Nakaplagan Nila ang Mesiyas!
Nakaplagan Nila ang Mesiyas!
“Nakaplagan namo ang Mesiyas.”—JUAN 1:41.
1. Nganong si Andres nakaingon: “Nakaplagan namo ang Mesiyas”?
SI Juan Bawtista nagtindog uban sa iyang duha ka tinun-an. Samtang nagsingabot si Jesus, si Juan mipatugbaw: “Tan-awa, ang Kordero sa Diyos!” Dihadiha si Andres ug ang ubang tinun-an miuban kang Jesus ug migugol sa tibuok adlaw uban niya. Sa ulahi, gipangita ni Andres ang iyang igsoong si Simon Pedro ug siya maikagong nagpahibalo: “Nakaplagan namo ang Mesiyas.” Dayon gidala niya si Pedro kang Jesus.—Juan 1:35-41.
2. Sa unsang paagi makabenepisyo kita sa padayong pagsusi sa mga tagna bahin sa Mesiyas?
2 Sa lakat sa panahon, si Andres, Pedro, ug ang uban may dakong kahigayonan sa pagsusi sa Kasulatan ug makombinsir nga si Jesus nga taga-Nasaret mao ang gisaad nga Mesiyas. Sa padayon natong pagsusi sa mga tagna bahin sa Mesiyas, molig-on usab ang atong pagtuo sa Pulong sa Diyos ug sa Usa nga Dinihogan.
‘Tan-awa! Ang Imong Hari Moabot’
3. Unsang mga tagna ang natuman sa dihang si Jesus harianong misulod sa Jerusalem?
3 Ang Mesiyas harianong mosulod sa Jerusalem. Si Zacarias mitagna: “Paglipay sa hilabihan, Oh anak nga babaye sa Zion. Singgit sa kadaogan, Oh anak nga babaye sa Jerusalem. Tan-awa! Ang imong hari moanha kanimo. Siya matarong, oo, linuwas; mapainubsanon, ug nagsakay sa usa ka asno, sa usa ka hingkod nga hayop nga anak nga laki sa usa ka asna.” (Zac. 9:9) Ang salmista misulat: “Dalayegon ang Usa nga moanhi sa ngalan ni Jehova.” (Sal. 118:26) Si Jesus wala magsugo sa panon nga buhaton kadto. Apan, ingong katumanan sa tagna, ang mga tawo misinggit sa kalipay. Samtang nagbasa ka sa maong asoy, handurawa ang esena ug pamatia ang ilang paghugyaw.—Basaha ang Mateo 21:4-9.
4. Sa unsang paagi natuman ang Salmo 118:22, 23?
4 Bisag daghan ang mosalikway kang Jesus ingong Mesiyas, siya bililhon sa Diyos. Ingon sa gitagna, si Jesus ‘gitamay ug giisip nga walay hinungdan’ niadtong wala motuo sa ebidensiya. (Isa. 53:3; Mar. 9:12) Apan, ang Diyos nag-inspirar sa salmista sa pagsulat: “Ang bato nga gisalikway sa mga magtutukod nahimong pangulong bato sa pamag-ang. Kini naggikan kang Jehova.” (Sal. 118:22, 23) Gihisgotan kini ni Jesus sa dihang nakigsulti siya sa relihiyosong mga magsusupak, ug si Pedro miingon nga kini natuman kang Kristo. (Mar. 12:10, 11; Buh. 4:8-11) Si Jesus ang nahimong “patukoranang bato nga pamag-ang” sa Kristohanong kongregasyon. Bisag gisalikway sa mga dili-diyosnon, siya “pinili, bililhon, sa Diyos.”—1 Ped. 2:4-6.
Gibudhian ug Gibiyaan!
5, 6. Unsay gitagna bahin sa pagbudhi sa Mesiyas, ug sa unsang paagi kana natuman?
