Nahinumdom Ka Ba?

Gipabilhan mo ba ang pagbasa sa bag-ong mga gula sa Ang Bantayanang Torre? Aw, sulayi kon makatubag ka ba sa mosunod nga mga pangutana:

• Unsa ang tulo ka kinahanglanong butang aron malikayan ang tendensiya nga manglimbong?

(1) Ugmara ang kahadlok sa Diyos. (1 Ped. 3:12) (2) Ugmara ang binansay-sa-Bibliya nga tanlag. (3) Paningkamoti nga magmakontento.—4/15, panid 6-7.

• Sa unsang paagi nahibalo kita nga ang pag-alagad sa Diyos uban ang pagkaseryoso wala magpasabot sa pagbaton kanunay ug seryosong dagway o paglikay sa kalingawan?

Atong tagdon ang panig-ingnan ni Jesus. Siya nakig-uban sa malipayong pagpangaon. Kita nahibalo nga siya dili sobra ka seryoso o estrikto. Ang uban, bisan gani mga bata, ganahang moduol ug makig-uban kaniya.—4/15, panid 10.

• Unsay mahimo sa magtiayon kon ang ilang relasyon daw mihuyang sa dihang nakabatog mga anak?

Kinahanglan nga padayong pasaligan nila ang usag usa sa ilang gugma. Ang bana mahimong maningkamot sa paghupay sa mga kabalaka sa iyang asawa. Kinahanglang dili sila magpanuko sa pagsulti sa ilang pagbati ug sa ilang pisikal nga panginahanglan.—5/1, panid 12-13.

• Unsay gisimbolohan sa kahoyng olibo diha sa Roma kapitulo 11?

Ang kahoyng olibo adunay kalabotan sa ikaduhang bahin sa binhi ni Abraham, ang espirituwal nga Israel. Si Jehova gipanig-ingon sa gamot ug si Jesus sa punoan niining simbolikong kahoyng olibo. Sa dihang si Jesus gisalikway sa kadaghanang kinaiyanhong Hudiyo, ang Hentil nga mga magtutuo mahimong isumpay, sa ingon makompleto ang gidaghanon sa ikaduhang bahin sa binhi ni Abraham.—5/15, panid 22-25.

• Unsa ang maayong balita nga atong ikapaambit sa mga kabos?

Ang maayong balita mao: Gitudlo sa Diyos si Jesus ingong Hari. Siya ang takos nga Magmamando nga maghanaw sa kakabos. Ngano? Kay siya ang magmando sa tanang katawhan ug siya gamhanan; siya maluluy-on sa mga kabos; ug siya makahanaw sa hinungdan sa kakabos, ang atong napanunod nga tendensiya sa kahakog.—6/1, panid 7.

• Unsay gipasabot ni Jesus sa giingnan niya si Caifas: “Ikaw mismo ang nag-ingon niini”?—Mat. 26:63, 64.

Mopatim-aw nga ang ekspresyong “ikaw mismo ang nag-ingon niini” maoy komon nga panultihon sa mga Hudiyo nga nagpasabot nga tinuod ang gipamulong. Ang Hataas nga Saserdoteng si Caifas nangutana kon si Jesus ba ang Kristo, ang Anak sa Diyos. Ang tubag ni Jesus nga: “Ikaw mismo ang nag-ingon niini” maoy pag-uyon.—6/1, panid 18.

• Mahimo kahang bahin sa lukat ang posible nga mga kaliwat sa hingpit nga tawong si Jesus?

Dili. Bisag si Jesus mahimo untang amahan sa bilyonbilyong hingpit nga kaliwat, ang maong posible nga mga kaliwat dili bahin sa lukat. Ang hingpit nga kinabuhi ni Jesus mao lamang ang katugbang sa kinabuhi ni Adan. (1 Tim. 2:6)—6/15, panid 13.

• Sa unsang paagi ikapakita sa mga Kristohanon nga sila nagpatalinghog sa pasidaan bahin sa bakak nga mga magtutudlo diha sa Buhat 20:29, 30?

Sila dili moabiabi kanila diha sa ilang mga balay ni motimbaya kanila. (Roma 16:17; 2 Juan 9-11) Likayan sa mga Kristohanon ang mga basahon sa mga apostata, mga programa sa TV nga naglangkit kanila, ug mga Web site nga naundan sa ilang mga pagtulon-an.—7/15, panid 15-16.

• Kinsay angayng magtudlo sa mga bata bahin sa Diyos?

Ang amahan ug inahan angayng magtinabangay niana, sumala sa gitambag sa Bibliya. (Prov. 1:8; Efe. 6:4) Gipakita sa panukiduki nga sa dihang magtinabangay ang ginikanan sa pagtudlo, maayo ang epekto niana diha sa mga bata.—8/1, panid 6-7.