Pagbasa sa Bibliya—Akong Tinubdan sa Kusog

Sumala sa giasoy ni Marceau Leroy

“SA SINUGDAN gilalang sa Diyos ang mga langit ug ang yuta,” ako nagbasa sulod sa akong kuwarto. Nganong sekreto kong nagbasa? Seguradong si Papa, nga usa ka ateyista, dili mouyon nga mobasa kog Bibliya.

Kadto ang una kong pagbasa sa Bibliya, ug nainteres ko sa unang mga pulong sa Genesis. Ako naghunahuna, ‘Nia ra man diay dinhi ang tubag kon nganong nagkaharmonya ang pisikal nga mga balaod nga nakapahingangha nako!’ Busa ako nagbasa gikan sa alas otso sa gabii hangtod sa alas kuwatro sa buntag. Kadto ang sinugdanan sa akong batasan sa pagbasa sa Bibliya. Paasoya ko kon sa unsang paagi kana nahimong tinubdan sa akong kusog.

“Adlaw-adlaw Ka Nang Magbasa Niana”

Ako natawo sa 1926, sa Vermelles, usa ka minahag-karbon nga baryo sa northern France. Panahon sa ikaduhang gubat sa kalibotan, hinungdanon kaayo ang karbon sa nasod. Busa ingong minero, wala ko obligaha nga magsundalo. Apan aron moasenso, nagtuon kog radioelectronics, diin mibilib ko sa kaharmonya sa pisikal nga mga balaod. Sa nag-edad kog 21, gitagaan ko sa akong klasmet sa akong unang Bibliya, ug miingon, “Maayo kaayo ning basahon.” Sa nahuman nako kinig basa, nakombinsir ko nga ang Bibliya maoy Pulong sa Diyos.

Abi nakog gusto sab sa akong mga silingan nga mobasag Bibliya, busa mikuha kog walo ka kopya. Apan ila hinuon kong gibiaybiay ug gisupak. Ang matuotuohong mga paryente mipasidaan, “Kon masugdan na nimo nag basa, adlaw-adlaw ka nang magbasa niana!” Gibasa ko kana, ug wala ko magmahay. Nahimo ko kining batasan.

Kay nakamatikod nga interesado ko sa Bibliya, gitagaan ko sa akong mga silingan ug mga basahon sa mga Saksi ni Jehova. Ang mga pulyeto sama sa One World, One Government * (sa French) nagpatin-aw kon nganong ang Bibliya nagtudlo nga ang Gingharian sa Diyos mao ang bugtong paglaom sa katawhan. (Mat. 6:10) Nahimo kong mas determinado sa pagpaambit sa maong paglaom.

Ang usa sa akong nahatagan ug Bibliya mao si Noël, akong higala sukad sa pagkabata. Kay debotadong Katoliko, iyang gihikay  nga makig-estorya mi sa usa nga nagtuon sa pagkapari. Medyo nahadlok ko, apan nahibalo ko nga sa Salmo 115:4-8 ug Mateo 23:9, 10 gidili sa Diyos ang paggamit ug mga idolo sa pagsimba ug ang pagtawag sa mga klerigo gamit ang mga titulo. Kini naghatag nakog kaisog sa pagdepensa sa akong bag-ong pagtuo. Ingong resulta, si Noël midawat sa kamatuoran, ug hangtod karon siya matinumanong Saksi.

Gibisita sab nako ang akong igsoon. Ang iyang bana may mga libro bahin sa espiritismo ug ginaatake sa mga demonyo. Sa sinugdan mibati ko nga walay mahimo, apan ang mga teksto sama sa Hebreohanon 1:14 nagkombinsir nako nga ang mga manulonda ni Jehova nagpaluyo nako. Dihang gipadapat sa akong bayaw ang mga prinsipyo sa Bibliya ug giwagtang ang tanang butang nga konektado sa espiritismo, wala na siya hasia sa mga demonyo. Siya ug ang akong igsoon nahimong masibotong mga Saksi.

Sa 1947 miduaw nako si Arthur Emiot, usa ka Amerikanong Saksi. Ako mahinamong nangutana kaniya kon diin nagtigom ang mga Saksi. Siya miingon nga may grupo sa Liévin, mga diyes kilometros ang gilay-on. Wala kaayoy mapalit nga bisikleta niadto, busa ako nagbaktas sulod sa daghang bulan paingon sa mga tigom. Ang buluhaton sa mga Saksi ni Jehova sa France gibando sulod na sa walo ka tuig. Dihay 2,380 lamang ka Saksi sa tibuok nasod—kadaghanan mga imigranteng Polako. Apan sa Septiyembre 1, 1947, nalegal na usab ang atong buluhaton sa France. Giestablisar pag-usab ang sangang buhatan sa Paris, sa Villa Guibert. Kay wala may payunir sa France, ang Disyembre 1947 nga Informant (Atong Ministeryo sa Gingharian) nag-awhag sa mga igsoon nga magregular payunir, nga mogugol ug 150 ka oras kada bulan. (Sa 1949 kana gihimong 100 ka oras.) Uyon gyod ko sa mga pulong ni Jesus sa Juan 17:17, ‘Ang pulong sa Diyos maoy kamatuoran,’ busa ako nagpabawtismo sa 1948 ug nagpayunir sa Disyembre 1949.

