Bantayi ang Panon sa Diyos nga Gisalig Kaninyo
Bantayi ang Panon sa Diyos nga Gisalig Kaninyo
“Bantayi ninyo ang panon sa Diyos nga ubos sa inyong pag-atiman, dili nga pinugos, kondili kinabubut-on.”—1 PED. 5:2.
1. Unsa ang kahimtang sa mga Kristohanon sa dihang gihimo ni Pedro ang iyang unang sulat?
SA WALA pa mosugod si Nero sa paglutos sa mga Kristohanon sa Roma, si apostol Pedro mihimo sa iyang unang sulat. Gusto niyang palig-onon ang iyang isigkamagtutuo. Ang Yawa “nagasuroysuroy” nga nagtinguha sa pagtukob sa mga Kristohanon. Aron makabarog batok kaniya, kinahanglan silang ‘maghupot ug maayong panghunahuna’ ug ‘magpaubos sa ilang kaugalingon ilalom sa gamhanang kamot sa Diyos.’ (1 Ped. 5:6, 8) Kinahanglan sab silang magpabiling nahiusa. Peligroso nga sila ‘magpinahitay ug magtinukbanay sa usag usa,’ kay kana moresulta nga sila “mangalaglag pinaagi sa usag usa.”—Gal. 5:15.
2, 3. Batok kang kinsa kita angayng makigdumog, ug unsay atong hisgotan niining duha ka artikulo?
2 Susama usab niana ang atong kahimtang karon. Ang Yawa nangitag mga kahigayonan sa pagtukob kanato. (Pin. 12:12) Ug anaa sa atong unahan ang “dakong kasakitan nga ang ingon niana wala pa mahitabo sukad sa sinugdan sa kalibotan.” (Mat. 24:21) Sama sa mga Kristohanon sa unang siglo nga nagbantay batok sa pag-awayay, angay usab kitang magbantay. Aron mahimo kini, kinahanglan usahay nato ang tabang sa mga ansiyano.
3 Atong tagdon kon sa unsang paagi mas mapabilhan sa mga ansiyano ang pribilehiyo sa pagbantay sa ‘panon sa Diyos nga gisalig kanila.’ (1 Ped. 5:2) Dayon, atong palandongon ang hustong paagi sa pagbantay sa panon. Sa sunod artikulo, atong susihon kon sa unsang paagi ‘tamdon sa kongregasyon kadtong naghago ug nagdumala’ sa panon. (1 Tes. 5:12) Ang paghisgot niini makatabang kanato sa pagbarog nga malig-on batok sa atong pangunang Kaaway, nga kaniya kita may pakigdumog.—Efe. 6:12.
Bantayi ang Panon sa Diyos
4, 5. Unsa ang angayng panghunahuna sa mga ansiyano bahin sa panon? Iilustrar.
4 Gidasig ni Pedro ang mga ansiyano sa unang siglo nga magbaton ug diyosnong panghunahuna bahin sa panon nga gisalig kanila. (Basaha ang 1 Pedro 5:1, 2.) Bisag si Pedro giisip nga usa ka haligi sa kongregasyon, wala siya makigsulti sa mga ansiyano nga mahariharion. Hinunoa, siya nag-awhag kanila ingong isigkaansiyano. (Gal. 2:9) Sama sa paagi ni Pedro, ang Nagamandong Lawas karon nag-awhag sa mga ansiyano sa kongregasyon sa pagtuman sa bug-at nga responsabilidad ingong magbalantay sa panon sa Diyos.
5 Ang apostol misulat nga ang mga ansiyano angayng ‘magbantay sa panon sa Diyos nga ilalom sa ilang pag-atiman.’ Hinungdanon nga ilang ilhon nga ang panon iya ni Jehova ug ni Jesu-Kristo. Ang mga ansiyano manubag kon giunsa nila pagbantay ang panon sa Diyos. Ibutang ta nga hangyoon ka sa imong suod nga higala nga bantayan ang iyang mga anak samtang wala siya. Dili ba nimo sila atimanon ug pakan-on? Kon ang usa masakit, dili ba nimo siya patambalan? Sa susama, ang mga ansiyano kinahanglang “magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buh. 20:28) Hinumdoman nila kanunay nga ang matag karnero gipalit pinaagi sa bililhong dugo ni Kristo Jesus. Kay may tulubagon, ang mga ansiyano magpakaon, manalipod, ug mag-atiman sa panon.