5 Ang Mesiyas budhian sa iyang maluibong higala. Si David mitagna: “Ang tawo nga may pakigdait uban kanako, nga akong gisaligan, nga nagkaon sa akong tinapay, nag-alsa sa iyang tikod batok kanako.” (Sal. 41:9) Sa panahon sa Bibliya, kadtong magkauban sa pagkaog tinapay giisip nga managhigala. (Gen. 31:54) Busa ang pagbudhi ni Judas Iskariote kang Jesus grabe gayod. Gipadayag ni Jesus sa iyang mga apostoles nga matuman ang tagna ni David sa dihang naghisgot Siya bahin sa magbudhi kaniya: “Ako wala magasulti mahitungod kaninyong tanan; nakaila ako sa mga tawo nga akong gipili. Apan kini maoy aron matuman ang Kasulatan, ‘Siya nga tigsalo ug kaon sa akong tinapay nag-isa sa iyang tikod batok kanako.’”—Juan 13:18.
6 Ang Mesiyas budhian ilis sa 30 ka pirasong plata—ang bili sa usa ka ulipon! Base sa Zacarias 11:12, 13, gipakita ni Mateo nga si Jesus gibudhian ilis sa gamay kaayong kantidad. Apan nganong miingon si Mateo nga kini gitagna “pinaagi ni Jeremias nga manalagna”? Sa adlaw ni Mateo, ang basahon ni Jeremias mahimong giuna pagbutang sa grupo sa mga basahon sa Bibliya nga naglakip sa kang Zacarias. (Itandi ang Lucas 24:44.) Si Judas wala gayod makagamit sa salapi nga gibayad kaniya kay siya naglabay niana sa templo, milakaw, ug naghikog.—Mat. 26:14-16; 27:3-10.
7. Sa unsang paagi natuman ang Zacarias 13:7?
7 Ang mga tinun-an sa Mesiyas magkatibulaag. “Hampaka ang magbalantay,” misulat si Zacarias, “ug patibulaaga ang panon.” (Zac. 13:7) Sa Nisan 14, 33 K.P., si Jesus miingon sa iyang mga tinun-an: “Kamong tanan mapandol labot kanako niining gabhiona, kay nahisulat kini, ‘Pagahampakon ko ang magbalantay, ug matibulaag ang mga karnero sa panon.’” Kana gayod ang nahitabo kay si Mateo mitaho nga “ang tanang tinun-an mibiya [kang Jesus] ug nangalagiw.”—Mat. 26:31, 56.
Giakusahan ug Gisagpa
8. Sa unsang paagi natuman ang Isaias 53:8?
8 Ang Mesiyas husayon ug hukmang sad-an. (Basaha ang Isaias 53:8.) Sa kadlawon sa Nisan 14, ang tibuok Sanhedrin nagtigom, nagpagapos kang Jesus, ug nagtugyan kaniya sa Romanong Gobernador nga si Poncio Pilato. Iyang gisukitsukit si Jesus ug nasayran nga wala siyay sala. Apan sa dihang si Pilato misugyot nga buhian si Jesus, ang panon misinggit: “Ilansang siya!” ug miawhag nga ang kriminal nga si Barabas maoy buhian. Kay buot pahimut-an ni Pilato ang panon, iyang gibuhian si Barabas, gipalatigo si Jesus, ug gitugyan aron ilansang.—Mar. 15:1-15.
9. Unsay nahitabo sa panahon ni Jesus ingon sa gitagna sa Salmo 35:11?
9 Ang bakak nga mga saksi motestigo batok sa Mesiyas. Si salmistang David miingon: “Ang mabangis nga mga saksi nanindog; nangutana sila kanako sa wala ko hisayri.” (Sal. 35:11) Ingon sa gitagna, “ang pangulong mga saserdote ug ang tibuok Sanhedrin nangitag bakak nga pamatuod batok kang Jesus aron ipapatay siya.” (Mat. 26:59) Sa pagkatinuod, “daghan ang misaksig bakak batok kaniya, apan ang ilang mga pamatuod wala magkauyon.” (Mar. 14:56) Wala ra tagda sa mga kaaway ni Jesus nga bakak ang mga pamatuod kay buot lamang nilang ipapatay siya.