Gikan sa Prisohan, Ako Mibalik sa Dunkerque

Ang una kong asaynment mao ang Agen, sa southern France, apan kadiyot ra ko didto. Kay dili na ko minero, ako giobligar nga magsundalo. Midumili ko, busa ako gipriso. Bisag wala ko tugti nga makabatog Bibliya, duna koy pipila ka panid sa basahon sa Salmo. Ako nalig-on sa pagbasa niana. Sa nakagawas na ko, kinahanglan kong modesisyon: Mohunong na ba ko sa pagpayunir aron magpamilya? Sa makausa pa, ang akong nabasa sa Bibliya nakatabang nako. Gipamalandong ko ang giingon ni Pablo sa Filipos 4:11-13: “Sa tanang butang ako adunay kusog pinaagi kaniya nga naghatag ug gahom kanako.” Midesisyon ko nga magpadayon sa pagpayunir. Sa 1950, nakadawat kog bag-ong asaynment—sa Dunkerque, usa ka lungsod nga akong gisangyawan kaniadto.

Sa akong pag-abot, ako walay bisan unsa. Ang lungsod grabeng nadaot sa gubat ug lisod mangitag kapuy-an. Akong giduaw ang pamilya nga akong gisangyawan kaniadto, ug ang inahan nalipay kaayo: “Mr. Leroy, nakagawas na diay ka! Ang akong bana miingon nga kon daghan pa ang sama nimo, wala untay gubat.” Sila adunay guesthouse, busa gipapuyo ko nila didto samtang wala pay mga turista. Nianang adlawa, gitanyagan kog trabaho sa igsoon ni Arthur Emiot nga si Evans. * Siya interpreter sa pantalan ug nangitag mobantay sa barko magabii. Iya kong gipailaila sa usa sa mga opisyales sa barko. Kay gikan sa prisohan, niwang kaayo ko. Sa dihang gipatin-aw ni Evans kon ngano, giingnan ko sa opisyal nga mokuha ra kog pagkaon sa refrigerator. Nianang adlawa, ako nakabatog puy-anan, trabaho, ug pagkaon! Nalig-on ang  akong pagsalig sa mga pulong ni Jesus sa Mateo 6:25-33.

Pag-abot sa mga turista, kami sa akong partner nga payunir nga si Simon Apolinarski, kinahanglang mangitag laing kapuy-an, apan determinado ming magpabilin sa among asaynment. Gitanyagan mig kapuy-an diha sa daang kuwadra sa kabayo, diin manghigda ra mi sa kompay. Sa maadlaw, manangyaw mi. Among gisangyawan ang tag-iya sa kuwadra ug siya na-Saksi. Wala madugay, ang lokal nga mantalaan nagpasidaan sa mga molupyo sa Dunkerque bahin sa pagdagsang sa mga Saksi. Apan ang tinuod diyutay ra ming Saksi didto! Sa maong lisod nga mga panahon, kami napalig-on pinaagi sa pagpamalandong sa among Kristohanong paglaom ug kon giunsa kami pag-atiman ni Jehova. Diha nay mga 30 ka regular nga magmamantala sa Dunkerque sa dihang nabag-o ang akong asaynment sa 1952.

Napalig-on Alang sa Bag-ong mga Responsabilidad

Human sa mubong pag-estar sa siyudad sa Amiens, ako gitudlo nga espesyal payunir sa Boulogne-Billancourt, duol sa Paris. Nakabaton kog daghang Bible study, ug ang pipila nahimong payunir ug misyonaryo. Usa ka batan-on, si Guy Mabilat, midawat sa kamatuoran ug nahimong magtatan-aw sa sirkito ug dayon magtatan-aw sa distrito. Sa ulahi, siya nagdumala sa pagtukod sa imprentahan sa Bethel sa Louviers, nga layo sa Paris. Ang kanunayng paghisgot sa Bibliya diha sa ministeryo mas nagsilsil sa Pulong sa Diyos sa akong kaisipan. Kini nakapalipay nako ug nakapauswag sa akong katakos sa pagpanudlo.

