Kapahulayan sa Diyos—Nakasulod Ka na ba Niana?

“Ang pulong sa Diyos buhi ug gamhanan.”—HEB. 4:12.

1. Unsay usa ka paagi nga kita makasulod sa kapahulayan sa Diyos karon, apan nganong lisod tingali kanang buhaton?

SA MIAGING artikulo, atong nasayran nga kita makasulod sa kapahulayan sa Diyos kon kita molihok uyon sa iyang mga katuyoan. Usahay, lisod kanang buhaton. Pananglitan, sa dihang atong masayran nga supak si Jehova sa atong gustong kalingawan, ang una natong reaksiyon mao ang pagsupak niana. Kana nagpaila nga kinahanglan kitang mahimong mas “andam mosunod.” (Sant. 3:17) Niining artikuloha, atong repasohon ang pipila ka kahimtang diin ang atong kaandam nga mopahiuyon sa katuyoan sa Diyos—nga kinasingkasing nga magmasinugtanon—mahimong masulayan.

2, 3. Unsay padayon natong buhaton aron magpabiling tilinguhaon sa mga mata ni Jehova?

 ² Andam ka bang modawat ug tambag nga binase sa Bibliya? Ang Kasulatan nag-ingon nga kabubut-on sa Diyos nga tigomon “ang tilinguhaong mga butang sa tanang kanasoran.” (Hag. 2:7) Siyempre, ang kadaghanan kanato dili pa tilinguhaon sa bag-o pa kitang nagtuon sa kamatuoran. Apan tungod sa atong gugma sa Diyos ug sa iyang Anak, kita nag-usab sa atong tinamdan ug batasan aron bug-os makapahimuot sa Diyos. Sa kataposan, human sa daghang pag-ampo ug dakong paningkamot, kita takos na alang sa bawtismo.—Basaha ang Colosas 1:9, 10.

³ Apan human sa atong bawtismo, kita makigbisog gihapon sa atong pagkadili-hingpit. Hinuon, kon kita padayong makigbisog ug magmadeterminado nga mahimong mas tilinguhaon sa mga mata ni Jehova, panalanginan niya ang atong paningkamot.

Sa Dihang Gikinahanglan ang Tambag

4. Unsa ang tulo ka paagi nga kita makadawat ug Kasulatanhong tambag?

⁴ Aron mabuntog ang atong mga kahuyangan, kinahanglang mailhan una kana. Mahimong gamiton ni Jehova ang usa ka makapatandog-sa-kasingkasing nga pakigpulong sa Kingdom Hall o artikulo sa usa sa atong mga basahon aron mailhan ang atong kahuyangan. Sa laing bahin, kon wala kita makasabot sa punto nga gipresentar sa pakigpulong o wala makapadapat sa napatik nga tambag, mahimong gamiton ni Jehova ang isigka-Kristohanon aron ipaila ang atong kahuyangan.—Basaha ang Galacia 6:1.

5. Unsa tingali ang atong pipila ka reaksiyon sa dihang kita tambagan? Nganong ang mga ansiyano kinahanglang padayong motabang kanato?

⁵ Dili sayon modawat ug tambag gikan sa dili-hingpit nga tawo, bisan pag kana gihatag sa mataktikanhon ug mahigugmaong paagi. Apan gipakita sa Galacia 6:1 nga si Jehova nagsugo sa mga ansiyano nga ‘maningkamot’ sa pagpasibo kanato “diha sa espiritu sa kalumo.” Kon kita modawat sa ilang tambag, kita mahimong mas tilinguhaon sa panan-aw sa Diyos. Hinuon, sa dihang kita mag-ampo, dali kitang moangkon sa atong mga kahuyangan. Apan sa dihang sultihan kita sa atong kahuyangan, kita mangatarongan dayon, isipon kana nga dili seryoso, kuwestiyonon ang motibo sa nagtambag, o sawayon ang paagi sa pagtambag. (2 Hari 5:11) Kon kita tambagan bahin sa pribadong mga butang—panggawi sa usa ka membro sa pamilya, atong sininaan ug pamostura, kahinlo sa panglawas, o paboritong kalingawan nga wala uyoni ni Jehova—mahimong masuko ta ug makasultig sakit nga mga pulong. Kini makapasubo kanato ug sa magtatambag! Apan sa dihang kalmado na kita, sagad mouyon na kita sa tambag.

