Dagan Aron Inyong Makab-ot ang Ganti

“Dagan sa paagi nga inyong makab-ot kini.”—1 COR. 9:24.

1, 2. (a) Unsay gigamit ni Pablo sa pagdasig sa Hebreohanong mga Kristohanon? (b) Unsay giawhag nga buhaton sa mga alagad sa Diyos?

SA SULAT ni apostol Pablo sa mga Hebreohanon, migamit siyag ilustrasyon sa pagdasig sa mga isigka-Kristohanon. Iyang gipahinumdoman sila nga dili lang sila ang nagdagan sa lumba sa kinabuhi. Sila gilibotan sa ‘bagang panganod sa mga saksi’ nga nakatapos na sa lumba. Kon hinumdoman sa Hebreohanong mga Kristohanon ang mga buhat sa pagtuo ug mga paningkamot sa nangaging mga magdadagan, sila madasig sa paglahutay.

² Sa miaging artikulo, atong nahisgotan ang panig-ingnan sa pipila sa “panganod sa mga saksi.” Ang ilang lig-ong pagtuo nakatabang kanila nga magmaunongon sa Diyos hangtod sa kataposan. Makakuha kitag leksiyon sa ilang kalamposan. Ingon sa gipakita sa maong artikulo, si Pablo nag-awhag sa iyang isigkaalagad, lakip kanato: “Tangtangon usab nato ang tanang kabug-at ug ang sala nga daling makasabod kanato, ug daganon nato nga malahutayon ang lumba nga gibutang sa atong atubangan.”—Heb. 12:1.

3. Unsay punto sa tambag ni Pablo maylabot sa Gregong mga magdadagan?

³ Bahin sa lumba sa dagan, ang librong Backgrounds of Early Christianity nag-ingon nga “ang mga Grego nagbansay ug nakiglumba nga hubo.” * Ang mga magdadagan  nagtangtang sa bisan unsa nga makapahinay sa ilang pagdagan. Bisag dili kita mouyon sa ilang pagdagan nga hubo, gibuhat nila kadto aron makadaog. Ang punto ni Pablo mao nga kinahanglang tangtangon sa mga magdadagan ang bisan unsang kabug-at aron makab-ot ang ganti. Maalamon kini nga tambag para sa mga Kristohanon kaniadto ug karon. Unsang mga kabug-at ang makapugong kanato sa pagkab-ot sa ganti sa lumba sa kinabuhi?

‘Tangtanga ang Tanang Kabug-at’

4. Unsay nakapalinga sa mga tawo sa adlaw ni Noe?

⁴ Si Pablo nagtambag nga ‘tangtangon ang tanang kabug-at.’ Kana naglakip sa tanang butang nga makapugong nato sa pagpokus sa lumba ug sa pagdagan kutob sa maarangan. Unsa ang pipila sa maong mga kabug-at? Bahin kang Noe, nga gihisgotan ni Pablo, si Jesus miingon: “Maingon sa nahitabo sa mga adlaw ni Noe, mao man usab unya sa mga adlaw sa Anak sa tawo.” (Luc. 17:26) Ang pangunang gitumong ni Jesus dinhi mao ang pagkinabuhi sa mga tawo, dili ang umaabot nga kalaglagan. (Basaha ang Mateo 24:37-39.) Ang kadaghanang tawo sa adlaw ni Noe dili interesado sa Diyos, ilabina sa pagpahimuot kaniya. Unsay nakapalinga nila? Ang normal nga kalihokan sa kinabuhi—pagkaon, pag-inom, ug pagminyo. Ang tinuod nga problema mao nga sila ‘wala magtagad,’ sumala sa giingon ni Jesus.

