“Magpadayon sa Pagbantay”—Nganong Importante Kaayo?

“UNSA man unya ang ilhanan sa imong presensiya ug sa kataposan sa sistema sa mga butang?” (Mat. 24:3) Sa pagtubag, gihatagan ni Jesus ang iyang mga tinun-an ug tin-aw ug detalyadong ilhanan nga narekord sa Mateo kapitulo 24, Marcos kapitulo 13, ug Lucas kapitulo 21. Siya midugang: “Magpadayon sa pagbantay.”—Mat. 24:42.

Kon tin-aw na kaayo ang ilhanan, nganong kinahanglan pang magpadayon sa pagbantay? Tagda kining duha ka rason. Una, ang mga kabaldahan lagmit magtukmod sa uban sa pagbalewala sa ilhanan, nga moresulta sa pagkawala sa espirituwalidad ug pagkamabinantayon. Ikaduha, tingali ang usa ka Kristohanon nakakitag mga bahin sa ilhanan apan kay wala man kini mahitabo sa iyang lugar, dili siya mobating apektado. Siya lagmit maghunahuna nga layo pa ang “dakong kasakitan,” ang sangkoanan sa tagna ni Jesus, ug busa dili pa kinahanglang “magpadayon sa pagbantay.”—Mat. 24:21.

“Wala Sila Magtagad”

Gipahinumdoman ni Jesus ang iyang mga sumusunod bahin sa mga tawo sa adlaw ni Noe. Imposibleng dili nila mamatikdan ang pagsangyaw ni Noe, ang pagtukod sa arka, ug ang kapintasan niadtong panahona. Bisan pa niana, “wala sila magtagad.” (Mat. 24:37-39) Daghan usab ang wala magtagad sa mga pasidaan karon. Pananglitan, klaro kaayo ang mga speed-limit sign, apan daghan ang wala magsunod niini. Ang mga awtoridad sagad magbutag mga hump diha sa karsada aron mapugos ang mga drayber sa pagmenor. Sa susama, ang usa ka Kristohanon tingali nakakita sa ilhanan sa kataposang mga adlaw apan nakigbahin gihapon sa mga kalihokan nga makabalda kaniya. Kini ang nahitabo kang Arielle, usa ka tin-edyer nga babaye sa West Africa.

Malingaw siyang magtan-aw sa dulang handball sa TV. Sa dihang nagpormag tem ang ilang eskuylahan, gusto kaayo siyang moapil mao nga nalimot siya nga posible kining makadaot sa iyang espirituwalidad. Midula siya ingong goalkeeper. Unsay nahitabo? Siya miingon: “Ang uban nakong teammate dunay mga trato nga nagdroga ug nanigarilyo. Ila kong giyagayagaan kay lahi kono ko.” Nagtuo si Arielle nga dili ra sila makaimpluwensiya niya. Apan wala madugay, ang dula nakaapektar sa iyang espirituwalidad. Siya miingon: “Nasentro na ang akong hunahuna ug kasingkasing sa dula. Bisag naa sa Kingdom Hall, ang akong hunahuna tua ra sa handball. Naapektohan sab ang akong Kristohanong personalidad. Sa una ganahan ra kong modula pero sa ulahi gusto na kong modaog. Busa nagpraktis kog maayo, apan natensiyon ko. Nawad-an pa gani kog mga higala tungod sa handball.”

 Apan dihay nahitabo nga nakapaamgo kang Arielle. Sa dihang ang ilang kontra gihatagag penalty shot, nangandam siya sa pagdepensa. Matod niya: “Wa ko kamatikod nga miampo na diay ko kang Jehova nga tabangan ko sa pagsagang sa bola! Kini nakapaamgo nako nga nadaot na gyod ang akong espirituwalidad.” Unsay iyang gihimo?

Siya miingon: “Nakakita na ko sa DVD nga Young People Ask—What Will I Do With My Life? * Nakahukom ko nga tan-awon kini pag-usab ug palandongon ni pag-ayo.” Nahibalo si Arielle nga pareho silag problema ni André, ang batan-on sa drama. Iyang gihimo ang gitambag sa ansiyano kang André nga basahon ug palandongon ang Filipos 3:8. Ingong resulta, si Arielle mibiya sa tem.

Nakapausab kini kang Arielle. Dili na siya maindigon ug tensiyonado. Mas malipayon ug mas nasuod na siya sa mga igsoon sa kongregasyon. Siya miingon: “Mas importante na nako ang espirituwal nga kalihokan. Maminaw na ko pag-ayo sa tigom ug giganahan na pag-usab niini. Miuswag sab ko sa ministeryo ug kanunayng mag-oksilyare payunir.”