6. Unsay responsabilidad sa mga magbalantay sa karnero sa karaang panahon?
6 Hunahunaa ang mga responsabilidad sa magbalantay sa karnero sa panahon sa Bibliya. Ilang giantos ang kainit sa adlaw ug katugnaw sa kagabhion aron bantayan ang panon. (Gen. 31:40) Gipameligro pa gani nila ang ilang kinabuhi alang sa mga karnero. Ang magbalantay nga si David nagluwas sa iyang panon gikan sa mapintas nga mga mananap, sama sa leyon ug oso. Si David miingon nga iyang ‘gikuptan ang bungot niini ug gihampak kini ug gipatay.’ (1 Sam. 17:34, 35) Pagkamaisogon! Pagkaduol niya sa baba sa mananap! Bisan pa niana, wala siya managana sa pagluwas sa karnero.
7. Sa simbolikong pagkasulti, sa unsang paagi masakmit sa mga ansiyano ang karnero gikan sa baba ni Satanas?
7 Ang mga ansiyano karon kinahanglang magbantay sa samag-leyon nga mga pangatake sa Yawa. Kini mahimong maglakip sa maisogong lihok aron luwason ang karnero gikan sa baba sa Yawa. Pinaagi sa pagkupot sa bungot sa mapintas nga mananap, ingnon ta, ang mga ansiyano makaluwas sa karnero. Pinaagi sa pagpangatarongan, kinahanglang sakmiton nila ang dili-mabinantayong mga igsoon nga nalit-agan ni Satanas. (Basaha ang Judas 22, 23.) Siyempre, dili kini mahimo sa mga ansiyano kon wala ang tabang ni Jehova. Sila magmaluloton sa nasamdan nga karnero, nga magbendahe ug maghaplas niini pinaagi sa makapahupay nga balsamo sa Pulong sa Diyos.
8. Asa tultolan sa mga ansiyano ang panon, ug sa unsang paagi?
8 Ang magbalantay sa karnero naggiya usab sa panon ngadto sa maayong sibsibanan ug sa dapit nga may tubig. Sa susama, ang mga ansiyano nagtultol sa panon ngadto sa kongregasyon, nga nagdasig kanila sa pagtambong nga regular sa tigom aron sila makakaon ug makadawat sa “ilang pagkaon sa hustong panahon.” (Mat. 24:45) Ang mga ansiyano tingali mogugol ug ekstrang panahon aron tabangan kadtong masakiton sa espirituwal sa pagdawat sa makapahimsog nga Pulong sa Diyos. Ang nasalaag nga karnero tingali naningkamot nga makabalik sa panon. Inay hadlokon ang igsoon, malulotong ipatin-aw sa mga ansiyano ang mga prinsipyo sa Kasulatan ug ipakita kon unsaon kini pagpadapat sa iyang kinabuhi.
9, 10. Sa unsang paagi angayng atimanon sa mga ansiyano ang mga masakiton sa espirituwal?
9 Kon may sakit ka, unsang klase sa doktor ang imong pilion? Ang usa ba nga igo rang mangutana ug moreseta dayon aron makaatubang na sab ug laing pasyente? O mokonsulta kag doktor nga mamati nimo, magpatin-aw kon unsay imong sakit, ug mosugyot ug mga paagi sa pagtambal?
10 Sa susama, ang mga ansiyano makapamati sa masakiton sa espirituwal ug makatabang sa pag-alim sa samad, sa ingon masambingayong “maghaplas kaniya ug lana sa ngalan ni Jehova.” (Basaha ang Santiago 5:14, 15.) Sama sa balsamo sa Gilead, ang Pulong sa Diyos makapahupay sa masakiton. (Jer. 8:22; Ezeq. 34:16) Kon ipadapat ang mga prinsipyo sa Bibliya, ang masakiton malig-on pag-usab sa espirituwal. Oo, ang mga ansiyano makatabang sa dihang sila mamati sa mga problema sa mga masakiton sa espirituwal ug mag-ampo uban kanila.
Dili Pinugos Kondili Kinabubut-on
11. Unsay nagtukmod sa mga ansiyano sa pag-atiman sa panon sa Diyos nga kinabubut-on?
11 Sunod, si Pedro nagpahinumdom sa mga ansiyano kon unsay angay ug dili angayng buhaton sa usa ka magbalantay. Ang mga ansiyano angayng mag-atiman sa panon sa Diyos, “dili nga pinugos, kondili kinabubut-on.” Unsay nagtukmod sa mga ansiyano sa pag-alagad nga kinabubut-on sa ilang mga igsoon? Buweno, unsay nagtukmod kang Pedro sa pagbantay ug sa pagpakaon sa mga karnero ni Jesus? Ang usa ka hinungdan mao ang iyang gugma ug pagmahal alang sa Ginoo. (Juan 21:15-17) Tungod sa gugma, ang mga ansiyano “magkinabuhi dili na alang sa ilang kaugalingon, kondili alang kaniya nga namatay alang kanila.” (2 Cor. 5:14, 15) Kini nga gugma, nga inubanan sa gugma sa Diyos ug sa ilang mga igsoon, nagtukmod sa mga ansiyano sa pag-alagad sa panon, nga naggamit sa ilang kusog, kahinguhaan, ug panahon sa pagbuhat niana. (Mat. 22:37-39) Sila nag-alagad dili nga pinugos, kondili kinabubut-on.
