAGMIT una nimong nakita ang ngalan ni Jehova sa dihang gipabasa kanimo ang Salmo 83:18. Nasorpresa ka tingali sa dihang nabasa nimo kining mga pulonga: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” Sukad niadto, tino nga gigamit nimo kini sa pagtabang sa uban nga makaila sa atong mahigugmaong Diyos, si Jehova.—Roma 10:12, 13.
2 Bisag hinungdanon nga ang mga tawo makaila sa ngalan ni Jehova, kana dili pa igo. Matikdi nga ang salmista nagpasiugdag laing kamatuoran nga gikinahanglan sa atong kaluwasan sa dihang siya nag-ingon: “Ikaw lamang ang Labing Hataas ibabaw sa tibuok nga yuta.” Oo, si Jehova ang labing hinungdanong Persona sa tibuok uniberso. Ingong Maglalalang sa tanang butang, siya may katungod sa pagdahom nga ang tanan niyang linalang bug-os nga magpasakop kaniya. (Pin. 4:11) Nan angay nga mangutana kita sa atong kaugalingon, ‘Kinsa ang labing importante sa akong kinabuhi?’ Hinungdanon nga susihon nato ang atong tubag niana!
Ang Isyu sa Tanaman sa Eden
3, 4. Sa unsang paagi nalimbongan ni Satanas si Eva, ug unsay resulta?
3 Base sa mga panghitabo sa tanaman sa Eden, masabtan nga seryoso ang maong pangutana. Didto ang rebelyosong manulonda nga sa ulahi ginganlag Satanas nga Yawa nagdani sa unang babaye, si Eva, nga unahon ang iyang kaugalingong mga tinguha inay ang sugo ni Jehova nga dili mokaon sa bunga sa usa ka kahoy. (Gen. 2:17; 2 Cor. 11:3) Siya natental ug sa ingon nagpakitag kawalay pagtahod sa pagkasoberano ni Jehova. Si Eva wala mag-isip kang Jehova ingong labing importanteng Persona sa iyang kinabuhi. Apan sa unsang paagi nalimbongan ni Satanas si Eva?
4 Si Satanas naggamit ug malinglahong mga taktika sa pagpakigsulti kang Eva. (Basaha ang Genesis 3:1-5.) Una, wala gamita ni Satanas ang ngalan ni Jehova. Ang pulong “Diyos” mao lamang ang iyang gigamit. Sa kasukwahi, ang magsusulat sa Genesis naggamit sa ngalan ni Jehova sa unang bersikulo sa maong kapitulo. Ikaduha, inay mosulti bahin sa ‘sugo’ sa Diyos, si Satanas nangutana lamang kon unsay ‘giingon’ sa Diyos. (Gen. 2:16) Niining malinglahong paagi, gipagawas ni Satanas nga dili kaayo hinungdanon ang maong sugo. Ikatulo, bisag nakigsulti lamang kang Eva, iyang gigamit ang pulong nga “kamo.” Sa pagbuhat niana, mahimong gipukaw niya ang garbo ni Eva aron siya mobating importante—nga samag siya ang tigpamaba alang sa iyang kaugalingon ug sa iyang bana. Unsay resulta? Si Eva mapangahasong midesisyon alang kanila pinaagi sa pag-ingon sa halas: “Sa bunga sa mga kahoy sa tanaman kami makakaon.”
5. (a) Sa unsa gipokus ni Eva ang iyang pagtagad tungod sa panghaylo ni Satanas? (b) Unsay gipakita ni Eva sa dihang mikaon siya sa gidiling bunga?
5 Si Satanas nagtuis usab sa tinuod nga kahimtang. Iyang gipadayag nga dili-makataronganon ang Diyos sa pagsugo kang Adan ug Eva nga ‘dili gayod mokaon gikan sa tanang kahoy sa tanaman.’ Sunod, nadani ni Satanas si Eva sa paghunahuna sa kaugalingon ug sa pagpauswag sa iyang kahimtang, nga mahimong ‘sama sa Diyos.’ Sa ulahi, iyang naaghat si Eva nga mapokus ang iyang pagtagad diha sa kahoy ug sa bunga niini inay sa iyang relasyon sa Usa nga naghatag kaniya sa tanang butang. (Basaha ang Genesis 3:6.) Ikasubo nga pinaagi sa pagkaon sa bunga, gipakita ni Eva nga dili si Jehova ang labing importanteng Persona sa iyang kinabuhi.
