Mosunod Ka ba sa Mahigugmaong Giya ni Jehova?
Mosunod Ka ba sa Mahigugmaong Giya ni Jehova?
“Gidumtan ko ang tanang bakak nga alagianan.”—SAL. 119:128.
1, 2. (a) Sa dihang mangayog direksiyon sa pag-adto sa usa ka dapit, unsang pasidaan ang imong pabilhan, ug ngano? (b) Unsang mga pasidaan ang gihatag ni Jehova sa iyang mga alagad, ug ngano?
HANDURAWA nga moadto ka sa usa ka dapit. Kay dili man ka katultol, mangutana ka sa imong higala nga suheto sa dalan. Lagmit kini ang iyang isulti sa dihang maghatag kanimog direksiyon: “Pagbantay sa sunod kurbada kay dili klaro ang karatula. Daghan ang nagsunod niana ug nahisalaag.” Pabilhan mo ba ang iyang pagkamahunahunaon ug mosunod sa iyang pasidaan? Si Jehova nahisama sa maong higala. Siya naghatag kanatog klarong direksiyon sa dalan ngadto sa kinabuhing walay kataposan, apan siya nagpasidaan usab sa mga kapeligrohan nga makapahisalaag kanato.—Deut. 5:32; Isa. 30:21.
2 Niini ug sa sunod artikulo, atong hisgotan ang pipila ka kapeligrohan nga gipasidaan sa atong Higala, si Jehova nga Diyos. Atong hinumdoman nga siya nagpasidaan kanato tungod sa iyang pagkamahunahunaon ug gugma. Gusto ni Jehova nga makaabot kita sa atong destinasyon. Masubo siya sa dihang ang mga tawo dili molikay sa mga kapeligrohan ug mahisalaag. (Ezeq. 33:11) Niining artikuloha, atong hisgotan ang tulo ka kapeligrohan. Ang una gikan sa gawas, ang ikaduha gikan sa atong kaugalingon. Ang ikatulo gikan sa mga butang nga dili tinuod. Angay natong masayran kining tulo ka kapeligrohan ug kon unsay gitudlo sa atong langitnong Amahan sa paglikay niana. Usa ka salmista miingon kang Jehova: “Gidumtan ko ang tanang bakak nga alagianan.” (Sal. 119:128) Kana ba usab ang imong pagbati? Atong susihon kon sa unsang paagi kita mahimong mas determinado sa paglikay sa “bakak nga alagianan.”
Ayawg Sunda ang “Panon sa Katawhan”
3. (a) Nganong lagmit peligroso ang pagsunod sa ubang magpapanaw kon dili kita segurado sa hustong dalan? (b) Unsang hinungdanong prinsipyo ang anaa sa Exodo 23:2?
3 Samtang nagpanaw paingon sa layong dapit, unsay imong himoon kon dili ka segurado sa hustong dalan? Basin mosunod ka sa ubang magpapanaw—ilabina kon daghan sila. Peligroso kana kay basin dili mo parehog destinasyon o sila usab nahisalaag. Maylabot niini, tagda ang usa ka prinsipyo diin gibase ang usa sa mga balaod nga gihatag sa karaang Israel. Ang mga maghuhukom o mga saksi sa hudisyal nga kaso gipasidan-an sa kapeligrohan sa ‘pagsunod sa panon sa katawhan.’ (Basaha ang Exodo 23:2.) Dali kaayong madaog sa pagpit-os sa isigkaingon ang dili-hingpit nga mga tawo, mao nga matuis ang hustisya. Apan, ang prinsipyo bahin sa dili ‘pagsunod sa panon sa katawhan’ dili lamang aplikado sa hudisyal nga mga kaso.
4, 5. Sa unsang paagi si Josue ug Caleb gipit-os sa pagsunod sa panon? Unsay nakatabang kanila sa pagsukol niana?