12. Unsang sakripisyo ang gihimo ni Pablo alang sa mga igsoon?
12 Unsa ka dakong sakripisyo ang angayng himoon sa mga ansiyano? Sa pag-atiman sa mga karnero, sila nagsundog kang apostol Pablo, kinsa nagsundog usab kang Jesus. (1 Cor. 11:1) Kay gimahal ni Pablo ug sa iyang mga kauban ang mga igsoon sa Tesalonica, sila nalipay sa pagpaambit kanila ‘dili lamang sa maayong balita sa Diyos kondili sa ilang mga kalag usab.’ Sa pagbuhat niana, sila nahimong malumo, “sama sa usa ka nagpasusong inahan nga nagpangga sa iyang kaugalingong mga anak.” (1 Tes. 2:7, 8) Nahibalo si Pablo kon unsay pagbati sa nagapasusong inahan ngadto sa iyang anak. Buhaton niya ang tanan, apil ang pagbangon sa tungang gabii aron magpasuso.
13. Sa unsa nga ang mga ansiyano kinahanglang balanse?
13 Ang mga ansiyano kinahanglang kanunayng balanse bahin sa ilang mga responsabilidad sa kongregasyon ug sa ilang obligasyon sa pamilya. (1 Tim. 5:8) Ang panahon nga gigugol sa mga ansiyano sa kongregasyon maoy bililhong panahon nga alang unta sa ilang pamilya. Ang usa ka paagi sa pagbalanse sa duha ka responsabilidad mao ang panagsang pag-imbitar sa uban diha sa ilang Pamilyahanong Pagsimba. Sa daghang katuigan, si Masanao, usa ka ansiyano sa Japan, nag-imbitar sa mga tagsaanon ug sa mga pamilya nga ang amahan dili-Saksi nga mouban sa ilang pagtuon sa pamilya. Ngadtongadto, ang pipila nahimong ansiyano ug nagsundog sa panig-ingnan ni Masanao.
Likayi ang Kinitaan Pinaagi sa Limbong—Maikagong Bantayi ang Panon
14, 15. Nganong ang mga ansiyano angayng magbantay batok sa “gugma sa kinitaan pinaagig limbong,” ug sa unsang paagi sila makasundog kang Pablo niining bahina?
14 Gidasig usab ni Pedro ang mga ansiyano sa pagbantay sa panon, ‘dili tungod sa gugma sa kinitaan pinaagig limbong, apan maikagon.’ Ang mga ansiyano mogugol ug daghang panahon alang sa kongregasyon, apan wala sila magdahom ug bayad niana. Nasabtan ni Pedro nga kinahanglang pasidan-an ang iyang isigkaansiyano bahin sa kapeligrohan sa pag-atiman sa panon tungod sa “gugma sa kinitaan pinaagig limbong.” Ang maong kapeligrohan nadayag diha sa maluhong pagkinabuhi sa relihiyosong mga lider sa “Dakong Babilonya” samtang ang daghan kabos. (Pin. 18:2, 3) Ang mga ansiyano karon angay gayong magbantay batok niana.
15 Si Pablo maoy maayong panig-ingnan sa mga ansiyano. Bisag siya usa ka apostoles ug mahimo untang “gastosong pabug-at” sa mga Kristohanon sa Tesalonica, siya wala ‘mokaon sa pagkaon gikan kang bisan kinsa nga walay bayad.’ Hinunoa, siya ‘naghago ug nagbudlay sa adlaw ug gabii.’ (2 Tes. 3:8) Daghang ansiyano karon, lakip sa mga nagapanawng magtatan-aw, maoy maayong panig-ingnan niining bahina. Bisag ang mga igsoon nag-abiabi kanila, sila wala ‘magpabug-at’ kang bisan kinsa.—1 Tes. 2:9.
16. Unsay ipasabot sa pag-atiman sa panon nga “maikagon”?
16 Ang mga ansiyano nag-atiman sa panon nga “maikagon.” Dayag kana sa ilang pagsakripisyo sa pagtabang sa panon. Apan, dili pugson sa mahigugmaong mga ansiyano ang panon sa pag-alagad kang Jehova; ni dasigon ang uban nga mag-alagad sa Diyos uban ang pagkamaindigon. (Gal. 5:26) Nahibalo ang mga ansiyano nga ang mga karnero lainlaig katakos. Sila maikagong motabang sa ilang mga igsoon sa pag-alagad kang Jehova nga malipayon.
