Kalipay Ko ang Pag-alagad Kang Jehova

Sumala sa giasoy ni Fred Rusk

Bata pa lang ko, nasinati na nako ang giingon ni David sa Salmo 27:10: “Kon ugaling biyaan ako sa akong amahan ug sa akong inahan, si Jehova mismo magsagop kanako.” Paasoya ko kon sa unsang paagi natinuod kini.

NAGDAKO ko sa umahan sa gapas sa akong lolo sa Georgia, U.S.A., panahon sa Great Depression sa katuigang 1930. Si Papa naguol kaayo sa pagkamatay ni Mama ug sa akong igsoon nga bag-ong nahimugso mao nga iya kong gibilin sa akong biyudong lolo ug miadto sa layong siyudad aron manarbaho. Sa ulahi, nangita siyag paagi aron mag-uban mig puyo, apan wala kana molampos.

Ang akong mga iyaan maoy nagdumala sa panimalay ni Lolo. Siya dili relihiyoso, apan ang akong mga iyaan debotadong mga Southern Baptist. Kay gihadlok nga latigohon, mapugos ko sa pagsimba ma-Dominggo. Busa sukad sa akong pagkabata, wala koy hilig sa relihiyon. Hinuon, ganahan kong moeskuyla ug moapil sa esports.

Ang Pagduaw nga Nakausab sa Akong Kinabuhi

Usa ka hapon niana sa 1941, sa nag-edad kog 15, usa ka tigulang uban sa iyang asawa ang miduaw sa among balay. Siya diay si Tiyo Talmadge Rusk. Wala ko makadungog sukad bahin niya apan nasayran ko nga sila mga Saksi ni Jehova. Ang iyang gisaysay bahin sa katuyoan sa Diyos nga ang mga tawo magpuyo sa yuta sa walay kataposan lahi kaayo sa akong nadunggan sa simbahan. Kadaghanan sa among pamilya wala motuo ug mibiaybiay pa gani sa ilang gisulti. Wala na gyod sila pabalika sa balay. Pero si Tiya Mary, nga magulang nakog tulo ka tuig, midawat ug Bibliya ug mga publikasyon nga nagpatin-aw niini.

Si Tiya Mary nakombinsir dayon nga nakaplagan niya ang kamatuoran ug nabawtismohan sa 1942. Nasinati usab niya ang gitagna ni Jesus: “Ang mga kaaway sa usa ka tawo mao unya ang mga tawo sa iyang kaugalingong panimalay.” (Mat. 10:34-36) Gilutos siya pag-ayo sa pamilya. Ang usa niya ka magulang nga babaye, nga impluwensiyado sa among lugar, nakigkunsabo sa mayor ug gipadakop si Tiyo Talmadge. Siya gisumbong nga namaligya nga walay lisensiya ug gibilanggo.

Ang lokal nga mantalaan nagtaho nga ang mayor, nga mao usab ang huwes, miingon sa korte: ‘Ang mga basahon nga gipanagtag niining tawhana peligroso samag hilo.’ Si Tiyo  miapelar ug nakadaog sa kaso, apan napulo ka adlaw na siyang nabilanggo.

Gitabangan Ko ni Tiya Mary

Gisangyawan ko ni Tiya Mary sa iyang bag-ong tinuohan ug ang among mga silingan usab. Ako siyang gikuyogan sa Bible study niya nga lalaki kinsa midawat sa librong The New World. * Ang asawa miingon nga tibuok gabiing gibasa sa iyang bana ang libro. Bisag dili ko interesadog relihiyon, nakaangay ko sa akong nakat-onan. Apan ang mga pagtulon-an sa Bibliya dili ang unang nakakombinsir nako nga ang mga Saksi mao ang katawhan sa Diyos, kondili ang pagtratar kanila sa uban.

Pananglitan, usa ka adlaw niana sa among pag-uli gikan sa pagpangguna sa kamatisan, nakita namo ni Tiya Mary nga nagsiga ang daoban. Gisunog diay sa uban nakong iyaan ang iyang literatura, apil ang ponograpo ug mga plaka nga may mensahe sa Bibliya. Hilabihan nakong sukoa apan gibadlong ko sa usa nako ka iyaan, “Magpasalamat ra unya ka namo sa among gihimo.”