6. Sa unsang paagi ang pulong sa Diyos nagpadayag sa “mga hunahuna ug mga tuyo sa kasingkasing”?

⁶ Ang yawing teksto niining artikuloha magpahinumdom kanato nga ang pulong sa Diyos “gamhanan.” Oo, ang Pulong sa Diyos makapausab sa kinabuhi. Kini nagtabang kanato sa paghimog mga kausaban una ug human sa atong bawtismo. Si Pablo misulat usab sa mga Hebreohanon nga ang pulong sa Diyos “modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Heb. 4:12) Sa laing pagkasulti, sa dihang tin-aw natong masabtan ang katuyoan sa Diyos alang kanato, ang atong reaksiyon magpadayag kon kinsa gayod kita. May kalainan ba usahay ang atong panggawas nga panagway (“kalag”) ug ang tinuod natong pagkatawo (“espiritu”)? (Basaha ang Mateo 23:27, 28.) Tagda kon unsay imong reaksiyon sa mosunod nga mga kahimtang.

Nunot sa Organisasyon ni Jehova

7, 8. (a) Nganong ang pipila ka Hudiyong Kristohanon gusto gihapong mosunod sa pipila ka bahin sa Balaod? (b) Nganong ang ilang paningkamot wala mahiuyon sa katuyoan ni Jehova?

⁷ Daghan kanato ang nakamemorya sa  Proverbio 4:18: “Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.” Kana nagkahulogan nga ang atong panggawi ug pagsabot sa mga katuyoan sa Diyos mouswag usab paglabay sa panahon.

⁸ Sa atong nahisgotan sa miaging artikulo, daghang Hudiyong Kristohanon ang gusto gihapong mosunod sa Moisesnong Balaod. (Buh. 21:20) Bisag gipatin-aw ni Pablo nga ang mga Kristohanon dili na ilalom sa Balaod, ang uban misalikway sa iyang inspiradong pangatarongan. (Col. 2:13-15) Tingali mibati sila nga kon sundon gihapon nila ang pipila ka bahin sa Balaod, sila dili lutoson. Apan tin-awng gisulat ni Pablo ngadto sa Hebreohanong mga Kristohanon nga dili sila makasulod sa kapahulayan sa Diyos kon dili sila molihok nga uyon sa Iyang katuyoan. * (Heb. 4:1, 2, 6; basaha ang Hebreohanon 4:11.) Aron uyonan ni Jehova, kinahanglan nilang ilhon nga siya naggiya sa iyang katawhan sa laing direksiyon.

9. Unsay angay natong tinamdan sa dihang dunay mga kausaban sa atong pagsabot sa Kasulatan?

⁹ Karon, dunay bag-ong mga katin-awan sa pipila ka pagtulon-an sa Bibliya. Dili kita angayng matugaw niini; angay kining maglig-on sa atong pagsalig sa matinumanon ug maalamong ulipon. Sa dihang nasabtan sa mga hawas sa “ulipon” nga kinahanglang tin-awon ug tul-iron ang atong pagsabot sa usa ka bahin sa kamatuoran, dili gayod sila magpanuko sa pagbuhat niana. Ang ulipon nga matang andam nga mobuhat uyon sa katuyoan sa Diyos bisan pag sawayon sila tungod sa maong mga kausaban. Unsay imong reaksiyon sa dihang may kausaban sa atong pagsabot sa Kasulatan?—Basaha ang Lucas 5:39.

10, 11. Unsay atong makat-onan gikan sa reaksiyon sa uban sa dihang gipaila ang bag-ong mga paagi sa pagsangyaw?

¹⁰ Atong tagdon ang laing pananglitan. Sa hinapos sa ika-19 ug sayo sa ika-20 nga mga siglo, ang pipila ka Estudyante sa Bibliya nga batid nga mga mamumulong nagtuo nga ang paghatag ug pakigpulong sa publiko mao ang kinamaayohang paagi sa pagsangyaw. Ganahan kaayo silang modiskurso, ug ang pipila kanila nalipay nga gidayeg sa ilang mamiminaw. Apan nadayag sa ulahi nga buot ni Jehova nga ang iyang katawhan magmapuliki sa lainlaing paagi sa pagsangyaw, lakip ang pagpamalaybalay. Ang ubang batid nga mamumulong midumili niana. Sa panggawas, sila daw hamtong sa espirituwal ug debotado sa Ginoo. Apan sa dihang natin-aw ang katuyoan sa Diyos bahin sa buluhatong pagsangyaw, nadayag ang ilang tinuod nga mga hunahuna, tuyo, ug motibo. Unsay gibati ni Jehova bahin kanila? Siya wala magpanalangin kanila ug sila namiya sa organisasyon.—Mat. 10:1-6; Buh. 5:42; 20:20.