Sa 1953, kalit kong natudlo ingong magtatan-aw sa sirkito sa Alsace-Lorraine, usa ka rehiyon nga kaduha nasakop sa Germany tali sa 1871 ug 1945. Busa kinahanglang magtuon kog pinulongang German. Sa pagsugod nakog duaw, pipila ra ang sakyanan, TV, o makenilya sa maong dapit ug wala pay radyo o computer. Pero wala man sab ko nagmamingawon. Gani malipayon kaayo kadto nga panahon. Ang akong pagsunod sa tambag sa Bibliya nga magbaton ug ‘yanong mata’ nakatabang nako sa pag-alagad kang Jehova nga wala kaayoy kabaldahan.—Mat. 6:19-22.

Dili gyod nako malimtan ang “Triumphant Kingdom” nga asembliya sa Paris niadtong 1955. Didto nako nakaila ang akong naasawa, si Irène Kolanski, nga nauna nakog usa ka tuig sa pagpayunir. Ang iyang Polako nga mga ginikanan maoy masiboton ug dugay nang mga Saksi. Sila nasangyawan sa  France ni Adolf Weber, kanhing hardinero ni Brader Russell nga miadto sa Europe aron sa pagsangyaw sa maayong balita. Kami ni Irène naminyo sa 1956, ug siya miuban nako sa sirkitong buluhaton. Dalayegon kaayo ang iyang pagpaluyo kanako sulod sa daghang katuigan!

Paglabay lag duha ka tuig, ako natudlo nga magtatan-aw sa distrito. Apan kay kulang man ug kuwalipikadong mga brader, padayon kong nagduaw sa pipila ka kongregasyon ingong magtatan-aw sa sirkito. Puliki kaayo kadto nga panahon! Gawas sa pagkuhag 100 ka oras kada bulan, duna koy mga pakigpulong kada semana, tulo ka panagtuon sa libro nga duawon, mga rekord nga susihon, ug mga report nga andamon. May panahon pa kaha ko sa pagbasa sa Bibliya? Nakakita kog solusyon—akong gigunting ang pipila ka panid sa daang Bibliya ug gidaladala kini. Sa dihang magpaabot ko sa akong kasabot, akong basahon ang pipila niini. Kadto nakapalig-on sa akong determinasyon nga magpadayon sa akong asaynment.

Sa 1967, kami ni Irène gidapit sa Bethel sa Boulogne-Billancourt. Ako naasayn sa Service Department, ug kapig 40 ka tuig akong nag-alagad diha niana. Ang ganahan nako sa akong trabaho mao ang pagtubag sa mga sulat sa mga pangutana bahin sa Bibliya. Malipay kaayo ko sa pagsusi sa Pulong sa Diyos ug sa “pagdepensa . . . sa maayong balita”! (Filip. 1:7) Malipay sab ko sa pagdumala sa inadlawng teksto sa dili pa mamahaw. Sa 1976, ako gitudlo ingong membro sa Komite sa Sanga sa France.

Ang Labing Maayong Pagkinabuhi

Bisag nakasinati kog daghang kalisdanan kaniadto, karon ang labing lisod kay tigulang ug masakiton na mi ni Irène. Bisan pa niana, ang pagbasa ug pagtuon sa Bibliya nga magkauban nagpalig-on sa among paglaom. Ganahan ming mosakayg bus paingon sa among teritoryo aron ipaambit ang among paglaom sa uban. Ang among kapig 120 ka tuig diha sa bug-os panahong pag-alagad nagtukmod namo sa pagrekomendar niini nga karera sa tanang nagtinguhag malipayon ug mapuslanong kinabuhi. Sa pagsulat ni Haring David sa Salmo 37:25, siya ‘tigulang na,’ apan sama niya, ako ‘wala makakita ug matarong nga gibiyaan sa bug-os.’

Sa tibuok nakong kinabuhi, si Jehova nagpalig-on nako pinaagi sa iyang Pulong. Ang akong mga paryente miingon kapig 60 ka tuig kanhi nga kon masugdan nakog basa ang Bibliya, dili na nako ni maundangan. Husto sila. Nahimo ko kining batasan sa adlaw-adlaw ug wala gyod ko magmahay!

[Mga footnote]

[Hulagway sa panid 5]

Si Simon ug ako

[Hulagway sa panid 5]

Pareho sa akong unang Bibliya

[Hulagway sa panid 5]

Dihang nag-alagad ingong magtatan-aw sa distrito

[Hulagway sa panid 6]

Sa among kasal

[Hulagway sa panid 6]

Kami ni Irène malipay nga magbasa ug magtuon sa Bibliya