Ang Isyu sa Adlaw ni Job
6. Sa unsang paagi gikuwestiyon ni Satanas ang pagkamatinumanon ni Job, ug unsang kahigayonan ang gihatag kang Job?
6 Kasiglohan sa ulahi, ang matinumanong si Job nakabatog kahigayonan sa pagpakita kon kinsa ang labing importanteng Persona sa iyang kinabuhi. Sa dihang gipahayag ni Jehova kang Satanas ang pagkamatinumanon ni Job, si Satanas misumbalik: “Mahadlok ba sa Diyos si Job sa wala lamay kapuslanan?” (Basaha ang Job 1:7-10.) Wala kuwestiyona ni Satanas ang pagkamasinundanon ni Job sa Diyos. Apan, iyang gikuwestiyon ang motibo ni Job. Siya miakusar nga si Job nag-alagad kang Jehova tungod sa hinakog nga tumong, dili tungod sa gugma. Si Job lamang ang makapanghimakak sa maong akusasyon, ug gihatagan siyag kahigayonan sa paghimo niana.
7, 8. Unsang mga pagsulay ang gisagubang ni Job, ug unsay gipakita sa iyang pagkamalahutayon?
7 Gitugotan ni Jehova si Satanas sa pagpahinabog sunodsunod nga katalagman kang Job. (Job 1:12-19) Unsay reaksiyon ni Job sa kausaban sa iyang kahimtang? Siya “wala makasala ni magpasangil ug bisan unsang butang nga dili angay batok sa Diyos.” (Job 1:22) Apan wala mohunong si Satanas. Siya dugang mihagit: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag.” * (Job 2:4) Si Satanas nangatarongan nga kon si Job mismo mag-antos, siya modesisyon nga si Jehova dili ang labing importanteng Persona sa iyang kinabuhi.
8 Ang lawas ni Job nangil-ad tungod sa makaluod nga sakit ug dayon siya gipit-os sa iyang asawa nga tunglohon ang Diyos ug magpakamatay. Sa ulahi, ang iyang tulo ka bakak nga maghuhupay miakusar nga siya nakasala. (Job 2:11-13; 8:2-6; 22:2, 3) Bisan pa sa tanang pag-antos, si Job nagmatinumanon. (Basaha ang Job 2:9, 10.) Ang iyang pagkamalahutayon nagpakita nga si Jehova ang labing importanteng Persona sa iyang kinabuhi. Gipasundayag usab ni Job nga ang dili-hingpit nga tawo, bisan sa limitadong paagi, makatubag sa bakak nga mga akusasyon sa Yawa.—Itandi ang Proverbio 27:11.
Ang Hingpit nga Tubag ni Jesus
9. (a) Sa unsang paagi misulay si Satanas pagtental kang Jesus bahin sa personal nga tinguha? (b) Unsay reaksiyon ni Jesus sa maong tentasyon?
9 Pagkahuman dayon sa bawtismo ni Jesus, si Satanas misulay pagtental kaniya nga mangagpas ug hakog nga mga tinguha imbes isipon si Jehova ingong labing importanteng Persona sa iyang kinabuhi. Ang Yawa nagtental kang Jesus sa tulo ka beses. Una, gipahimuslan niya ang tinguha ni Jesus alang sa pagkaon, nga nagtental kaniya nga ang mga bato himoong tinapay. (Mat. 4:2, 3) Bag-o pang nagpuasa si Jesus sulod sa 40 ka adlaw ug siya gigutom gayod. Busa siya giagda sa Yawa nga gamiton ang iyang gahom sa pagtagbaw sa iyang kagutom. Unsay reaksiyon ni Jesus? Lahi kang Eva, gipokus ni Jesus ang iyang hunahuna diha sa Pulong ni Jehova ug dihadiha gisalikway ang tentasyon.—Basaha ang Mateo 4:4.
