Angay Bang Bawtismohan ang mga Bata?

“NALIPAY kaayo ko nga ang akong anak babaye alagad na ni Jehova, ug nahibalo ko nga malipayon sab siya kaayo,” miingon si Carlos, * usa ka Kristohanong amahan sa Pilipinas. Ang usa ka amahan nga taga-Greece misulat: “Nalipay mi sa akong asawa nga ang among tulo ka bata bawtismado na. Sila miuswag sa espirituwal ug malipayong nag-alagad kang Jehova.”

Ang Kristohanong mga ginikanan malipay sa dihang mabawtismohan ang ilang mga anak, apan usahay mabalaka sab sila. “Nalipay kaayo ko pero nabalaka sab ko,” matod sa usa ka inahan. Ngano? “Kay ang akong anak manubag na kang Jehova.”

Angayng himoong tumong sa tanang kabataan nga mahimong bawtismadong alagad ni Jehova. Apan ang diyosnong mga ginikanan tingali maghunahuna, ‘Nahibalo ko nga maayo ang pag-uswag sa akong anak, pero makasukol na kaha siya sa imoral nga pagpamit-os ug makapabiling hinlo atubangan kang Jehova?’ Ang uban makapangutana sa kaugalingon, ‘Sa dihang mag-atubang ug tentasyon bahin sa materyalismo, makapadayon kaha ang akong anak sa pag-alagad sa Diyos uban ang kalipay ug kasibot?’ Unsang giya sa Bibliya ang makatabang sa mga ginikanan sa pagsusi kon ang ilang mga anak andam na alang sa bawtismo?

Pagkatinun-an—Pangunang Kinahanglanon

Imbes maghatag ug espesipikong edad kon kanus-a magpabawtismo, ang Pulong sa Diyos naghubit sa espirituwal nga kahimtang niadtong kuwalipikado na niana. Si Jesus nagsugo sa iyang mga sumusunod: “Paghimog mga tinun-an sa katawhan sa tanang kanasoran, nga magabawtismo kanila.” (Mat. 28:19) Busa, ang bawtismo maoy alang niadtong tinun-an na ni Kristo.

Unsa ang pagkatinun-an? Ang Pagtugkad sa Kasulatan nagpatin-aw: “Ang pangunang gitumong niini nga termino mao ang tanan nga wala lamang motuo sa mga pagtulon-an ni Kristo apan niadtong nagsunod usab pag-ayo niini.” Mahimo bang tinuod nga mga tinun-an ni Kristo ang mga bata pa kaayo? Ang usa ka  misyonarya nga nag-alagad sa Latin America sa kapig 40 ka tuig misulat bahin kaniya ug sa iyang duha ka igsoong babaye: “Bisag bata pa mi, gusto na namong moalagad kang Jehova ug mopuyo sa Paraiso. Ang among pagpahinungod nagpalig-on kanamo sa pag-atubang sa mga tentasyon sa pagkabatan-on. Wala mi magmahay nga nagpahinungod mi sa Diyos sa linghod nga pangedaron.”

Unsaon nimo pagkahibalo kon ang imong anak tinun-an na ni Kristo? Ang Bibliya nag-ingon: “Pinaagi sa iyang mga binuhatan ang usa ka bata magpaila sa iyang kaugalingon kon ang iyang kalihokan maoy lunsay ug matul-id.” (Prov. 20:11) Tagda ang pipila ka binuhatan nga magpaila nga ang usa ka bata ‘nagpadayag sa iyang pag-uswag’ ingong tinun-an.—1 Tim. 4:15.

Pamatuod sa Pagkatinun-an

Ginasunod ka ba sa imong anak? (Col. 3:20) Ginahimo ba niya ang iyang mga buluhaton sa balay? Ang Bibliya nag-ingon bahin sa 12-anyos nga si Jesus: “Siya nagpadayon sa pagpasakop [sa iyang ginikanan].” (Luc. 2:51) Siyempre, walay bata karon ang hingpit nga makasunod sa iyang ginikanan. Apan ang matuod nga mga Kristohanon kinahanglang ‘mosunod pag-ayo sa mga tunob ni Jesus.’ Busa ang mga bata nga gustong magpabawtismo angayng magmasinundanon sa ilang ginikanan.—1 Ped. 2:21.

Tagda ang mosunod nga mga pangutana: Ang imo bang anak ‘nag-una sa Gingharian’ pinaagi sa bug-os nga pagpakig-ambit sa ministeryo? (Mat. 6:33) Kinabubut-on ba siyang mopaambit sa maayong balita sa uban, o kinahanglan pa nimo siyang agdahon nga mosangyaw? Mahunahunaon ba siya sa iyang responsabilidad ingong di-bawtismadong magmamantala? May tinguha ba siya nga balikan ang mga interesado nga nahibalag sa teritoryo? Nailhan ba siya sa iyang mga eskolmet ug magtutudlo ingong Saksi ni Jehova?