10. Sa unsang paagi natuman ang Isaias 53:7?
10 Ang Mesiyas dili motubag niadtong nag-akusar kaniya. Si Isaias mitagna: “Siya gipit-os pag-ayo, ug iyang gitugotan nga siya sakiton; apan wala niya bukha ang iyang baba. Siya gidala sama gayod sa usa ka karnero aron pagaihawon; ug sama sa usa ka bayeng karnero nga atubangan sa iyang mga tigtupi naamang, siya usab wala mobuka sa iyang baba.” (Isa. 53:7) Samtang si Jesus “gisumbong sa pangulong mga saserdote ug sa mga ansiyano, siya wala motubag.” Si Pilato nangutana: “Wala ka ba makadungog sa daghang butang nga ilang gipamatuod batok kanimo?” Apan, si Jesus “wala motubag kaniya, wala gayod, bisan usa ka pulong, mao nga natingala kaayo ang gobernador.” (Mat. 27:12-14) Si Jesus wala manginsulto niadtong nag-akusar kaniya.—Roma 12:17-21; 1 Ped. 2:23.
11. Sa unsang paagi natuman ang Isaias 50:6 ug Miqueas 5:1?
11 Si Isaias mitagna nga sagpaon ang Mesiyas. Siya misulat: “Ang akong bukobuko akong gitahan sa mga tigbunal, ug ang akong mga aping ngadto niadtong magaibot sa buhok. Wala nako itago ang akong nawong gikan sa mga pakaulaw ug sa pagluwa.” (Isa. 50:6) Si Miqueas mitagna: “Pinaagi sa olisi sila maghampak sa aping sa maghuhukom sa Israel.” (Miq. 5:1) Sa pagpakita nga natuman kang Jesus ang maong mga tagna, si Marcos miingon: “Ang pipila misugod sa pagpangluwa kaniya ug sa pagtabon sa tibuok niyang nawong ug sa pagsumbag kaniya ug sa pag-ingon kaniya: ‘Tagnaa!’ Ug, nga gisagpa siya, gidala siya sa mga tig-alagad sa korte.” Si Marcos miingon nga ‘gihapak sa mga sundalo ang iyang ulo pinaagig tangbo ug giluwaan siya ug, nga nagluhod nga matamayon, ilang giyukboan siya.’ (Mar. 14:65; 15:19) Siyempre, si Jesus dili takos nga tratahon sa maong paagi.
Matinumanon Hangtod sa Kamatayon
12. Sa unsang paagi ang Salmo 22:16 ug Isaias 53:12 natuman kang Jesus?
12 Ang Mesiyas ilansang ug mamatay. Si salmista David miingon: “Gilikosan ako sa panon sa mga mamumuhat ug daotan. Ingon sa usa ka leyon sila nagapaak sa akong mga kamot ug mga tiil.” (Sal. 22:16) Bahin sa usa ka hitabo nga nasayran na sa mga magbabasa sa Bibliya, si Marcos misulat: “Ikatulo na nga takna [mga alas nuybe sa buntag] niadto, ug siya ilang gilansang.” (Mar. 15:25) Gitagna usab nga ang Mesiyas mamatay kauban sa mga makasasala. ‘Iyang gibubo ang iyang kalag ngadto gayod sa kamatayon,’ si Isaias misulat, “ug siya giisip nga kauban sa mga malapason.” (Isa. 53:12) Kini natuman kay ‘duha ka tulisan ang gilansang kauban ni Jesus, ang usa sa iyang tuo ug ang usa sa iyang wala.’—Mat. 27:38.