¹¹ Kadtong nagpabiling maunongon sa organisasyon nalisdan usab sa pagsangyaw sa balaybalay, ilabina sa sinugdanan. Apan sila nagmasinugtanon. Ngadtongadto, nabuntog nila ang ilang kakulba ug sila dagayang gipanalanginan ni Jehova. Unsay imong reaksiyon kon awhagon kang mosulay sa usa ka bag-ong paagi sa pagsangyaw? Andam ka bang mosulay niana?

Sa Dihang ang Usa ka Minahal Mobiya Kang Jehova

12, 13. (a) Nganong si Jehova nagsugo nga ipalagpot ang dili-mahinulsolong mamumuhat ug daotan? (b) Unsang pagsulay ang giatubang sa pipila ka ginikanan, ug nganong lisod kaayo kana?

¹² Kitang tanan mouyon gayod sa prinsipyo nga angay kitang magmahinlo sa pisikal, moral, ug espirituwal aron mapahimut-an ang Diyos. (Basaha ang Tito 2:14.) Apan may mga kahimtang diin malisdan kita sa pagsunod niining sugoa. Pananglitan, ang bugtong anak nga lalaki sa usa ka sulondang magtiayon mibiya sa kamatuoran. Kay gipalabi  ang “umalaging kalipay sa pagpakasala” inay sa iyang relasyon kang Jehova ug sa iyang diyosnong ginikanan, siya gipalagpot.—Heb. 11:25.

¹³ Naguol pag-ayo ang mga ginikanan! Siyempre, sila nahibalo nga ang Bibliya nag-ingon nga “mohunong na sa pagpakig-uban kang bisan kinsa nga gitawag ug igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili gani mokaon uban sa maong tawo.” (1 Cor. 5:11, 13) Nahibalo usab sila nga ang pulong “bisan kinsa” naglakip sa mga membro sa pamilya nga wala na sa ilang poder. Apan gimahal nila pag-ayo ang ilang anak! Tungod niana sila tingali mangatarongan: ‘Unsaon namo pagtabang sa among anak nga mobalik kang Jehova kon limitado kaayo ang among pagpakig-uban kaniya? Dili ba mas matabangan namo siya kon kanunay kaming makig-estorya kaniya?’ *

14, 15. Unsang desisyon ang angayng himoon sa mga ginikanan bahin sa napalagpot nga mga anak?

¹⁴ Makasimpatiya kita sa kaguol sa maong mga ginikanan. Kon buot hunahunaon, ang ilang anak puwedeng mopili, apan iyang gipili ang dili-Kristohanong pagkinabuhi kay sa pahimuslan ang suod nga pagpakig-uban sa iyang mga ginikanan ug sa ubang isigkamagtutuo. Sa laing bahin, ang mga ginikanan dili makabuot sa desisyon sa ilang anak. Dili ikatingala nga naguol kaayo sila!

¹⁵ Apan unsay buhaton sa mga ginikanan? Sundon ba nila ang tin-awng direksiyon ni Jehova? O mangatarongan sila nga pwede silang makig-uban kanunay sa napalagpot nga anak ug tawgon kanang “kinahanglanong kalihokan sa pamilya”? Sa dihang modesisyon, angay nilang tagdon kon unsay pagbati ni Jehova bahin niana. Katuyoan niya nga mahuptang hinlo ang organisasyon ug, kon posible, aron makaamgo ang mamumuhat ug daotan. Sa unsang paagi ang mga ginikanan makapaluyo sa maong katuyoan?

16, 17. Unsay atong makat-onan sa panig-ingnan ni Aaron?

¹⁶ Ang igsoon ni Moises nga si Aaron miatubang ug lisod nga situwasyon bahin sa iyang duha ka anak lalaki. Hunahunaa ang iyang gibati sa dihang ang iyang anak nga si Nadab ug Abihu naghalad ug gidiling kalayo kang Jehova ug sila gipatay. Siyempre, dili na gyod makauban ni Aaron ang duha niya ka anak. Apan dili lamang kana. Si Jehova nagsugo kang Aaron ug sa iyang matinumanong mga anak nga lalaki: “Ayaw ninyo pasagding magkalkag ang buhok sa inyong mga ulo, ug dili ninyo gision ang inyong mga besti [sa pagbangotan], aron dili kamo mamatay ug aron [si Jehova] dili masuko sa tibuok katigoman.” (Lev. 10:1-6) Tin-aw ang mensahe. Angay nga mas higugmaon nato si  Jehova kay sa napalagpot nga membro sa pamilya.

