Malipay Ka Bang Magtuon sa Pulong sa Diyos?

“SA DIHANG nagbasa na ko sa Bibliya nga regular, ako gibudlayan imbes malipay,” matod ni Lorraine. “Lisod kining masabtan mao nga sagad maglatagaw ang akong hunahuna.”

Ang uban miadmitir nga wala sab sila malingaw sa pagsugod nilag basa sa Bibliya. Apan sila mipadayon kay nahibalo nga ang Balaang Kasulatan angayng basahon. Si Marc miingon: “Daghang makababag sa atong pagbasag Bibliya ug personal nga pagtuon. Gikinahanglan gyod ang regular nga pag-ampo ug dakong paningkamot aron mahimong bahin sa akong rutina ang pagbasa sa Bibliya kada adlaw.”

Unsay imong mahimo aron mas mapabilhan ang Pulong sa Diyos, ang Bibliya? Sa unsang paagi ka malingaw sa pagbasa niini? Tagda ang mosunod nga mga sugyot.

Mga Tumong ug Paagi

Pag-ampo sa dili pa mobasa sa Bibliya ug ipokus ang imong hunahuna niana. Pangayog tabang kang Jehova nga maugmad ang kaikag sa pagtuon sa iyang Pulong. Hangyoa siya nga buksan ang imong hunahuna ug kasingkasing aron mas masabtan ang iyang kaalam. (Sal. 119:34) Kon dili kini himoon, ang pagtuon sa Bibliya mahimong rutina na lang, ug lagmit dili ka na ganahang mopadayon niini. Si Lynn miingon: “Usahay paspas ra kaayo ang akong pagbasa ug masayloan nako ang ubang mga punto. Sagad dili nako bug-os masabtan ang pangunang mga ideya. Apan nag-ampo ko nga makapugong ko sa kaugalingon aron dili maglatagaw ang akong hunahuna.”

Pabilhi ang imong nakat-onan. Hinumdomi nga ang pagsabot ug pagpadapat sa mga kamatuoran sa Bibliya nagkahulogan sa imong kinabuhi. Busa, paningkamoti nga makita ang praktikal nga mga punto ug ipadapat kana. “Mangita kog mga punto nga makatabang nako sa pag-ila sa akong sayop nga mga tinamdan ug motibo,” matod ni Chris. “Makalilipay nga ang Bibliya ug ang atong mga publikasyon naundag mga impormasyon nga nakatabang nako, bisag ang mga tagsulat niini wala makaila nako.”

Pagtakdag makab-ot nga mga tumong. Sulayi sa pagkat-on ug bag-ong mga butang bahin sa mga karakter sa Bibliya. Makakaplag kag makaiikag nga mga butang bahin kanila pinaagi sa pagsusi sa Pagtugkad sa Kasulatan o sa Watch Tower Publications Index. Sa dihang masayran nimo ang personalidad ug pagbati sa mga karakter sa Bibliya, ang ilang panig-ingnan mas dakog epekto kanimo.

Pangitag bag-ong mga paagi sa pagpangatarongan pinasukad sa Kasulatan. (Buh. 17:2, 3) Kana ang tumong ni Sophia sa dihang siya magtuon. “Gusto kong makakat-on ug bag-ong mga paagi sa pagpangatarongan nga magamit nako sa ministeryo ug sa ubang panahon, aron mas makapatin-aw ko sa mga kamatuoran sa Bibliya. Ang Bantayanang Torre maoy labing maayong instrumento sa paghimo niini,” siya miingon.—2 Tim. 2:15.

Handurawa ang mga asoy sa Bibliya. “Ang pulong sa Diyos buhi,” nag-ingon ang Hebreohanon 4:12. Samtang magbasa ka sa Kasulatan, buhia diha sa imong hunahuna ang mensahe sa Diyos pinaagi sa paghanduraw kon unsay nakita sa mga karakter sa Bibliya. Pamatia ang ilang nadungog ug batia ang ilang gibati. Ilangkit ang ilang mga kasinatian sa mga kahimtang sa  imong kinabuhi. Kat-oni kon giunsa nila pagsagubang ang ilang kahimtang. Sa pagbuhat niini, mas masabtan nimo ang mga asoy sa Bibliya ug mas matisok kini sa imong hunahuna.

Paggahig panahon aron masabtan ang lisod nga mga teksto ug ang mga katin-awan niini. Paggahin ug daghang panahon sa matag pagtuon. Lagmit makakita kag makaiikag kaayong mga pangutana nga nagkinahanglag dugang panukiduki. Susiha ang di-pamilyar nga mga pulong, tagda ang mga potnot ug cross-reference sa Bibliya. Kon mas masabtan ug mapadapat nimo ang imong nabasa, mas malipay ka sa pagtuon sa Pulong sa Diyos. Sama sa salmista ikaw makaingon: “Gidawat ko ang imong [Jehova] mga pahinumdom ingon nga katigayonan hangtod sa panahong walay tino, kay sila mao ang kasadya sa akong kasingkasing.”—Sal. 119:111.

