Ang Diyos Nagrekomendar sa Iyang Gugma Kanato
Ang Diyos Nagrekomendar sa Iyang Gugma Kanato
“Ang dili-takos nga kalulot magmando ingong hari pinaagi sa pagkamatarong alang sa kinabuhing walay kataposan.”—ROMA 5:21.
1, 2. Unsa ang duha ka gasa nga gihisgotan, ug asa niana ang mas bililhon?
ANG usa ka propesor sa University of Melbourne sa Australia miingon nga ang bililhon ug malungtarong gasa sa Imperyo sa Roma para sa sibilisasyon mao ang ilang balaod. Apan ang Diyos naghatag kanatog mas bililhon ug mahigugmaong gasa. Kini maoy paagi sa Diyos aron kita iyang uyonan ug isipong matarong ug makalaom sa kaluwasan ug kinabuhing dayon.
2 Sa usa ka diwa, ang paagi sa Diyos sa pagtagana niini nga gasa nalangkit sa iyang balaod, o hustisya. Sa Roma kapitulo 5, si apostol Pablo wala magpresentar niini pinaagig detalyadong paghisgot sa balaod. Hinunoa, gisugdan niya kini sa makapalipay nga pasalig: “Kita gipahayag na nga matarong tungod sa pagtuo, [busa] tagamtamon nato ang pakigdait uban sa Diyos pinaagi sa atong Ginoong Jesu-Kristo.” Kadtong nakadawat sa gasa sa Diyos matukmod sa pagbalos sa iyang gugma. Si Pablo usa niana. Siya misulat: “Ang gugma sa Diyos gibubo man nganhi sa atong mga kasingkasing pinaagi sa balaang espiritu.”—Roma 5:1, 5.
3. Unsang mga pangutana ang motungha?
3 Apan, nganong gikinahanglan kining mahigugmaong gasa? Sa unsang paagi ang Diyos makatanyag niini sa makataronganon o makiangayong paagi? Ug unsay angayng buhaton sa mga tawo aron makadawat niana? Atong susihon ang makapatagbawng mga tubag ug tan-awon kon sa unsang paagi kana nagpasiugda sa gugma sa Diyos.
Gugma sa Diyos Batok Sala
4, 5. (a) Sa unsang paagi gipahayag ni Jehova ang iyang dakong gugma? (b) Unsay angay natong mahibaloan aron masabtan ang Roma 5:12?
4 Tungod sa iyang dakong gugma, si Jehova nagpadala sa iyang bugtong Anak aron tabangan ang katawhan. Si Pablo miingon: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Matikdi ang usa ka butang nga gihisgotan: “Kita mga makasasala pa.” Ang tanan kinahanglang mahibalo kon sa unsang paagi kita nahimong makasasala.
5 Sa pagpatin-aw niana, kini ang unang punto nga gisulti ni Pablo: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Kita makasabot niini kay gipasulat sa Diyos ang sinugdanan sa tawo. Gilalang ni Jehova si Adan ug Eva. Kay ang Maglalalang hingpit, mao man usab ang atong unang ginikanan. Sila gidid-an sa Diyos sa usa lamang ka butang ug giingnan nga kon sila mosupak sa maong balaod, sila mamatay. (Gen. 2:17) Apan, sila misupak sa makataronganong sugo sa Diyos, sa ingon ilang gisalikway siya ingong Maghahatag-balaod ug Soberano.—Deut. 32:4, 5.
6. (a) Nganong mamatay ang mga kaliwat ni Adan? (b) Sa unsang paagi ikailustrar ang epekto sa napanunod nga sala?
6 Human makasala si Adan, siya nakabatog mga anak, ug busa sila nakapanunod sa sala ug sa mga epekto niini. Siyempre, sila wala makalapas sa balaod sa Diyos sama kang Adan, busa sila dili sad-an sa samang sala; ni may mga balaod nga gihatag na. (Gen. 2:17) Bisan pa niana, ang kaliwat ni Adan nakapanunod sa sala. Busa, ang sala ug kamatayon nagmando na sa dihang ang Diyos naghatag sa mga Israelinhon sa Moisesnong Balaod, nga tin-awng nagpakita nga sila makasasala. (Basaha ang Roma 5:13, 14.) Ang epekto sa sala ikailustrar sa napanunod nga mga sakit o depekto, sama sa Mediterranean anemia o hemophilia (bleeding disorder). Tingali nakabasa ka nga si Alexis, ang anak lalaki sa Rusong Czar nga si Nicholas II ug ni Alexandra, nakapanunod sa hemophilia. Tinuod nga bisan sa ingon nga mga pamilya, ang pipila ka anak dili masakit niana, apan sila makapasa gihapon niini ngadto sa ilang mga anak. Apan lahi ang sala nga gikan ni Adan, kini dili kalikayan ug kanunayng makamatay. Ug kini gipasa sa tanang anak. Matapos pa kaha kining alaot nga kahimtang?
