Magmakigdaiton Kamo
Magmakigdaiton Kamo
“Atong tinguhaon ang mga butang nga mopatunghag pakigdait.”—ROMA 14:19.
1, 2. Nganong adunay panagdait ang mga Saksi ni Jehova?
ANG tinuod nga kalinaw, o pakigdait lisod makaplagan diha sa kalibotan karon. Bisan ang mga tawo nga parehog nasyonalidad ug pinulongan sagad nagkabahinbahin tungod sa relihiyon, politika, ug kahimtang sa kinabuhi. Sa kasukwahi, ang katawhan ni Jehova nagkahiusa bisag sila naggikan sa “tanang kanasoran ug mga tribo ug katawhan ug mga pinulongan.”—Pin. 7:9.
2 Ang panagdait nga atong nabatonan dili sulagma. Ang pangunang rason mao nga atong ‘natagamtam ang pakigdait uban sa Diyos’ tungod kay kita may pagtuo sa iyang Anak, kinsa nagtubos sa atong mga sala. (Roma 5:1; Efe. 1:7) Dugang pa, ang matuod nga Diyos naghatag ug balaang espiritu sa iyang maunongong mga alagad, ug ang usa ka bahin sa bunga sa maong espiritu mao ang pakigdait. (Gal. 5:22) Ang laing rason sa atong panagdait mao nga kita ‘dili bahin sa kalibotan.’ (Juan 15:19) Kita neyutral sa mga isyu sa politika. Kay ‘gisalsal na nato ang atong mga espada ingong mga punta sa daro,’ kita dili moapil sa mga gubat.—Isa. 2:4.
3. Unsay mga resulta sa atong pagdinaitay, ug unsay hisgotan niining artikuloha?
3 Ang atong pagdinaitay sa usag usa wala lamang magpasabot nga dili nato daoton ang atong mga igsoon. Bisan pag ang mga membro sa kongregasyon tingali gikan sa lainlaing tribo ug kultura, kita ‘naghigugmaay sa usag usa.’ (Juan 15:17) Ang atong pagdinaitay magtukmod kanato nga ‘buhaton ang maayo ngadto sa tanan, apan ilabina kanila nga atong kabanay sa pagtuo.’ (Gal. 6:10) Ang atong malinawong espirituwal nga paraiso bililhon kaayo ug angayng panalipdan. Busa, atong susihon kon sa unsang paagi kita magmakigdaiton sulod sa kongregasyon.
Kon Kita Mapandol
4. Unsay atong buhaton kon may masuko kanato?
4 “Kitang tanan mangapandol sa makadaghan,” misulat si disipulong Santiago. “Kon adunay dili mapandol sa pulong, siya usa ka tawong hingpit.” (Sant. 3:2) Busa, motungha gayod ang mga panagbingkil ug di-pagsinabtanay taliwala sa mga igsoon. (Filip. 4:2, 3) Apan, kana mahusay ra nga dili madaot ang kalinaw sa kongregasyon. Pananglitan, tagda ang tambag nga angay natong sundon kon may masuko kanato.—Basaha ang Mateo 5:23, 24.
5. Sa unsang paagi kita magmakigdaiton kon kita ang masilo?
5 Komosta kon kita ang masilo? Ato bang dahomon nga ang nakapasilo kanato maoy moduol ug mangayog pasaylo? “[Ang gugma] dili maghupot ug talaan sa kadaot,” nag-ingon ang 1 Corinto 13:5. Sa ato pa, sa dihang masilo, kita magmakigdaiton pinaagi sa pagpasaylo ug pagkalimot. (Basaha ang Colosas 3:13.) Kini ang labing maayong himoon sa dihang motungha ang ginagmayng problema, kay kini makaamot sa panagdait taliwala sa mga igsoon ug mohatag kanatog kalinaw sa hunahuna. Usa ka maalamong panultihon nag-ingon: “Katahom . . . ang pagpalabay sa kalapasan.”—Prov. 19:11.
