Kadaogan Human sa Dugayng Legal nga Pakigbisog!

KADTO nagsugod sa 1995 ug natapos human sa 15 ka tuig. Nianang panahona, ang mga magsusupak determinado nga ibando ang mga Saksi ni Jehova sa Moscow ug sa ubang dapit sa Russia. Bisan pa niana, gigantihan ni Jehova ug legal nga kadaogan ang integridad sa atong minahal nga mga igsoon sa Russia. Apan, nganong nahitabo ang maong panagharong diha sa korte?

SA KATAPOSAN MAY KAGAWASAN!

Sa unang mga tuig sa katuigang 1990, ang mga igsoon sa Russia nakabaton pag-usab sa kagawasan sa pagsimba nga nawala niadtong 1917. Sa 1991, ang ilang relihiyon girehistro sa gobyerno sa Soviet Union. Pagkabungkag sa Soviet Union, ang mga Saksi ni Jehova girehistro sa Russian Federation. Dugang pa, giangkon sa Estado nga ang mga Saksi biktima sa pangdaogdaog sa kanhing gobyerno. Sa 1993, ang Department of Justice sa Moscow nagrehistro kanila ingong Moscow Community of Jehovah’s Witnesses. Nianang tuiga, gipatuman usab ang bag-ong konstitusyon sa Russia nga nagtugot sa kagawasan sa pagsimba. Bantog ra nga nakaingon ang usa ka brader, “Wala gyod namo damha kini nga kagawasan!” Siya mipadayon, “Sulod sa 50 ka tuig kami naghulat niini!”

Gipahimuslan sa mga igsoon sa Russia kining “paborableng panahon” pinaagi sa makugihong pagsangyaw, ug daghan ang misanong. (2 Tim. 4:2) “Ang mga tawo interesado kaayo sa relihiyon,” matod sa usa nga nakapaniid. Wala madugay, midaghan ang mga magmamantala, payunir, ug kongregasyon. Gani gikan 1990 hangtod 1995, ang mga Saksi sa Moscow miuswag gikan sa mga 300 ngadto sa kapig 5,000! Tungod sa padayong pag-uswag, naalarma ang mga magsusupak. Sa 1995, sila misugod sa pag-atake sa mga Saksi diha sa mga korte. Upat ka hugna sa pag-atake ang nahitabo una kini nahusay.

NAGSUGOD ANG KRIMINAL NGA MGA IMBESTIGASYON

Ang unang hugna sa pag-atake nagsugod sa Hunyo 1995. Usa ka grupo sa Moscow nga dapig sa Russian Orthodox Church miakusar sa atong mga igsoon nga sila nalangkit sa kriminal nga kalihokan. Ang maong grupo naghawas kono sa mga membro sa pamilya nga nangasuko kay ang ilang mga kapikas o mga anak nahimong Saksi. Sa Hunyo 1996, ang mga imbestigador nangitag ebidensiya apan walay nakit-an. Bisan pa niana, ang maong grupo miakusar sa atong mga igsoon sa samang akusasyon nga sila nalangkit sa kriminal nga kalihokan—sa tulo pa ka higayon. Sa matag higayon, ang mga imbestigador walay nakitang ebidensiya batok sa mga Saksi. Sa kataposan, sa Abril 13, 1998, gidismis ang kaso.

“Apan may katingad-ang nahitabo,” matod sa usa ka abogado nga nalangkit sa kaso. Bisag ang hawas sa prosecutor’s office nga nagdumala niining ikalima nga imbestigasyon miadmitir nga walay ebidensiya sa kriminal  nga kalihokan, siya misugyot gihapon nga pasakahag sibil nga kaso ang mga igsoon. Ang hawas miingon nga ang Moscow Community of Jehovah’s Witnesses naglapas sa nasyonal ug internasyonal nga balaod. Ang prosecutor sa Northern Administrative Circuit sa Moscow miuyon ug mipayl ug sibil nga kaso. * Sa Septiyembre 29, 1998, gisugdan ang mga husay sa Golovinsky District Court sa Moscow. Nagsugod ang ikaduhang hugna sa pag-atake.

