Si Jehova—“Ang Diyos nga Nagahatag ug Kalinaw”
Si Jehova—“Ang Diyos nga Nagahatag ug Kalinaw”
“Hinaot ang Diyos nga nagahatag ug kalinaw magauban kaninyong tanan.”—ROMA 15:33.
1, 2. Unsang kulba nga situwasyon ang gihubit sa Genesis kapitulo 32 ug 33, ug unsay resulta niana?
ANG dapit dili layo sa Penuel, nga duol sa walog sa Jabok sa silangang bahin sa suba sa Jordan. Si Esau nakadungog nga nagapanaw na pauli ang iyang kaluhang si Jacob. Bisag milabay na ang 20 ka tuig sukad ibaligya ni Esau ang iyang katungod ingong panganay ngadto sa iyang kaluha, si Jacob nahadlok nga basin gusto gihapon siyang patyon sa iyang igsoon. Si Esau, uban sa iyang 400 ka tawo, milakaw aron sugaton ang iyang igsoon. Kay nagdahom nga suko gihapon si Esau, si Jacob nagpadalag mga gasa kaniya nga mikabat ug kapig 550 ka hayop. Sa matag grupo sa mga hayop, ang mga sulugoon nagsulti kang Esau nga ang gasa gikan kang Jacob.
2 Sa kataposan nagkita ang managsoon! Samtang nagpadulong kang Esau, si Jacob miyukbo ug pito ka beses. Una pa niana, gihimo na ni Jacob ang labing importanteng lakang sa paglukmay sa iyang igsoon. Siya miampo kang Jehova nga panalipdan siya gikan kang Esau. Gitubag ba kini ni Jehova? Oo. Ang Bibliya nag-ingon: “Si Esau midagan sa pagsugat kaniya, ug siya migakos kaniya ug mihalog sa iyang liog ug mihalok kaniya.”—Gen. 32:11-20; 33:1-4.
3. Unsay atong makat-onan sa asoy bahin kang Jacob ug Esau?
3 Ang asoy bahin kang Jacob ug Esau nagpakita nga angay natong himoon ang tanan aron mahusay ang mga problema nga makagun-ob sa kalinaw sa kongregasyon. Si Jacob nagtinguha nga makigdait kang Esau bisag siya wala makasala ug dili angay mangayog pasaylo kaniya. Si Esau ang nagtamay sa iyang katungod ingong panganay ug nagbaligya niana kang Jacob ilis sa linat-ang lentihas. (Gen. 25:31-34; Heb. 12:16) Ang ehemplo ni Jacob nagpakita nga angay natong buhaton ang atong maarangan aron magpabilin ang kalinaw diha sa kongregasyon. Kini nagpakita usab nga panalanginan ni Jehova ang atong mainampoong paningkamot nga magmakigdaiton. Ang Bibliya adunay daghang panig-ingnan nga magtudlo kanato nga magmakigdaiton.
Ang Labing Maayong Ehemplo
4. Unsay gitagana sa Diyos aron matubos ang katawhan gikan sa sala ug kamatayon?
4 Ang labing maayong ehemplo sa pagkamakigdaiton mao si Jehova—“ang Diyos nga nagahatag ug kalinaw.” (Roma 15:33) Hunahunaa ang tanang gihimo ni Jehova aron makabaton kitag maayong relasyon kaniya. Ingong makasasalang kaliwat ni Adan ug Eva, kita takos sa “suhol nga ginabayad sa sala.” (Roma 6:23) Apan tungod sa dakong gugma ni Jehova, gipadala niya ang iyang minahal nga Anak sa yuta sa pagtubos kanato. Ang Anak kinabubut-ong misunod ug misakripisyo sa iyang kinabuhi alang kanato. (Juan 10:17, 18) Ang matuod nga Diyos nagbanhaw sa iyang minahal nga Anak. Didto sa langit, gipresentar ni Jesus ngadto sa iyang Amahan ang bili sa iyang giulang dugo, nga magtubos sa mahinulsolong mga makasasala gikan sa kamatayon.—Basaha ang Hebreohanon 9:14, 24.
5, 6. Unsay epekto sa giulang dugo ni Jesus diha sa nadaot nga relasyon tali sa Diyos ug sa makasasalang katawhan?
5 Unsay epekto sa halad lukat sa Anak sa Diyos diha sa nadaot nga relasyon tali sa Diyos ug sa makasasalang katawhan? “Ang pagkastigo nga alang sa atong kalinaw diha ibabaw niya,” nag-ingon ang Isaias 53:5, “ug tungod sa iyang mga samad dihay pagpang-ayo alang kanato.” Imbes isipon sila nga kaaway sa Diyos, ang masinundanong mga tawo makabaton na ug maayong relasyon uban kaniya. “Pinaagi [ni Jesus] atong nabatonan ang kagawasan pinaagi sa lukat pinaagi sa iyang dugo, oo, ang kapasayloan sa atong kalapasan.”—Efe. 1:7.