6. Unsay angay natong buhaton kon lisod kalimtan ang sala nga gibuhat kanato?
6 Komosta kon lisod kalimtan ang sala nga gibuhat kanato? Dili maalamon ang pagtabi niana sa uban. Kana makadaot sa kalinaw sa kongregasyon. Unsay angayng buhaton aron masulbad kana sa malinawong paagi? Ang Mateo 18:15 nag-ingon: “Kon ang imong igsoon makasala, adtoa siya ug ipadayag ang iyang sayop tali kanimo ug kaniya lamang. Kon siya mamati kanimo, nakabig mo ang imong igsoon.” Bisag ang Mateo 18:15-17 mapadapat sa seryosong sala, kaharmonya sa prinsipyo sa bersikulo 15, angay kitang malulotong moduol sa nakapasilo kanato diha sa pribado ug maningkamot nga magkauli ang maayong relasyon. *
7. Nganong angayng husayon dayon ang panagbingkil?
7 Si apostol Pablo misulat: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efe. 4:26, 27) “Pakighusay sa madali uban sa usa nga nagasumbong batok kanimo sa hukmanan,” miingon si Jesus. (Mat. 5:25) Busa aron mahimong makigdaiton, kinahanglang husayon dayon ang panagbingkil. Ngano? Aron dili kana mograbe, sama sa samad nga naimpeksiyon kay wala dayon tambali. Ang garbo, kasina, o gugma sa materyal nga mga butang dili angayng magbabag kanato sa paghusay dayon sa panagbingkil.—Sant. 4:1-6.
Kon Daghan ang Nalangkit
8, 9. (a) Unsang magkalahing panglantaw ang mitungha sa kongregasyon sa Roma sa unang siglo? (b) Unsay gitambag ni Pablo sa mga igsoon sa Roma bahin sa ilang panagbingkil?
8 Usahay daghan ang nalangkit sa panagbingkil diha sa kongregasyon. Tinuod kini sa kahimtang sa mga Kristohanon sa Roma, kinsa gisulatan ni apostol Pablo. Dihay panagbingkil tali sa Hudiyo ug Hentil nga mga Kristohanon. Ang pipila ka membro sa maong kongregasyon nagtamay niadtong may huyang, o estrikto kaayo nga konsensiya. Sila sayop nga naghukom sa uban base sa ilang personal nga opinyon. Unsay gitambag ni Pablo sa kongregasyon?—Roma 14:1-6.
9 Gitambagan ni Pablo ang duha ka grupo. Iyang gipahimangnoan kadtong nakasabot nga dili na sila angayng mosunod sa Moisesnong Balaod nga dili pakaubson ang ilang mga igsoon. (Roma 14:2, 10) Kana nga tinamdan makapandol sa mga magtutuo nga dili pa gustong mokaon sa mga butang nga gidili sa Balaod. “Hunong na sa paglumpag sa buhat sa Diyos tungod lamang sa pagkaon,” mitambag si Pablo kanila. “Maayo nga dili mokaon ug karne o moinom ug bino o mobuhat ug bisan unsang butang nga ikapandol sa imong igsoon.” (Roma 14:14, 15, 20, 21) Sa laing bahin, gitambagan ni Pablo kadtong mas estriktog konsensiya nga dili hukman ingong dili-maunongon kadtong liberal ug panglantaw. (Roma 14:13) Iyang gisultihan ang ‘tanan diha sa ilang taliwala nga dili maghunahuna ug labaw bahin sa iyang kaugalingon kay sa angay nga hunahunaon.’ (Roma 12:3) Kay natambagan na ang duha ka grupo, si Pablo misulat: “Busa, atong tinguhaon ang mga butang nga mopatunghag pakigdait ug ang mga butang nga makapalig-on sa usag usa.”—Roma 14:19.
10. Sama sa kongregasyon sa Roma, unsay gikinahanglan aron masulbad ang panagbingkil karon?
10 Makaseguro kita nga ang kongregasyon sa Roma misunod sa tambag ni Pablo ug mihimog kausaban. Sa dihang motungha karon ang di-pagsinabtanay taliwala sa mga igsoon, dili ba angayng sulbaron dayon ang panagbingkil pinaagi sa pagpadapat sa tambag sa Bibliya? Sama sa kahimtang sa mga taga-Roma, ang mga grupo karon nga nagkabingkil kinahanglang mohimog kausaban aron adunay ‘pagdinaitay sa usag usa.’—Mar. 9:50.