10. Nganong gihagit ni Satanas si Jesus nga moambak gikan sa ibabawng bahin sa paril sa templo?
10 Si Satanas nagtental usab kang Jesus nga mosanong sa mahakogong paagi. Iyang gihagit si Jesus nga moambak gikan sa ibabawng bahin sa paril sa templo. (Mat. 4:5, 6) Unsay gidahom ni Satanas? Si Satanas nangatarongan nga kon si Jesus dili masamdan sa dihang siya mahulog, kana magpamatuod nga siya “anak sa Diyos.” Dayag nga buot sa Yawa nga si Jesus mabalaka pag-ayo sa iyang dungog, sa punto nga mapagawalong ipasundayag kana. Nahibalo si Satanas nga ang tawo mahimong modawat ug peligrosong hagit tungod sa garbo ug sa tinguha nga dili maulawan. Sayop nga gipadapat ni Satanas ang kasulatan, apan gipakita ni Jesus nga bug-os niyang nasabtan ang Pulong ni Jehova. (Basaha ang Mateo 4:7.) Pinaagi sa pagsalikway sa maong hagit, gipamatud-an pag-usab ni Jesus nga si Jehova ang labing importanteng Persona sa iyang kinabuhi.
11. Nganong gibalibaran ni Jesus ang pagtanyag sa Yawa sa tanang gingharian sa kalibotan?
11 Sa iyang kataposang pagsulay sa pagtental kang Jesus, si Satanas mitanyag kaniya sa tanang gingharian sa kalibotan. (Mat. 4:8, 9) Dihadiha kana gibalibaran ni Jesus. Nahibalo siya nga ang pagdawat niana magpasabot nga siya nagsalikway sa pagkasoberano ni Jehova—ang katungod mismo sa Diyos nga magmando ingong Labing Hataas. (Basaha ang Mateo 4:10.) Sa matag kahimtang, gitubag ni Jesus si Satanas pinaagi sa pagkutlog mga kasulatan nga anaa ang ngalan ni Jehova.
12. Unsay nakapasubo pag-ayo kang Jesus? Apan unsay iyang reaksiyon, ug unsay atong makat-onan niana?
12 Sa hapit nang matapos ang yutan-ong kinabuhi ni Jesus, miatubang siyag lisod kaayong desisyon. Sa tibuok niyang ministeryo, gipahayag niya ang iyang kaandam sa paghalad sa iyang kinabuhi. (Mat. 20:17-19, 28; Luc. 12:50; Juan 16:28) Apan, si Jesus nahibalo nga siya bakak nga akusahan ug hukmang sad-an pinasukad sa balaod sa mga Hudiyo ug patyon ingong tigpasipala. Kana nakapasubo kaayo niya. Siya miampo: “Amahan ko, kon posible, isaylo kining kopa gikan kanako.” Pero siya mipadayon: “Apan, dili sumala sa akong pagbuot, kondili sumala sa imong pagbuot.” (Mat. 26:39) Oo, ang pagkamatinumanon ni Jesus hangtod sa iyang kamatayon bug-os nagpamatuod kon kinsa ang labing importanteng Persona sa iyang kinabuhi!
Atong Tubag sa Pangutana
13. Unsang mga leksiyon ang atong nakat-onan gikan sa kinabuhi ni Eva, Job, ug Jesu-Kristo?
13 Unsa nay atong nakat-onan? Sa kahimtang ni Eva, atong nakat-onan nga kadtong magpadaog sa hakog nga mga tinguha o magpaimportante-sa-kaugalingon nagpakita nga dili si Jehova ang labing importanteng Persona sa ilang kinabuhi. Kasukwahi niana, ang pagkamatinumanon ni Job nagtudlo kanato nga bisan ang dili-hingpit nga mga tawo mahimong magpakita nga ilang giuna si Jehova pinaagi sa paglahutay nga matinumanon sa mga kalisdanan—bisag wala nila masabti sa bug-os ang hinungdan niana. (Sant. 5:11) Sa kataposan, ang panig-ingnan ni Jesus nagtudlo kanato nga magmaandam sa pag-antos sa kaulawan ug dili hatagag dakong importansiya kon unsay hunahunaon sa uban. (Heb. 12:2) Apan sa unsang paagi nato ikapadapat ang maong mga leksiyon?