4 Sa pagkatinuod, ang pagpit-os sa ‘pagsunod sa panon sa katawhan’ makaapektar kanato sa bisan unsang panahon. Kini lagmit kalit nga motungha, ug mahimong lisod kaayong suklan. Palandonga pananglitan ang pagpit-os nga nasinati ni Josue ug Caleb. Lakip sila sa 12 ka lalaki nga nangespiya sa Yutang Saad. Sa ilang pag-uli, ang napulo kanila nagdalag negatibo ug makahahadlok nga taho. Sila miingon pa gani nga ang pipila ka molupyo didto maoy mga higante nga kaliwat sa mga Nepilim—mga anak sa rebeldeng mga manulonda ug sa mga babaye sa yuta. (Gen. 6:4) Imposible kadto kay ang tanang Nepilim nangamatay sa Lunop sa adlaw ni Noe, gatosan ka tuig kanhi, ug sila wala makabatog mga anak. Apan bisan ang sayop nga mga ideya makaapektar niadtong huyang ug pagtuo. Ang negatibong taho sa napulo ka espiya nakapalisang sa katawhan. Wala madugay, ang kadaghanan nila nagtuo nga sayop ang pagsunod sa sugo ni Jehova nga mosulod sa Yutang Saad. Unsay gihimo ni Josue ug Caleb niadtong lisod nga kahimtang?—Num. 13:25-33.
5 Sila wala mosunod sa panon sa katawhan. Bisag dili gusto sa panon nga makadungog, gisulti sa duha ka espiya ang kamatuoran ug gibarogan kadto—bisag gihulga silang batoon! Diin gikan ang ilang kaisog? Sa ilang pagtuo kang Jehova. Ang mga tawong may pagtuo makasabot gayod sa kalainan sa way-basehanang mga pangangkon sa tawo ug sa mga saad ni Jehova nga Diyos. Sa ulahi, gipahayag sa duha ka espiya nga si Jehova kanunayng nagatuman sa iyang mga saad. (Basaha ang Josue 14:6, 8; 23:2, 14.) Gihigugma ni Josue ug Caleb ang ilang maunongong Diyos, ug dili gayod nila gustong pasakitan siya pinaagi sa pagsunod sa way-pagtuong katawhan. Busa sila mibarog, nga naghatag ug maayong panig-ingnan kanato karon.—Num. 14:1-10.
6. Sa unsang mga paagi kita lagmit mobati nga gipit-os sa pagsunod sa panon?
6 May panahon ba nga ikaw gipit-os sa pagsunod sa panon? Kadaghanan sa mga tawo walay pagtahod kang Jehova ug sa iyang moral nga mga sukdanan. Sila nagpasiugdag sayop nga mga ideya bahin sa kalingawan ug lulinghayaw. Sila moinsistir nga dili daotan ang imoralidad, kapintasan, ug espiritismo nga kaylap diha sa mga programa sa TV, sine, ug mga video game. (2 Tim. 3:1-5) Sa dihang magpilig kalingawan ug lulinghayaw alang sa imong kaugalingon o sa pamilya, ang imong mga desisyon ba maimpluwensiyahan sa dili-estriktong mga konsensiya sa uban? Kon mao, ikaw nagasunod sa panon.
7, 8. (a) Sa unsang paagi mabansay ang atong “mga gahom sa pagsabot,” ug nganong kana mas mapuslanon kay sa pagsunod sa daghang estriktong mga lagda? (b) Nganong makapalipay ang panig-ingnan sa daghang Kristohanong batan-on?
7 Si Jehova naghatag kanatog bililhong gasa nga makatabang nato sa pagdesisyon—ang atong “mga gahom sa pagsabot.” Apan, kini kinahanglang mabansay “pinaagi sa paggamit.” (Heb. 5:14) Ang pagsunod sa panon dili makabansay sa atong mga gahom sa pagsabot; ni ang daghang estriktong mga lagda magbansay sa atong konsensiya. Kanay hinungdan, pananglitan, nga ang katawhan ni Jehova wala hatagig listahan sa mga pelikula, libro, ug mga site sa Internet nga pagalikayan. Kay paspas nga nagakausab kining kalibotana, magkinahanglan kita kanunay ug bag-ong listahan. (1 Cor. 7:31) Gawas pa, dili kita makapamalandong nga mainampoon sa mga prinsipyo sa Bibliya ug makahimog mga desisyon base sa maong mga prinsipyo.—Efe. 5:10.