Si Tiya Mary napugos sa pagbiya sa balay niadtong 1943 kay dili niya gustong isalikway ang iyang bag-ong tinuohan ug mohunong sa pagsangyaw. Niadtong panahona, nalipay ko kay nahibaloan nako nga ang Diyos may ngalan, si Jehova, ug nga siya mahigugmaon, maluluy-on, ug dili magsunog sa mga tawo sa impiyerno. Nasayran sab nako nga si Jehova dunay mahigugmaong organisasyon, bisag wala pa ko makatambong ug tigom.

Sa ulahi, samtang nanghabas kog sagbot sa tugkaran, may awto nga miabot ug ang usa sa duha ka lalaki nga nagsakay nangutana kon ako ba si Fred. Sa nasayran nako nga sila mga Saksi, ako miingon, “Pasakya ko, adto ta mag-estorya sa laing dapit.” Gihangyo diay sila ni Tiya Mary sa pagduaw nako. Usa kanila mao si Shield Toutjian, usa ka nagapanawng ministro kinsa nagdasig ug naggiya nako sa panahong gikinahanglan ko kana. Ako na karon ang gisupak sa pamilya tungod sa pagdepensa sa tinuohan sa mga Saksi.

Si Tiya Mary, nga mibalhin na sa Virginia, misulat nako nga mahimo kong moipon niya kon gusto gyod kong moalagad kang Jehova. Midesidir dayon kong moadto. Usa niana ka Biyernes sa gabii sa Oktubre 1943, akong gisulod ug karton ang pipila nako ka gamit ug gihigot kana sa usa ka kahoy nga layo sa balay. Pagka-Sabado, gikuha ko ang karton, milipot sa balay sa silingan, ug misakay paingon sa lungsod. Mibiyahe ko paingon sa siyudad sa  Roanoke, diin akong natultolan si Tiya Mary sa balay ni Edna Fowlkes.

Pag-uswag sa Espirituwal, Bawtismo, ug Bethel

Si Edna maoy mabinationg dinihogang Saksi—usa ka modernong-adlaw nga Lydia. Siya nag-abang ug dakong balay ug gipapuyo didto si Tiya Mary, ang asawa sa magulang ni Edna, ug ang duha ka anak niini nga si Gladys ug Grace Gregory, kinsa nahimong mga misyonarya sa ulahi. Si Gladys, nga kapin nag 90 anyos karon, matinumanon gihapong nag-alagad sa sangang buhatan sa Japan.

Samtang nagpuyo sa balay ni Edna, ako tigtambongan sa tigom ug gibansay sa pagsangyaw. Kay wala nay mibabag sa akong pagtuon sa Bibliya ug pagtambong sa tigom, ako miuswag sa kamatuoran ug nabawtismohan sa Hunyo 14, 1944. Si Tiya Mary ug ang magsoong Gregory nagpayunir ug naasayn sa amihanang Virginia. Sila nakatabang sa pagtukod ug kongregasyon sa Leesburg. Sayo sa 1946, ako nagpayunir sa dapit nga duol nila. Sa ting-init nianang tuiga, kami mitambong sa halandomong internasyonal nga kombensiyon sa Cleveland, Ohio, sa Agosto 4-11.

Sa maong kombensiyon, gipahibalo ni Nathan Knorr, nga maoy nanguna sa organisasyon, ang plano nga padak-an ang Bethel sa Brooklyn. Kini naglakip sa pagtukod ug bag-ong mga bilding nga puy-anan ug imprentahan. Daghang batan-ong lalaki ang gikinahanglan. Midesisyon ko nga didto moalagad kang Jehova. Busa miaplay ko, ug paglabayg pipila ka bulan, gitawag ko sa Bethel niadtong Disyembre 1, 1946.

Mga usa ka tuig sa ulahi, ang magtatan-aw sa printery nga si Max Larson miadto sa akong opisina sa Mailing Department. Iya kong gipahibalo nga ibalhin ko sa Service Department. Daghan kog nakat-onan dinhi bahin sa pagpadapat sa mga prinsipyo sa Bibliya ug sa organisasyonal nga kalihokan, ilabina samtang nagtrabaho uban ni T. J. (Bud) Sullivan, ang magtatan-aw sa departamento.