Kon Gikinahanglan ang Tabang
11. Unsay angayng himoon sa usa ka ansiyano kon makigsulti kaniya ang igsoong may reklamo batok sa isigkamagtutuo?
11 Komosta kon may igsoon nga gustong makigsulti sa usa ka ansiyano bahin sa iyang problema batok sa iyang paryente o isigkamagtutuo? Ang Proverbio 21:13 nag-ingon: “Si bisan kinsa nga magasampong sa iyang igdulungog sa pagtuaw sa timawa, siya usab magatawag ra ug dili pagatubagon.” Ang usa ka ansiyano dili gayod “magasampong sa iyang igdulungog.” Apan, ang laing panultihon nagpasidaan: “Ang unang mosulti sa usa ka husay morag husto, hangtod nga sukitsukiton na siya sa iyang kontra.” (Prov. 18:17, Ang Bag-ong Maayong Balita Biblia) Ang ansiyano angayng mamati, apan kinahanglang magbantay siya nga dili modapig sa nagreklamo. Human mamati, siya mahimong mangutana sa maong igsoon kon siya ba nakigsulti na niadtong nakapasilo niya. Mahimong hisgotan sab sa ansiyano ang Kasulatanhong mga lakang nga angayng himoon sa nagreklamo aron magpabilin ang panagdait.
12. Paghatag ug mga pananglitan nga nagpakita nga peligroso ang paglihok dayon human makadungog sa usa ka reklamo.
12 Adunay tulo ka pananglitan sa Bibliya nga nagpakita nga peligroso ang paglihok dayon human makadungog sa usa lamang ka bahin sa isyu. Si Potipar mituo sa sumbong sa iyang asawa nga lugoson unta siya ni Jose. Sa kasuko, gipabilanggo dayon ni Potipar si Jose. (Gen. 39:19, 20) Si Haring David mituo kang Ziba, kinsa miingon nga ang iyang agalon nga si Mepiboset midapig sa mga kaaway ni David. “Tan-awa! Imo na ang tanan nga gipanag-iya ni Mepiboset,” mao ang dihadihang reaksiyon ni David. (2 Sam. 16:4; 19:25-27) Si Haring Artajerjes giingnan nga ang mga Hudiyo nagtukod pag-usab sa paril sa Jerusalem kay gusto nilang morebelde sa Imperyo sa Persia. Ang hari mituo sa bakak nga taho ug mimando nga ihunong ang tanang pagpanukod sa Jerusalem. Ingong resulta, gihunong sa mga Hudiyo ang ilang pagtukod sa templo sa Diyos. (Esd. 4:11-13, 23, 24) Magmaalamon ang mga ansiyano kon sundon nila ang tambag ni Pablo kang Timoteo nga likayan ang paghukom kon wala pa madungog ang tanang impormasyon.—Basaha ang 1 Timoteo 5:21.
13, 14. (a) Kon dunay mga panagbangi, unsay angayng hinumdoman? (b) Unsay makatabang sa mga ansiyano aron makahimog hustong paghukom?
13 Bisan pag nadunggan na nimo ang duha ka bahin sa isyu, angayng hinumdoman nga “kon adunay naghunahuna nga siya nakabaton na ug kahibalo sa usa ka butang, siya wala pa mahibalo niini ingon sa angay niyang mahibaloan niini.” (1 Cor. 8:2) Nahibalo ba gayod kita sa tanang detalye nga mitultol sa maong panagbangi? Bug-os ba natong nasabtan ang ilang tagsatagsa ka kahimtang? Sa dihang mohukom ang mga ansiyano, dili sila angayng magpalimbong sa mga bakak, inabtik nga taktika, o hungihong. Ang tinudlo sa Diyos nga Maghuhukom, si Jesu-Kristo, maoy matarong nga Maghuhukom. Siya dili “mohukom sumala sa makita lamang sa iyang mga mata, ni mobadlong sumala sa butang nga nadungog lamang sa iyang mga dalunggan.” (Isa. 11:3, 4) Hinunoa, si Jesus gigiyahan sa espiritu ni Jehova, ug mao man usab ang mga ansiyano.
14 Sa dili pa mohukom, ang mga ansiyano kinahanglang moampo alang sa espiritu ni Jehova. Sila magpagiya niana pinaagi sa pagsusi sa Bibliya ug sa mga basahon gikan sa matinumanon ug maalamong ulipon.—Mat. 24:45.
Unahon ang Pagpakigdait sa Diyos
15. Kanus-a angayng itug-an ang usa ka seryosong sala nga atong nahibaloan?
15 Ang mga Kristohanon giawhag sa Bibliya nga magmakigdaiton. Apan kini nag-ingon usab: “Ang kaalam nga gikan sa itaas maoy una sa tanan putli, unya makigdaiton.” (Sant. 3:17) Ang pagkaputli angayng unahon kay sa pagkamakigdaiton. Ang pagkaputli maoy pagsunod sa moral nga sukdanan ug sa matarong nga mga sugo sa Diyos. Kon ang usa ka Kristohanon nahibalo nga ang isigkamagtutuo nakahimog seryosong sala, angay niyang awhagon siya nga itug-an kana sa mga ansiyano. (1 Cor. 6:9, 10; Sant. 5:14-16) Kon dili motug-an ang nakasala, siya nga nahibalo ang motug-an. Kon siya magpakahilom kay dili niya gusto nga ang nakasala masuko, siya nakasala usab.—Lev. 5:1; basaha ang Proverbio 29:24.
