Bansaya ang Uban sa Pagkab-ot ug Pribilehiyo
Bansaya ang Uban sa Pagkab-ot ug Pribilehiyo
“Ang matag usa nga hingpit nga natudloan mahisama sa iyang magtutudlo.”—LUC. 6:40.
1. Sa iyang ministeryo, sa unsang paagi gipahiluna ni Jesus ang pundasyon sa usa ka kongregasyon?
SA PAGTAPOS sa iyang Ebanghelyo, si apostol Juan misulat: “Sa pagkatinuod, adunay daghang uban pa usab nga mga butang nga gihimo si Jesus, nga, kon kini sila isulat nga detalyado kaayo, sa akong hunahuna, ang kalibotan dili paigo sa mga linukot nga basahon nga masulat.” (Juan 21:25) Lakip sa mga nahimo ni Jesus sa iyang mubo apan malamposong ministeryo mao ang pagpili, pagbansay, ug pag-organisar ug mga lalaki nga manguna dihang mobiya na siya sa yuta. Sa iyang pagbalik sa langit niadtong 33 K.P., napahiluna na ni Jesus ang pundasyon sa usa ka kongregasyon nga daling midaghan ngadto sa linibo.—Buh. 2:41, 42; 4:4; 6:7.
2, 3. (a) Nganong may dakong panginahanglan sa mga brader nga mokab-ot ug pribilehiyo? (b) Unsay hisgotan niini nga artikulo?
2 Kay kapin na sa pito ka milyon ang aktibong magmamantala diha sa kapig 100,000 ka kongregasyon sa tibuok yuta karon, may dakong panginahanglan sa mga lalaki nga manguna sa maong mga kongregasyon. Pananglitan, gikinahanglan kaayo ang mga ansiyano. Kadtong nangab-ot niini nga pribilehiyo angayng komendahan, kay sila “matinguhaon sa usa ka maayong buhat.”—1 Tim. 3:1.
3 Apan ang mga lalaki dili awtomatikong mokuwalipikar sa mga pribilehiyo sa kongregasyon. Dili sekular nga edukasyon o kasinatian ang mag-andam sa usa alang niini nga buluhaton. Kinahanglang makab-ot niya ang espirituwal nga mga kuwalipikasyon. Gawas sa iyang mga abilidad o kalamposan, angayng makita kaniya ang espirituwal nga mga hiyas. Sa unsang paagi matabangan ang mga lalaki sa kongregasyon nga mokuwalipikar? Si Jesus miingon: “Ang matag usa nga hingpit nga natudloan mahisama sa iyang magtutudlo.” (Luc. 6:40) Niini nga artikulo, hisgotan nato ang pipila ka paagi nga ang atong Batid nga Magtutudlo, si Jesu-Kristo, nagbansay sa iyang mga tinun-an aron mokuwalipikar sa mas dagkong responsabilidad, ug tan-awon nato kon unsay atong makat-onan niana.
“Gitawag Ko Kamong mga Higala”
4. Giunsa pagpakita ni Jesus nga siya tinuod nga higala sa iyang mga tinun-an?
4 Si Jesus nag-isip sa iyang mga tinun-an ingong mga higala, dili kay ubos niya. Siya nakig-uban ug misalig kanila. Iyang ‘gipahibalo kanila ang tanang butang nga iyang nadungog gikan sa iyang Amahan.’ (Basaha ang Juan 15:15.) Hunahunaa ang ilang kalipay dihang gitubag ni Jesus ang ilang pangutana: “Unsa man unya ang ilhanan sa imong presensiya ug sa kataposan sa sistema sa mga butang?” (Mat. 24:3, 4) Iya usab gisulti kanila ang iyang hunahuna ug pagbati. Pananglitan, sa gabii nga siya gibudhian, gidala ni Jesus si Pedro, Santiago, ug Juan sa tanaman sa Getsemane, diin siya miampo tungod sa hilabihang kaguol. Ang tulo ka apostoles lagmit wala makadungog sa pag-ampo ni Jesus, apan nahibalo sila nga siya nag-antos pag-ayo niadtong higayona. (Mar. 14:33-38) Una pa niana, may higayon nga gilig-on sila ni Jesus dihang “nausab ang iyang dagway sa ilang atubangan.” (Mar. 9:2-8; 2 Ped. 1:16-18) Ang suod nga panaghigalaay ni Jesus ug sa iyang mga tinun-an nagpalig-on kanila sa pag-atiman sa ilang bug-at nga responsabilidad sa ulahi.
5. Unsaon pagpakita sa mga ansiyano nga sila andam motabang sa uban?
5 Sama kang Jesus, ang mga ansiyano karon makighigala ug motabang sa uban. Sila makigsuod sa mga igsoon pinaagi sa pagpakitag personal nga interes kanila. Bisag ang mga ansiyano dili maghisgot ug kompidensiyal nga mga butang, sila makig-estorya kanila bahin sa ilang nakat-onan sa Pulong sa Diyos ug misalig kanila. Dili nila isipong ubos ang ministeryal nga alagad nga mas bata kay kanila. Hinunoa, isipon nila siya ingong espirituwal nga tawo nga may potensiyal kinsa kauban nila sa pag-atiman sa kongregasyon.