Likayi nga magdalidali sa pagtuon. Magmakataronganon sa panahon nga imong gieskedyul alang sa personal nga pagtuon. Paneguroa nga dili kini makakuha sa imong panahon sa pagpangandam sa mga tigom sa kongregasyon. “Kay sagad tensiyonado ko, dili ko makapokus,” matod ni Raquel. “Busa akong nakita nga mapuslanon ang mugbong mga yugto sa pagtuon. Nakatabang kini nako nga makabenepisyog dako sa akong pagtuon.” Si Chris miadmitir: “Kon magdalidali ko, makonsensiya ko kay diyutay ra kaayo ang akong mahinumdoman. Sagad ang impormasyon dili makaabot sa akong kasingkasing.” Busa, ayaw pagdalidali.

Ugmara ang pangandoy sa pulong sa Diyos. Si apostol Pedro miingon: “Sama sa mga bata nga bag-o pang nahimugso, ugmara ang pagpangandoy sa walay sambog nga gatas nga iya sa pulong, nga pinaagi niini kamo managtubo ngadto sa kaluwasan.” (1 Ped. 2:2) Dili na kinahanglang ugmaron sa mga masuso ang pagpangandoy sa gatas kay kana kinaiyanhon kanila. Apan ang Kasulatan nag-ingon nga kita kinahanglang mag-ugmad ug pangandoy sa pulong sa Diyos. Kon mobasa kag bisan usa lang ka panid sa Bibliya kada adlaw, ang maong pangandoy sa dili madugay maugmad. Ang butang nga morag lisod sa sinugdan, sa dili madugay mahimong makapalipay.

Palandonga ang mga teksto sa Kasulatan. Dakog benepisyo usab ang pagpamalandong sa imong gibasa. Kini makatabang nimo sa pagkonektar sa mga topiko nga imong natun-an. Sa dili madugay imong mabatonan ang daghang espirituwal nga perlas sa kaalam—makapalipay nga bahandi.—Sal. 19:14; Prov. 3:3.

 Panahon nga Maayong Pagkagamit

Ang pagsunod sa maayong mga paagi sa pagtuon nagkinahanglag paningkamot, apan ang mga panalangin dili masukod. Pinaagi niini, ang imong pagsabot sa kamatuoran mouswag. (Heb. 5:12-14) Ang lalom nga pagsabot ug kaalam nga imong mabatonan gikan sa inspiradong Kasulatan moresulta sa kalipay, pagkamaayo, ug kalinaw. Ang kaalam diha sa Pulong sa Diyos maoy “kahoy sa kinabuhi” alang niadtong nagbaton ug nagpadapat niini.—Prov. 3:13-18.

Ang lalom nga pagtuon sa Pulong sa Diyos makapatunghag kasingkasing nga may pagsabot. (Prov. 15:14) Kini motabang kanimo sa paghatag ug kinasingkasing nga tambag nga bug-os gibase sa Bibliya. Kon ang imong mga desisyon ipasukad sa Kasulatan ug sa mga basahon sa “matinumanon ug maalamong ulipon,” imong masinati ang makapalagsik ug makapalig-ong impluwensiya sa inspiradong Pulong ni Jehova. (Mat. 24:45) Mahimo kang mas positibo, malaomon, ug hamtong sa espirituwal. Dugang pa, ang tanang kalihokan nga naglangkit sa imong relasyon sa Diyos magmalamposon.—Sal. 1:2, 3.

Ang halalom nga gugma sa Diyos magtukmod kanimo sa pagpaambit sa imong pagtuo. Kini makapatagbaw sab kaayo. Si Sophia naningkamot sa paghinumdom ug sa paggamit ug lainlaing teksto aron makuha ang interes sa tagbalay ug aron mahimong epektibo ug makapalipay ang iyang ministeryo. “Malipay gyod ko sa reaksiyon sa mga tawo inigbasa nila sa mga teksto sa Bibliya,” siya miingon.

Apan ang labing talagsaong benepisyo sa malipayong pagtuon sa Pulong sa Diyos mao ang suod nga relasyon kang Jehova. Pinaagi sa pagtuon sa Bibliya, mahibalo ka sa iyang mga sukdanan ug mapabilhan ang iyang gugma, pagkamahinatagon, ug hustisya. Walay laing buluhaton nga mas importante o makapatagbaw. Magmapuliki sa pagtuon sa Pulong sa Diyos, ug sa ingon imong gipakita nga gigamit nimo ang imong panahon sa maayong paagi.—Sal. 19:7-11.

[Kahon/Mga hulagway sa panid 5]

PAGBASA SA PULONG SA DIYOS: MGA TUMONG UG PAAGI

▪ Pag-ampo sa dili pa mobasa sa Bibliya ug ipokus ang imong hunahuna niana.

▪ Pabilhi ang imong nakat-onan.

▪ Pagtakdag makab-ot nga mga tumong.

▪ Pangitag bag-ong mga paagi sa pagpangatarongan pinasukad sa Kasulatan.

▪ Handurawa ang mga asoy sa Bibliya.

▪ Paggahig panahon aron masabtan ang lisod nga mga teksto ug ang mga katin-awan niini.

▪ Likayi nga magdalidali sa pagtuon.

▪ Ugmara ang pangandoy sa pulong sa Diyos.

▪ Palandonga ang mga teksto sa Kasulatan.

[Hulagway sa panid 4]

Sa dihang magbasag usa ka asoy sa Bibliya, handurawa nga anaa ka sa susamang kahimtang