Ang Gitagana sa Diyos Pinaagi ni Jesu-Kristo
7, 8. Sa unsang paagi ang kinabuhi sa duha ka hingpit nga tawo mitultol sa magkalahing resulta?
7 Sa kamahigugmaon, si Jehova may gitagana aron ang tawo makalingkawas sa napanunod nga sala. Gipatin-aw ni Pablo nga kadto naposible pinaagi sa laing hingpit nga tawo—ang ikaduhang Adan. (1 Cor. 15:45) Apan magkalahi kaayo ang resulta sa kinabuhi sa duha ka hingpit nga tawo. Sa unsang paagi?—Basaha ang Roma 5:15, 16.
8 “Ang gasa dili ingon sa paglapas,” si Pablo misulat. Si Adan nakalapas, ug siya makataronganong gisilotan sa kamatayon. Apan, dili lamang siya ang namatay. Atong mabasa: “Sa paglapas sa [maong] usa ka tawo daghan ang nangamatay.” Ang silot ni Adan naagoman usab sa tanan niyang dili-hingpit nga kaliwat, apil kita. Bisan pa niana, mahupayan kitang mahibalo nga ang hingpit nga tawong si Jesus makapatunghag katugbang nga resulta. Unsa kana? Ang tubag makita sa giingon ni Pablo nga “ang tanang matang sa tawo igapahayag nga matarong alang sa kinabuhi.”—Roma 5:18.
9. Unsay gihimo sa Diyos aron ikapahayag ang mga tawo nga matarong, sumala sa Roma 5:16, 18?
9 Unsay kahulogan sa Gregong mga pulong nga gihubad nga “pagpahayag sa pagkamatarong” ug “igapahayag nga matarong”? Usa ka maghuhubad sa Bibliya misulat: “Kini maoy pagtandi nga nagpahayag ug daw legal nga punto. Nagtumong kini sa kausaban sa kahimtang sa usa ka tawo maylabot sa Diyos, dili sa kausaban sa iyang pagkatawo . . . Kini nga pagtandi naghulagway sa Diyos ingong maghuhukom nga midesisyon pabor sa akusado, kinsa samag gidala atubangan sa hukmanan sa Diyos nga giakusahan sa pagkadili-matarong. Apan siya giabsuwelto sa Diyos.”
10. Unsay gihimo ni Jesus nga maoy basehanan aron ang mga tawo ikapahayag nga matarong?
10 Unsay basehanan sa matarong nga “Maghuhukom sa tibuok yuta” sa pag-absuwelto sa tawong dili-matarong? (Gen. 18:25) Una, siya mahigugmaong nagpadala sa iyang bugtong Anak sa yuta. Si Jesus hingpit nga nagbuhat sa kabubut-on sa iyang Amahan bisan pa sa mga tentasyon, grabeng pagbiaybiay, ug pagdagmal. Siya nagmatinumanon hangtod nga namatay sa sakitanang estaka. (Heb. 2:10) Sa paghalad sa iyang hingpit tawhanong kinabuhi, gitanyag ni Jesus ang lukat nga mahimong magpahigawas o magtubos sa mga kaliwat ni Adan gikan sa sala ug kamatayon.—Mat. 20:28; Roma 5:6-8.
11. Unsang panagtugbang ang gibasehan sa lukat?
11 Sa laing basahon, gitawag kini ni Pablo nga “katugbang nga lukat.” (1 Tim. 2:6) Unsay gitugbangan niini? Si Adan nagpasa sa pagkadili-hingpit ug kamatayon sa binilyon niyang kaliwat. Tinuod nga ang hingpit nga tawong si Jesus makapatungha untag binilyong hingpit nga kaliwat. * Busa, gisabot nga ang kinabuhi ni Jesus ug sa tanang posibleng hingpit niyang kaliwat maoy halad nga katumbas sa kinabuhi ni Adan ug sa iyang dili-hingpit nga mga kaliwat. Apan ang Bibliya wala mag-ingon nga ang posibleng kaliwat ni Jesus maoy bahin sa lukat. Ang Roma 5:15-19 nag-ingon nga ang kinabuhi sa ‘usa lamang ka tawo’ ang nagtubos. Oo, ang hingpit nga kinabuhi ni Jesus mao ang katugbang sa kinabuhi ni Adan. Ang hinungdanon mao lamang si Jesu-Kristo. Tungod sa “usa ka buhat sa pagkamatarong” ni Jesus, ang iyang pagkamasinugtanon ug pagkamatinumanon bisan hangtod sa kamatayon, ang tanang matang sa tawo mahimong makadawat sa walay-bayad nga gasa ug sa kinabuhi. (2 Cor. 5:14, 15; 1 Ped. 3:18) Sa unsang paagi kana nahitabo?