Dili Mahariharion Apan Panig-ingnan sa Panon
17, 18. (a) Nganong dihay mga panahon nga wala dayon makasabot ang mga apostoles sa gitudlo ni Jesus bahin sa pagkamapainubsanon? (b) Unsang susamang kahimtang ang mahimo natong masinati?
17 Sa atong nahisgotan na, angayng hinumdoman sa mga ansiyano nga ang panon nga ilang giatiman iya sa Diyos, dili ilaha. Mag-amping sila nga dili ‘magmahariharion niadtong panulondon sa Diyos.’ (Basaha ang 1 Pedro 5:3.) Dihay mga panahon nga ang mga apostoles ni Jesus nangab-ot ug katungdanan uban ang sayop nga motibo. Sama sa mga magmamando sa kanasoran, buot nilang makabaton ug dungganong posisyon.—Basaha ang Marcos 10:42-45.
18 Karon, ang mga brader nga ‘nagapangab-ot sa katungdanan sa pagkamagtatan-aw’ angayng magsusi sa ilang kaugalingon kon nganong sila nagtinguha niana. (1 Tim. 3:1) Ang mga ansiyano karon mahimong mangutana sa kaugalingon kon sila ba nagtinguha sa awtoridad o sa pagkadungganon sama sa pipila ka apostoles. Kon ang mga apostoles nalisdan niining bahina, nan masabtan sab sa mga ansiyano nga kinahanglan silang maningkamot nga likayan ang maong kalibotanong kinaiya.
19. Unsay angayng hinumdoman sa mga ansiyano sa dihang magpahamtang ug disiplina aron panalipdan ang panon?
19 Tinuod, may mga panahon nga ang mga ansiyano kinahanglang magmaisogon, sama sa dihang manalipod sa panon batok sa “malupigong mga lobo.” (Buh. 20:28-30) Giingnan ni Pablo si Tito nga magpadayon sa ‘pag-awhag ug sa pagbadlong uban ang bug-os nga awtoridad.’ (Tito 2:15) Bisan sa pagpahamtang ug disiplina, angayng pakitaag dignidad sa mga ansiyano ang gidisiplina. Ilang nasabtan nga ang malumong pag-awhag mas epektibo sa pag-abot sa kasingkasing aron ang usa mosunod sa matarong nga dalan kay sa grabeng pagsaway.
20. Sa unsang paagi masundog sa mga ansiyano si Jesus sa paghatag ug maayong panig-ingnan?
20 Ang panig-ingnan ni Kristo nagtukmod sa mga ansiyano nga higugmaon ang panon. (Juan 13:12-15) Kita madasig samtang magbasa bahin sa iyang paagi sa pagtudlo sa mga tinun-an sa pagwali ug paghimog disipulo. Ang iyang pagkamapainubsanon nakatandog sa kasingkasing sa mga tinun-an, nga nagdasig kanila nga sundogon ang iyang pagpakitag ‘pagpaubos sa hunahuna nga magaisip nga ang uban labaw kay kanila.’ (Filip. 2:3) Ang mga ansiyano karon natukmod sab sa pagsunod sa panig-ingnan ni Jesus, ug buot nilang mahimong “mga panig-ingnan alang sa panon.”
21. Unsay umaabot nga ganti sa mga ansiyano?
21 Gitapos ni Pedro ang iyang tambag sa mga ansiyano pinaagi sa paghisgot sa usa ka saad. (Basaha ang 1 Pedro 5:4.) Ang dinihogang mga magtatan-aw ‘makadawat sa dili-malawos nga purongpurong sa himaya’ uban ni Kristo sa langit. Ang ubos nga mga magbalantay sa “ubang mga karnero” aduna unyay pribilehiyo sa pag-atiman sa panon sa Diyos dinhi sa yuta ubos sa pagmando sa “pangulong magbalantay.” (Juan 10:16) Hisgotan sa sunod artikulo ang mga paagi nga ang mga membro sa kongregasyon makapaluyo sa mga ansiyano.
Agig Repaso
• Nganong haom nga giawhag ni Pedro ang mga isigkaansiyano sa pag-atiman sa panon sa Diyos?
• Sa unsang paagi angayng atimanon sa mga ansiyano ang mga masakiton sa espirituwal?
• Unsay nagtukmod sa mga ansiyano sa pag-atiman sa panon sa Diyos?
[Mga Pangutana sa Pagtuon]
[Hulagway sa panid 21]
Sama sa mga magbalantay kaniadto, ang mga ansiyano karon kinahanglang manalipod sa “karnero” nga gisalig kanila