Kadaghan ko giduaw ni Papa sa Bethel. Siya nahimong relihiyoso sa natigulang na. Sa kataposan niyang pagduaw sa 1965, siya miingon, “Dili na ko moduaw nimo dinhi pag-usab. Ikaw na lay duaw nako.” Giduaw nako siyag pipila ka higayon sa wala pa siya mamatay. Siya nagtuo gayod nga mahilangit. Apan naglaom ko nga siya banhawon ni Jehova, dili sa dapit nga iyang gihunahuna, kondili dinhi sa yuta uban ang paglaom nga mabuhing walay kataposan sa Paraiso.

 Ubang Halandomong Kombensiyon ug Konstruksiyon

Ang mga kombensiyon maoy hinungdanong okasyon alang sa espirituwal nga pag-uswag, sama sa internasyonal nga mga asembliya sa Yankee Stadium sa New York sa katuigang 1950. Sa usa ka sesyon sa Yankee Stadium ug Polo Grounds sa 1958, dihay mitambong nga 253,922 gikan sa 123 ka nasod. May usa ka hitabo niadto nga dili gyod nako malimtan. Samtang nagtabang ko sa opisina sa kombensiyon, si Brader Knorr miduol nako nga nagdali. Siya miingon, “Fred, nakalimot kog asayn sa mopakigpulong sa mga payunir, ug tua na sila sa giabangang pasilidad sa duol. Pwede bang ikay moadto? Paghunahuna rag nindot nga ulohan nga ipakigpulong samtang magpaingon ka didto.” Pwerte nakong ampo samtang nagdalidali sa pagpaingon didto.

Sa nagdaghan ang mga kongregasyon sa New York City sa katuigang 1950 ug 1960, dili na igo ang giabangang mga pasilidad ingong mga Kingdom Hall. Busa gikan sa 1970 hangtod sa 1990, tulo ka bilding sa Manhattan ang gipalit ug giremodel aron himoong tigomanan. Ako ang tsirman sa mga komite sa pagtukod sa maong mga proyekto. Daghan kog nindot nga kasinatian kon giunsa pagpanalangin ni Jehova ang mga kongregasyon nga nagtinabangay sa pag-amot ug paghuman sa maong mga bilding nga padayong gigamit alang sa matuod nga pagsimba.

Mga Kausaban sa Kinabuhi

Usa ka adlaw niana sa 1957, samtang naglakaw ko sa parke tali sa Bethel Home ug sa printery, mibundak ang ulan. Dihay naglakaw nga maanyag ug bulagawg-buhok nga bag-ong Bethelite. Wala siyay payong mao nga ako siyang gipayongan. Dinhi mi nagkaila ni Marjorie, ug sukad sa among kasal sa 1960, kami malipayong nag-alagad kang Jehova. Niadtong Septiyembre 2010, among gisaulog ang ika-50 nga anibersaryo sa among kasal.

Mao pay among pag-abot gikan sa honeymoon sa dihang gisultihan ko ni Brader Knorr nga giasayn ko nga instruktor sa Gilead School. Pagkatalagsaong pribilehiyo kadto! Gikan sa 1961 hangtod sa 1965, gipahigayon ang lima ka mas taas nga klase ilabina para sa mga membro sa sanga aron bansayon sa pagdumala sa mga sangang buhatan. Sa tinghunlak sa 1965, ang mga klase gibalik sa lima ka bulan, ug kana gisentro na usab sa pagbansayg mga misyonaryo.

Sa 1972, gikan sa Gilead School, gihimo kong magtatan-aw sa Writing Correspondence Department. Ang pagpanukiduki aron  sa pagtubag sa lainlaing pangutana ug pagsulbad sa mga problema nakatabang nako nga mas masabtan ang mga pagtulon-an sa Bibliya ug ang kapadapatan sa mga prinsipyo niini sa pagtabang sa uban.

Dayon sa 1987, giasayn ko sa bag-ong departamento nga gitawag ug Hospital Information Services. Gipahigayon ang mga seminar aron tudloan ang mga ansiyano nga membro sa mga Hospital Liaison Committee kon unsaon pagpakig-estorya ang mga doktor, huwes, ug mga social worker aron ipatin-aw ang atong Kasulatanhong baroganan bahin sa dugo. Ang usa ka dakong problema mao nga ang mga doktor nag-abonog dugo sa mga bata nga walay permiso sa ginikanan, nga sagad mokuhag mando sa korte sa paghimo niana.

