Sa Unsang Paagi Magmalamposon ang Imong Dalan?

“KALAMPOSAN”—makapadani nga pulong! Daghan ang nagmalamposon pag-ayo sa negosyo ug nahimong dato ug inila. Ang uban nangandoy nga magmalamposon apan napakyas.

Sa dakong bahin, ang kalamposan nagdepende sa kon unsay gipokus nimo sa imong kinabuhi. Ang duha ka laing importanteng butang maoy kon giunsa nimo paggamit ang imong panahon ug kusog ug kon ikaw ba may inisyatibo.

Daghang Kristohanong payunir ang nakasinatig dakong katagbawan. Ang bug-os-panahong pag-alagad nakatabang sa mga batan-on ug tigulang nga magmalamposon. Apan, lagmit ang pipila gilaay sa ministeryo ug gihimo nilang prayoridad ang pagpangab-ot ug kalibotanong mga tumong. Unsay lagmit hinungdan niini? Unsay imong mahimo aron kanunay kang nakapokus sa kon unsay tinuod nga hinungdanon? Ug sa unsang paagi “magmalamposon ka sa imong dalan”?—Jos. 1:8.

Ekstrakurikular nga Kalihokan ug mga Hobby

Ang Kristohanong mga batan-on kinahanglang magmabalanse sa ilang pag-alagad sa Diyos ug sa pagpakigbahin sa ubang kalihokan. Kadtong nagbuhat niana takos nga komendahan ug makatino nga magmalamposon sa kinabuhi.

Apan ang ubang Kristohanong batan-on nalinga pag-ayo sa ekstrakurikular nga kalihokan ug mga hobby. Hinuon dili man sayop ang maong mga kalihokan. Apan angay nilang pangutan-on ang ilang kaugalingon: ‘Unsa ka dakong panahon ang akong magugol niana? Komosta ang akong mga kauban? Unsay ilang mga tinamdan? Ug asa kaha mapokus ang akong kinabuhi?’ Tingali maamgohan nimo nga ang usa mahimong mapuliki pag-ayo sa maong mga kalihokan nga gamay na lang ang panahon ug kusog alang sa pag-alagad sa Diyos. Nan imong makita kon nganong hinungdanon ang pagtakdag mga prayoridad.—Efe. 5:15-17.

Tagda ang kahimtang ni Wiktor. * Siya miasoy: “Sa 12 anyos pa ko, miapil ko sa volleyball club. Ngadtongadto, nakadaog kog daghang premyo ug mga award. May kahigayonan ko nga mosikat.” Apan, nabalaka si Wiktor kay naapektohan ang iyang espirituwalidad tungod sa esports. Usa ka adlaw niana, nakatulog siya samtang nagbasa sa Bibliya. Ug iyang namatikdan nga dili na kaayo siya malipayon sa pagsangyaw. “Ang esports nakahurot sa akong kusog, ug wala madugay akong naamgohan nga nakapaluya kini kanako sa espirituwal. Nahibalo ko nga wala nako buhata ang akong kinamaayohan.”

Taas nga Edukasyon

Ang usa ka Kristohanon may Kasulatanhong obligasyon sa pag-atiman sa iyang pamilya, ug kana naglakip sa pagtagana sa ilang materyal nga panginahanglan. (1 Tim. 5:8) Apan nagkinahanglan ba gyod kini ug taas nga edukasyon?

Maayong susihon kon sa unsang paagi ang pagkuhag taas nga edukasyon makaapektar sa imong relasyon kang Jehova. Atong susihon ang usa ka pananglitan diha sa Bibliya.

Si Baruk maoy sekretaryo ni propeta Jeremias. Dihay panahon nga nahimo siyang ambisyoso inay magpokus sa iyang mga  pribilehiyo sa pag-alagad kang Jehova. Namatikdan kini ni Jehova ug siya mipasidaan kaniya pinaagi kang Jeremias: “Ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagtinguha.”—Jer. 45:5.

Unsa ang “dagkong mga butang” nga padayong gitinguha ni Baruk? Tingali gusto niyang mabantog diha sa Hudiyohanong sistema sa mga butang o kaha madato. Kon unsa man ugaling, wala na niya masentro ang iyang pagtagad sa labing importanteng mga butang nga magtabang kaniya sa pagpabiling suod kang Jehova. (Filip. 1:10) Apan si Baruk naminaw sa gipasidaan ni Jehova pinaagi kang Jeremias ug sa ingon siya naluwas.—Jer. 43:6.

Unsay atong makat-onan sa maong asoy? Ang tambag nga nadawat ni Baruk nagpaila nga may sayop kaniya. Siya nagtinguhag dagkong mga butang. Kon ikaw makasuportar na sa imong kaugalingon, kinahanglan pa ba nimong mogahin ug panahon, salapi, ug kusog alang sa taas nga edukasyon aron lang matuman ang imong mga pangandoy o nianang sa imong ginikanan o paryente?