“Ako Nagtagana ug Sumbanan Alang Kaninyo”
6, 7. Unsang panig-ingnan ang gipakita ni Jesus sa iyang mga tinun-an? Unsay epekto niini kanila?
6 Bisag gipabilhan sa mga tinun-an ni Jesus ang espirituwal nga mga butang, ang ilang hunahuna usahay naimpluwensiyahan sa ilang kagikan ug kultura. (Mat. 19:9, 10; Luc. 9:46-48; Juan 4:27) Apan wala sila sawaya o kasab-i ni Jesus. Wala niya sila sugoa sa pagbuhat ug butang nga lisod ra kaayo para nila o siya mismo dili gani mobuhat. Hinunoa, si Jesus nagtudlo kanila pinaagig panig-ingnan.—Basaha ang Juan 13:15.
7 Unsang sulondan ang gibilin ni Jesus sa iyang mga tinun-an? (1 Ped. 2:21) Siya nagkinabuhing simple aron makaalagad sa uban. (Luc. 9:58) Kanunayng gibase ni Jesus sa Kasulatan ang iyang gitudlo, dili sa iyang kaugalingon. (Juan 5:19; 17:14, 17) Siya daling duolon ug buotan. Ang tanan niyang gihimo nagpakita sa iyang gugma. (Mat. 19:13-15; Juan 15:12) Ang panig-ingnan ni Jesus maayog impluwensiya sa iyang mga apostoles. Pananglitan, si Santiago wala mahadlok bisag nag-atubang ug kamatayon apan maunongong nag-alagad sa Diyos hangtod nga siya gipatay. (Buh. 12:1, 2) Si Juan matinumanong nagsunod sa panig-ingnan ni Jesus sa kapig 60 ka tuig.—Pin. 1:1, 2, 9.
8. Unsang panig-ingnan ang ipakita sa mga ansiyano ngadto sa batan-ong mga lalaki ug sa uban?
8 Ang mga ansiyano nga andam mosakripisyo, mapaubsanon, ug mahigugmaon maoy maayong panig-ingnan sa batan-ong mga lalaki. (1 Ped. 5:2, 3) Dugang pa, ang mga ansiyano nga sulondan sa pagtuo, pagpanudlo, Kristohanong pagkinabuhi, ug sa ministeryo malipay nga ang uban nagsundog kanila.—Heb. 13:7.
‘Si Jesus Naghatag Kanilag mga Sugo ug Nagpadala Kanila’
9. Giunsa nato pagkahibalo nga gibansay ni Jesus ang iyang mga tinun-an sa pagsangyaw?
9 Human sa duha ka tuig nga ministeryo ni Jesus, gipadala niya ang iyang 12 ka apostoles sa pagsangyaw. Apan una sa tanan, siya naghatag kanilag instruksiyon. (Mat. 10:5-14) Sa wala pa milagrosong pakan-a ang linibo ka tawo, giingnan ni Jesus ang iyang mga tinun-an kon unsaon pag-organisar ang mga tawo aron ang tanan makakaon. (Luc. 9:12-17) Klaro nga gibansay ni Jesus ang iyang mga tinun-an pinaagi sa paghatag kanilag tin-aw ug espesipikong instruksiyon. Tungod sa maong pagbansay ug sa tabang sa balaang espiritu, naorganisar sa mga apostoles ang dakong buluhatong pagsangyaw nga nagsugod sa 33 K.P.
10, 11. Sa unsang paagi bansayon ang mga bag-ohan?
10 Karon, madawat sa usa ka lalaki ang espirituwal nga instruksiyon dihang modawat siyag pagtuon sa Bibliya. Tingali kinahanglan nato siyang tabangan aron mouswag ang iyang pagbasa. Samtang ato siyang tun-an sa Bibliya, daghan pa kitag ikatabang kaniya. Dihang regular na siyang motambong sa mga tigom, ang pagbansay kaniya magpadayon dihang siya makigbahin sa Teokratikanhong Tunghaan sa Ministeryo ug mahimong di-bawtismadong magmamantala. Human sa bawtismo, ang pagbansay kaniya mahimong maglakip sa pagtabang sa pagmentinar sa Kingdom Hall. Ngadtongadto, mahimong tabangan siya kon unsay himoon aron mokuwalipikar ingong ministeryal.
11 Dihang hatagag buluhaton ang usa ka brader, ipatin-aw sa usa ka ansiyano ang kahikayan sa paghimo niini ug hatagan siyag espesipikong instruksiyon. Ang brader nga gibansay angayng makasabot kon unsay gidahom kaniya. Kon naglisod siya sa gipabuhat kaniya, ang mahigugmaong ansiyano dili dayon mohukom nga dili siya kuwalipikado. Hinunoa, maluloton niyang ipatin-aw pag-usab kon unsay angayng himoon sa brader ug kon unsaon kini paghimo. Ang mga ansiyano malipay dihang ilang makita nga ang mga lalaki misanong sa pagbansay ug nalipay sa pag-alagad sa uban.—Buh. 20:35.