Pagkaabsuwelto Gibase sa Lukat
12, 13. Nganong kadtong gipahayag nga matarong nagkinahanglan sa kaluoy ug gugma sa Diyos?
12 Gidawat ni Jehova nga Diyos ang halad lukat nga gitanyag sa iyang Anak. (Heb. 9:24; 10:10, 12) Bisan pa niana, ang mga tinun-an ni Jesus, lakip sa iyang matinumanong mga apostoles, nagpabiling dili-hingpit. Bisag naningkamot sila nga dili makabuhat ug daotan, may panahon nga napakyas sila. Ngano? Kay sila nakapanunod sa sala. (Roma 7:18-20) Apan ang Diyos may gihimo bahin niana. Iyang gidawat ang “katugbang nga lukat” ug andam nga ipadapat kana alang sa iyang mga alagad.
13 Gipadapat sa Diyos ang lukat ngadto sa mga apostoles ug sa uban dili tungod sa ilang maayong mga buhat kondili tungod sa iyang kaluoy ug dakong gugma. Iyang gipili nga maabsuwelto ang mga apostoles ug ang uban sa napanunod nga sala. Gipatin-aw kana ni Pablo: “Pinaagi niining dili-takos nga kalulot, sa pagkatinuod, kamo giluwas pinaagi sa pagtuo; ug kini dili tungod kaninyo, kini gasa sa Diyos.”—Efe. 2:8.
14, 15. Unsang ganti ang madawat niadtong gipahayag sa Diyos nga matarong, apan unsa pay kinahanglan nilang buhaton?
14 Pagkatalagsaong gasa nga ang Labing Gamhanan magpasaylo sa napanunod nga sala ug sa mga sala nga nahimo sa usa ka tawo! Dili maihap ang mga sala sa mga tawo sa wala pa sila mahimong Kristohanon; apan base sa lukat, mapasaylo sa Diyos ang maong mga sala. Si Pablo misulat: “Ang gasa misangpot gikan sa daghang kalapasan ngadto sa pagpahayag sa pagkamatarong.” (Roma 5:16) Ang mga apostoles ug ang uban nga nakadawat niining mahigugmaong gasa (gipahayag nga matarong) kinahanglang magpadayon sa pagsimba sa Diyos uban ang pagtuo. Unsay ilang ganti? ‘Kadtong nagadawat sa kadagaya sa dili-takos nga kalulot ug sa walay bayad nga gasa sa pagkamatarong magmando ingong mga hari diha sa kinabuhi pinaagi sa usa ka persona, si Jesu-Kristo.’ Sa pagkatinuod, ang gasa sa pagkamatarong moresulta sa kinabuhi.—Roma 5:17; basaha ang Lucas 22:28-30.
15 Kadtong nakadawat sa maong gasa, nga gipahayag nga matarong, mahimong espirituwal nga mga anak sa Diyos. Ingong kaubang mga manununod ni Kristo, sila may paglaom nga mabanhaw ingong espiritung mga anak nga “magmando ingong mga hari” uban ni Jesu-Kristo.—Basaha ang Roma 8:15-17, 23.
Gugma sa Diyos Gipakita Ngadto sa Uban
16. Unsang gasa ang madawat niadtong may yutan-ong paglaom bisan karon?
16 Dili tanan nga nagpakitag pagtuo ug nagmaunongon sa Diyos ang nagdahom nga “magmando ingong mga hari” uban ni Kristo sa langit. Daghan ang may paglaom nga sama sa mga alagad sa Diyos sa wala pa ang panahon ni Kristo. Sila naglaom nga mabuhi sa walay kataposan sa paraisong yuta. Madawat ba nila bisan karon ang mahigugmaong gasa sa Diyos ug isipong matarong uban ang paglaom nga mabuhi sa yuta? Base sa gisulat ni Pablo sa mga taga-Roma, oo!
17, 18. (a) Tungod sa pagtuo ni Abraham, unsay pag-isip sa Diyos kaniya? (b) Nganong giisip ni Jehova si Abraham nga matarong?
17 Si Pablo naghisgot kang Abraham, usa ka maayong ehemplo sa pagtuo nga nagkinabuhi sa wala pa hatagi ni Jehova ug balaod ang Israel ug sa wala pa buksi ni Kristo ang dalan ngadto sa langitnong kinabuhi. (Heb. 10:19, 20) Atong mabasa: “Dili pinaagi sa balaod nga si Abraham o ang iyang binhi nakabaton sa saad nga mahimo siyang manununod sa usa ka kalibotan, kondili pinaagi sa pagkamatarong tungod sa pagtuo.” (Roma 4:13; Sant. 2:23, 24) Busa giisip sa Diyos nga matarong ang matinumanong si Abraham.—Basaha ang Roma 4:20-22.