6 Ang Bibliya nag-ingon: “Nakitang maayo sa Diyos nga ang tibuok kabug-osan mopuyo diha [kang Kristo].” Tungod kini kay si Kristo ang gigamit sa Diyos sa pagtuman sa Iyang katuyoan. Unsay katuyoan ni Jehova? Aron “ipasig-uli nganha sa iyang kaugalingon ang tanang ubang butang pinaagi sa pagpakigdait pinaagi sa [giulang] dugo” ni Jesu-Kristo. ‘Ang tanang ubang butang’ nga ipasig-uli sa Diyos nganha kaniya mao ang “mga butang sa mga langit” ug ang ‘mga butang sa yuta.’ Unsa kini?—Basaha ang Colosas 1:19, 20.
7. Unsa ang “mga butang sa mga langit” ug ang ‘mga butang sa yuta’ nga nakatagamtam pag-usab ug pakigdait uban sa Diyos?
7 Tungod sa lukat, ang dinihogang mga Kristohanon “gipahayag na nga matarong” ingong mga anak sa Diyos ug ‘nakatagamtam ug pakigdait uban sa Diyos.’ (Basaha ang Roma 5:1.) Sila gitawag nga “mga butang sa mga langit” tungod kay sila adunay langitnong paglaom ug “magamando ingong mga hari ibabaw sa yuta” ug mahimong mga saserdote sa Diyos. (Pin. 5:10) Sa laing bahin, ‘ang mga butang sa yuta’ nagtumong sa mahinulsolong mga tawo, kinsa mabuhi nga walay kataposan sa yuta.—Sal. 37:29.
8. Sa unsang paagi ang ehemplo ni Jehova makatabang nimo sa dihang motungha ang mga problema nga makabungkag sa panaghiusa sa kongregasyon?
8 Sa pagpahayag sa iyang apresasyon sa tagana ni Jehova, si Pablo misulat sa dinihogang mga Kristohanon sa Efeso: “Ang Diyos, kinsa dato sa kaluoy, . . . naghimo kanatong buhi kauban ni Kristo, bisan gani sa dihang kita mga patay pa sa kalapasan—pinaagi sa dili-takos nga kalulot kamo giluwas.” (Efe. 2:4, 5) Langitnon man o yutan-on ang atong paglaom, kita angayng magpasalamat sa Diyos tungod sa iyang kaluoy ug dili-takos nga kalulot. Kita mapasalamaton usab sa tanang gihimo ni Jehova aron ang tawo makatagamtam ug pakigdait uban kaniya. Sa dihang motungha ang mga problema nga makabungkag sa panaghiusa sa kongregasyon, dili ba angay natong palandongon ang ehemplo sa Diyos ug makigdait sa atong mga igsoon?
Pagkat-on sa Ehemplo ni Abraham ug Isaac
9, 10. Sa unsang paagi si Abraham nagmakigdaiton kang Lot sa dihang nagkaaway ang ilang mga magbalantay?
9 Bahin sa patriarkang si Abraham, ang Bibliya nag-ingon: “‘Si Abraham nagbutang ug pagtuo kang Jehova, ug kadto giisip kaniya ingong pagkamatarong,’ ug siya gitawag nga ‘higala ni Jehova.’” (Sant. 2:23) Ang pagtuo ni Abraham nadayag diha sa iyang pagkamakigdaiton. Pananglitan, sa dihang midaghan ang kahayopan ni Abraham, nagkaaway ang mga magbalantay sa kahayopan ni Abraham ug ang sa iyang pag-umangkong si Lot. (Gen. 12:5; 13:7) Ang klarong solusyon mao nga magbulag si Abraham ug Lot. Unsay himoon ni Abraham niining lisod nga situwasyon? Imbes gamiton ang iyang pagkaedaran ug pagkahigala ni Jehova aron makabenepisyo, si Abraham nagmakigdaiton.
10 Si Abraham miingon kang Lot: “Palihog, ayaw tugoting magpadayon ang bisan unsang away tali kanako ug kanimo ug tali sa akong mga tig-alimag hayop ug sa imong mga tig-alimag hayop, kay kita managsoon.” Ang patriarka mipadayon: “Dili ba ang tibuok yuta anaa man alang kanimo? Palihog, bulag kanako. Kon ikaw moadto sa wala, nan ako moadto sa tuo; apan kon ikaw moadto sa tuo, nan ako moadto sa wala.” Gipili ni Lot ang labing mabungahong dapit. Bisan pa niana, si Abraham wala magdumot. (Gen. 13:8-11) Sa dihang si Lot nabihag sa ulahi, si Abraham wala magpanuko sa pagluwas kaniya.—Gen. 14:14-16.