ANG BIBLIYA DIHA SA KORTE

Sa usa ka korte sa amihanang Moscow, si Prosecutor Tatyana Kondratyeva migamit sa usa ka pederal nga balaod nga gipirmahan niadtong 1997 sa pag-atake sa mga Saksi. Kini nga balaod nag-ingon nga ang Orthodox Christianity, Islam, Judaismo, ug Budhismo mao lamang ang tradisyonal nga mga relihiyon. * Tungod niini, ang ubang relihiyon nalisdan sa pagparehistro ug kini nagtugot sa mga korte sa pagbando sa mga relihiyon nga nagpasiugdag pagdumot. Ang prosecutor migamit sa maong balaod sa pag-akusar sa mga Saksi nga sila nagpasiugdag pagdumot ug nagbungkag sa mga pamilya, ug busa angayng ibando.

Ang abogado nga nagdepensa sa atong mga igsoon nangutana: “Kinsa man sa Moscow Congregation ang naglapas sa balaod?” Walay ngalan nga ikahatag ang prosecutor. Apan siya miingon nga ang mga basahon sa mga Saksi ni Jehova nagdasig sa pagdumot sa ubang relihiyon. Aron pamatud-an kana, may gibasa siya gikan sa Watchtower ug Awake! ug sa ubang basahon. (tan-awa ang ibabaw). Sa dihang gipangutana kon sa unsang paagi kini nagdasig sa pagdumot, siya mitubag: “Ang mga Saksi ni Jehova nagtudlo nga ang ilang relihiyon mao ang tinuod.”

Usa ka abogadong Saksi ang mitunol ug kopya sa Bibliya ngadto sa huwes ug sa prosecutor ug dayon gibasa ang Efeso 4:5: “Usa ka Ginoo, usa ka pagtuo, usa ka bawtismo.” Ang huwes, prosecutor, ug ang abogado—nga nagkupot nag tagsa ka Bibliya—naghisgot ug mga teksto sama sa Juan 17:18 ug Santiago 1:27. Ang huwes nangutana: “Kini bang mga tekstoha nagdasig sa pagdumot sa ubang relihiyon?” Ang prosecutor mitubag nga dili siya eksperto sa Bibliya. Ang abogado mipakitag mga basahon gikan sa Russian Orthodox Church nga grabeng nagsaway sa mga Saksi ni Jehova ug nangutana: “Kini bang mga pulonga naglapas sa balaod?” Ang prosecutor mitubag nga dili siya eksperto bahin sa relihiyon.

MGA AKUSASYON NGA WALA MAPAMATUD-I

Sa pag-akusar nga ang mga Saksi nagbungkag sa mga pamilya, ang prosecutor miingon nga sila wala magsaulog ug mga  holiday sama sa Pasko. Apan giangkon niya sa ulahi nga ang gobyerno walay balaod nga saulogon ang Pasko. Ang mga Ruso—lakip ang Ruso nga mga Saksi—mahimong makapili. Ang prosecutor miingon usab nga ang mga bata sa atong organisasyon ‘gihikawan ug igong pahulay ug lingawlingaw.’ Apan sa dihang gikuwestiyon, miangkon siya nga wala pa siya makaestorya ug mga anak sa Saksi. Sa dihang ang usa ka abogado nangutana sa prosecutor kon nakatambong na siyag tigom sa mga Saksi ni Jehova, siya mitubag: “Dili na kana kinahanglan.”

Gipresentar sa prosecutor ang usa ka propesor sa psychiatry aron motestigo. Ang propesor miingon nga ang pagbasa sa atong literatura makadaot sa pangisip. Sa dihang miingon ang abogado sa depensa nga ang sinulat nga testimonya sa propesor pareho sa dokumento nga gisulat sa Moscow Patriarchate, ang propesor miangkon nga iyang gikopya ang pipila ka bahin niana. Sa dugang panukitsukit, nadayag nga wala pa siyay pasyente sukad nga Saksi ni Jehova. Ang laing propesor sa psychiatry mitestigo nga iyang natun-an ang kapig 100 ka Saksi sa Moscow. Iyang nasayran nga sila normal ug pangisip ug mas masinabtanon sa ubang relihiyon sukad sila na-Saksi.