13. Sa unsang paagi ang Salmo 22:7, 8 natuman kang Jesus?
13 Gitagna ni David nga ang Mesiyas yubiton. (Basaha ang Salmo 22:7, 8.) Si Jesus gibiaybiay samtang nag-antos sa estaka, kay si Mateo mitaho: “Ang mga lumalabay nagsulti nga mapasipalahon kaniya, nga naglingolingo sa ilang mga ulo ug nag-ingon: ‘Oh ikaw nga mao man kahay magtutumpag sa templo ug magtutukod niini sa tulo ka adlaw, luwasa ang imong kaugalingon! Kon ikaw anak sa Diyos, kanaog sa estaka sa pagsakit!’” Sa susama, ang mga pangulong saserdote, eskriba, ug mga ansiyano nagbugalbugal kaniya: “Ang uban giluwas niya; ang iyang kaugalingon dili niya maluwas! Siya nga Hari sa Israel; pakanaoga siya karon sa estaka sa pagsakit ug motuo kami kaniya. Siya misalig sa Diyos; ipaluwas siya karon Kaniya kon Siya buot kaniya, kay siya miingon, ‘Ako mao ang Anak sa Diyos.’” (Mat. 27:39-43) Apan kanang tanan giantos ni Jesus uban ang dignidad. Pagkamaayong panig-ingnan alang kanato!
14, 15. Isaysay kon sa unsang paagi natuman ang mga tagna bahin sa besti sa Mesiyas ug sa paghatag kaniyag suka.
14 Ripahan ang besti sa Mesiyas. Ang salmista misulat: ‘Gibahinbahin nila ang akong besti ug giripahan ang akong sapot.’ (Sal. 22:18) Kana gayoy nahitabo, kay ‘sa gilansang na si Jesus sa Romanong mga sundalo, gibahinbahin nila ang iyang panggawas nga mga besti pinaagi sa pagripa.’—Mat. 27:35; basaha ang Juan 19:23, 24.
15 Ang Mesiyas hatagag suka ug apdo. Ang salmista miingon: “Bahin sa pagkaon sila naghatag kanako ug tanom nga makahilo, ug sa akong kauhaw gisulayan nila ang pagpainom kanako ug suka.” (Sal. 69:21) Si Mateo nagsulti kanato: “Ilang gihatagan [si Jesus ug] bino nga sinambogan ug apdo aron imnon; apan, human matilawi kini, midumili siya sa pag-inom.” Sa ulahi, “usa kanila midagan ug mikuhag usa ka espongha ug gipatuhop kini sa aslom nga bino ug gibutang kini sa usa ka tangbo ug gipainom siya.”—Mat. 27:34, 48.
16. Sa unsang paagi natuman ang Salmo 22:1?
16 Ang Mesiyas daw biyaan sa Diyos. (Basaha ang Salmo 22:1.) Ingon sa gitagna, “sa ikasiyam nga takna [mga alas tres sa hapon] si Jesus mipatugbaw sa makusog nga tingog: ‘Eli, Eli, lama sabachthani?’ nga nagkahulogan, kon hubaron: ‘Diyos ko, Diyos ko, nganong gitalikdan mo ako?’” (Mar. 15:34) Si Jesus wala mawad-ig pagtuo sa iyang langitnong Amahan. Ang Diyos mibiya kaniya pinaagi sa pagkuha sa Iyang proteksiyon aron bug-os masulayan ang iyang integridad. Ug sa dihang si Jesus mipatugbaw, natuman niya ang Salmo 22:1.
17. Sa unsang paagi natuman ang Zacarias 12:10 ug Salmo 34:20?
17 Ang Mesiyas duslakon, apan walay bukog nga mabali. Ang mga molupyo sa Jerusalem “molantaw gayod sa Usa nga ilang gidughang.” (Zac. 12:10) Ug ang Salmo 34:20 nag-ingon: “[Ang Diyos] nagabantay sa tanan niyang mga bukog; walay usa kanila nga nabali.” Gipakita ni apostol Juan nga natuman kini pinaagi sa pagsulat: “Usa sa mga sundalo miduslak ug bangkaw sa kilid [ni Jesus], ug dihadiha migula ang dugo ug tubig. Ug [si Juan] nga nakakita niini nagpamatuod, ug ang iyang pamatuod tinuod . . . Kining mga butanga nahitabo aron matuman ang kasulatan: ‘Walay bukog niya nga magupok.’ Ug usab, ang laing kasulatan nag-ingon: ‘Sila molantaw sa Usa nga ilang gidughang.’”—Juan 19:33-37.