11. Sa unsang paagi si Abraham nagmakigdaiton sa mga Filistehanon?
11 Hunahunaa usab kon sa unsang paagi si Abraham nagmakigdaiton sa mga Filistehanon, nga silingan niya sa Canaan. ‘Sa kapintas giilog’ sa mga Filistehanon ang usa ka atabay nga gikalot sa mga sulugoon ni Abraham sa Beer-seba. Niining situwasyona, unsa kahay buhaton sa usa ka tawo nga nakapildig upat ka hari sa pagluwas sa iyang pag-umangkon? Imbes makig-away aron mabawi ang atabay, si Abraham nagpakahilom. Sa ulahi, ang hari sa mga Filistehanon miduaw kang Abraham aron mohimog pakigsaad sa pakigdait. Human lamang nga si Abraham nakapanumpa nga magmaluloton sa mga kaliwat sa hari nga siya mitug-an bahin sa giilog nga atabay. Ang hari nakurat pagkadungog niini ug iyang giuli ang atabay. Ug si Abraham padayong nagpuyo nga malinawon ingong langyaw sa maong yuta.—Gen. 21:22-31, 34.
12, 13. (a) Sa unsang paagi si Isaac nagsundog sa ehemplo sa iyang amahan? (b) Sa unsang paagi gipanalanginan ni Jehova ang pagkamakigdaiton ni Isaac?
12 Ang anak ni Abraham nga si Isaac misundog sa pagkamakigdaiton sa iyang amahan. Dayag kini sa iyang pagpakiglabot sa mga Filistehanon. Kay may kagutom sa maong dapit, si Isaac ug ang iyang panimalay mibiya sa umaw nga dapit sa Beer-lahai-roi, sa Negeb, ug mibalhin sa mas mabungahong teritoryo sa mga Filistehanon, sa Gerar. Didto, gipanalanginan ni Jehova si Isaac ug daghang ani ug kahayopan. Ang mga Filistehanon nasina kaniya. Dili nila gusto nga madato si Isaac sama sa iyang amahan, busa gitabonan nilag yuta ang iyang mga atabay. Sa ulahi, ang hari sa mga Filistehanon miingon kang Isaac: “Pahawa sa among kasilinganan.” Ang makigdaitong si Isaac misunod.—Gen. 24:62; 26:1, 12-17.
13 Human mobalhin si Isaac ngadto sa layo, ang iyang mga magbalantay nagkalot ug laing atabay. Giangkon sa Filistehanong mga magbalantay nga ilaha ang tubig. Sama sa iyang amahan nga si Abraham, si Isaac wala makig-away. Hinuon, siya nagpakalot ug laing atabay. Giangkon na usab kana sa mga Filistehanon. Alang sa kalinaw, si Isaac ug ang iyang dakong panimalay mibalhin na usab sa laing dapit. Didto, nagpakalot na usab siyag laing atabay nga ginganlan niyag Rehobot. Sa ulahi, siya mibalhin ngadto sa mas mabungahong dapit sa Beer-seba, diin si Jehova nagpanalangin kaniya ug nag-ingon: “Ayaw kahadlok, tungod kay ako magauban kanimo, ug ako magpanalangin kanimo ug magpadaghan sa imong binhi tungod kang Abraham nga akong alagad.”—Gen. 26:17-25.
14. Sa unsang paagi gipakita ni Isaac nga siya makigdaiton dihang ang hari sa mga Filistehanon mihimog pakigsaad sa pakigdait uban kaniya?
14 Siyempre, may katakos si Isaac nga makig-away alang sa iyang katungod sa paggamit sa tanang atabay nga iyang gipakalot. Gani, ang hari sa mga Filistehanon uban sa iyang mga opisyales miduaw kaniya sa Beer-seba ug gustong mohimog pakigsaad sa pakigdait, nga nag-ingon: “Nakita gayod namo nga si Jehova nag-uban kanimo.” Bisan pa niana, alang sa kalinaw, si Isaac mibalhin ug daghang beses inay makig-away. Niining higayona usab, gipakita ni Isaac nga siya makigdaiton. Ang Bibliya nag-ingon: “Siya naghimog kombira alang [sa iyang mga bisita] ug sila nangaon ug nanginom. Pagkasunod buntag sila mibangon pagsayo ug sila naghimog gipanumpaang mga pahayag ngadto sa usag usa. Human niana si Isaac nagpalakaw kanila . . . diha sa kalinaw.”—Gen. 26:26-31.
