Mga Sugyot Para sa Pamilyahanong Pagsimba ug Personal nga Pagtuon

SUGOD niadtong 2009, ang mga kongregasyon sa mga Saksi ni Jehova sa tibuok kalibotan nag-usab sa ilang eskedyul sa mga tigom. Ang duha ka tigom sa midweek giusa, ug ang tanan gidasig sa paggahig usa ka gabii kada semana alang sa pamilyahanong pagsimba o personal nga pagtuon. Gipahimuslan mo ba ang bag-ong kahikayan? Bug-os ka bang nakabenepisyo niini?

Unsay atong gamiton diha sa pamilyahanong pagsimba? Ang Nagamandong Lawas wala magsugo kon unsay angayng tun-an kada semana. Kay lainlain man ang kahimtang, angayng susihon sa matag ulo sa pamilya o indibiduwal ang kinamaayohang paagi sa pagpahimulos niining senemanang okasyon.

Ang pipila mangandam alang sa mga tigom sa kongregasyon, apan dili lang kana ang atong mahimo diha sa pamilyahanong pagsimba. Ang uban magbasa, maghisgot, ug magdrama-drama pa gani sa mga asoy sa Bibliya aron mas makabenepisyo ang mga bata. Dili kinahanglan nga puro pangutanag-tubag, pareho sa ginahimo diha sa mga tigom. Angay nga ang pamilyahanong pagsimba maoy panahon nga ang matag membro makasulti sa ilang opinyon. Kini magdasig kanila sa pagbayloayg mga ideya, nga maghimo sa maong okasyon nga espesyal ug makalingaw.

Usa ka amahan nga may tulo ka anak miingon nga ang ilang pamilyahanong pagsimba sagad gibase diha sa pagbasa sa Bibliya. Siya misulat: “Abante namong basahon ang mga kapitulo, ang mga bata mopilig usa ka bahin niana nga gusto nilang i-research, ug dayon ipresentar kana. Si Michael [siyete anyos] sagad modrowing ug hulagway o mosulat bahin sa iyang nabasa. Usahay si David ug Kaitlyn [13 ug 15 anyos] mosulat bahin sa usa ka asoy sa Bibliya nga samag nakakita sila sa maong hitabo. Pananglitan, sa dihang nagbasa mi bahin sa interpretasyon ni Jose sa mga damgo sa panadero ug sa magtitiing ni Paraon, si Kaitlyn misulat bahin niini nga samag didto siya sa bilanggoan nga nakakita sa maong panghitabo.”—Gen., kap. 40.

Siyempre, lainlaig kahimtang ang mga pamilya. Kon unsay epektibo sa usa ka indibiduwal o pamilya mahimong dili epektibo sa uban. Ang kahon niining artikuloha naghatag ug mga sugyot nga magamit sa pamilyahanong pagsimba o personal nga pagtuon. Lagmit nga duna ka pay ubang ideya nga mahunahunaan.

[Kahon/Hulagway sa panid 6, 7]

 Para sa pamilyang may tin-edyer:

• Basaha ug hisgoti ang Mga Pangutanang Gisukna sa mga Batan-on—Mga Tubag nga Mosaler.

• Handurawa nga ikaw nagkinabuhi panahon sa Bibliya. (Tan-awa ang Bantayanang Torre sa Mayo 15, 1996, panid 14, parapo 17-18.)

• Paghisgot bahin sa dali ug dugayng makab-ot nga mga tumong.

• Pagtan-awg usa sa atong mga video ug hisgoti kana.

• Hisgoti ang seksiyon sa Bantayanang Torre nga “Alang sa mga Batan-on.”

Para sa magtiayon nga walay anak:

• Hisgoti ang kapitulo 1, 3, 11-16 sa librong Ang Sekreto sa Kalipay sa Pamilya.

• Ipaambit ang mga punto nga na-research gikan sa pagbasa sa Bibliya.

• Pangandam alang sa Pagtuon sa Kongregasyon sa Bibliya o Pagtuon sa Bantayanang Torre.

• Hisgoti ang mga paagi nga mapauswag ang inyong ministeryo ingong magtiayon.

Para sa tagsaanon o sa panimalay nga lainlaig relihiyon:

• Tun-i ang bag-ong mga publikasyon.

• Basaha ang bag-o ug daang mga Tinuig nga Basahon.

• Pag-research kon unsaon pagtubag sa mga pangutana nga komon sa inyong teritoryo.

• Pag-andam ug mga presentasyon alang sa pagsangyaw.

Para sa pamilya nga may gagmayng anak:

• Dramaha ang mga esena sa Bibliya.

• Paggamit ug makalingawng mga pasulit sa memorya, sama nianang sa panid 30 ug 31 sa Pagmata!

• Magmamugnaon panagsa. (Tan-awa ang “Pagtuon sa Bibliya—Diha sa Zoo!” sa Pagmata! sa Marso 8, 1996, panid 16-19.)

• Tagda ang seksiyon sa Bantayanang Torre nga “Tudloi ang Inyong mga Anak.”