14, 15. Sa unsang paagi lahi ang reaksiyon ni Jesus sa tentasyon kon itandi sa kang Eva, ug sa unsang paagi masundog nato si Jesus? (Komentohi ang ilustrasyon sa panid 18.)
14 Ayawg kalimti si Jehova tungod sa mga tentasyon. Gitugotan ni Eva nga mapokus dayon ang iyang pagtagad sa tentasyon nga iyang giatubang. Iyang nakita nga ang bunga “maayong kan-on ug nga kini takos pangandoyon sa mga mata, oo, ang kahoy tilinguhaong tan-awon.” (Gen. 3:6) Sukwahi gayod kana sa reaksiyon ni Jesus sa tulo ka tentasyon! Sa matag higayon, iyang gihunahuna ang mga sangpotanan kon magpadaog siya sa tentasyon. Siya misalig sa Pulong sa Diyos ug migamit usab sa ngalan ni Jehova.
15 Sa dihang tentalon kita sa pagbuhat ug mga butang nga dili makapahimuot kang Jehova, asa nato ipunting ang atong pagtagad? Kon kanunay kitang maghunahuna sa tentasyon, mas mahimong kusganon ang maong daotang tinguha. (Sant. 1:14, 15) Kinahanglang langkaton nato dayon ang tinguha, bisan pag kana tingali ingon ka grabe sa pagputol sa usa ka bahin sa atong lawas. (Mat. 5:29, 30) Sama kang Jesus, kinahanglang ipokus nato ang atong pagtagad diha sa sangpotanan sa atong binuhatan—kon unsay epekto niana sa atong relasyon kang Jehova. Kinahanglang hinumdoman nato kon unsay giingon sa Bibliya. Niining paagiha lamang kita makapamatuod nga si Jehova ang labing importanteng Persona sa atong kinabuhi.
16-18. (a) Unsa tingali ang hinungdan nga kita maguol? (b) Unsay makatabang nato aron kita makasagubang sa mga kasakitan?
16 Ayawg kaaligutgot kang Jehova tungod sa personal nga mga trahedya. (Prov. 19:3) Samtang nagkaduol ang kataposan niining daotang kalibotan, nagkadaghan ang alagad ni Jehova nga naapektohan sa mga katalagman ug trahedya. Dili nato dahomon karon nga kita panalipdan sa milagrosong paagi. Bisan pa niana, sama kang Job, kita maguol sa dihang mawad-ag mga minahal o makasinatig kalisdanan.
17 Si Job wala makasabot kon nganong gitugotan ni Jehova ang pipila ka panghitabo, ug usahay mahimong dili sab nato masabtan ang daotang mga panghitabo. Tingali nakadungog kita bahin sa matinumanong mga Saksi nga nangamatay sa linog, sama niadtong sa Haiti, o sa uban pang katalagman. O mahimong nadunggan nato nga ang usa ka matinumanong alagad nabiktima sa kapintasan o namatay sa usa ka grabeng aksidente. O mahimong kita mismo nakasinatig kasakitan o inhustisya. Tungod sa kaguol kita mahimong makahunahuna: ‘Ngano, Oh Jehova? Nganong ako pa man? Unsa may akong sala?’ (Hab. 1:2, 3) Unsay makatabang kanato sa pagsagubang ug mga kahimtang nga sama niana?
18 Dili nato angayng isipon nga ang maong mga hitabo nagpaila nga nawad-an kita sa pag-uyon ni Jehova. Gipasiugda kini ni Jesus sa naghisgot siyag duha ka trahedya. (Basaha ang Lucas 13:1-5.) Ang daghang katalagman maoy resulta sa ‘panahon ug wala-damhang panghitabo.’ (Eccl. 9:11) Apan bisag unsay hinungdan sa atong kasakitan, kita makasagubang kon ipokus nato ang atong pagtagad sa “Diyos sa tanang paghupay.” Siya mohatag kanatog kusog aron kita magmatinumanon.—2 Cor. 1:3-6.