Importante ba niya ang pagtambong sa mga tigom? (Sal. 122:1) Ganahan ba siyang mokomento panahon sa Pagtuon sa Bantayanang Torre ug sa Pagtuon sa Kongregasyon sa Bibliya? Malipay ba siyang makigbahin sa Teokratikanhong Tunghaan sa Ministeryo?—Heb. 10:24, 25.

Ang imo bang anak naningkamot nga magpabiling hinlo sa moral pinaagi sa paglikay sa makadaot nga mga kauban sa eskuylahan ug sa ubang dapit? (Prov. 13:20) Unsay hilig niya nga musika, pelikula, programa sa TV, video game, ug site sa Internet? Ang iyang bang sinultihan ug linihokan nagpakita nga buot niyang sundon ang mga sukdanan sa Bibliya?

Sinati ba ang imong anak sa Bibliya? Makasulti ba siya sa iyang kaugalingong pulong sa iyang nakat-onan sa Pamilyahanong Pagsimba? Makasaysay ba siya sa pangunang mga kamatuoran sa Bibliya? (Prov. 2:6-9) Interesado ba siyang mobasa sa Bibliya ug motuon sa mga publikasyon sa matinumanon ug maalamong ulipon? (Mat. 24:45) Mangutana ba siya bahin sa mga pagtulon-an sa Bibliya ug mga teksto?

 Ang maong mga pangutana motabang kanimo sa pagsukod sa espirituwal nga pag-uswag sa imong anak. Human sa pagkonsiderar niana, imong makita kon unsay angay pa niyang pauswagon sa dili pa magpabawtismo. Apan kon siya nagpakitag pamatuod sa pagkatinun-an ug nagpahinungod na sa iyang kinabuhi sa Diyos, mahimong tugotan na nimo siyang magpabawtismo.

Ang mga Bata Makadayeg Kang Jehova

Daghang alagad sa Diyos ang nagmatinumanon ug nagmaunongon kaniya sa ilang pagkabatan-on o sayo pa niana. Hinumdomi si Jose, Samuel, Josias, ug Jesus. (Gen. 37:2; 39:1-3; 1 Sam. 1:24-28; 2:18-20; 2 Cron. 34:1-3; Luc. 2:42-49) Ug ang upat ka anak babaye ni Felipe, nga nanagna, tino nga nabansay pag-ayo sukad sa pagkabata.—Buh. 21:8, 9.

Usa ka Saksi sa Greece miingon: “Nabawtismohan ko sa edad nga 12. Wala ko magmahay sa akong desisyon. Sukad niadto, 24 ka tuig na ang milabay, 23 niana akong gigugol sa pagpayunir. Tungod sa akong gugma kang Jehova, nasagubang nako ang mga suliran sa pagkabatan-on. Niadtong 12 anyos ko, gamay ra ang akong kahibalo sa Kasulatan kon itandi karon. Pero gihigugma na nako si Jehova niadto ug gusto nang moalagad niya hangtod sa hangtod. Nalipay ko nga iya kong gitabangan nga makapadayon sa pag-alagad.”

Bata man o tigulang, ang usa nga nagpakitag pamatuod sa pagkatinun-an angay nang magpabawtismo. Si apostol Pablo misulat: “Pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan.” (Roma 10:10) Sa dihang magpabawtismo na ang usa ka bata, siya ug ang iyang ginikanan nakaabot sa usa ka hinungdanong yugto sa ilang kinabuhi. Hinaot nga walay makababag kanimo ug sa imong mga anak sa kalipay nga inyong masinati sa umaabot.

[Footnote]

[Kahon sa panid 5]

Hustong Panglantaw sa Bawtismo

Giisip sa ubang ginikanan nga ang pagpabawtismo sa ilang anak maoy hinungdanong lakang nga may risgo—samag pagkuhag lisensiya sa pagdrayb. Apan ang bawtismo ug sagradong pag-alagad ba makapugong sa kalamposan sa usa? Dili, kay ang Proverbio 10:22 nag-ingon: “Ang panalangin ni Jehova—mao kana ang makapadato, ug dili niya kana dugangan ug kasakit.” Ug si Pablo misulat sa batan-ong si Timoteo: “Sa pagkatinuod, kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento.”—1 Tim. 6:6.

