Kristohanong Pamilya—‘Magmaandam Kanunay’

“Mangandam kanunay, tungod kay sa takna nga wala ninyo hunahunaa, ang Anak sa tawo moabot.”—LUC. 12:40.

1, 2. Nganong angay natong seryosohon ang tambag ni Jesus nga ‘magmaandam kanunay’?

“INIG-ABOT sa Anak sa tawo diha sa iyang himaya” ug sa dihang iyang lainon ang “katawhan gikan sa usag usa,” unsay mahitabo kanimo ug sa imong pamilya? (Mat. 25:31, 32) Sanglit mahitabo kini sa takna nga wala nato dahoma, hinungdanon gayod nga atong seryosohon ang tambag ni Jesus nga ‘magmaandam kanunay’!—Luc. 12:40.

² Gihisgotan sa miaging artikulo kon sa unsang paagi ang matag membro makatabang sa tibuok pamilya nga magtukaw sa espirituwal pinaagi sa pag-isip nga seryoso sa ilang tagsatagsa ka responsabilidad. Atong tagdon ang ubang paagi nga kita makatabang sa espirituwal nga kaayohan sa atong pamilya.

Hupti ang “Yano” nga Mata

3, 4. (a) Batok sa unsa angayng magbantay ang Kristohanong mga pamilya? (b) Unsay kahulogan sa paghupot ug “yano” nga mata?

³ Aron maandam sa pag-abot ni Kristo, ang mga pamilya kinahanglang magpokus kanunay sa mga kalihokan maylabot sa matuod nga pagsimba. Kinahanglan silang magbantay batok sa mga kabaldahan. Sanglit ang materyalismo nakalit-ag sa daghang pamilya,  tagda ang giingon ni Jesus bahin sa paghupot ug “yano” nga mata. (Basaha ang Mateo 6:22, 23.) Sama sa lampara nga makalamdag sa atong agianan ug niana makalakaw kita nga dili matumba, ang ginatan-aw sa atong simbolikong ‘mga mata sa kasingkasing’ makalamdag usab kanato, nga makatabang kanato sa paglikay sa pagpakasala.—Efe. 1:18.

⁴ Aron ang literal nga mata tin-awng makakita, kini kinahanglan nga walay depekto ug makapokus sa ginatan-aw. Ingon usab niana ang mga mata sa kasingkasing. Ang pagbaton ug yano nga simbolikong mata nagpasabot nga kita nakapokus sa usa ka katuyoan. Imbes masentro ang atong kinabuhi sa materyal nga mga butang ug mabalaka pag-ayo sa pagtagana sa panginahanglan sa pamilya, atong ipokus ang atong mata sa espirituwal nga mga butang. (Mat. 6:33) Kini nagpasabot nga magmakontento na kita sa kon unsay atong nabatonan ug unahon ang pag-alagad sa Diyos sa atong kinabuhi.—Heb. 13:5.

5. Sa unsang paagi gipakita sa usa ka tin-edyer nga ang iyang “mata” nakapokus sa pag-alagad sa Diyos?

⁵ Pagkamaayo sa resulta sa dihang ang mga anak mabansay sa paghupot ug yanong mata! Tagda ang usa ka tin-edyer nga babaye sa Ethiopia. Siya maayo kaayo sa klase nga pagkagraduwar sa hayskul, siya gitanyagan ug eskolarsip sa kolehiyo. Sanglit nakapokus man ang iyang mata sa pag-alagad kang Jehova, gibalibaran niya kana. Wala madugay human niadto, siya gitanyagan ug trabaho nga ang suweldo kada bulan katumbas sa $4,200—dako kaayo kon itandi sa kasagarang suweldo sa maong nasod. Apan ang “mata” sa tin-edyer napokus na sa pagpayunir. Wala na siya mokonsulta sa iyang ginikanan nga iyang balibaran ang trabaho. Unsay gibati sa iyang ginikanan pagkahibalo niana? Sila nalipay gayod ug gisultihan siya nga magarbohon kaayo sila kaniya!

6, 7. Batok sa unsang kapeligrohan nga atong ‘bukhon kanunay ang atong mga mata’?