8 Siyempre, ang pipila supak sa atong mga desisyon nga nahiuyon sa Bibliya. Lagmit pit-oson pag-ayo ang Kristohanong mga batan-on sa eskuylahan nga mosunod sa ginabuhat sa kadaghanan. (1 Ped. 4:4) Busa, makapalipay nga daghang Kristohanon, bata ug tigulang, ang nagsundog sa pagtuo ni Josue ug Caleb nga wala magsunod sa panon.
Ayawg Sunda ang ‘Inyong mga Kasingkasing ug mga Mata’
9. (a) Samtang ikaw nagpanaw, nganong peligroso ang pagsubay sa dalan tungod lang kay gusto nimo kini? (b) Nganong ang balaod diha sa Numeros 15:37-39 hinungdanon sa karaang Israel?
9 Ang ikaduhang kapeligrohan nga atong hisgotan naggikan sa atong kaugalingon. Agig ilustrasyon: Kon moadto ka sa usa ka dapit, unsay mahitabo kon dili ka mogamit ug mapa ug mosubay lamang sa dalan nga gusto nimo tungod sa nindot nga talan-awon? Dili gyod ka makaabot sa imong adtoan. Bahin niini, tagda ang laing balaod ni Jehova ngadto sa karaang Israel. Daghan karon ang dili makasabot sa balaod bahin sa pagbutang ug borlas ug asul nga kordon sa sidsid sa besti sa mga Israelinhon. (Basaha ang Numeros 15:37-39.) Apan, nasabtan mo ba kon nganong hinungdanon ang maong balaod? Ang pagsunod niana nagpalahi sa katawhan sa Diyos gikan sa paganong mga nasod. Gikinahanglan kadto aron mahuptan ang pag-uyon ni Jehova. (Lev. 18:24, 25) Apan, ang maong balaod nagpadayag usab ug laing kapeligrohan nga mahimong makapahisalaag kanato gikan sa dalan sa kinabuhing walay kataposan. Sa unsang paagi?
10. Sa unsang paagi gipakita ni Jehova nga siya nakaila gayod sa mga tawo?
10 Matikdi kon nganong gihatag ni Jehova kini nga balaod: ‘Dili kamo magsunod sa inyong mga kasingkasing ug sa inyong mga mata, nga ginasunod ninyo sa pagpakighilawas.’ Si Jehova nakaila gayod sa mga tawo. Nahibalo siya nga ang atong kasingkasing, nga mao ang atong kinasulorang pagkatawo, daling mahaylo sa mga butang nga atong makita. Ang Bibliya nagpasidaan: “Ang kasingkasing labaw nga malimbongon kay sa bisan unsa pa ug desperado. Kinsa ang makahibalo niini?” (Jer. 17:9) Busa, nasabtan mo ba kon nganong haom ang pasidaan ni Jehova sa mga Israelinhon? Nahibalo siya nga sila lagmit motan-aw sa paganong katawhan ug mahaylo sa pagsunod sa ilang makita. Lagmit matental sila sa pagsundog sa pagpamesti, panghunahuna, ug linihokan niadtong mga dili-magtutuo.—Prov. 13:20.
