Sundoga si Pinehas Dihang Makaatubang Kag Pagsulay

DAKONG pribilehiyo ang pag-alagad ingong ansiyano. Apan sumala sa Bibliya, ang mga ansiyano makaatubag mga pagsulay. Usahay, sila mohusay ug mga kaso sa daotang buhat diin sila ang ‘magahukom alang kang Jehova.’ (2 Cron. 19:6) O ang usa ka ansiyano makadawat ug asaynment nga mobati siyang dili takos niana, sama kang Moises, kinsa mapaubsanong nangutana: “Kinsa ba ako aron ako moadto kang Paraon?”—Ex. 3:11.

Ang Kasulatan, nga gisulat ubos sa paggiya sa samang aktibong puwersa nga nagtudlo sa mga ansiyano, naghisgot ug sulondang mga magtatan-aw nga malamposong nakasagubang ug mga pagsulay. Si Pinehas maoy anak ni Eleasar ug apo ni Aaron ug busa nahilinya sa pagkahimong hataas nga saserdote. Ang tulo ka panghitabo sa iyang kinabuhi nagpasiugda nga kinahanglang atubangon sa mga ansiyano karon ang mga pagsulay uban ang kaisog, hait nga salabotan, ug pagsalig kang Jehova.

“Siya Dihadiha Mitindog”

Si Pinehas batan-on pa sa nagkampo ang mga Israelinhon sa Kapatagan sa Moab. Ang Bibliya nagtaho: “Ang katawhan misugod sa pagpakighilawas uban sa mga anak nga babaye sa Moab. . . . Ug ang katawhan nangaon, ug nangyukbo sa ilang mga diyos.” (Num. 25:1, 2) Gilaglag ni Jehova ang mga mamumuhat ug daotan pinaagig hampak. Unsa kahay gibati ni Pinehas sa nadungog niya ang taho bahin sa daotang buhat ug sa hampak nga nahitabo?

Ang asoy nagpadayon: “Tan-awa! usa ka lalaki, usa sa mga anak sa Israel, miabot ug siya nagdala sa duol sa iyang mga igsoong lalaki ug usa ka babayeng Midianhon atubangan sa mga mata ni Moises ug atubangan sa mga mata sa tibuok katigoman sa mga anak sa Israel, samtang sila nanghilak didto sa ganghaan sa tolda nga tagboanan.” (Num. 25:6) Unsay buhaton sa saserdoteng si Pinehas? Siya batan-on pa, ug ang makasasala usa ka pangulo nga nanguna sa katawhan sa pagsimba.—Num. 25:14.

Si Pinehas nahadlok kang Jehova, dili sa mga tawo. Pagkakita niya sa duha, siya mikuha dayog bangkaw ug misulod sa tolda ug giduslak sila. Unsay hunahuna ni Jehova sa kaisog ug determinasyon ni Pinehas? Dihadiha gihunong ni Jehova ang hampak ug gigantihan siyag pakigsaad nga ang pagkasaserdote magpabilin sa iyang banay “hangtod sa panahong walay tino.”—Num. 25:7-13.

Siyempre, ang mga ansiyano karon dili magmapintason. Apan sama kang Pinehas, sila angayng magmadeterminado ug magmaisogon. Pananglitan, si Guilherme bag-o pang naansiyano dihang gipaapil sa hudisyal nga komite. Ang kaso naglangkit sa usa ka ansiyano nga nagtabang niya sa batan-on pa siya. “Nalisdan ko,” siya miingon. “Dili kaayo  ko makatulog magabii. Naghunahuna kog mga paagi nga makahukom sumala sa sukdanan ni Jehova ug dili madaog sa akong emosyon. Daghang adlaw kong nag-ampo ug nanukiduki sa mga publikasyon sa Bibliya.” Kini nakatabang kaniya nga makabatog kaisog sa paghusay niining linaing kaso ug matabangan sa espirituwal ang nakasalang igsoon.—1 Tim. 4:11, 12.

Kon ang mga ansiyano magmaisogon ug magmadeterminado sa dihang kana gikinahanglan, sila mahimong panig-ingnan sa pagtuo ug pagkamaunongon. Siyempre, ang ubang Kristohanon kinahanglan usab nga magmaisogon, nga itaho ang daotang buhat nga ila tingaling nasayran. Sa susama, gikinahanglan ang pagkamaunongon aron dili na makig-uban sa napalagpot nga higala o paryente.—1 Cor. 5:11-13.

Ang Hait nga Salabotan Nakapugong sa Katalagman

Ang pagkamaisogon ni Pinehas maoy dili tungod sa pagkamadalidalion nga sagad sa mga batan-on. Siya nagpakitag hait nga salabotan o milihok nga maalamon sa dihang nakadungog ug laing taho. Ang mga tribo ni Ruben ug Gad ug ang katunga sa tribo ni Manases nagtukod ug halaran duol sa Suba sa Jordan. Nagtuo ang ubang Israelinhon nga alang kadto sa bakak nga pagsimba ug sila nangandam sa pagpakiggubat.—Jos. 22:11, 12.

Unsay reaksiyon ni Pinehas? Siya, uban ang mga pangulo sa Israel, maalamong nakig-estorya sa mga nagtukod sa maong halaran. Gipatin-aw sa giakusahang mga tribo nga alang kadto ‘sa pag-alagad kang Jehova.’ Busa nalikayan ang panaggubat.—Jos. 22:13-34.

Kon ang usa makadungog ug akusasyon o negatibong taho bahin sa isigkamagtutuo, maalamon gayod nga sundogon si Pinehas. Ang hait nga salabotan makapugong kanato sa pagkasuko o pagsultig dili maayo bahin sa atong mga igsoon.—Prov. 19:11.

