Hupaya ang Tanang Nagmagul-anon
Hupaya ang Tanang Nagmagul-anon
“Si Jehova nagdihog kanako . . . sa paghupay sa tanang nagbangotan [o nagmagul-anon].”—ISA. 61:1, 2.
1. Unsay gihimo ni Jesus alang sa mga magul-anon, ug ngano?
SI Jesu-Kristo miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Sa pagtuman niini, gipasundayag ni Jesus ang samang gugma nga gipakita ni Jehova alang sa katawhan. (1 Juan 4:7-10) Gihisgotan ni apostol Pablo ang usa ka paagi diin si Jehova nagpakita niana nga gugma sa dihang iyang gitawag Siya nga “Diyos sa tanang paghupay.” (2 Cor. 1:3) Si Jesus nagpasundayag niana nga gugma sa dihang gituman niya ang gitagna ni Isaias. (Basaha ang Isaias 61:1, 2.) Gibasa ni Jesus ang maong tagna didto sa sinagoga sa Nasaret ug gipadapat kini sa iyang kaugalingon. (Luc. 4:16-21) Sa iyang ministeryo, si Jesus mahigugmaong naghupay sa mga magul-anon, nga nakahatag kanilag kadasig ug kalinaw sa hunahuna.
2, 3. Nganong ang mga sumusunod ni Kristo angayng mosundog kaniya sa paghupay sa uban?
2 Ang tanang sumusunod ni Jesus angay nga mosundog kaniya sa paghupay sa mga magul-anon. (1 Cor. 11:1) Si Pablo miingon: “Magpadayon sa paghupay sa usag usa ug sa paglinig-onay sa usag usa.” (1 Tes. 5:11) Ang mga tawo nagkinahanglag paghupay kay kita nagkinabuhi niining “makuyaw nga mga panahong lisod sagubangon.” (2 Tim. 3:1) Nagkadaghan ang maayong mga tawo sa tibuok kalibotan nga naguol ug nasakitan tungod sa gisulti ug gibuhat sa uban.
3 Sumala sa gitagna sa Bibliya, niining kataposang mga adlaw, daghan ang “magmahigugmaon sa ilang kaugalingon, magmahigugmaon sa salapi, mapagawalon, mapahitas-on, mapasipalahon, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig ulo, nangburot sa garbo, mga mahigugmaon sa kalipayan inay nga mga mahigugmaon sa Diyos.” Ang maong mga kinaiya mas grabe karon kay ang ‘mga tawong daotan ug mga impostor misamot pa kangil-ad.’—2 Tim. 3:2-4, 13.
4. Unsay kahimtang sa kalibotan karon?
4 Dili kita angayng matingala niini kay ang Bibliya nag-ingon nga “ang tibuok kalibotan nailalom sa gahom sa usa nga daotan.” (1 Juan 5:19) “Ang tibuok kalibotan” naglakip sa politika, relihiyon, komersiyo, ug media. Busa si Satanas nga Yawa haom nga gitawag “ang magmamando niining kalibotana” ug “ang diyos niini nga sistema sa mga butang.” (Juan 14:30; 2 Cor. 4:4) Ang kahimtang sa kalibotan karon nagkagrabe kay si Satanas suko kaayo, nga nahibalo nga mubo na lang ang iyang panahon. (Pin. 12:12) Makapahupay gayod ang pagkahibalo nga hapit nang laglagon sa Diyos si Satanas ug ang iyang daotang sistema, ug ang isyu bahin sa pagkasoberano ni Jehova mahusay na!—Gen., kap. 3; Job, kap. 2.
Ang Maayong Balita Ginawali sa Tibuok Yuta
5. Sa unsang paagi natuman karon ang tagna bahin sa pagsangyaw?
5 Niining malisod nga panahon, ang gitagna ni Jesus natuman. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mat. 24:14) Kining tibuok kalibotang buluhaton padayong nag-uswag. Karon, kapig 7,500,000 ka Saksi ni Jehova diha sa kapig 107,000 ka kongregasyon ang nagsangyaw bahin sa Gingharian sa Diyos, sama sa gihimo ni Jesus. (Mat. 4:17) Ingong resulta, daghang nagmagul-anon ang nahupayan. Gani sa miaging duha ka tuig, 570,601 ang nabawtismohan ingong mga Saksi ni Jehova!
6. Unsay imong ikasulti bahin sa pag-uswag sa buluhatong pagsangyaw?
6 Ang mga Saksi ni Jehova karon naghubad ug nanagtag ug mga literatura sa Bibliya sa kapig 500 ka pinulongan. Kini wala pa sukad mahitabo sa kasaysayan! Bisan pag anaa sa kalibotan nga kontrolado ni Satanas, ang katawhan ni Jehova padayong nag-uswag. Dili kini mahitabo kon wala pa ang tabang ug giya sa balaang espiritu sa Diyos. Tungod sa pagwali sa maayong balita sa tibuok yuta, ang mga tawo nga midawat sa mensahe sa Gingharian nahupayan usab sama sa katawhan ni Jehova.