18 Kana wala magpasabot nga si Abraham walay sala samtang nag-alagad kang Jehova sa daghang katuigan. (Roma 3:10, 23) Hinunoa, tungod sa way-kinutobang kaalam ni Jehova, gipabilhan niya ang talagsaong pagtuo ug mga buhat ni Abraham ilabina ang iyang pagpakitag pagtuo sa gisaad nga “binhi” nga maggikan sa iyang banay. Kana nga Binhi mao ang Mesiyas, o Kristo. (Gen. 15:6; 22:15-18) Base “sa lukat nga gibayad ni Kristo Jesus,” ang langitnong Maghuhukom makapasaylo sa mga sala nga nahimo sa karaang panahon. Busa, si Abraham ug ang ubang tawo sa pagtuo sa wala pa ang Kristohanong panahon pagabanhawon.—Basaha ang Roma 3:24, 25; Sal. 32:1, 2.
Tagamtama ang Matarong nga Baroganan Karon
19. Nganong makapadasig sa daghan karon ang pag-isip sa Diyos kang Abraham?
19 Ang pag-isip sa mahigugmaong Diyos kang Abraham ingong matarong makapadasig sa matuod nga mga Kristohanon karon. Ang pagpahayag ni Jehova kaniya nga matarong dili samag kahulogan niadtong gidihogan niya sa espiritu aron mahimong “kaubang mga manununod ni Kristo.” Ang limitadong gidaghanon sa maong grupo “gitawag aron mahimong mga balaan” ug gidawat ingong “mga anak sa Diyos.” (Roma 1:7; 8:14, 17, 33) Sa kasukwahi, si Abraham gitawag nga “higala ni Jehova”—ug kana sa wala pa ihalad ang lukat. (Sant. 2:23; Isa. 41:8) Nan, komosta ang matuod nga mga Kristohanon nga naglaom nga mabuhi sa napasig-uling Paraiso sa yuta?
20. Unsay gidahom sa Diyos niadtong giisip niya karon nga matarong, sama kang Abraham?
20 Sila wala makadawat sa “walay bayad nga gasa sa pagkamatarong” uban ang paglaom sa langitnong kinabuhi “tungod sa pagpagawas pinaagi sa lukat nga gibayad ni Kristo Jesus.” (Roma 3:24; 5:15, 17) Bisan pa niana, sila nagpakitag lalom nga pagtuo sa Diyos ug sa iyang mga tagana, ug ila kanang gipasundayag pinaagi sa maayong binuhatan. Usa niana mao ang ‘pagwali sa gingharian sa Diyos ug pagtudlo sa mga butang mahitungod sa Ginoong Jesu-Kristo.’ (Buh. 28:31) Busa, mahimong isipon sila ni Jehova nga matarong sama kang Abraham. Ang gasa nga ilang madawat—pagkahigala sa Diyos—lahi sa “walay bayad nga gasa” nga madawat sa mga dinihogan. Apan sila mapasalamaton sa maong gasa.
21. Unsang mga benepisyo ang mabatonan tungod sa gugma ug hustisya ni Jehova?
21 Ang paglaom nga kinabuhing dayon sa yuta wala maggikan sa tawhanong magmamando. Hinunoa, kini gipasukad sa maalamong katuyoan sa Soberano sa Uniberso. Si Jehova mihimog progresibong mga lakang aron matuman ang iyang katuyoan. Kini nga mga lakang kaharmonya sa tinuod nga hustisya. Labaw pa niana, kini nagpadayag sa dakong gugma sa Diyos. Busa si Pablo nakaingon: “Ang Diyos nagrekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.”—Roma 5:8.
[Footnote]
^ par. 11 Ang maong panglantaw bahin sa mga kaliwat gihisgotan sa Pagtugkad sa Kasulatan, Tomo 2, panid 209, parapo 2 ug 3.
Nahinumdom Ka Ba?
• Unsay napanunod sa mga kaliwat ni Adan, ug unsay resulta?
• Sa unsang paagi gitagana ang katugbang nga lukat, ug sa unsang diwa kini may panagtugbang?
• Unsay imong palaaboton tungod kay ikaw gipahayag nga matarong?
[Mga Pangutana sa Pagtuon]
[Hulagway sa panid 13]
Ang hingpit nga tawong si Adan nakasala. Ang hingpit nga tawong si Jesus naghalad sa “katugbang nga lukat”
[Hulagway sa panid 15]
Maayong balita gayod—pinaagi ni Jesus kita ikapahayag nga matarong!
