Mag-uban Kita sa Pagmaya!

NAGAKALISOD ang pagbatog kalipay ug kangaya. Para sa daghan, lisod ang pagsultig positibong mga butang ngadto sa uban. Ang pagkinabuhi ilabina diha sa dagkong siyudad magtukmod sa mga tawo sa pagpalain sa kaugalingon.

Ang propesor sa psychobiology nga si Alberto Oliverio miingon nga daghan ang nagmamingawon karon ug ang pagpuyo sa dagkong siyudad nag-aghat kanila sa pagpalain sa kaugalingon. Tungod niini, sila lagmit dili na magpakabana sa ilang kaopisina, silingan, o sa mga tindera sa supermarket nga ilang ginapalitan. Kini sagad motultol sa depresyon.

Apan lahi ang kahimtang ug tinamdan sa mga Kristohanon. Si apostol Pablo misulat: “Pagmaya sa kanunay.” (1 Tes. 5:16) Daghan kitag rason nga malipay ug magmaya uban sa mga igsoon. Kita nagsimba sa Labing Hataas nga Diyos, si Jehova. Kita nakasabot sa kamatuoran. Kita may paglaom nga maluwas ug  mabuhi sa dayon. Ug kita makatabang sa uban sa pagbaton sa samang mga panalangin.—Sal. 106:4, 5; Jer. 15:16; Roma 12:12.

Ang matuod nga mga Kristohanon magmaya uban sa mga igsoon. Busa dili ikatingala nga si Pablo misulat sa mga taga-Filipos: “Ako nalipay ug nagmaya uban kaninyong tanan. Karon sa samang paagi paglipay ug pagmaya usab kamo uban kanako.” (Filip. 2:17, 18) Niining duha lang ka bersikulo, kaduha hisgoti ni Pablo ang pagkalipay ug pagmaya uban sa usag usa.

Ang mga Kristohanon angayng magbantay nga dili magpalain sa kaugalingon. Ang usa nga magpalain dili makahimo sa pagmaya uban sa mga igsoon. Busa sa unsang paagi nato masunod ang awhag ni Pablo nga “magpadayon sa pagmaya diha sa Ginoo” uban sa atong mga igsoon?—Filip. 3:1.

Pagmaya Uban sa mga Igsoon

Sa dihang si Pablo misulat sa mga taga-Filipos, lagmit siya usa ka binilanggo sa Roma tungod sa iyang pagsangyaw. (Filip. 1:7; 4:22) Apan kana wala makawala sa iyang kadasig sa ministeryo. Hinuon, siya nalipay nga mag-alagad kang Jehova kutob sa iyang maarangan ug ‘ibubo nga samag halad-nga-ilimnon.’ (Filip. 2:17) Ang tinamdan ni Pablo nagpakita nga ang kalipay wala mag-agad sa atong kahimtang. Bisag binilanggo, siya miingon: “Ako usab magpadayon sa pagmaya.”—Filip. 1:18.

Si Pablo ang nagtukod sa kongregasyon sa Filipos ug iyang gimahal pag-ayo ang mga igsoon didto. Siya nahibalo nga ang pagpaambit sa iyang kalipay sa pag-alagad kang Jehova makadasig usab kanila. Busa siya misulat: “Karon buot ko nga inyong mahibaloan, mga igsoon, nga ang akong mga kalihokan misangpot hinuon sa pagpauswag sa maayong balita inay sa kasukwahi, mao nga ang akong mga gapos nahibaloan sa publiko kalangkit kang Kristo taliwala sa tanang Praetorianong Guwardiya ug sa tanang uban pa.” (Filip. 1:12, 13) Ang pagpaambit ni Pablo niining makapadasig nga kasinatian maoy usa ka paagi nga siya nalipay ug nagmaya uban sa mga igsoon. Sa baylo, ang mga taga-Filipos nagmaya uban kaniya. Apan aron magmaya sila, kinahanglang dili sila maluya tungod sa naagoman ni Pablo. Hinunoa, angay nilang sundogon ang iyang panig-ingnan. (Filip. 1:14; 3:17) Mahimo usab nilang iampo kanunay si Pablo ug tabangan siya kutob sa ilang maarangan.—Filip. 1:19; 4:14-16.