18. Nganong si Jesus nalubong uban sa mga dato?
18 Ang Mesiyas ilubong uban sa mga dato. (Basaha ang Isaias 53:5, 8, 9.) Sa kilumkilom sa Nisan 14, ‘usa ka datong tawo nga taga-Arimatea nga ginganlag Jose,’ nangayo kang Pilato sa lawas ni Jesus, ug kini gihatag. Ang asoy ni Mateo midugang: “Gikuha ni Jose ang lawas, giliminan kini sa mahinlo ug pino nga lino, ug gipahiluna kini sa iyang bag-ong handomanang lubnganan, nga kinubkob niya sa dakong-bato. Ug human sa pagligid ug dakong bato sa pultahan sa handomanang lubnganan, siya mibiya.”—Mat. 27:57-60.
Dayega ang Mesiyanikong Hari!
19. Sa unsang paagi natuman ang Salmo 16:10?
19 Ang Mesiyas banhawon. Si David misulat: “Dili mo [Jehova] biyaan ang akong kalag sa Sheol.” (Sal. 16:10) Nakugang gayod ang mga babaye nga nangadto sa lubnganan ni Jesus. Ilang nakita didto ang usa ka manulonda nga nagmateryalisar, kinsa miingon: “Ayaw na kamo pagkaugnok. Gipangita ninyo si Jesus nga Nasaretnon, nga gilansang. Gibangon na siya, wala na siya dinhi. Tan-awa! Ang dapit nga ilang gipahilunaan kaniya.” (Mar. 16:6) Ngadto sa panon nga presente sa Jerusalem sa Pentekostes 33 K.P., si apostol Pedro mipahayag: “[Si David] nakapanglantaw nang daan ug misulti mahitungod sa pagkabanhaw sa Kristo, nga wala siya biyai sa Hades ni ang iyang unod makakita ug pagkadunot.” (Buh. 2:29-31) Wala itugot sa Diyos nga madunot ang lawas sa iyang minahal nga Anak. Gawas pa, si Jesus gibanhaw ingong usa ka espiritu!—1 Ped. 3:18.
20. Unsay gitagna bahin sa pagmando sa Mesiyas?
20 Sumala sa tagna, ipahayag sa Diyos nga si Jesus maoy iyang Anak. (Basaha ang Salmo 2:7; Mateo 3:17.) Dugang pa, ang panon sa katawhan nagdayeg kang Jesus ug sa umaabot nga Gingharian, ug kita malipayong nagsulti sa uban bahin kaniya ug sa iyang pagmando. (Mar. 11:7-10) Duol nang laglagon ni Kristo ang iyang mga kaaway samtang siya ‘magsakay sa kawsa sa kamatuoran ug sa pagkamapainubsanon ug sa pagkamatarong.’ (Sal. 2:8, 9; 45:1-6) Ang iyang pagmando magdalag kalinaw ug kadagaya sa tibuok yuta. (Sal. 72:1, 3, 12, 16; Isa. 9:6, 7) Dako natong kadungganan ang pagmantala niining mga kamatuoran ingong mga Saksi ni Jehova, kansang Anak nagmando na sa langit ingong Mesiyanikong Hari!
Unsay Imong Tubag?
• Sa unsang paagi si Jesus gibudhian ug gibiyaan?
• Unsa ang pipila ka tagna bahin sa paglansang kang Jesu-Kristo?
• Nganong kombinsido ka nga si Jesus ang gisaad nga Mesiyas?
[Mga Pangutana sa Pagtuon]
[Hulagway sa panid 13]
Ang harianong pagsulod ni Jesus sa Jerusalem nagtuman sa unsang mga tagna?
[Mga hulagway sa panid 15]
Si Jesus namatay alang sa atong mga sala, apan siya karon nagmando na ingong Mesiyanikong Hari