Tagda si Grzegorz, usa ka computer programmer. Kay nadani sa iyang mga kauban, siya mikuhag dugang kurso. Ngadtongadto, wala na siyay panahon sa espirituwal nga mga butang. Siya nahinumdom: “Kanunay kong matensiyon. Nakonsensiya ko kay wala nako makab-ot ang espirituwal nga mga tumong nga akong gitakda.”

Napokus sa Pagpanarbaho

Ang Pulong sa Diyos nagdasig sa matuod nga mga Kristohanon nga magmakugihon ug mahimong responsableng mga empleyado ug amo. Si apostol Pablo misulat: “Bisan unsay inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo.” (Col. 3:22, 23) Apan bisag dalayegon ang pagkakugihan, labaw pa ang gikinahanglan—ang maayong relasyon uban sa atong Maglalalang. (Eccl. 12:13) Kon ang usa nakapokus sa iyang trabaho, dili na mahatagag prayoridad ang espirituwal nga mga butang.

Ang pagkapuliki sa trabaho makapaluya sa usa ka Kristohanon, nga dili na niya maatiman ang iyang espirituwalidad ug sa iyang pamilya. Namatikdan ni Haring Solomon nga ang “duha ka hakop nga kahago” sagad maoy “paggukod sa hangin.” Kon ang usa ka Kristohanon nakapokus pag-ayo sa iyang trabaho, kini grabeng makatensiyon. Siya mahimong maulipon sa trabaho hangtod nga malapoy. Kon mahitabo kini, siya ba ‘makamaya ug makapahimulos sa tanan niyang kahago’? (Eccl. 3:12, 13; 4:6) Labaw sa tanan, may igo pa kaha siyang kusog ug kadasig sa pag-atiman sa iyang mga responsabilidad sa pamilya ug sa  pagpakigbahin sa espirituwal nga mga kalihokan?

Si Janusz, nga nagpuyo sa Sidlakang Uropa, nalinga pag-ayo sa iyang negosyo sa pagpananom. Siya nahinumdom: “Gidayeg ko sa mga tawo kay ako may inisyatibo ug makahuman dayon sa trabaho. Pero naluya ko sa espirituwal ug wala na ko mosangyaw. Ngadtongadto, mihunong ko sa pagtambong sa mga tigom. Nahimo kong garboso kaayo nga akong gisalikway ang tambag sa mga ansiyano ug mipalayo sa kongregasyon.”

Mahimo Kang Magmalamposon

Atong nahisgotan ang tulo ka natad diin ang usa ka Kristohanon mahimong malinga pag-ayo nga mapasagdan ang iyang espirituwalidad. Nalinga ka ba sa bisan hain niini?  Kon mao, ang mosunod nga mga pangutana, teksto, ug komento makatabang nimo sa pagsusi kon ikaw ba magmalamposon.

Ekstrakurikular nga kalihokan ug mga hobby: Nalinga ka ba pag-ayo niini? Naibanan ba niini ang imong panahon nga alang unta sa espirituwal nga kalihokan? Dili ka na ba ganahang makig-uban sa mga isigkamagtutuo? Kon mao, nganong dili nimo sundogon si Haring David, kinsa mihangyo kang Jehova: “Ipahibalo kanako ang dalan nga akong pagalaktan.”—Sal. 143:8.

Si Wiktor, nga gihisgotan ganina, gitabangan sa usa ka nagapanawng magtatan-aw. Siya giingnan sa magtatan-aw: “Lingaw kaayo kang moestorya bahin sa imong pagdulag balibol.” “Nahigmata ko niadto,” miingon si Wiktor. “Akong naamgohan nga nahilayo na ko. Wala madugay, akong giputol ang pagpakig-uban sa kalibotanong mga higala ug nakigsuod diha sa kongregasyon.” Karon si Wiktor masibotong nag-alagad kang Jehova diha sa iyang kongregasyon. Siya midasig: “Pangutan-a ang inyong mga higala, ginikanan, o mga ansiyano kon ang inyo bang kalihokan sa eskuylahan nakapasuod o nakapahilayo kaninyo kang Jehova.”

Nganong dili nimo ipahibalo sa mga ansiyano nga gusto kang mangab-ot ug mga pribilehiyo sa pag-alagad? Makatabang ka ba sa mga edaran, tingali diha sa pagpamalit o sa mga buluhaton sa balay? Bisag unsa pay imong edad, makahimo ka sa pagpakigbahin sa bug-os-panahong ministeryo, nga ipaambit sa uban ang tinubdan sa imong kalipay.

Taas nga edukasyon: Si Jesus nagpasidaan batok sa ‘pagtinguha sa kaugalingong himaya.’ (Juan 7:18) Kon unsa mang sekular nga edukasyon ang imong kuhaon, imo na bang ‘natino ang mas hinungdanong mga butang’?—Filip. 1:9, 10.