NAKADAOG—APAN DILI BUG-OS

Sa Marso 12, 1999, ang huwes mipilig lima ka edukadong tawo aron tun-an ang basahon sa mga Saksi, ug gihunong una ang paghusay. Una pa niini, ang Ministry of Justice sa Russia nagsugo nag grupo sa mga edukado sa pagtuon sa atong basahon. Niadtong Abril 15, 1999, ang maong grupo mireport nga dili makadaot ang atong mga basahon. Busa sa Abril 29, 1999, girehistro na usab sa Ministry of Justice ang mga Saksi ni Jehova. Bisan pa sa positibong report,  ang korte sa Moscow miinsistir nga susihon pag-usab sa usa ka bag-ong grupo ang atong mga basahon. Katingalahan kini kay ang mga Saksi ni Jehova giila na sa Ministry of Justice sa Russia ingong aprobadong relihiyon nga nagsunod sa balaod, apan sa samang higayon, ang Department of Justice sa Moscow nag-imbestigar kanila tungod kono sa paglapas sa balaod!

Duolag duha ka tuig sa ulahi, ang paghusay gipadayon. Sa Pebrero 23, 2001, si Judge Yelena Prokhorycheva midesisyon nga walay rason nga ibando ang buluhaton sa mga Saksi ni Jehova sa Moscow. Sa kataposan, napamatud-an sa korte nga bakak ang tanang akusasyon batok sa atong mga igsoon! Apan, ang prosecutor wala mouyon sa desisyon ug miapelar sa Moscow City Court. Paglabayg tulo ka bulan, sa Mayo 30, 2001, ginulo sa korte ang desisyon ni Judge Prokhorycheva. Ang korte mimando nga husayon pag-usab ang kaso sa samang prosecutor apan lahi na ang huwes. Ang ikatulong hugna sa pag-atake hapit nang mosugod.

NAPILDI—APAN DILI BUG-OS

Sa Oktubre 30, 2001, gisugdan ni Judge Vera Dubinskaya ang bag-ong paghusay. * Si Prosecutor Kondratyeva miakusar gihapon sa mga Saksi nga sila nagdasig sa pagdumot. Siya midugang nga ang pagbando kanila maoy alang sa ilang proteksiyon! Ingong sanong, ang tanang 10,000 ka Saksi sa Moscow mipirma dayon ug petisyon nga mihangyo sa korte nga dili dawaton ang gitanyag sa prosecutor nga “proteksiyon.”

Ang prosecutor miingon nga dili na siya kinahanglang mohatag ug ebidensiya ingong pamatuod nga sad-an ang mga Saksi. Matod niya, ang kaso maoy bahin sa mga basahon ug pagtulon-an sa mga Saksi, dili sa ilang buluhaton. Siya mipahibalo nga ipresentar niya ang usa ka tigpamaba sa Russian Orthodox Church ingong testigo. Siyempre, kana nagpakita nga ang klero nalangkit gayod sa paningkamot nga ibando ang mga Saksi. Sa Mayo 22, 2003, ang huwes mimando nga susihon pag-usab sa usa ka grupo sa mga eksperto ang mga basahon sa mga Saksi ni Jehova.

Sa Pebrero 17, 2004, gipadayon ang paghusay aron repasohon ang resulta sa pagtuon sa mga eksperto. Ilang nakaplagan nga ang atong mga basahon nagdasig sa mga magbabasa sa “pagpreserbar sa pamilya ug sa kaminyoon” ug kini wala magdasig ug pagdumot. Ang ubang eskolar miuyon. Usa ka propesor sa relihiyon gipangutana: “Nganong nagasangyaw ang mga Saksi ni Jehova?” Siya mitubag: “Ang mga Kristohanon kinahanglang mosangyaw. Kanay giingon sa Ebanghelyo ug kana ang sugo ni Kristo sa iyang mga tinun-an—‘manglakaw ug magsangyaw sa tanang kayutaan.’” Bisan pa niana, sa Marso 26, 2004, gibando sa huwes ang buluhaton sa mga Saksi ni Jehova sa Moscow. Sa Hunyo 16, 2004, giuyonan sa Moscow City Court ang maong desisyon. * Bahin niini, usa ka dugay nang Saksi mikomento: “Panahon sa Soviet, ang usa ka Ruso kinahanglang mahimong ateyista. Karon, ang usa ka Ruso kinahanglang mahimong Ortodokso.”