11. Sa unsang paagi kita lagmit matental sa pagsunod sa atong makita?
11 Sa atong adlaw, ang atong malimbongong kasingkasing mas daling madani sa mga butang nga atong makita. Kita nagkinabuhi sa kalibotan nga nagpasiugda sa pagtagbaw sa unodnong mga tinguha. Busa sa unsang paagi nato ikapadapat ang prinsipyo sa Numeros 15:39? Tagda kini: Kon ang imong mga kauban sa eskuylahan, trabahoan, o mga silingan magsul-ob ug seksi nga mga besti, maapektohan ka ba niana? Matental ka ba sa ‘pagsunod sa imong kasingkasing ug mga mata’ ug mosundog sa imong nakita? Imo bang ipaubos ang imong mga sukdanan sa pagpamesti pinaagi sa pagsundog kanila?—Roma 12:1, 2.
12, 13. (a) Unsay angay natong buhaton kon ang atong mga mata maglirawliraw sa mga butang nga dili-angay? (b) Unsay magtukmod kanato sa paglikay nga makapatental sa uban?
12 Kinahanglan gayod nga ugmaron nato ang pagpugong-sa-kaugalingon. Kon ang atong mga mata maglirawliraw sa mga butang nga dili angay, atong hinumdoman ang matinumanong si Job, kinsa nakigsaad sa iya mismong mga mata—nga determinadong dili motan-aw nga maibogon sa dili niya asawa. (Job 31:1) Si Haring David susamang midesisyon: “Dili ko ibutang sa atubangan sa akong mga mata ang bisan unsang butang nga walay hinungdan.” (Sal. 101:3) Ang bisan unsa nga makadaot sa atong hinlong konsensiya ug sa atong relasyon kang Jehova maoy “butang nga walay hinungdan” alang kanato. Kana naglakip sa bisan unsang tentasyon nga makadani sa atong mga mata ug kasingkasing sa pagbuhat ug daotan.
13 Sa laing bahin, dili gayod nato gusto nga mahimong “butang nga walay hinungdan” ngadto sa uban pinaagi sa pagtental kanila sa paghunahunag daotan. Busa seryosohon nato ang tambag sa Bibliya nga magsul-ob ug hapsay ug makasaranganong besti. (1 Tim. 2:9) Ang pagkamakasaranganon wala magpasabot sa paghunahuna lamang sa kon unsay atong gusto. Kinahanglang tagdon nato ang konsensiya ug pagbati sa uban, nga dili unahon ang pagpahimuot sa kaugalingon. (Roma 15:1, 2) Daghan kaayong batan-ong Kristohanon ang nagpakitag maayong ehemplo sa pagpamesti. Ikapasigarbo gayod nato sila kay sila wala ‘mosunod sa ilang mga kasingkasing ug mga mata,’ kondili sila nagpahimuot kang Jehova sa tanan nilang ginabuhat—bisan sa ilang pagpamesti!
Ayawg Sunda ang “mga Butang nga Dili Tinuod”
14. Unsay gipasidaan ni Samuel bahin sa pagsunod sa “mga butang nga dili tinuod”?
14 Handurawa nga sa imong panaw, moagi kag halapad nga desyerto. Unsay mahitabo kon motipas ka sa dalan aron adtoon ang morag tubig nga imong nakita? Ang pag-adto sa maong ilusyon makapahisalaag kanimo ug makapameligro sa imong kinabuhi! Si Jehova nahibalo kon unsa ka peligroso ang pagsalig sa butang nga dili tinuod. Tagda pananglitan ang mga Israelinhon nga gustong mosundog sa ilang silingang mga nasod, nga may tawhanong mga hari. Ang maong tinguha maoy seryosong sala kay kadto samag pagsalikway kang Jehova ingong ilang Hari. Bisag gitugotan sila ni Jehova nga makabatog tawhanong hari, siya nagpasidaan kanila pinaagi ni propeta Samuel bahin sa pagsunod sa “mga butang nga dili tinuod.”—Basaha ang 1 Samuel 12:21.