5. Unsay makatabang kanato nga makatapos sa lumba?

⁵ Sama kang Noe ug sa iyang pamilya, daghan kitag buluhaton matag adlaw. Kita kinahanglang manginabuhi ug mag-atiman sa atong kaugalingon ug pamilya. Kana mahimong makahurot sa atong panahon ug kusog. Dali ra kitang mabalaka sa adlaw-adlawng panginahanglan ilabina kon lisod ang panalapi. Ingong mga Kristohanon, kita usab dunay teokratikanhong mga responsabilidad. Kita mosangyaw, mangandam ug motambong sa mga tigom, ug magpalig-on sa espirituwalidad pinaagi sa personal nga pagtuon ug pamilyahanong pagsimba. Bisan pa sa tanang gisugo sa Diyos kang Noe, “gibuhat niya ang ingon gayod.” (Gen. 6:22) Busa, ang pagkahimong balanse ug ang paglikay sa wala kinahanglanang mga kabug-at hinungdanon kon buot natong makatapos sa lumba.

6, 7. Unsang tambag ni Jesus ang angay natong hinumdoman?

⁶ Unsay gipasabot ni Pablo nga tangtangon ang “tanang kabug-at”? Siyempre, dili mahimong tangtangon nato ang tanan natong responsabilidad. Bahin niini, hinumdomi ang giingon ni Jesus: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga.” (Mat. 6:31, 32) Ang mga pulong ni Jesus nagpakita nga bisan ang mga kinahanglanon sa kinabuhi, sama sa pagkaon ug besti,  mahimong kabug-at kon kana ang mas hinungdanon kanato.

⁷ Matikdi ang giingon ni Jesus: “Ang inyong langitnong Amahan nahibalo nga gikinahanglan ninyo kining tanang butanga.” Kini nagpasabot nga ang atong Amahan, si Jehova, motagana sa atong panginahanglan. Siyempre, ang pamulong “kining tanang butanga” wala magkahulogan nga atong mabatonan ang tanan natong gusto. Bisan pa niana, kita giawhag nga dili mabalaka sa “mga butang nga maikagong ginapangagpas sa mga nasod.” Ngano? Si Jesus nagtambag sa iyang mamiminaw: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag.”—Luc. 21:34, 35.

8. Nganong karon na ang panahon nga ‘tangtangon ang tanang kabug-at’?

⁸ Duol na kaayo ang sangkoanan sa Kristohanong lumba. Pagkaanugon kon dili ta makatapos niini tungod sa wala kinahanglanang mga kabug-at! Nan, maalamon gayod ang tambag ni apostol Pablo: “Kini maoy usa ka paagi nga makaganansiyag dako, kining diyosnong pagkamahinalaron inubanan sa pagkakontento.” (1 Tim. 6:6) Kon sundon nato kini, mas dako ang purohan nga atong makab-ot ang ganti.

“Ang Sala nga Daling Makasabod Kanato”

9, 10. (a) Unsa “ang sala nga daling makasabod kanato”? (b) Sa unsang paagi kita lagmit masabod?

⁹ Gawas pa sa “tanang kabug-at,” si Pablo miingon nga tangtangon “ang sala nga daling makasabod kanato.” Unsa kana? Ang Gregong pulong nga gihubad ug “daling makasabod,” kas-a lang makita sa Bibliya. Ang eskolar nga si Albert Barnes miingon nga ang magdadagan kaniadto dili mosul-ob ug sapot nga makasabod sa iyang bitiis aron dili siya malisdan sa pagdagan. Sa susama, angayng ihiklin sa usa ka Kristohanon ang tanang butang nga makasabod kaniya. Sa unsang paagi ang usa ka Kristohanon masabod, o mawad-ag pagtuo?

¹⁰ Ang usa ka Kristohanon dili kalit nga mawad-ag pagtuo. Kini hinayhinayng mahitabo, nga dili gani mamatikdan. Sa sulat ni Pablo sa mga Hebreohanon, siya nagpasidaan bahin sa kapeligrohan nga “maanod” ug ‘maugmad ang daotang kasingkasing nga walay pagtuo.’ (Heb. 2:1; 3:12) Kon ang sapot sa magdadagan mosabod sa iyang bitiis, lagmit matumba siya. Busa dili siya angayng magsul-ob ug sayop nga matang sa sapot. Apan posibleng dili niya tagdon kini nga kapeligrohan. Ngano? Tingali tungod sa kadanghag, sobrang pagsalig sa kaugalingon, o may nakabalda niya. Unsay atong makat-onan sa tambag ni Pablo?