Sa unsang paagi ang hait nga salabotan makatabang sa mga ansiyano sa pagsundog kang Pinehas? Si Jaime nga napulo ka tuig nang ansiyano miingon, “Sa dihang ang usa ka igsoon moreklamo batok sa lain, ako moampo dayon kang Jehova nga ako walay dapigan ug makahatag ug Kasulatanhong giya. Kas-a may usa ka sister nga mireklamo bahin sa usa ka brader nga may katungdanan sa laing kongregasyon. Sanglit higala ko ang brader, dali ra unta nako siyang sultihan bahin sa reklamo sa sister. Apan akong gihisgotan uban sa sister ang pipila ka prinsipyo sa Bibliya. Siya miuyon nga makig-estorya una sa brader. (Mat. 5:23, 24) Apan wala dayon masulbad ang problema. Busa akong giawhag ang sister nga ipadapat ang ubang prinsipyo sa Bibliya. Siya nag-ampo pag-usab bahin sa problema ug naningkamot sa pagpasaylo.”

 Unsay resulta? Si Jaime nahinumdom, “Pipila ka bulan sa ulahi, giduol ko sa sister. Siya miingon nga nangayog pasaylo ang brader. Gihikay sa brader nga magkauban sila sa pagsangyaw ug gidayeg niya ang sister. Nag-uli ang ilang maayong kabubut-on. Masulbad kaha ang problema kon may gidapigan pa ko?” Ang Bibliya nagtambag: “Ayaw pagdalidali sa pagpasaka ug legal nga kaso.” (Prov. 25:8) Ang mga ansiyano nga may hait nga salabotan magdasig sa nagkabingkil nga mga igsoon sa pagpadapat sa mga prinsipyo sa Bibliya aron motunhay ang kalinaw.

Siya Mikonsulta Kang Jehova

Si Pinehas nag-alagad ingong saserdote sa piniling katawhan sa Diyos. Sa nahisgotan na, siya may talagsaong kaisog ug hait nga salabotan bisag batan-on pa. Apan ang iyang kalamposan sa pagsagubang sa mga pagsulay nagdepende sa iyang pagsalig kang Jehova.

Human nga ang puyopuyo sa usa ka Levihanon gilugos ug gipatay sa mga lalaki sa Gibea, sa tribo ni Benjamin, ang ubang tribo nangandam sa pagpakiggubat kanila. (Maghu. 20:1-11) Sila miampo alang sa tabang ni Jehova una makiggubat, apan kaduha sila napildi ug daghan ang namatay. (Maghu. 20:14-25) Sila ba makaingon nga wala dungga ang ilang mga pag-ampo? Gusto ba gayod ni Jehova nga ilang tul-iron ang sayop nga buhat?

Si Pinehas, nga karon hataas na nga saserdote, nagpakita na usab sa iyang lig-ong pagsalig. Siya miampo: “Mogula pa ba ako pag-usab sa pagpakiggubat batok sa mga anak ni Benjamin nga akong igsoon o mohunong na?” Ingong tubag, gitugyan ni Jehova kanila ang tribo ni Benjamin ug gisunog ang Gibea.—Maghu. 20:27-48.

Unsay leksiyon niini? Ang ubang problema sa kongregasyon magpadayon bisan pa sa paningkamot sa mga ansiyano ug sa pag-ampo alang sa tabang sa Diyos. Kon mahitabo kini, maayong hinumdoman nila ang mga pulong ni Jesus: “Padayon sa pagpangayo [o pag-ampo], ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo.” (Luc. 11:9) Bisag daw wala dayon tubaga ang pag-ampo, ang mga ansiyano makasalig nga si Jehova motubag sa iyang gitakdang panahon.

Pananglitan, ang usa ka kongregasyon sa Ireland nanginahanglan pag-ayo ug Kingdom Hall apan wala aprobahi sa local planning officer ang tanang plano sa lugar nga gusto nilang tukoran. Ang laing makaaprobar lang niana mao ang chief planning officer sa tibuok rehiyon. Makatabang ba ang pag-ampo, sama sa adlaw ni Pinehas?

Usa ka ansiyano didto miasoy: “Human sa daghang pag-ampo ug pangaliyupo, miadto mi sa main planning office. Giingnan ko nga basig pipila pa ka semana una namo maatubang ang chief officer. Apan amo dayon siyang naestorya sulod sa lima ka minutos. Pagkakita niya sa bag-ong plano, iya dayon kining giaprobahan, ug sukad niadto gitabangan na mi sa local planning officer. Tungod niini nga kasinatian, mas napamatud-an namo ang gahom sa pag-ampo.” Oo, si Jehova motubag sa tim-os nga pag-ampo sa mga ansiyano nga nagasalig kaniya.

Bug-at ang responsabilidad ni Pinehas sa karaang Israel; apan uban ang kaisog, hait nga salabotan, ug pagsalig sa Diyos, siya milampos bisan pa sa mga pagsulay. Giuyonan ni Jehova ang iyang makugihong pag-atiman sa kongregasyon sa Diyos. Mga 1,000 ka tuig sa ulahi, si Esdras misulat: “Si Pinehas nga anak nga lalaki ni Eleasar mao ang pangulo ibabaw nila sa miaging panahon. Si Jehova nag-uban kaniya.” (1 Cron. 9:20) Hinaot nga tinuod usab kini sa tanang nagapanguna sa katawhan sa Diyos karon ug sa tanang maunongong Kristohanon.