Unsay reaksiyon sa mga igsoon? Sama sa adlaw ni Nehemias, sa dihang ang mga kaaway misupak sa pagtukod pag-usab sa paril  sa Jerusalem, sila wala magpababag. Hinunoa, sila ‘nagpadayon sa pagtukod ug sa pagbutang sa ilang kasingkasing sa pagtrabaho.’ (Neh. 4:1-6) Sa susama, ang mga igsoon sa Moscow wala magpababag sa ilang buluhaton—ang pagsangyaw sa maayong balita. (1 Ped. 4:12, 16) Sila masaligon nga si Jehova motabang kanila, ug sila andam na alang sa ikaupat nga hugna sa pag-atake.

MISAMOT NGA KASUKO

Sa Agosto 25, 2004, ang mga igsoon nagpadalag petisyon sa Kremlin alang kang Vladimir Putin, presidente niadto sa Russia. Ang petisyon, nga nagpahayag sa ilang pagbati bahin sa pagbando, may 76 ka tomo ug kapig 315,000 ka pirma. Sa samang panahon, nadayag ang intensiyon sa klero sa Russian Orthodox. Usa nila ka tigpamaba miingon: “Supak kaayo mi sa buluhaton sa mga Saksi ni Jehova.” Gidayeg sa usa ka lider sa mga Muslim ang pagbando sa mga Saksi.

Dili ikatingala nga kadtong mituo sa bakak nga mga akusasyon batok sa mga Saksi may kaisog sa pag-atake kanila. Ang pipila ka Saksi nga nagsangyaw sa Moscow gisumbag ug gipatiran. Ang usa ka sister gipagawas sa usa ka suko kaayong lalaki sa bilding ug gipatiran sa likod. Siya natumba ug naparok ang ulo ug gidala sa ospital. Apan, wala dakpa sa polis ang maong lalaki. Ang ubang Saksi gidakop, gikuhaag fingerprint, giletratohan, ug giprisog usa ka gabii. Ang mga manedyer sa mga bilding sa Moscow gihulga nga tangtangon sa trabaho kon padayong magpaabang sa mga Saksi. Daghang kongregasyon ang wala nay maabangang tigomanan. Kuwarenta ka kongregasyon ang kinahanglang mogamit sa upat ka Kingdom Hall diha sa usa ka bilding. Busa, ang usa ka kongregasyon mosugod sa pagtigom sa alas 7:30 sa buntag.  “Aron makatambong, ang mga igsoon mobangon sa alas singko sa buntag,” matod sa usa ka magtatan-aw sa sirkito, “pero gikalipay nila ang pagbuhat niana sa kapig usa ka tuig.”

‘USA GAYOD KA PAMATUOD’

Aron pamatud-an nga ilegal ang pagbando sa mga Saksi sa Moscow, ang atong mga abogado nagpatabang sa European Court of Human Rights niadtong Disyembre 2004. (Tan-awa ang kahong “Kon Nganong Girepaso sa France ang Desisyon sa Russia,” sa panid 6.) Unom ka tuig sa ulahi, sa Hunyo 10, 2010, giabsuwelto sa Korte ang mga Saksi ni Jehova! * Ang Korte mihukom nga ang tanang akusasyon walay basehanan. Kini usab mihukom nga kinahanglang ihunong sa gobyerno sa Russia ang pagbando ug tul-iron ang kadaot nga ilang nahimo sa mga Saksi.—Tan-awa ang kahong “Ang Desisyon sa Korte,” sa panid 8.

Ang Korte midesisyon nga ang European Convention on Human Rights magpanalipod sa buluhaton sa mga Saksi ni Jehova. Kini mapadapat dili lamang sa Russia kondili sa 46 ka nasod usab nga membro sa Council of Europe. Tungod sa maayong pagkaanalisar sa balaod ug sa mga ebidensiya, daghang eskolar, huwes, magbabalaod, eksperto sa tawhanong katungod ang mainteres niini. Ngano? Sa wala pa modesisyon, gitun-an sa Korte ang ilang nangaging walo ka desisyon nga pabor sa mga Saksi ingon man ang siyam ka kaso nga nadaog sa mga Saksi ni Jehova sa hataas nga mga hukmanan sa Argentina, Canada, Japan, Russia, South Africa, Spain, United Kingdom, ug United States. Ang maong mga desisyon magamit karon sa mga Saksi ni Jehova sa tibuok kalibotan sa pagdepensa sa ilang pagtuo ug buluhaton.