16. Unsay atong makat-onan sa gibuhat ni Jehu kang Haring Jehoram?
16 Ang usa ka asoy bahin kang Jehu nagpakita nga ang pagkamatarong sa Diyos mas labaw kay sa pagkamakigdaiton. Si Jehu gisugo sa Diyos sa pagsilot sa pamilya ni Haring Ahab. Ang daotang Haring Jehoram, nga anak ni Ahab ug Jezebel, misakay sa iyang karo sa pagsugat kang Jehu, ug miingon: “Aduna bay pakigdait, Jehu?” Siya mitubag: “Aduna bay pakigdait samtang anaa ang mga pakighilawas ni Jezebel nga imong inahan ug ang iyang daghang pamarang?” (2 Hari 9:22) Dayon, gipana ni Jehu si Jehoram ug kini milagbas sa iyang kasingkasing. Sama kang Jehu, ang mga ansiyano kinahanglang molihok ug dili mokonsentir sa dili-mahinulsolong mga makasasala tungod ug alang lamang sa kalinaw. Ilang ipalagpot sila aron ang kongregasyon magpabiling may pakigdait uban sa Diyos.—1 Cor. 5:1, 2, 11-13.
17. Unsay buhaton sa tanang Kristohanon aron mapreserbar ang kalinaw?
17 Ang kasagarang panagbingkil sa mga igsoon wala maglangkit ug seryosong sala nga nagkinahanglag hudisyal nga aksiyon. Busa, labing maayo nga tabonan ug gugma ang kasaypanan sa uban. Ang Pulong sa Diyos nag-ingon: “Ang nagatabon sa kalapasan nagapangita ug gugma, ug siya nga nagapunay ug sulti mahitungod sa usa ka butang nagapabulag niadtong suod sa usag usa.” (Prov. 17:9) Kon ato kanang sundon, atong mapreserbar ang kalinaw sa kongregasyon ug ang maayong relasyon uban kang Jehova.—Mat. 6:14, 15.
Panalanginan sa Diyos ang Makigdaiton
18, 19. Unsay mga panalangin sa mga makigdaiton?
18 Si Jehova magapanalangin kanato kon kita magmakigdaiton. Atong matagamtam ang suod nga relasyon kang Jehova samtang kita nagsundog kaniya, ug makatabang kita sa paghupot sa kalinaw ug panaghiusa sa kongregasyon. Ang atong pagkamakigdaiton diha sa kongregasyon makatabang usab nato nga magmakigdaiton niadtong atong sangyawan sa “maayong balita sa pakigdait.” (Efe. 6:15) Kita mas andam nga ‘magmalumo sa tanan, nagapadayon sa pagpugong sa kaugalingon bisan ilalom sa daotan.’—2 Tim. 2:24.
19 Hinumdomi usab nga aduna unyay “pagkabanhaw sa mga matarong ug sa mga dili-matarong.” (Buh. 24:15) Sa dihang matuman na kini, milyonmilyong tawo nga lainlaig kagikan ug kinaiya ang mabanhaw—ug sila maggikan sa lainlaing yugto sa panahon, sukad pa “sa pagkatukod sa kalibotan”! (Luc. 11:50, 51) Dakong pribilehiyo unya ang pagtudlo kanila sa dalan sa pakigdait. Ang atong pagbansay karon nga magmakigdaiton makatabang gayod pag-abot sa maong panahon.
[Footnote]
^ par. 6 Alang sa Kasulatanhong giya sa pagsulbad sa seryosong mga sala sama sa pagbutangbutang ug pagpanikas, tan-awa ang Bantayanang Torre, Oktubre 15, 1999, panid 17-22.
Unsay Imong Nakat-onan?
• Sa unsang paagi kita magmakigdaiton kon may nasuko kanato?
• Aron magmakigdaiton, unsay atong buhaton kon kita ang nasilo?
• Nganong dili maalamon nga may dapigan sa dihang may mga panagbingkil?
• Nganong may higayon nga ang pagpakigdait dili angayng unahon?
[Mga Pangutana sa Pagtuon]
[Mga hulagway sa panid 29]
Si Jehova nahigugma niadtong nagapasaylo sa uban