Pagkat-on sa Panig-ingnan ni Jose
15. Nganong ang mga magulang ni Jose wala makahimo sa pagsulting madinaiton kaniya?
15 Ang anak ni Isaac nga si Jacob maoy “tawo nga walay-ikasaway.” (Gen. 25:27) Sa gihisgotan sa sinugdan, si Jacob nagtinguha nga makigdait sa iyang kaluhang si Esau. Si Jacob seguradong nakakat-on sa maayong ehemplo sa iyang amahan, si Isaac. Komosta ang mga anak nga lalaki ni Jacob? Sa 12 niya ka anak, si Jose ang gihigugma pag-ayo ni Jacob. Si Jose masinundanon ug matinahorong anak ug sinaligan sa iyang amahan. (Gen. 37:2, 14) Apan, ang mga magulang ni Jose nasina kaayo mao nga wala sila makahimo sa pagsulting madinaiton kaniya. Sa kapintas, gibaligya nila si Jose ingong ulipon ug gipatuo ang ilang amahan nga siya gipatay sa ihalas nga mananap.—Gen. 37:4, 28, 31-33.
16, 17. Sa unsang paagi si Jose nagmakigdaiton sa iyang mga igsoon?
16 Si Jehova nag-uban kang Jose. Sa ulahi, siya nahimong primer ministro sa Ehipto—ikaduha lamang kang Paraon. Tungod sa grabeng kagutom, ang mga igsoon ni Jose nangadto sa Ehipto, ug sila wala makaila kaniya tungod sa iyang Ehiptohanong besti. (Gen. 42:5-7) Pagkasayon ra unta nga manimalos si Jose sa iyang mga igsoon tungod sa ilang daotang pagtratar kaniya ug sa ilang amahan! Apan imbes manimalos, si Jose nakigdait kanila. Sa nakita niya nga naghinulsol ang iyang mga igsoon, gipaila niya ang iyang kaugalingon, nga miingon: “Ayaw kamo pagbatig kasakit ug ayaw pagkasuko sa inyong kaugalingon tungod sa inyong pagbaligya kanako dinhi; tungod kay alang sa pagtipig sa kinabuhi nga ang Diyos nagpadala kanako una kaninyo.” Dayon siya mihalok sa tanan niyang igsoon ug mihilak.—Gen. 45:1, 5, 15.
17 Pagkamatay sa ilang amahan nga si Jacob, ang mga igsoon ni Jose naghunahuna nga basin siya manimalos kanila. Sa dihang gisulti nila kini kang Jose, siya mihilak ug mitubag: “Ayaw kamo kahadlok. Ako magtagana ug pagkaon alang kaninyo ug sa inyong gagmayng mga bata.” Ang makigdaitong si Jose “naghupay kanila ug misulti nga mapasaligon kanila.”—Gen. 50:15-21.
“Gisulat Alang sa Pagtudlo Kanato”
18, 19. (a) Unsay imong nakat-onan sa ehemplo sa mga makigdaiton nga gihisgotan niining artikuloha? (b) Unsay hisgotan sa sunod artikulo?
18 Si Pablo misulat: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Unsay atong nakat-onan gikan sa labing maayong ehemplo ni Jehova ug sa mga asoy bahin ni Abraham, Isaac, Jacob, ug Jose?
19 Dili ba ang pagpamalandong sa gihimo ni Jehova aron mapasig-uli ang maayong relasyon tali kaniya ug sa makasasalang katawhan magtukmod kanato sa pagbuhat sa atong maarangan nga magmakigdaiton sa uban? Ang ehemplo ni Abraham, Isaac, Jacob, ug Jose nagpakita nga ang mga ginikanan mahimong maayong impluwensiya sa ilang mga anak. Dugang pa, kini nga mga asoy nagpakita usab nga panalanginan ni Jehova kadtong nagtinguha nga magmakigdaiton. Dili ikatingala nga si Pablo nagtawag kang Jehova ingong “Diyos nga nagahatag ug kalinaw”! (Basaha ang Roma 15:33; 16:20.) Ang sunod artikulo maghisgot kon nganong gipasiugda ni Pablo nga kita kinahanglang magmakigdaiton ug kon sa unsang paagi mahimo kana.
Unsay Imong Nakat-onan?
• Sa unsang paagi si Jacob nagmakigdaiton kang Esau?
• Unsay imong reaksiyon sa gibuhat ni Jehova aron ipasig-uli ang maayong relasyon sa katawhan uban niya?
• Unsay imong nakat-onan sa pagkamakigdaiton ni Abraham, Isaac, Jacob, ug Jose?
[Mga Pangutana sa Pagtuon]
[Mga hulagway sa panid 23]
Unsa ang labing hinungdanong lakang nga gihimo ni Jacob sa pagpakigdait kang Esau?