11. Unsay posibleng hinungdan nga kita mawad-ag pagtuo?

¹¹ Angay natong hinumdoman nga ang pagkawala sa pagtuo maoy resulta sa atong ginabuhat. Bahin sa “sala nga daling makasabod kanato,” ang laing eskolar miingon nga ang atong kahimtang, kauban, ug sayop nga tinguha dakog impluwensiya kanato. Tungod niini, ang atong pagtuo mohuyang o mawala pa gani.—Mat. 13:3-9.

12. Unsang mga pasidaan ang angay natong sundon aron dili kita mawad-ag pagtuo?

¹² Ang matinumanon ug maalamong ulipon kanunayng nagpahinumdom kanato nga magmapilion sa atong ginatan-aw ug ginapaminaw, kay kini makaapektar sa atong kasingkasing ug hunahuna. Kita gipasidan-an sa kapeligrohan sa pagpangagpas ug materyal nga mga butang. Basin malinga kita sa mga kalingawan sa kalibotan o sa bag-ong mga gadyet. Peligro gayod kon dili  nato tagdon ang maong mga pasidaan ug maghunahuna nga kini estrikto ra kaayo. Ug dili ta maghunahuna nga para lang na sa uban kay lig-on na ang atong pagtuo. Ang kabaldahan nga gigamit ni Satanas malinglahon ug dili dayon mamatikdan. Ang uban nawad-ag pagtuo tungod sa kadanghag, sobrang pagsalig sa kaugalingon, ug pagkalinga sa mga butang sa kalibotan. Kon mahitabo kini kanato, peligrong dili nato makab-ot ang ganti nga kinabuhi.—1 Juan 2:15-17.

13. Sa unsang paagi atong mapanalipdan ang kaugalingon batok sa makadaot nga mga impluwensiya?

¹³ Kada adlaw, makauban nato ang mga tawong kalibotanon ug mga tumong, tinamdan, ug panghunahuna. (Basaha ang Efeso 2:1, 2.) Apan naa ra nato kon magpaimpluwensiya kita niini. Ang “hangin” nga gihisgotan ni Pablo makamatay. Angay kitang magbantay kanunay aron dili mahilo niini, ug dili na hinuon makatapos sa lumba. Unsay makatabang kanato aron makapadayon sa lumba? Ang panig-ingnan sa atong hingpit nga magdadagan, si Jesus. (Heb. 12:2) Si Pablo usa usab ka panig-ingnan kay siya nag-isip sa iyang kaugalingon ingong magdadagan ug nag-awhag sa iyang isigkamagtutuo sa pagsundog kaniya.—1 Cor. 11:1; Filip. 3:14.

“Inyong Makab-ot Kini”—Sa Unsang Paagi?

14. Unsa ka bililhon kang Pablo ang pagtapos sa lumba?

¹⁴ Unsa ka bililhon kang Pablo ang pagtapos sa lumba? Sa iyang kataposang pagpakigsulti sa mga ansiyano gikan sa Efeso, siya miingon: “Wala ko pakamahala ang akong kalag, basta lamang akong mahuman ang akong ginadagan ug ang ministeryo nga akong nadawat sa Ginoong Jesus.” (Buh. 20:24) Andam niyang isakripisyo ang tanan, lakip ang iyang kinabuhi, aron makatapos sa lumba. Para kang Pablo, anugon ang tanan niyang paghago sa maayong balita kon dili siya makatapos sa lumba. Apan dili siya  sobra ka masaligon, nga naghunahunang segurado siyang makadaog niini. (Basaha ang Filipos 3:12, 13.) Hinuon, sa hapit na siyang mamatay, siya nakaingon: “Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.”—2 Tim. 4:7.