Dihang sugyotan ang mga doktor bahin sa mga alternatibo sa pag-abonog dugo, sila sagad moingon nga kini dili mabatonan o mahal kaayo. Kon kanay isulti sa doktor, ako sagad motubag, “Pwede bang motan-aw ko sa imong kamot?” Inigpakita niya niana, ako moingon, “Abi nimo, nabatonan mo ang usa sa labing maayong mga alternatibo sa pag-abonog dugo.” Kini nga pagdayeg magpahinumdom sa doktor nga kon maampingon niyang gamiton ang scalpel, diyutay rang dugo ang mausik.

Sa milabayng 20 ka tuig, gipanalanginan ni Jehova ang paningkamot nga matin-awan ang mga doktor ug huwes. Nausab ang ilang tinamdan sa dihang mas nasabtan nila ang atong baroganan. Ilang nahibaloan nga gipamatud-an sa pagpanukiduki sa medisina nga epektibo ang mga alternatibo sa pag-abonog dugo ug nga daghan nang doktor ug ospital ang moopera nga dili moabonog dugo.

Sukad sa 1996, kami ni Marjorie nag-alagad sa Watchtower Educational Center sa Patterson, New York, mga 110 kilometros amihanan sa Brooklyn. Naasayn ko kadiyot sa Service Department ug may panahon nga nagtudlo ko sa mga membro sa komite sa sanga ug mga nagapanawng magtatan-aw. Sa milabayng 12 ka tuig, ako nag-alagad pag-usab ingong magtatan-aw sa Writing Correspondence, nga gibalhin gikan sa Brooklyn ngadto sa Patterson.

Mga Kalisdanan sa Pagkatigulang

Karon nga 85 anyos na ko, dili na sayon ang pag-atiman sa akong mga trabaho sa Bethel. Ako nakigbisog sa kanser sa kapin nag napulo ka tuig. Sama kang Ezequias, nagtuo ko nga gilugwayan ni Jehova ang akong kinabuhi. (Isa. 38:5) Si Marjorie usab may Alzheimer’s disease. Siya kugihang ministro ni Jehova, magtatambag sa mga batan-on, ug matinumanon ug maunongong kapikas. Siya kugihang motuon sa Bibliya ug maayong motudlo niana, ug daghan mig anak sa espirituwal nga padayong nakigkomunikar namo.

Si Tiya Mary namatay sa Marso 2010, sa edad nga 87. Siya maayong magtutudlo sa Pulong sa Diyos ug gitabangan niya ang uban sa pagbarog sa matuod nga pagsimba. Daghang tuig siyang nagpayunir. Mapasalamaton kaayo ko sa iyang pagtabang nako nga makakat-on sa kamatuoran ug mahimong alagad sa atong mahigugmaong Diyos, si Jehova. Si Tiya Mary gilubong tupad sa iyang bana, kinsa misyonaryo kanhi sa Israel. Segurado ko nga sila anaa sa panumdoman ni Jehova nga nagpaabot sa pagkabanhaw.

Sa kapig 67 ka tuig nga pag-alagad kang Jehova, mapasalamaton ko sa daghang panalangin nga akong nadawat. Kalipay ko gayod ang pagbuhat sa kabubut-on ni Jehova! Tungod sa iyang dili-takos nga kalulot, ako naglaom sa katumanan sa saad sa iyang Anak: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod sa akong ngalan magadawat ug pilo-pilo pa ug makapanunod sa kinabuhing walay kataposan.”—Mat. 19:29.

[Footnote]

[Hulagway sa panid 19]

Sa umahan sa gapas ni Lolo sa Georgia, U.S.A., 1928

[Hulagway sa panid 19]

Si Tiya Mary ug Tiyo Talmadge

[Hulagway sa panid 20]

Si Mary, Gladys, ug Grace

[Hulagway sa panid 20]

Sa akong bawtismo, Hunyo 14, 1944

[Hulagway sa panid 20]

Sa Service Department sa Bethel

[Hulagway sa panid 21]

Uban ni Tiya Mary sa 1958 internasyonal nga kombensiyon sa Yankee Stadium

[Hulagway sa panid 21]

Kasal namo ni Marjorie

[Hulagway sa panid 21]

Kami ni Marjorie, 2008