⁶ Masabtan sa mga pulong ni Jesus sa Mateo 6:22, 23 nga siya nagpasidaan batok sa kadalo. Wala itugbang ni Jesus ang pulong “yano” sa pulong nga “komplikado” kondili sa pulong nga “daotan.” Ang ‘daotang mata’ maoy “masinahon,” sa ato pa maibogon o dalo. (Mat. 6:23; potnot sa New World Translation of the Holy Scriptures—With References.) Unsay pagbati ni Jehova bahin sa hakog nga pangibog o kadalo? “Ang pakighilawas ug ang tanang matang sa kahugawan o kadalo [o, “hakog nga pangibog”] dili gayod angay hisgotan sa inyong taliwala,” nag-ingon ang Bibliya.—Efe. 5:3; potnot sa New World Translation of the Holy Scriptures—With References.

⁷ Kita daling makamatikod sa kadalo diha sa uban, apan dili diha sa atong kaugalingon. Busa, maalamon natong sundon ang tambag ni Jesus: “Bukha kanunay ang inyong mga mata ug pagbantay batok sa tanang matang sa hakog nga pangibog.” (Luc. 12:15) Aron mahimo kana, kinahanglang susihon nato ang atong kaugalingon kon diin nasentro ang atong kasingkasing. Angayng hunahunaon sa Kristohanong mga pamilya kon unsa ka dako ang panahon ug salapi nga ilang gigugol sa kalingawan, lulinghayaw, ug pagbatog materyal nga mga butang.

8. Kon bahin sa pagpamalit, sa unsang paagi kita magmaalamon?

⁸ Sa dili pa mopalit ug usa ka butang, dili lamang nimo konsiderahon kon duna ka bay ikabayad niini. May ubang butang nga angay nimong tagdon sama niini: ‘May panahon ba ko sa paggamit kanunay ug pag-atiman niini? Unsa ka dugay kong makakat-on sa paggamit niini?’ Mga batan-on, ayawg tuohi ang tanang anunsiyo sa mga produkto ug dayon magpapalit ug branded, o mahalong mga besti o ubang butang. Pugngi ang kaugalingon. Lain pa, hunahunaa kon ang pagpalit ba niana makatabang sa imong pamilya nga maandam sa pag-abot sa Anak sa tawo. Salig sa saad ni Jehova: “Dili ko gayod ikaw pagabiyaan ni sa bisan unsang paagi pagatalikdan.”—Heb. 13:5.

 Kab-ota ang Espirituwal nga mga Tumong

9. Unsay kaayohan kon ang pamilya mangab-ot ug espirituwal nga mga tumong?

⁹ Ang pagtakdag espirituwal nga mga tumong ug pagkab-ot niana maoy laing paagi nga ang matag membro sa pamilya makapalig-on sa ilang pagtuo ug makaamot sa espirituwal nga kaayohan sa pamilya. Kana makatabang kanila sa pagtino kon miuswag ba sila sa ilang pag-alagad kang Jehova ug sa pagdesisyon usab kon unsang mga kalihokan ang labing importante sa ilang kinabuhi.—Basaha ang Filipos 1:10.

10, 11. Ingong pamilya, unsay inyong espirituwal nga mga tumong, ug unsang mga tumong ang buot pa ninyong itakda?

¹⁰ Bisan ang pagtakdag ginagmay ug daling makab-ot nga mga tumong adunay dagkong benepisyo. Tagda pananglitan ang paghisgot sa inadlawng teksto. Pinaagi sa mga komento sa mga membro sa pamilya, mailhan sa amahan kon unsa ka dako ang ilang gugma sa kamatuoran. Ang tumong nga maghiusa ang pamilya sa pagbasa sa Bibliya nga regular makapauswag sa katakos sa mga bata sa pagbasa ug sa pagsabot sa mensahe sa Bibliya. (Sal. 1:1, 2) Ug dili ba usa ka maayong tumong nga pauswagon ang kalidad sa atong mga pag-ampo? Usa usab ka maayong tumong ang padayong pag-ugmad sa bunga sa espiritu. (Gal. 5:22, 23) O komosta ang pagpangitag mga paagi sa pagpakitag empatiya sa mga tawo diha sa kanataran? Ang pagpaningkamot sa pamilya sa paghimo niana makatabang sa mga anak nga mahimong mahingawaon, ug lagmit maugmad nila ang tinguha nga mahimong regular payunir o misyonaryo.

¹¹ Nganong dili hisgotan ang pipila ka tumong nga mahimong makab-ot nimo ug sa  imong pamilya? Puwede bang himoong tumong sa inyong pamilya ang paggugol ug mas daghang oras sa ministeryo? Mahimo ba ninyong paningkamotan nga mabuntog ang kahadlok nga mosangyaw gamit ang telepono, diha sa dalan, o sa komersiyal nga dapit? Unsa kaha ang pag-alagad diin adunay dakong panginahanglan sa mga magmamantala? Aduna bay usa ka membro sa inyong pamilya nga makatuon ug bag-ong pinulongan aron makasangyaw sa mga langyaw?