Tinuod, dili sayon ang pag-alagad kang Jehova. Si Jeremias nag-atubang ug daghang kalisdanan ingong propeta sa Diyos. Apan siya misulat bahin sa iyang pagsimba sa matuod nga Diyos: “Ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova nga Diyos sa mga panon.” (Jer. 15:16) Nahibalo si Jeremias nga ang tuboran sa iyang kalipay mao ang pag-alagad sa Diyos. Ang kalibotan ni Satanas maoy tuboran sa kalisdanan. Kinahanglang tabangan sa mga ginikanan ang ilang mga anak sa pag-ila sa maong kalainan.—Jer. 1:19.

 [Kahon/Hulagway sa panid 6]

Angay Bang Dili Una Magpabawtismo ang Akong Anak?

Usahay, bisag kuwalipikado na ang mga bata alang sa bawtismo, pugngan sila sa ilang mga ginikanan. Ngano?

Nahadlok ko nga kon bawtismado na ang akong anak, basin makasala siya sa ulahi ug mapalagpot. Ang usa ka batan-on nga dili pa bawtismado dili ba manubag sa Diyos sa iyang binuhatan? Si Solomon nagtumong sa mga batan-on sa dihang siya miingon: “Hibaloi nga tungod [sa imong binuhatan] ang matuod nga Diyos magdala kanimo ngadto sa paghukom.” (Eccl. 11:9) Si Pablo naghatag niini nga pahinumdom alang sa tanan: “Ang matag usa kanato manubag alang sa iyang kaugalingon ngadto sa Diyos.”—Roma 14:12.

Ang bawtismado ug di-bawtismadong mga magsisimba manubag sa Diyos. Ayaw kalimti nga si Jehova manalipod sa iyang mga alagad pinaagi sa ‘dili pagtugot nga tentalon sila nga labaw sa ilang maantos.’ (1 Cor. 10:13) Kon ilang ‘huptan ang maayong panghunahuna’ ug suklan ang tentasyon, sila makalaom sa tabang sa Diyos. (1 Ped. 5:6-9) Usa ka Kristohanong inahan misulat: “Ang bawtismadong mga batan-on mas daghag rason nga magpahilayo sa daotang mga butang sa kalibotan. Ang akong anak lalaki, nga nabawtismohan sa edad nga 15, mibati nga ang bawtismo usa ka proteksiyon. ‘Dili ka maghunahuna nga supakon ang balaod ni Jehova,’ siya miingon. Ang bawtismo maoy lig-ong panukmod sa pagbuhat kon unsay matarong.”

Kon imong gibansay ang imong mga anak sa pagsunod kang Jehova pinaagi sa pulong ug panig-ingnan, makaseguro ka nga human sa ilang bawtismo padayon nila kanang himoon. Ang Proverbio 20:7 nag-ingon: “Ang matarong nagalakaw diha sa iyang integridad. Malipayon ang iyang mga anak sunod kaniya.”

Gusto ko nga mangab-ot unag pipila ka tumong ang akong anak. Ang mga batan-on angayng makakat-on sa pagtrabaho, aron sa ulahi makasuportar sila sa ilang kaugalingon. Apan may kapeligrohan ang pagdasig kanila nga unahon ang edukasyon ug pinansiyal nga kasegurohan inay ang matuod nga pagsimba. Bahin sa “binhi” o pulong sa Gingharian nga wala motubo, si Jesus miingon: “Mahitungod sa napugas taliwala sa mga sampinit, mao kini siya ang nakadungog sa pulong, apan ang kabalaka niining sistema sa mga butang ug ang malimbongong gahom sa mga bahandi motuok sa pulong, ug siya dili mamunga.” (Mat. 13:22) Kon dasigon sa ginikanan ang anak nga unahon ang kalibotanong mga tumong inay ang espirituwal nga mga butang, mabugnaw ang tinguha sa bata nga moalagad sa Diyos.

Usa ka dugay nang ansiyano mikomento bahin sa mga batan-on nga kuwalipikado nang magpabawtismo apan gibabagan sa mga ginikanan: “Ang pagpugong sa bata nga magpabawtismo makadaot sa iyang espirituwal nga pag-uswag ug mahimong masagmuyo.” Usa ka nagapanawng magtatan-aw misulat: “Ang bata mahimong mobati nga huyang pa ang iyang relasyon kang Jehova o menos pa ang iyang pag-uswag kay sa uban. Basin pangitaon niya diha sa kalibotan ang iyang kalamposan.”

[Hulagway]

Angay bang unahon ang taas nga edukasyon?

[Hulagway sa panid 3]

Ang bata makapamatuod sa iyang pagkatinun-an

[Mga hulagway sa panid 3]

Pagpangandam ug pagkomento sa mga tigom

[Hulagway sa panid 4]

Pagsunod sa ginikanan

[Hulagway sa panid 4]

Pagpakigbahin sa ministeryo

[Hulagway sa panid 4]

Personal nga pag-ampo