Si Jesus miingon sa iyang mga sumusunod: “Kamo pagataralon atubangan sa mga gobernador ug sa mga hari tungod kanako, ingong usa ka pagpamatuod kanila ug sa mga nasod.” (Mat. 10:18) Ang legal nga pakigbisog sulod sa 15 ka tuig naghatag ug kahigayonan sa atong mga igsoon nga labaw pang ipaila ang ngalan ni Jehova sa Moscow ug sa ubang dapit. Ang mga imbestigasyon, kaso, ug desisyon sa internasyonal nga korte maoy ‘usa gayod ka pamatuod’ ug nakatabang sa “pagpauswag sa maayong balita.” (Filip. 1:12) Gani, sa dihang ang mga Saksi magsangyaw karon sa Moscow, daghan ang moingon, “Dili ba gibando man mo?” Kana sagad maghatag ug kahigayonan sa mga igsoon sa pagpatin-aw sa atong pagtuo. Dayag, walay makapahunong kanato sa pagsangyaw sa maayong balita sa Gingharian. Hinaot nga si Jehova padayong magpanalangin ug magpalig-on sa atong minahal ug maisogong mga igsoon sa Russia.

[Mga footnote]

[Kahon/Hulagway sa panid 6]

Kon Nganong Girepaso sa France ang Desisyon sa Russia

Niadtong Pebrero 28, 1996, ang Russia mipirma sa European Convention on Human Rights. (Sa Mayo 5, 1998, giratipikahan sa Russia ang maong Convention.) Pinaagi sa pagpirma sa maong kasabotan, ang gobyerno sa Russia mideklarar nga ang mga sakop niini adunay

‘katungod sa kagawasan sa relihiyon ug sa pagsunod sa mga tulumanon niini sa balay ug sa publiko ug sa pag-usab sa ilang relihiyon kon gusto nila.’—Article 9.

‘katungod sa pagsulti ug pagsulat sa responsableng paagi sa kon unsay ilang gihunahuna ug sa paghatag ug impormasyon sa uban.’—Article 10.

‘katungod sa malinawong pagpakigtigom.’—Article 11.

Ang mga tawo o organisasyon nga nabiktima sa paglapas sa maong kasabotan ug nakadangop na sa tanang lokal nga mga korte makasang-at sa ilang kaso ngadto sa European Court of Human Rights sa Strasbourg, France (gipakita sa ibabaw). Gilangkoban kinig 47 ka huwes—katumbas sa gidaghanon sa nasod nga membro sa European Convention on Human Rights. Ang mga desisyon sa maong Korte angayng sundon sa mga nasod nga membro niini.

[Kahon sa panid 8]

Ang Desisyon sa Korte

Ania ang tulo ka mubong kinutlo gikan sa desisyon sa Korte.

Ang mga Saksi ni Jehova giakusahan nga nagbungkag sa mga pamilya. Ang Korte midesisyon:

“Ang pagdumili sa dili-relihiyosong mga membro sa pamilya sa pagdawat ug pagtahod sa kagawasan sa pagsimba sa ilang paryente mao ang hinungdan sa kasamok.”—Par. 111.

Ang Korte walay nakitang ebidensiya nga magpamatuod nga ang mga Saksi “nagkontrolar sa hunahuna” sa tawo. Kini nag-ingon:

“Nadayag sa Korte nga ang mga korte [sa Russia] wala makangalan ug bisan usa ka tawo kansang katungod sa kagawasan sa konsensiya gilapas gamit ang maong mga pamaagi.”—Par. 129.

Ang mga Saksi ni Jehova giakusahan usab nga nagdaot sa panglawas sa mga membro tungod sa dili pagpaabonog dugo. Sukwahi niana ang desisyon sa Korte:

“Ang kagawasan sa pagdawat o pagdumili sa usa ka paagi sa pagtambal, o pagpilig alternatibong pagtambal, maoy hinungdanong bahin sa mga prinsipyo sa pagbuot sa kaugalingon. Ang hamtong nga pasyente adunay kagawasan sa pagdesisyon, sama sa, kon magpaopera ba o dili, magpatambal ba o dili, o kon magpaabono ba ug dugo o dili.”—Par. 136.