¹⁷ Karon, si Jehova dili dayon mopatay niadtong molapas sa iyang mga balaod. Siya mahigugmaong naghatag kanilag kahigayonan nga maghinulsol sa ilang dili-matarong nga mga buhat. Apan, unsa kahay bation ni Jehova kon ang ginikanan sa napalagpot dili mosunod sa iyang sugo ug mangitag mga rason sa pagpakig-uban sa ilang anak?

18, 19. Unsang mga panalangin ang mabatonan sa pamilya kon mosunod sila sa mga instruksiyon ni Jehova bahin sa pagpalagpot?

¹⁸ Daghang napalagpot kaniadto miingon nga natabangan silang makaamgo sa ilang sayop tungod sa lig-ong baroganan sa ilang mga higala ug pamilya. Sa pagrekomendar nga ipasig-uli ang usa ka batan-ong babaye, ang mga ansiyano misulat nga ang usa ka hinungdan nga siya nagbag-o sa iyang kinabuhi mao nga ang iyang igsoong lalaki nagtahod sa kahikayan sa pagpalagpot. Ang babaye miingon nga ang pagkamaunongon sa iyang igsoon sa pagsunod sa kahikayan ni Jehova nakatabang kaniya nga mobalik sa organisasyon.

¹⁹ Unsay atong ikahinapos? Kinahanglang suklan nato ang kiling sa atong dili-hingpit nga kasingkasing nga mosupak sa tambag sa Kasulatan. Kinahanglang kombinsido kita nga ang isulti ni Jehova maoy alang kanunay sa atong kaayohan.

“Ang Pulong sa Diyos Buhi”

20. Sa unsang duha ka paagi mapadapat ang Hebreohanon 4:12? (Tan-awa ang potnot.)

²⁰ Sa dihang gisulat ni Pablo nga “ang pulong sa Diyos buhi,” siya wala espesipikong magtumong sa Bibliya. * Gipakita sa konteksto nga siya nagtumong sa mga saad sa Diyos. Ang punto ni Pablo mao nga ang Diyos kanunayng nagatuman sa iyang mga saad. Si Jehova naglig-on niini pinaagi ni propeta Isaias: “Ang akong pulong . . . dili mobalik kanako nga walay sangpotanan, apan kini . . . magpalampos sa butang nga tungod niana kini akong gipadala.” (Isa. 55:11) Busa, dili ta angayng mawad-ag pailob kon wala pa matuman ang mga saad sa Diyos nga gusto na natong mahitabo. Si Jehova “nagpadayon sa pagbuhat” aron bug-os matuman ang iyang katuyoan.—Juan 5:17.

21. Sa unsang paagi ang Hebreohanon 4:12 nakadasig sa matinumanong edaran nga mga membro sa “dakong panon”?

²¹ Ang matinumanong edaran nga mga membro sa “dakong panon” nag-alagad na kang Jehova sa daghang katuigan. (Pin. 7:9) Daghan kanila ang wala magdahom nga matigulang niining sistemaha sa mga butang. Bisan pa niana, sila wala mahigawad. (Sal. 92:14) Sila nahibalo nga ang pulong sa Diyos buhi ug nga tumanon ni Jehova ang iyang mga saad. Kay hinungdanon sa Diyos ang iyang katuyoan, malipay siya kon hinungdanon sab kana kanato. Sulod niining ikapitong adlaw sa kapahulayan, walay makapugong kang Jehova sa pagtuman sa iyang katuyoan. Siya nahibalo nga ang iyang katawhan, ingong usa ka grupo, magpaluyo niini. Komosta ka? Nakasulod ka na ba sa kapahulayan sa Diyos?

[Mga footnote]

Nahinumdom Ka Ba?

• Unsay gikinahanglan aron makasulod kita sa kapahulayan sa Diyos karon?

• Unsay koneksiyon sa katuyoan sa Diyos ug sa atong kaandam nga modawat ug Kasulatanhong tambag?

• Sa unsang mga kahimtang nga malisdan kita sa pagsunod sa Kasulatanhong direksiyon, ug nganong kinahanglang mosunod niana?

• Sa unsang duha ka paagi nga mahimong sabton ang Hebreohanon 4:12?

[Mga Pangutana sa Pagtuon]

[Hulagway sa panid 31]

Naguol pag-ayo ang mga ginikanan!