Kon ang mga kabaldahan magtukmod kanimo sa pagbalewala sa ilhanan nga gihatag ni Jesus, kinahanglang duna kay himoon sama ni Arielle. Sulayi kining mosunod. Susiha ang Watch Tower Publications Index, nga samag mapa sa tinagong mga bahandi. Makakita kag maayong mga tambag ug kasinatian kon giunsa pag-atubang sa uban ang susamang mga kahimtang. Pahimusli ang mga tigom pinaagi sa pagpangandam pag-ayo ug pagkuhag mga nota. Nakita sa uban nga mas maayong molingkod dapit sa unahan. Kon dunay pagpakig-ambit sa mamiminaw, paningkamoting makakomento dayon. Ug padayon sa pagbantay pinaagi sa pagtandi sa bag-ong mga hitabo uban sa ilhanan nga gihatag ni Jesus ug sa ubang tagna bahin sa “kataposang mga adlaw.”—2 Tim. 3:1-5; 2 Ped. 3:3, 4; Pin. 6:1-8.

‘Pamatud-i Ninyo nga Kamo Andam’

Ang ilhanan sa kataposang mga adlaw mahitabo sa “tibuok gipuy-ang yuta.” (Mat. 24:7, 14) Minilyon ang nag-antos tungod sa sakit, kanihit sa pagkaon, linog, ug uban pang hitabo nga gitagna. Apan ang uban nagpuyo rang malinawon sa ubang dapit. Kon wala nimo masinati ang pipila ka bahin sa ilhanan, moingon ka ba nga dugay pa ang dakong kasakitan? Dili kana maalamon.

Pananglitan, palandonga ang gitagna ni Jesus bahin sa ‘kamatay ug kanihit sa pagkaon.’ (Luc. 21:11) Una, siya wala moingon nga kini dungang mahitabo sa tanang dapit o sa samang kagrabehon. Siya miingon lang nga kini mahitabo “sa nagkalainlaing mga dapit.” Busa dili nato dahomon nga dungan kining mahitabo sa tanang dapit. Ikaduha, human hisgoti ang kanihit sa pagkaon, gipakita ni Jesus nga ang uban niyang sumusunod angayng magbantay nga dili magpalabig kaon: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon.” (Luc. 21:34) Busa dili masinatian sa tanang  Kristohanon ang matag bahin sa ilhanan. Si Jesus miingon: “Sa dihang makita ninyo nga nagakahitabo kining mga butanga, hibaloi nga ang gingharian sa Diyos haduol na.” (Luc. 21:31) Pinaagi sa modernong teknolohiya, atong makita ang tanang bahin sa ilhanan bisag wala kini mahitabo sa atong dapit.

Hinumdomi usab nga gitakda na ni Jehova ang ‘adlaw ug takna’ sa pagsugod sa dakong kasakitan. (Mat. 24:36) Ang mga panghitabo sa yuta dili makausab niining petsaha.

Si Jesus nag-awhag sa tanang Kristohanon: ‘Pamatud-i ninyo nga kamo andam.’ (Mat. 24:44) Kita kinahanglang andam kanunay. Siyempre dili kita makapakigbahin sa teokratikanhong kalihokan sa tanang panahon. Gawas pa, wala kita mahibalo kon unsay atong ginahimo inigsugod sa dakong kasakitan. Ang uban tingali anaa sa trabaho o nag-atiman sa buluhaton sa balay. (Mat. 24:40, 41) Busa, sa unsang paagi kita makapangandam?

Si Emmanuel, Victorine, ug ang unom nila ka anak nga babaye nagpuyo sa usa ka dapit sa Africa diin wala nila masinati ang tanang bahin sa ilhanan. Busa sila mihukom nga hisgotan ang Bibliya kada adlaw aron sila makapangandam. Si Emmanuel miingon: “Lisod ang pagpangitag panahon nga kombenyente sa tanan. Busa among gipili ang 6:00 hangtod sa 6:30 sa buntag. Human hisgoti ang inadlawng teksto, among tun-an ang pipila ka parapo sa publikasyon nga kobrehan sa tigom nianang semanaha.” Nakatabang ba kini kanila nga padayong magbantay? Oo! Si Emmanuel ang koordinetor sa lawas sa mga ansiyano. Si Victorine kanunayng mag-oksilyare payunir ug daghan siyag natabangan nga makakat-on sa kamatuoran. Ug ang tanan nilang anak aktibo sa pag-alagad.

Si Jesus nag-awhag kanato: “Magpadayon sa pagtan-aw, magpadayon sa pagtukaw.” (Mar. 13:33) Ayaw tugoti nga may makabalda kanimo. Hinunoa, ipadapat ang tambag diha sa atong mga publikasyon ug mga tigom, ingon sa gihimo ni Arielle. Sama sa pamilya ni Emmanuel, paningkamoti nga duna kay himoon kada adlaw nga magpakita nga ikaw andam ug ‘padayong nagbantay.’

[Footnote]

[Hulagway sa panid 4]

Ang adlaw-adlawng paghisgot sa Bibliya nakatabang kang Emmanuel ug sa iyang pamilya nga ‘padayong magbantay’