19, 20. Unsay nakatabang kang Jesus sa pag-antos sa mga kaulawan, ug unsay makatabang kanato sa paghimo usab niana?
19 Ayawg ipokus ang imong pagtagad sa garbo o sa kahadlok nga maulawan. Tungod sa pagkamapainubsanon ni Jesus, iyang “gihaw-asan ang iyang kaugalingon ug gihuptan ang dagway sa usa ka ulipon.” (Filip. 2:5-8) Iyang naantos ang daghang kaulawan tungod kay siya misalig kang Jehova. (1 Ped. 2:23, 24) Sa paghimo niana, giuna ni Jesus ang pagbuhat sa kabubut-on ni Jehova, ug kadto miresulta sa iyang pagkabayaw sa labaw nga katungdanan. (Filip. 2:9) Ang samang pagkinabuhi girekomendar ni Jesus sa iyang mga tinun-an.—Mat. 23:11, 12; Luc. 9:26.
20 Usahay, ang pipila ka pagsulay sa atong pagtuo mahimong makauulaw. Bisan pa niana, angayng magmasaligon kita sama ni apostol Pablo, kinsa miingon: “Tungod niini ako nag-antos usab niining mga butanga, apan wala ako maulaw. Kay ako nakaila sa akong gituohan, ug ako masaligon nga siya makahimo sa pagbantay sa akong gipiyal kaniya hangtod nianang adlawa.”—2 Tim. 1:12.
21. Bisan sa hakog nga tinamdan sa kalibotan, unsay imong determinasyon?
21 Ang Bibliya nagtagna nga sa atong panahon ang mga tawo “magmahigugmaon sa ilang kaugalingon.” (2 Tim. 3:2) Nan, dili ikatingala nga gilibotan kitag mga tawo nga nag-una sa ilang kaugalingong kaayohan. Hinaot dili kita matakdan nianang mahakogong tinamdan! Hinunoa, kon kita nag-atubang ug tentasyon, gisakit sa mga trahedya, o gipakaulawan, hinaot ang matag usa kanato magmadeterminado sa pagpamatuod nga si Jehova mao gayod ang labing importanteng Persona sa atong kinabuhi!
[Footnote]
^ par. 7 Ang pipila ka eskolar sa Bibliya nagtuo nga ang ekspresyong “panit alang sa panit” mahimong nagpasabot nga sa kahakog itugot ni Job nga ang iyang mga anak ug mga hayop mawad-ag mga panit, o kinabuhi, basta siya dili ra mawad-an sa iyang panit, o kinabuhi. Ang uban nagtuo nga kana nagpasiugda nga ang usa ka tawo andam mawad-ag bahin sa panit aron maluwas ang iyang kinabuhi. Pananglitan, kon bunalan ang usa, isagang niya ang bukton aron dili maigo ang iyang ulo, sa ingon mawad-an siyag bahin sa panit aron maluwas ang iyang panit o kinabuhi. Bisag unsay kahulogan sa maong idiom, kana nagpaila nga ihatag ni Job ang tanan aron lamang maluwas ang iyang kinabuhi.
Unsay Atong Makat-onan Gikan sa . . .
• paagi sa paglingla ni Satanas kang Eva?
• reaksiyon ni Job sa mga trahedya?
• kon asa gipokus ni Jesus ang iyang pagtagad?
[Mga Pangutana sa Pagtuon]
[Hulagway sa panid 17]
Wala mapokus ni Eva ang iyang pagtagad sa iyang relasyon kang Jehova
[Hulagway sa panid 18]
Gisalikway ni Jesus ang mga tentasyon ni Satanas ug nagpokus sa pagbuhat sa kabubut-on ni Jehova
[Mga hulagway sa panid 20]
Pagsangyaw diha sa mga tolda human sa linog sa Haiti
Panahon sa kasakitan, ipokus nato ang atong pagtagad diha sa “Diyos sa tanang paghupay”
