Mga Pangutana Gikan sa mga Magbabasa

Matino ba nato ang eksaktong gidaghanon sa mga tagna bahin sa Mesiyas diha sa Hebreohanong Kasulatan?

Kon susihon nato ang Hebreohanong Kasulatan, atong makita ang daghang tagna nga natuman kang Jesu-Kristo. Kining mga tagnaa naghatag ug mga detalye bahin sa kagikan, pag-abot ug kalihokan sa Mesiyas, pagtratar kaniya, ug sa iyang papel diha sa kahikayan ni Jehova nga Diyos. Kining tanan motabang nato sa pag-ila nga si Jesus mao ang Mesiyas. Apan, angay kitang mag-amping kon atong susihon ang eksaktong gidaghanon sa mga tagna bahin sa Mesiyas diha sa Hebreohanong Kasulatan.

Dili tanan ang magkauyon kon ang usa ka tagna nagtumong ba sa Mesiyas o wala. Sa iyang librong The Life and Times of Jesus the Messiah, si Alfred Edersheim miingon nga giila sa karaang rabinikong mga sinulat nga adunay 456 ka tagna bahin sa Mesiyas diha sa Hebreohanong Kasulatan, bisag daghan niana wala maghisgot sa Mesiyas. Ang pagsusi niini magpatunghag mga pangutana kon ang pipila nagtagna ba gayod kang Jesu-Kristo. Pananglitan, si Edersheim miingon nga giisip sa mga Hudiyo nga ang Genesis 8:11 nagtagna bahin sa Mesiyas. Sila nagtuo nga ang “dahon sa olibo nga gidala sa salampati, naggikan sa Bukid sa Mesiyas.” Ang awtor naghisgot usab sa Exodo 12:42. Sa pagpatin-aw nga sayop ang pagsabot sa mga Hudiyo niining tekstoha, siya misulat: “Ingon nga si Moises migula gikan sa desyerto, ang Mesiyas mogula gikan sa Roma.” Dili masabtan sa daghang eskolar ug uban pa ang koneksiyon niining duha ka teksto ug ang sayop nga pagpadapat niini kang Jesu-Kristo.

Bisag tagdon lamang nato ang mga tagna nga natuman kang Jesu-Kristo, lisod gihapon nga magkauyon bahin sa eksaktong gidaghanon. Pananglitan, tagda ang Isaias kapitulo 53, nga may daghang detalye nga gitagna bahin sa Mesiyas. Ang Isaias 53:2-7 nagtagna: “Wala siyay kaambong . . . Siya gitamay ug gilikayan sa mga tawo . . . Ang atong mga sakit mao ang iyang gidala . . . Siya gidughang tungod sa atong kalapasan . . . Siya gidala sama gayod sa usa ka karnero aron pagaihawon.” Kini bang bahina sa Isaias kapitulo 53 isipong usa ka tagna o lainlaing tagna?

Tagda usab ang Isaias 11:1, nga mabasa: “Mogitib gayod ang usa ka gamayng sanga gikan sa tuod ni Jese; ug gikan sa iyang mga gamot ang usa ka turok magmabungahon.” Sa bersikulo 10, kining tagnaa makita na usab, nga may susamang mga pulong. Isipon ba nato kining duha ka bersikulo ingong duha ka tagna o usa ka tagna nga gisubli lang? Ang makab-ot nga mga konklusyon bahin sa Isaias kapitulo 53 ug 11 makaapektar gayod sa gidaghanon sa mga tagna bahin sa Mesiyas.

Busa, maayong likayan nato ang pagkamakutihon sa eksaktong gidaghanon sa mga tagna bahin sa Mesiyas diha sa Hebreohanong Kasulatan. Ang organisasyon ni Jehova nagpatik ug mga talaan sa daghang tagna bahin kang Jesus ug sa katumanan niini. * Kini makatabang sa atong personal ug pamilyahanong pagtuon ug sa atong ministeryo. Dugang pa, ang daghang tagna bahin sa Mesiyas, bisag pilay gidaghanon niini, lig-ong nagpamatuod nga si Jesus mao ang Kristo, o Mesiyas.

[Footnote]