15. Sa unsang mga paagi ang mga Israelinhon nagsunod sa mga butang nga dili tinuod?
15 Ang mga Israelinhon ba naghunahuna nga ang tawhanong hari mas tinuod ug kasaligan kay kang Jehova? Kon mao, sila nagsunod sa butang nga dili tinuod! Ug sila nameligro sa pagsunod sa ubang butang nga gimugna ni Satanas. Ang tawhanong mga hari daling makaimpluwensiya kanila sa pagsimbag mga idolo. Ang mga tigsimbag idolo nasayop sa paghunahuna nga ang mga diyosdiyos nga gama sa kahoy o bato mas tinuod ug kasaligan kay sa dili makita nga Diyos, si Jehova, nga naglalang sa tanang butang. Apan si apostol Pablo nag-ingon nga ang mga idolo “walay bili.” (1 Cor. 8:4) Sila dili makakita, makadungog, makasulti, o makalihok. Imo tingali silang makita ug mahikap, apan kon imo silang simbahon, ikaw nagsunod sa butang nga dili tinuod—ilusyon nga motultol sa kalaglagan.—Sal. 115:4-8.
16. (a) Sa unsang paagi si Satanas nagdani sa daghan karon sa pagsunod sa mga butang nga dili tinuod? (b) Nganong makaingon kita nga ang materyal nga mga butang dili tinuod, ilabina kon itandi kang Jehova nga Diyos?
16 Si Satanas eksperto gihapon sa paglingla sa mga tawo sa pagsunod sa mga butang nga dili tinuod. Pananglitan, napatuo niya ang daghan nga ang materyal nga mga butang makahatag ug kasegurohan. Ang salapi, kabtangan, ug dakog-suweldo nga trabaho daw may mga bentaha. Apan unsay mahimo sa materyal nga mga butang kon sila masakit, mahugno ang ekonomiya, o modangat ang kalamidad? Unsay ikatabang niini sa dihang ang mga tawo mobati nga ang ilang kinabuhi haw-ang ug walay katuyoan? Makatubag ba kini sa hinungdanong mga pangutana bahin sa kinabuhi? Makaluwas ba kini sa usa nga nag-ungaw sa kamatayon? Kon mosalig kita sa materyal nga mga butang aron tagbawon ang atong espirituwal nga mga panginahanglan, kita mahigawad. Ang materyal nga mga butang dili makaluwas; kini maoy mga butang nga dili tinuod. Kini dili makahatag ug pisikal nga kasegurohan, kay kini dili makapalugway sa kinabuhi o makahanaw sa sakit ug kamatayon. (Prov. 23:4, 5) Apan, si Jehova nga Diyos tinuod gayod! Ang pagbaton lamang ug lig-ong relasyon uban kaniya ang makahatag ug tinuod nga kasegurohan. Pagkatalagsaong panalangin kana! Dili gayod kita mobiya kaniya ug mosunod sa mga butang nga dili tinuod.
17. Unsay imong determinadong buhaton bahin sa mga kapeligrohan nga atong gihisgotan?
17 Dili ba usa ka panalangin nga si Jehova maoy atong Higala ug Giya sa dalan sa kinabuhing walay kataposan? Kon kita padayong mosunod sa iyang mahigugmaong mga pasidaan batok sa tulo ka kapeligrohan—ang panon, atong kasingkasing, ug mga butang nga dili tinuod—makaabot gayod kita sa atong destinasyon nga kinabuhing walay kataposan. Sa sunod artikulo, atong hisgotan ang tulo pa ka pasidaan nga gihatag ni Jehova aron atong dumtan ug likayan ang bakak nga mga alagianan nga nakapahisalaag sa daghan.—Sal. 119:128.
Unsay Imong Hunahuna?
Sa unsang paagi nimo mapadapat ang mosunod nga mga prinsipyo sa Kasulatan?
[Mga Pangutana sa Pagtuon]
[Hulagway sa panid 11]
Natental ka ba sa pagsunod sa panon?
[Hulagway sa panid 13]
Nganong peligroso nga sundon lamang kon unsay imong gusto?
[Hulagway sa panid 14]
Nagsunod ka ba sa mga butang nga dili tinuod?