12. Unsay mahimo sa mga ulo sa pamilya aron mouswag ang espirituwalidad sa pamilya?

¹² Ingong ulo sa pamilya, susiha kon unsa pay angayng pauswagon sa pamilya kon bahin sa espirituwal. Dayon pagtakdag espesipikong mga tumong aron mouswag ang espirituwalidad sa pamilya. Ang mga tumong sa pamilya angayng realistiko ug makab-ot sumala sa inyong kahimtang ug mga katakos. (Prov. 13:12) Siyempre, nagkinahanglag panahon ang pagkab-ot ug usa ka mapuslanong tumong. Busa menosi ang panahon sa pagtan-awg TV ug gamita kana sa espirituwal nga kalihokan. (Efe. 5:15, 16) Maningkamot nga makab-ot ang mga tumong sa inyong pamilya. (Gal. 6:9) Sa dihang ang pamilya mangab-ot ug espirituwal nga mga tumong, ang ilang pag-uswag “madayag sa tanan nga mga tawo.”—1 Tim. 4:15.

Pagbatog Regular nga Pamilyahanong Pagsimba

13. Unsang kausaban ang gihimo sa senemanang mga tigom sa kongregasyon, ug unsang mga pangutana ang angay natong palandongon?

¹³ Ang kausaban sa eskedyul sa senemanang tigom sugod niadtong Enero 1, 2009 makatabang pag-ayo sa mga pamilya nga ‘maandam kanunay’ sa pag-abot sa Anak sa tawo. Ang tigom nga gitawag niadto ug Pagtuon sa Libro sa Kongregasyon gitapo na sa tigom sa Teokratikanhong Tunghaan sa Ministeryo ug sa Tigom sa Pag-alagad. Kini gihimo aron ang Kristohanong mga pamilya may panahon sa pagpalig-on sa ilang espirituwalidad pinaagi sa pag-eskedyul ug usa ka gabii kada semana alang sa pamilyahanong pagsimba. Kay milabay na ang taastaas nga panahon sukad niadto, ang pangutana mao: ‘Gigamit ko ba ang maong panahon alang sa Pamilyahanong Pagsimba o personal nga pagtuon? Nakab-ot ko ba ang tumong sa maong kahikayan?’

14. (a) Unsa ang pangunang katuyoan sa pagbatog regular nga Pamilyahanong Pagsimba o personal nga pagtuon? (b) Nganong hinungdanon ang paggahig usa ka gabii alang sa pagtuon?

¹⁴ Ang pangunang katuyoan sa pagbatog regular nga Pamilyahanong Pagsimba o personal nga pagtuon mao ang pagbaton ug mas suod nga relasyon sa Diyos. (Sant. 4:8) Sa dihang regular ang atong pagtuon sa Bibliya ug mouswag ang atong kahibalo sa Maglalalang, molig-on ang atong relasyon kaniya. Sa dihang mas masuod kita kang Jehova, mas matukmod kita sa paghigugma kaniya ‘sa tibuok natong kasingkasing, tibuok kalag, tibuok kaisipan, ug sa tibuok natong kusog.’ (Mar. 12:30) Tino nga kita magmasinundanon sa Diyos ug mosundog kaniya. (Efe. 5:1) Busa, ang pagbatog regular nga Pamilyahanong Pagsimba hinungdanon gayod sa pagtabang sa tanang membro sa pamilya nga ‘maandam kanunay’ sa espirituwal samtang nagpaabot sa gitagnang “dakong kasakitan.” (Mat. 24:21) Gikinahanglan kini alang sa kaluwasan.

15. Unsay epekto sa Pamilyahanong Pagsimba sa pagbati sa mga membro sa pamilya alang sa usag usa?

¹⁵ May lain pang katuyoan ang kahikayan sa Pamilyahanong Pagsimba—aron mas masuod ang mga membro sa pamilya. Ang paghisgot sa tibuok pamilya sa espirituwal nga mga butang matag semana dakog epekto sa pagbati sa mga membro sa pamilya alang sa usag usa. Ang magtiayon mas magkasuod sa dihang ipahayag nila ang ilang kalipay sa pagdiskobreg bililhong mga impormasyon samtang nagtuon sa Bibliya. (Basaha ang Ecclesiastes 4:12.) Ang mga ginikanan ug mga anak nga magkauban sa pagsimba mahimong  mahiusa sa gugma, ang “hingpit nga bugkos sa panaghiusa.”—Col. 3:14.