Paghupay sa mga Isigkamagsisimba
7. (a) Nganong dili nato dahomon nga wagtangon ni Jehova ang tanang hinungdan sa kagul-anan karon? (b) Giunsa nato pagkahibalo nga kita makalahutay sa paglutos ug kasakitan?
7 Sa kalibotan nga punog pagkadaotan ug pag-antos, kita makasinati gayod ug kagul-anan. Wagtangon lang sa Diyos ang tanang hinungdan sa kagul-anan karon sa dihang laglagon na niya kining sistemaha. Sa kasamtangan, ang mga paglutos magsulay sa atong pagkamaunongon kang Jehova ug sa iyang soberanya. (2 Tim. 3:12) Apan pinaagi sa tabang ug paghupay gikan sa atong langitnong Amahan, kita mahisama sa dinihogang mga Kristohanon sa karaang Tesalonica kinsa nakaantos sa mga paglutos ug kasakitan pinaagi sa pagtuo ug pagkamalahutayon.—Basaha ang 2 Tesalonica 1:3-5.
8. Unsay mga pamatuod sa Bibliya nga si Jehova naghupay sa iyang mga alagad?
8 Si Jehova maghupay gayod sa iyang mga alagad. Pananglitan, dihang gustong patyon ni Rayna Jezebel si propeta Elias, siya nahadlok ug mikalagiw. Siya miingon pa gani nga maayo pag mamatay na lang. Apan imbes sawayon si Elias, gihupay siya ni Jehova ug gidasig sa pagpadayon sa iyang buluhaton ingong propeta. (1 Hari 19:1-21) Ang laing pananglitan nga si Jehova naghupay sa iyang katawhan makita sa kasinatian sa Kristohanong kongregasyon sa unang siglo. Ang Bibliya nag-ingon nga “ang kongregasyon sa tibuok nga Judea ug Galilea ug Samaria nakabaton ug yugto sa kalinaw, nga napalig-on.” Dugang pa, “samtang kini naglakaw diha sa kahadlok kang Jehova ug diha sa paghupay sa balaang espiritu kini padayong midaghan.” (Buh. 9:31) Pagkamapasalamaton nato nga kita usab mahupay sa balaang espiritu!
9. Nganong makapahupay ang pagkakat-on bahin kang Jesus?
9 Ingong mga Kristohanon, kita nahupayan pinaagi sa pagkakat-on bahin kang Jesu-Kristo ug sa pagsunod kaniya. Si Jesus miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.” (Mat. 11:28-30) Ang pagkakat-on sa mahigugmaong pagtratar ni Jesus sa mga tawo ug ang pagsundog niana makatabang gayod sa paghupay sa atong kaguol.
10, 11. Kinsa diha sa kongregasyon ang makahatag ug kahupayan?
10 Kita usab mahupayan sa mga isigka-Kristohanon. Pananglitan, tagda kon sa unsang paagi matabangan sa mga ansiyano kadtong naluya sa pagtuo. Si Santiago misulat: “Aduna bay masakiton [sa espirituwal] kaninyo? Magpatawag siyag mga ansiyano sa kongregasyon, ug paampoa sila alang kaniya.” Unsay resulta? “Ang pag-ampo sa pagtuo mag-ayo sa usa nga naluya, ug si Jehova magbangon kaniya. Dugang pa, kon siya nakasala, siya pagapasayloon.” (Sant. 5:14, 15) Apan dili lang mga ansiyano ang makahatag ug kahupayan.
11 Ang mga babaye sagad mas daling makasulti sa ilang problema ngadto sa isigkababaye. Ang edaran ug mas eksperyensiyadong mga sister ilabinang makahatag ug maayong tambag sa batabata pang mga sister. Lagmit naagian na niining hamtong nga mga sister ang susamang mga kahimtang. Ang ilang pagsabot ug kahingawa dakog ikatabang. (Basaha ang Tito 2:3-5.) Siyempre, ang mga ansiyano ug ang uban makahupay ug angayng mohupay sa mga nagmagul-anon. (1 Tes. 5:14, 15) Ug maayong hinumdoman nga ang Diyos ‘nagahupay kanato sa tanan natong kasakitan, aron kita makahupay kanila nga anaa sa bisan unsang matang sa kasakitan.’—2 Cor. 1:4.
12. Nganong importante ang pagtambong sa mga tigom?
12 Ang usa ka importanteng paagi nga kita mahupayan mao ang pagtambong sa mga tigom, diin kita madasig sa mga panaghisgot sa Bibliya. Atong mabasa nga si Judas ug Silas “nagdasig sa mga igsoon pinaagi sa daghang pakigpulong ug nagpalig-on kanila.” (Buh. 15:32) Sa dili pa magsugod ang tigom ug pagkahuman niana, adunay makapalig-ong panag-estoryahay sa mga igsoon. Busa bisag duna kitay problema, dili kita magpalain kay dili kana makatabang. (Prov. 18:1) Hinunoa, atong sundon ang tambag ni apostol Pablo: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita ninyo nga ang adlaw nagkaduol na.”—Heb. 10:24, 25.