15. Unsay giawhag ni Pablo sa iyang mga isigkamagdadagan?

¹⁵ Buot usab ni Pablo nga makatapos sa lumba ang iyang mga isigka-Kristohanon. Pananglitan, giawhag niya ang mga Kristohanon sa Filipos nga manglimbasog alang sa ilang kaluwasan. Kinahanglan silang padayong ‘mangupot nga hugot sa pulong sa kinabuhi.’ Siya mipadayon: “Aron nga sa adlaw unya ni Kristo ako adunay hinungdan sa kasadya, nga ako wala diay modagan nga kawang o maghago nga kawang.” (Filip. 2:16) Sa susama, iyang giawhag ang mga Kristohanon sa Corinto: “Dagan sa paagi nga inyong makab-ot [ang ganti].”—1 Cor. 9:24.

16. Nganong ang ganti kinahanglang tinuod kanato?

¹⁶ Sa taas nga lumba, sama sa maraton, dili dayon makita ang sangkoanan. Apan ang magdadagan maghunahuna kanunay sa sangkoanan. Kon duol na kana, mas determinado siyang molahutay. Susama usab niana ang atong Kristohanong lumba. Ang ganti kinahanglang tinuod kanato. Kini motabang kanato sa pagkab-ot sa ganti.

17. Sa unsang paagi ang pagtuo makatabang nato sa paghunahuna kanunay sa ganti?

¹⁷ “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita,” misulat si Pablo. (Heb. 11:1) Si Abraham ug Sara andam sa pagbiya sa haruhayng kinabuhi ug sa pagpuyo ingong “mga estranyo ug temporaryong mga pumoluyo sa yuta.” Nganong nahimo nila kadto? “Sila nakakita [sa katumanan sa mga saad sa Diyos] sa halayo.” Gisalikway ni Moises ang “umalaging kalipay sa pagpakasala” ug ang “mga bahandi sa Ehipto.” Nganong siya may pagtuo ug kaisog sa pagbuhat niadto? Siya ‘mitutok ngadto sa pagbayad sa ganti.’ (Heb. 11:8-13, 24-26) Kanay hinungdan nga si Pablo miingon nga sila milihok “tungod sa pagtuo.” Ilang nasagubang ang mga pagsulay ug kalisdanan tungod sa pagtuo. Sila nahibalo nga ang Diyos nagtabang kanila ug nga siya magtuman sa iyang mga saad.

18. Aron matangtang “ang sala nga daling makasabod kanato,” unsay angay natong himoon?

¹⁸ Kon atong palandongon ug sundogon ang mga lalaki ug babaye sa pagtuo diha sa Hebreohanon kapitulo 11, atong maugmad ang pagtuo ug matangtang “ang sala nga daling makasabod kanato.” (Heb. 12:1) Dugang pa, pinaagi sa pagtambong sa mga tigom uban niadtong nagpalig-on sa ilang pagtuo, kita ‘makadasig sa usag usa sa paghigugma ug sa maayong mga buhat.’—Heb. 10:24.

19. Nganong hinungdanon ang paghunahuna kanunay sa ganti?

¹⁹ Hapit nang matapos ang atong lumba. Daw makita na nato ang sangkoanan. Pinaagi sa pagtuo ug sa tabang ni Jehova, kita usab ‘makatangtang sa sala nga daling makasabod kanato.’ Oo, kita makadagan sa paagi nga atong makab-ot ang ganti—ang mga panalangin nga gisaad sa atong Diyos ug Amahan, si Jehova.

[Footnote]

Nahinumdom Ka Ba?

• Unsay nalangkit sa pagtangtang sa “tanang kabug-at”?

• Unsay lagmit nga hinungdan nga ang usa mawad-ag pagtuo?

• Nganong kita angayng maghunahuna kanunay sa ganti?

[Mga Pangutana sa Pagtuon]

[Hulagway sa panid 23]

Unsa “ang sala nga daling makasabod kanato,” ug sa unsang paagi kini lagmit makasabod kanato?