Usa ka Halandomong Tinuig nga Miting

“PAGKAHUMAN niini nga miting, kamo makaingon, ‘Usa gayod kini ka halandomong tinuig nga miting!’” Ang maong mga pulong ni Stephen Lett, membro sa Nagamandong Lawas sa mga Saksi ni Jehova, mas nakapahinam sa daghang nanambong. Sila nagtigom alang sa ika-126 tinuig nga miting sa Watch Tower Bible and Tract Society of Pennsylvania niadtong Oktubre 2, 2010, sa Assembly Hall sa mga Saksi ni Jehova sa Jersey City, New Jersey, U.S.A. Unsa ang pipila ka importanteng butang nga gihisgotan sa maong halandomong okasyon?

Ang pangbukas nga pakigpulong ni Brader Lett naghisgot sa langitnong karo ni Jehova nga gihubit sa basahon ni Ezequiel. Kining dako, matahom nga karo naghulagway sa organisasyon sa Diyos, nga bug-os kontrolado ni Jehova. Ang langitnong bahin niini, nga gilangkoban sa espiritung mga linalang, nagalihok samag kilat—sama katulin sa mga hunahuna ni Jehova, miingon si Brader Lett. Ang yutan-ong bahin sa organisasyon ni Jehova nga Diyos nagalihok usab. Gihisgotan ni Brader Lett ang pipila ka makapaikag ug di pa dugayng mga kausaban niini.

Pananglitan, ang pipila ka sangang buhatan giusa mao nga daghan sa mga nag-alagad kanhi sa Bethel nianang mga nasora nagpokus sa buluhatong pagsangyaw. Giawhag ni Brader Lett ang mga mamiminaw sa pagpadayon sa pag-ampo nga ang Nagamandong Lawas, ingong hawas sa ulipon nga matang, magmatinumanon ug magmaalamon.—Mat. 24:45-47.

Makapadasig nga mga Report ug Interbiyo

Si Tab Honsberger, membro sa Komite sa Sanga sa Haiti, mihatag ug makapatandog nga taho bahin sa Enero 12, 2010 nga linog, diin mga 300,000 ang namatay. Siya miingon nga gisultihan sa klero ang mga tawo nga ang Diyos nagsilot niadtong nangamatay tungod sa ilang kawalay-pagtuo ug nagpanalipod sa maayong mga tawo. Apan, libolibo ka kriminal ang nakagawas sa dihang nalumpag sa linog ang usa ka prisohan. Daghang sinserong Haitiano ang nahupayan sa pagkahibalo sa kamatuoran kon nganong daghan kaayong problema sa atong panahon. Gikutlo ni Brader Honsberger ang gisulti sa usa ka matinumanong brader didto nga namatyag asawa: “Bisan karon ako maghilak gihapon. Ambot kon hangtod kanus-a ko magbangotan, apan nalipay ko sa gugma nga gipakita sa organisasyon ni Jehova. Aduna koy paglaom, ug ako gayod kining ipaambit.”

Si Mark Sanderson, membro karon sa pamilyang Bethel sa Brooklyn, mireport bahin sa Pilipinas.  Ingong membro kanhi sa Komite sa Sanga sa Pilipinas, siya malipayong nagreport sa 32 ka sunodsunod nga kinatas-ang ihap sa mga magmamantala ug nga mas daghan ang pagtuon sa Bibliya kay sa mga magmamantala. Siya miasoy bahin sa usa ka brader nga si Miguel, kansang apo nga lalaki gipatay. Tungod sa pagpaningkamot ni Miguel, napriso ang kriminal. Sa ulahi, samtang siya nagsangyaw sa prisohan, iyang nahibalag ang maong tawo. Bisag gikulbaan, si Miguel malumong nakig-estorya niya. Ngadtongadto, nadumalahan niyag pagtuon ang maong tawo, kinsa miuswag ug nakakat-on sa paghigugma kang Jehova. Siya karon bawtismado na ug si Miguel nahimo niyang suod nga higala. Si Miguel naningkamot nga sayong makagawas sa prisohan ang iyang bag-ong brader. *

Ang sunod nga bahin sa programa maoy interbiyo nga gidumala ni Mark Noumair, instruktor sa Theocratic Schools Department. Iyang giinterbiyo ang tulo ka magtiayon—si Alex ug Sarah Reinmueller, David ug Krista Schafer, ug si Robert ug Ketra Ciranko. Si Alex Reinmueller, katabang sa Publishing Committee, miasoy nga sa edad 15, siya nagpayunir sa Canada ug sagad nag-inusara sa pagsangyaw. Sa dihang gipangutana kon kinsay labing nakadasig niya sa Bethel, mihisgot siyag tulo ka matinumanong brader. Iyang gisaysay kon sa unsang paagi ang matag usa kanila nakatabang niya nga mohamtong sa espirituwal. Ang iyang asawa nga si Sarah miasoy bahin sa iyang higalang sister, kinsa napriso sa daghang katuigan sa China tungod sa iyang pagtuo. Si Sarah miingon nga siya nakakat-on sa pagsalig kang Jehova pinaagi sa pag-ampo.