Si Grzegorz, nga usa ka computer programmer, mihimog mga kausaban sa iyang kinabuhi. Siya miingon: “Akong gisunod ang tambag sa mga ansiyano ug gipasimple ang akong kinabuhi. Akong naamgohan nga dili na ko kinahanglang moeskuyla pag dugang. Makahurot lang na sa akong panahon ug kusog.” Si Grzegorz mas nakigbahin sa mga kalihokan sa kongregasyon. Sa ulahi, siya migraduwar sa gitawag karon ug Bible School for Single Brothers. Oo, iyang ‘gipalit ang panahon’ alang sa dugang espirituwal nga edukasyon.—Efe. 5:16.

Sekular nga trabaho: Nalinga ka ba pag-ayo sa imong trabaho nga napasagdan na nimo ang espirituwal nga mga butang? May panahon ka pa ba sa pagpakig-estorya sa imong pamilya? Miuswag ba ang kalidad sa imong mga bahin sa kongregasyon? Makapadasig ba ang imong pagpakig-estorya sa uban? “Kahadloki ang matuod nga Diyos ug tumana ang iyang mga sugo,” ug imong madawat ang dagayang panalangin ni Jehova ug ‘mapahimuslan pag-ayo ang imong paghago.’—Eccl. 2:24; 12:13.

Si Janusz, nga gihisgotan ganina, wala magmalamposon sa iyang negosyo. Kay wala nay kita ug napunog utang, siya midangop kang Jehova. Gitul-id niya ang iyang kahimtang ug karon nag-alagad ingong regular payunir ug ansiyano. Matod niya: “Kay nagmakontento na ko ug naggamit sa akong kusog sa espirituwal nga kalihokan, nakabaton kog kalinaw sa hunahuna ug kasingkasing.”—Filip. 4:6, 7.

Susiha ang imong mga motibo ug prayoridad. Ang pag-alagad kang Jehova motultol sa malamposong kinabuhi. Unaha kana sa imong kinabuhi.

Lagmit kinahanglan kang mohimog mga kausaban, nga biyaan pa gani ang wala-kinahanglanang mga butang aron mapamatud-an sa kaugalingon “ang maayo ug dalawaton ug hingpit nga kabubut-on sa Diyos.” (Roma 12:2) Apan “magmalamposon ka sa imong dalan” kon ikaw moalagad kaniya nga bug-os kalag.

[Footnote]

[Kahon/Hulagway sa panid 31]

Sa Unsang Paagi Ka Magmalamposon?

Tungod sa daghang butang nga makapabalda, unsay imong buhaton aron makapokus ka sa mas hinungdanong mga butang? Susiha ang imong mga motibo ug prioridad pinaagi sa pagpamalandong sa mosunod:

EKSTRAKURIKULAR NGA KALIHOKAN UG HOBBY

▪ Unsang mga tinamdan ang makaimpluwensiya nimo sa dihang makigbahin sa maong kalihokan?

▪ Unsa ka dakong panahon ang gikinahanglan niini?

▪ Mahimo na kaha kining prayoridad sa imong kinabuhi?

▪ Maibanan ba niini ang imong panahon alang sa espirituwal nga kalihokan?

▪ Kinsay imong mga kauban?

▪ Mas ganahan ka bang makig-uban nila kay sa mga isigkamagtutuo?

TAAS NGA EDUKASYON

▪ Kon makasuportar ka na sa kaugalingon, kinahanglan ka pa bang mogahin ug panahon, salapi, ug kusog alang sa dugang edukasyon?

▪ Aron makasuportar sa kaugalingon, gikinahanglan ba gyod ang taas nga edukasyon?

▪ Makaapektar kaha kini sa imong pagtambong sa mga tigom?

▪ Imo bang ‘natino ang mas hinungdanong mga butang’?

▪ Kinahanglan ba nimong palig-onon ang imong pagsalig sa katakos ni Jehova nga motagana kanimo?

PANARBAHO

▪ Ang imo bang trabaho magtugot kanimo sa ‘pagmaya ug sa pagpahimulos sa tanan nimong kahago’?

▪ May igo ka pa bang kusog ug kadasig sa pagtuman sa imong mga responsabilidad sa pamilya ug sa pagpakigbahin sa espirituwal nga mga buluhaton?

▪ May panahon ka pa ba sa pagpakig-estorya sa imong pamilya?

▪ Nalinga ka ba pag-ayo sa imong trabaho nga napasagdan na ang espirituwal nga mga butang?

▪ Naapektohan ba niini ang kalidad sa imong mga bahin sa kongregasyon?

[Hulagway sa panid 30]

Si Jehova nagpasidaan kang Baruk bahin sa pagkaambisyoso