Kahupayan Gikan sa Bibliya
13, 14. Sa unsang mga paagi ang Kasulatan makahupay kanato?
13 Kita man bawtismado o nagtuon pa lang bahin sa Diyos ug sa iyang mga katuyoan, kita makabatog dakong kahupayan gikan sa Bibliya. Si Pablo misulat: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Ang Bibliya makahupay ug ‘bug-os nga magsangkap kanato alang sa tanang maayong buhat.’ (2 Tim. 3:16, 17) Ang pagkahibalo sa kamatuoran bahin sa katuyoan sa Diyos ug ang pagbatog tinuod nga paglaom sa umaabot makapahupay gayod. Busa ato gayong basahon ug tun-an ang Bibliya ug ang atong mga publikasyon aron kita mahupayan ug makabenepisyo niana.
14 Si Jesus maayong panig-ingnan sa paggamit sa Kasulatan sa pagtudlo ug paghupay sa uban. Human mabanhaw, si Jesus nagpakita sa duha niya ka tinun-an. Iyang gipatin-aw kanila ang Kasulatan ug kini nakahupay kanila. (Luc. 24:32) Agig pagsundog kang Jesus, si apostol Pablo ‘nangatarongan gikan sa Kasulatan.’ Sa Berea, ang iyang mamiminaw ‘midawat sa pulong uban ang tumang kaikag sa hunahuna, nga sa adlaw-adlaw maampingong nagasusi sa Kasulatan.’ (Buh. 17:2, 10, 11) Busa importante nga atong basahon ang Bibliya kada adlaw ug ang atong mga publikasyon aron kita makabenepisyo niana. Kini makahatag kanatog kahupayan ug paglaom niining gubot nga panahon.
Dugang Paagi sa Paghupay sa Uban
15, 16. Unsay atong mahimo sa pagtabang ug paghupay sa atong mga igsoon?
15 Adunay daghang paagi nga kita makatabang ug makahupay sa atong mga igsoon. Pananglitan, mahimong kita ang mamalit alang sa tigulang ug masakitong isigkamagtutuo o tabangan nato ang uban sa ilang buluhaton sa balay. Kini maoy pagpakitag personal nga interes kanila. (Filip. 2:4) Mahimo usab natong dayegon ang maayong mga hiyas sa atong mga igsoon, sama sa ilang gugma, kaisog, ug pagtuo.
16 Ang usa ka paagi nga atong mahupay ang mga tigulang mao ang pagduaw kanila ug pagpamati sa ilang mga kasinatian ug panalangin sa pag-alagad kang Jehova. Basin kita pa gani ang ilang madasig ug mahupay! Mahimong basahan nato sila sa Bibliya o sa uban natong publikasyon. Tingali atong tun-an uban nila ang artikulo sa Bantayanang Torre o ang kobrehan sa Pagtuon sa Kongregasyon sa Bibliya nianang semanaha. Mahimong ubanan nato sila sa pagtan-aw sa usa sa atong mga DVD. Makabasa o makaasoy usab kitag makapadasig nga kasinatian gikan sa atong mga publikasyon.
17, 18. Nganong makaseguro kita nga si Jehova mohupay ug motabang gayod sa iyang maunongong mga alagad?
17 Kon may igsoon nga nagkinahanglag paghupay, mahimo nato siyang ilakip sa atong mga pag-ampo. (Roma 15:30; Col. 4:12) Samtang kita nag-atubang ug mga problema ug naningkamot sa paghupay sa uban, atong sundogon ang pagtuo ni David kinsa miawit: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.” (Sal. 55:22) Oo, si Jehova mohupay ug motabang gayod sa iyang maunongong mga alagad.
18 Ang Diyos miingon sa iyang mga magsisimba sa karaang panahon: “Ako—ako mao ang Usa nga naghupay kaninyo.” (Isa. 51:12) Buhaton usab kana ni Jehova kanato ug iyang panalanginan ang atong mga paningkamot sa paghupay sa uban. Sa langit man o sa yuta ang atong paglaom, kita mahupayan sa gisulti ni Pablo ngadto sa mga dinihogan sa iyang panahon: “Hinaot nga ang atong Ginoong Jesu-Kristo ug ang Diyos nga atong Amahan, nga nahigugma kanato ug naghatag ug walay kataposang paghupay ug maayong paglaom pinaagi sa dili-takos nga kalulot, maghupay sa inyong mga kasingkasing ug magpalig-on kaninyo diha sa tanang maayong buhat ug pulong.”—2 Tes. 2:16, 17.
Nahinumdom Ka Ba?
• Unsa ka kaylap ang atong buluhaton sa paghupay sa mga magul-anon?
• Unsay atong mahimo sa paghupay sa uban?
• Giunsa pagpakita sa Bibliya nga si Jehova naghupay sa iyang katawhan?
[Mga Pangutana sa Pagtuon]
[Hulagway sa panid 28]
Nakigbahin ka ba sa paghupay sa uban?
[Hulagway sa panid 30]
Batan-on man o tigulang, kita makahatag ug pagdasig