16. Iasoy kon sa unsang paagi ang tulo ka sister nakabenepisyo sa paggahig usa ka gabii alang sa pagtuon sa Bibliya.

¹⁶ Tagda kon sa unsang paagi nakabenepisyo ang tulo ka sister sa paggahig usa ka gabii alang sa pagtuon sa Bibliya. Bisag dili sila paryente, kining edarang mga biyuda parehog siyudad nga gipuy-an ug dugay nang managhigala. Kay gusto nilang mas magkauban ug sa samang panahon himoon kining makapalig-on sa espirituwal, nag-eskedyul silag usa ka gabii alang sa pagtuon sa Bibliya. Ilang gigamit ang librong “Bug-os nga Pagpamatuod” sa Gingharian sa Diyos. “Lingaw kaayo mi sa among pagtuon nga sagad kana mosobrag usa ka oras,” miingon ang usa kanila. “Among handurawon ang kahimtang sa mga igsoon sa unang-siglo ug hisgotan kon unsay among himoon kon masinati ang susamang kahimtang. Dayon among ipadapat diha sa ministeryo ang among nakat-onan. Tungod niini, mas makapalipay ug mabungahon ang among pagsangyaw ug paghimog tinun-an kay sukad masukad.” Gawas nga nalig-on sila sa espirituwal, ang maong kahikayan mas nakapasuod kanila. “Amo gayong gipabilhan ang maong kahikayan,” sila miingon.

17. Unsay makatabang aron magmalamposon ang Pamilyahanong Pagsimba?

¹⁷ Komosta ka? Unsang mga benepisyo ang imong nabatonan sa paggahig usa ka gabii alang sa pamilyahanong pagsimba o personal nga pagtuon? Kon panagsa ra kining himoon, dili makab-ot ang katuyoan niini. Ang matag membro sa pamilya angay nga andam na inig-abot sa oras nga gitakda alang sa pagtuon. Dili sila angayng magpabalda sa mga butang nga dili kaayo hinungdanon. Dugang pa, pilia ang materyal nga tun-an sumala sa panginahanglan sa pamilya. Unsay imong mahimo aron ang pagtuon mahimong makalingaw? Gamita ang epektibong mga paagi sa pagtudlo, ug hupting matinahoron ug malinawon ang inyong pagtuon.—Sant. 3:18. *

“Magtukaw” ug ‘Magmaandam Kanunay’

18, 19. Sa unsang paagi ang pagkahibalo nga duol na ang pag-abot sa Anak sa tawo nag-apektar kanimo ug sa imong pamilya?

¹⁸ Ang nagkagrabeng kahimtang sa kalibotan sa atong panahon nagpamatuod nga sukad niadtong 1914, ang kataposang mga adlaw sa daotang kalibotan ni Satanas nagsugod na. Ang mabaga nga dag-om sa Armagedon hapit nang mobundak. Sa dili madugay ang Anak sa tawo moabot aron ipahamtang ang paghukom ni Jehova sa mga dili-diyosnon. (Sal. 37:10; Prov. 2:21, 22) Dili ba angay kanang mag-apektar kanimo ug sa imong pamilya?

¹⁹ Nagsunod ka ba sa tambag ni Jesus nga maghupot ug “yano” nga mata? Samtang ang mga tawo niining kalibotana nangagpas ug bahandi, kabantog, o gahom, ang inyo bang pamilya nangab-ot ug espirituwal nga mga tumong? Nakabenepisyo ba mo sa kahikayan sa Pamilyahanong Pagsimba o personal nga pagtuon? Nakab-ot ba ninyo ang katuyoan niini? Ingon sa gihisgotan sa miaging artikulo, ginatuman mo ba ang imong responsabilidad ingong bana, asawa, o anak, sa ingon nagtabang sa imong pamilya nga “magtukaw”? (1 Tes. 5:6) Kon mao, ikaw ‘maandam kanunay’ sa pag-abot sa Anak sa tawo.

[Footnote]

Unsay Imong Nakat-onan?

• Ipatin-aw kon sa unsang paagi ang Kristohanong mga pamilya ‘maandam kanunay’ pinaagi sa . . .

paghupot ug “yano” nga mata.

pagtakda ug pagpangab-ot ug espirituwal nga mga tumong.

pagbatog regular nga Pamilyahanong Pagsimba.

[Mga Pangutana sa Pagtuon]

[Hulagway sa panid 13]

Ang “yano” nga mata magtukmod kanato sa pagsalikway sa mga kabaldahan sa kalibotan