Si David Schafer, katabang sa Teaching Committee, midayeg sa iyang inahan tungod sa iyang lig-ong pagtuo ug miasoy bahin sa mga brader nga magtotroso nga mitabang kaniya sa pag-oksilyare payunir niadtong siya batan-on pa. Ang iyang asawa nga si Krista mabinationg miasoy nga nakadasig kaniya ang edarang mga membro sa pamilyang Bethel kinsa “kasaligan sa labing gamay,” sumala sa giawhag ni Jesus.—Luc. 16:10.

Si Robert Ciranko, katabang sa Writing Committee, nahinumdom sa iyang upat ka apohang Hungarian, nga mga imigrante ug dinihogan. Sa bata pa, siya nahingangha sa dagkong mga kombensiyon sa katuigang 1950 ug iyang nasayran nga ang organisasyon ni Jehova mas dako kay sa iyang kongregasyon. Ang iyang asawa nga si Ketra miasoy nga siya nakakat-on nga magmaunongon samtang nagpayunir sa kongregasyon nga gisamok sa mga apostata ug may mga problema.  Siya milahutay ug sa ulahi naasayn nga espesyal payunir sa usa ka kongregasyon diin ang panaghiusa nakapatandog kaayo niya.

Sunod, si Manfred Tonak mireport bahin sa Ethiopia. Kining nasora naglungtad panahon pa sa Bibliya ug adunay kapig 9,000 ka magmamantala. Kadaghanan kanila nagpuyo sa kaulohan nga mao ang Addis Ababa o sa duol niana. Busa, ang hilit nga mga dapit nagkinahanglag dugang magmamantala. Aron matagan-an ang maong panginahanglan, ang Etiopianhong mga Saksi sa ubang nasod giawhag nga moduaw aron makasangyaw sa hilit nga mga bahin sa maong nasod. Daghan ang nangabot, nakapalig-on sa lokal nga mga Saksi, ug nakakaplag ug mga interesado.

Usa ka makapaikag nga bahin sa programa mao ang simposyum mahitungod sa mga Saksi ni Jehova sa Russia ug sa ilang legal nga pakigbisog. Si Aulis Bergdahl, membro sa Komite sa Sanga sa Russia, miasoy bahin sa paglutos nga naagoman sa mga Saksi sa Russia, ilabina sa Moscow. Si Philip Brumley sa Legal Department sa sanga sa United States misugilon bahin sa makapaikag nga kaugmaran niining milabayng mga bulan sa dihang gihusay sa European Court of Human Rights (ECHR) ang siyam ka akusasyon batok sa mga Saksi. Nakita sa Korte nga walay basehanan ang siyam ka akusasyon. Gani sa pipila ka kaso detalyado pang gipatin-aw kon nganong sayop ang mga argumento nga gipresentar. Bisag wala pa ta mahibalo kon unsa unyay mga resulta, si Brader Brumley masaligon nga ang desisyon sa Korte makatabang sa mga kaso diha sa ubang nasod.

Human niana, si Brader Lett mipahibalo nga gidawat na sa ECHR ang dugay nang kaso bahin sa buhis tali sa gobyerno sa France ug sa mga Saksi ni Jehova. Dili tanang kaso ang dawaton niining tinamod kaayo nga Korte. Sa pagkakaron, nahusay na sa ECHR ang 39 ka kaso nga naglangkit sa mga Saksi ni Jehova, ug ang desisyon sa 37 niana pabor kanato. Gidasig ni Brader Lett ang tanang alagad ni Jehova nga ilakip sa mga pag-ampo ang presenteng kaso.

Ang kataposang report gihatag ni Richard Morlan, nga usa ka instruktor sa School for Congregation Elders. Siya madasigong naghisgot bahin sa tunghaan ug sa pagkamapasalamaton sa mga ansiyano nga nakatungha niana.