 Nagmalipayon ba usab kita sama kang Pablo? Naningkamot ba kitang makita ang positibong mga bahin sa atong kinabuhi ug sa atong ministeryo? Dihang kauban ang mga igsoon, makahisgot kitag maayong mga kasinatian sa pagsangyaw bisag dili kini talagsaon kaayo. Pananglitan, tingali nakapukaw kitag interes sa mensahe sa Gingharian tungod sa atong epektibong introduksiyon o pangatarongan. Lagmit maayo ang atong pagpakig-estorya sa tagbalay bahin sa usa ka teksto sa Bibliya. O kaha nailhan kita sa teritoryo ingong mga Saksi ni Jehova, ug kini maayo nang pamatuod. Ang pagpaambit ug mga kasinatian nga sama niini maoy usa ka paagi nga kita magkauban sa pagmaya.

Daghang alagad ni Jehova ang padayong nagsakripisyo aron iwali ang maayong balita. Ang mga payunir, nagapanawng magtatan-aw, Bethelite, misyonaryo, ug internasyonal nga mga alagad nalipay sa pag-alagad nga bug-os panahon. Kita ba nalipay ug nagmaya uban kanila? Nan, ipakita nato ang atong pagpabili niining minahal nga “mga isigkamagbubuhat sa gingharian sa Diyos.” (Col. 4:11) Ato silang dasigon panahon sa mga tigom o asembliya ug sundogon ang ilang kasibot. Ug mahimong pahimuslan usab nato ang “kahigayonan” sa pagpamati sa ilang kasinatian ug pagdasig pinaagi sa pag-abiabi kanila, tingali sa pagdapit kanila sa pagpangaon.—Filip. 4:10.

Pagmaya Uban Niadtong Nag-atubang ug mga Pagsulay

Ang paglahutay sa paglutos ug mga pagsulay nakapalig-on sa determinasyon ni Pablo nga magmatinumanon kang Jehova. (Col. 1:24; Sant. 1:2, 3) Siya nahibalo nga ang mga igsoon sa Filipos mahimong makaatubang usab ug samang mga pagsulay ug siya nalipay nga pinaagi sa iyang pagkamalahutayon iyang madasig sila. Busa siya misulat: “Gihatag kaninyo ang pribilehiyo alang kang Kristo, dili lamang sa pagbutang sa inyong pagtuo kaniya, kondili usab sa pag-antos alang kaniya. Kay kamo adunay samang pakigbisog ingon sa inyong nakita sa akong kahimtang ug ingon sa inyong nadungog karon bahin sa akong kahimtang.”—Filip. 1:29, 30.

Ang mga Kristohanon usab karon gilutos tungod sa pagsangyaw. Usahay kini mapintason, apan sagad dili. Kini tingali bakak nga akusasyon sa mga apostata, pagsupak sa mga membro sa pamilya, pagbiaybiay sa mga katrabaho o eskolmet. Si Jesus nagpasidaan nga dili kita angayng matingala ni maluya tungod niini. Hinuon, kana maoy mga rason sa pagmaya. Siya miingon: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako. Pagmaya ug lukso sa kalipay, sanglit dako ang inyong ganti sa mga langit.”—Mat. 5:11, 12.

Dili kita angayng mahadlok kon makadungog kita nga ang atong mga igsoon sa ubang nasod grabeng gilutos. Angay hinuon kitang magmaya tungod sa ilang pagkamalahutayon. Kita makaampo kang Jehova nga palig-onon ang ilang pagtuo ug tabangan silang makalahutay. (Filip. 1:3, 4) Bisag wala kaayo kitay mahimo alang sa maong minahal nga mga igsoon, kita makatabang sa mga igsoon sa atong kongregasyon nga nagsagubang ug mga pagsulay. Kita makapakitag personal nga interes kanila. Makapangita kitag kahigayonan sa pagmaya uban kanila pinaagi sa pagdapit kanila panagsa sa atong Pamilyahanong Pagsimba, ug sa pagpakig-uban kanila sa pagsangyaw o paglulinghayaw.

Daghan kitag rason nga mag-uban sa pagmaya! Suklan nato ang espiritu sa kalibotan nga magpalain ug padayon kitang magmaya uban sa mga igsoon. Sa paghimo niana, kita makaamot sa gugma ug panaghiusa sa kongregasyon ug bug-os natong matagamtam ang Kristohanong panag-igsoonay. (Filip. 2:1, 2) Si Pablo nagdasig kanato: “Pagmaya kanunay diha sa Ginoo. Sa makausa pa ako magaingon, Pagmaya!”—Filip. 4:4.

[Picture Credit Line sa panid 6]

Globe: Courtesy of Replogle Globes