Ubang Pakigpulong sa mga Membro sa Nagamandong Lawas

Si Guy Pierce, membro sa Nagamandong Lawas, mihatag sa makapatandog nga pakigpulong  nga nagpasiugda sa tinuig nga teksto sa 2011, ‘Dangop sa ngalan ni Jehova.’ (Sof. 3:12) Siya miingon nga may daghang rason nga angayng malipay ang katawhan ni Jehova karon, apan kini maoy seryoso ug makapahinuklog nga panahon. Haduol na ang dakong adlaw ni Jehova; apan ang katawhan padayong nagadangop sa bakak nga relihiyon, politikal nga organisasyon, materyal nga bahandi, pilosopiya nga wala mag-ila sa tinuod nga kahimtang sa kalibotan, ug uban pa. Aron makakaplag sa tinuod nga dangpanan, kinahanglang motawag kita sa ngalan ni Jehova, nga naglangkit sa pag-ila, pagtahod, pagsalig, ug paghigugma kaniya uban sa tanan natong nabatonan.

Si David Splane, membro sa Nagamandong Lawas, ang sunod nga mihatag sa makapahinuklog nga tema “Nakasulod Ka na ba sa Kapahulayan sa Diyos?” Siya miingon nga ang kapahulayan sa Diyos wala magpasabot sa pagpahulay sa trabaho, kay si Jehova ug ang iyang Anak “nagpadayon sa pagbuhat” sulod nianang simbolikong adlaw aron matuman ang katuyoan sa Diyos bahin sa yuta. (Juan 5:17) Nan, sa unsang paagi kita makasulod sa kapahulayan sa Diyos? Ang paghunong sa pagpakasala ug sa pagpakamatarong sa kaugalingon maoy bahin lamang sa tubag. Kinahanglang magpasundayag kitag pagtuo ug magkinabuhi nga naghunahuna sa katuyoan sa Diyos, nga buhaton ang tanan aron makaamot sa kalamposan niana. Usahay lisod kanang buhaton, apan kinahanglang modawat kitag tambag ug mosunod sa direksiyon sa organisasyon ni Jehova. Giawhag ni Brader Splane ang mga mamiminaw nga buhaton ang tanan aron makasulod sa kapahulayan sa Diyos.

Ang kataposang pakigpulong, nga gihatag ni Anthony Morris nga membro sa Nagamandong Lawas, nag-ulohang “Unsay Atong Ginapaabot?” Si Brader Morris madasigong nagpahinumdom sa mga mamiminaw bahin sa umaabot nga katumanan sa mga tagna, mga hitabo nga mahinamong ginapaabot sa tanang matinumanon. Kini naglakip sa singgit sa “Kalinaw ug kasegurohan!” ug sa pagkalaglag sa bakak nga relihiyon. (1 Tes. 5:2, 3; Pin. 17:15-17) Si Brader Morris nagpasidaan nga dili kita angayng moingon, “Mao na ni ang Armagedon,” sa dihang makabasag mga balita nga dili pa katumanan sa maong mga tagna. Iyang gidasig ang pagbatog malipayon, mapailobon, ug mahulatong tinamdan nga gihubit sa Miqueas 7:7. Iyang gidasig usab ang tanan nga monunot sa Nagamandong Lawas, nga samag mga sundalo nga magtigom alang sa gubat. “Magmalig-on unta ang inyong kasingkasing,” siya miingon, “kamong tanan nga nagahulat kang Jehova.”—Sal. 31:24.

Sa pagtapos, dihay pipila ka halandomong pahibalo. Gipahibalo ni Geoffrey Jackson, membro sa Nagamandong Lawas, ang plano bahin sa gipayano nga tun-anang edisyon sa The Watchtower alang niadtong limitado ug kahibalo sa Ingles. Dayon gipahibalo ni Stephen Lett nga ang Nagamandong Lawas maghimog kahikayan nga duawon ang mga magtatan-aw sa distrito ug ilang mga asawa sa United States. Sunod, iyang gipahibalo nga ang Ministerial Training School tawgon nang Bible School for Single Brothers. Ug nga adunay bag-ong tunghaan nga mao ang Bible School for Christian Couples. Kini dugang magbansay sa mga magtiayon aron mas magamit sila diha sa organisasyon ni Jehova. Gipahibalo sab ni Brader Lett nga ang School for Traveling Overseers and Their Wives ug ang School for Branch Committee Members and Their Wives himoon nang duha ka klase kada tuig sa Patterson. Kadtong nakatambong sa nangagi makatungha sa ikaduhang higayon.

Ang kataposang bahin sa programa mao ang mapainubsanon ug kinasingkasing nga pag-ampo sa 97-anyos nga si John E. Barr, dugay nang membro sa Nagamandong Lawas. * Pagkahuman sa miting, ang tanan mibati nga kadto usa gayod ka halandomong adlaw.

[Mga footnote]

[Blurb sa panid 19]

Ang mga interbiyo diin nalingaw ang tanang nanambong

[Blurb sa panid 20]

Gipanalanginan ni Jehova ang buluhatong pagsangyaw sa Ethiopia