“Ang Nagapamati sa Tambag Maoy Maalamon”
12. Nganong epektibo ang tambag ni Jesus?
12 Si Jesus nagbansay sa iyang mga tinun-an pinaagi sa paghatag ug tambag nga haom sa ilang panginahanglan. Pananglitan, iyang gibadlong si Santiago ug Juan kay buot nilang magpakanaog ug kalayo gikan sa langit nganha sa pipila ka Samarianhon nga wala modawat kaniya. (Luc. 9:52-55) Dihang ang inahan ni Santiago ug Juan mihangyo kang Jesus nga hatagag taas nga posisyon sa Gingharian ang iyang duha ka anak, si Jesus nahibalo nga ang magsoon mao ang nagtinguha niini. Busa siya miingon sa duha: “Kining paglingkod sa akong tuong kamot ug sa akong wala dili akoa ang paghatag, kondili kini iya niadtong gitagan-an niini sa akong Amahan.” (Mat. 20:20-23) Si Jesus kanunayng naghatag ug tambag nga tin-aw, praktikal, ug binase sa mga prinsipyo sa Kasulatan. Gitudloan niya sila sa pagpangatarongan uyon sa maong mga prinsipyo. (Mat. 17:24-27) Si Jesus nahibalo usab sa limitasyon sa iyang mga sumusunod ug wala magdahom ug kahingpitan kanila. Siya naghatag ug tambag kay siya nahigugma pag-ayo kanila.—Juan 13:1.
13, 14. (a) Kinsay nagkinahanglag tambag? (b) Paghatag ug pananglitan sa tambag nga mahimong ihatag sa ansiyano sa usa nga wala mouswag sa espirituwal.
13 May mga panahon nga ang mga lalaki nga nangab-ot ug pribilehiyo sa kongregasyon magkinahanglag tambag gikan sa Bibliya. “Ang nagapamati sa tambag maoy maalamon,” nag-ingon ang Proverbio 12:15. Usa ka batan-ong brader miingon nga kaniadto siya mibating dili takos sa mga pribilehiyo, pero tungod sa tambag sa usa ka ansiyano, nakabaton siyag hustong panglantaw.
14 Kon mamatikdan sa mga ansiyano nga wala mouswag ang usa ka brader tungod sa iyang panggawi, angay siyang tabangan dayon sa malumong paagi. (Gal. 6:1) Usahay gikinahanglan ang tambag aron matul-id ang tinamdan sa usa. Pananglitan, kon ang brader dili kaayo dasig sa pag-alagad, pwedeng ipasiugda sa ansiyano kaniya nga si Jesus masiboton sa pagwali sa Gingharian ug nagsugo sa iyang mga sumusunod sa paghimog mga tinun-an. (Mat. 28:19, 20; Luc. 8:1) Kon ang usa morag gustong molabaw sa uban, mahimong ipakita kaniya sa ansiyano nga gitudloan ni Jesus ang Iyang mga tinun-an nga dili magtinguha nga mahimong labaw. (Luc. 22:24-27) Komosta kon ang brader nalisdan sa pagpasaylo sa uban? Makatabang gayod kaniya ang ilustrasyon bahin sa ulipon nga wala magpasaylo sa gamayng utang bisag siya gipasaylo sa iyang dakong utang. (Mat. 18:21-35) Kon kinahanglang mohatag ug tambag, maayong buhaton dayon kana sa mga ansiyano.—Basaha ang Proverbio 27:9.
“Bansaya ang Imong Kaugalingon”
15. Sa unsang paagi ang pamilya sa usa ka lalaki makatabang niya sa pag-alagad sa uban?
15 Ang mga ansiyano maoy manguna sa pagbansay sa mga lalaki sa pagkab-ot ug pribilehiyo. Pero makatabang usab ang uban, ilabina ang iyang pamilya. Kon ansiyano na ang brader, importante gihapon ang pagpaluyo sa iyang asawa ug mga anak. Angay nilang masabtan nga kinahanglan siyang mogahig panahon ug kusog alang sa uban. Makapalipay kaniya kon ang iyang pamilya andam mosakripisyo aron maatiman niya ang iyang responsabilidad, ug kini gipabilhan pag-ayo sa uban.—Prov. 15:20; 31:10, 23.
16. (a) Kinsa ang angayng maningkamot sa pagkab-ot ug pribilehiyo? (b) Unsay himoon sa usa ka lalaki aron makakab-ot ug mga pribilehiyo?
16 Bisan tuod ang uban makatabang ug makapaluyo kaniya, ang brader mismo maoy maningkamot sa pagkab-ot ug pribilehiyo. (Basaha ang Galacia 6:5.) Siyempre, ang usa ka brader dili kinahanglang ministeryal o ansiyano aron makatabang sa uban ug bug-os nga makigbahin sa ministeryo. Hinuon kon gusto niyang makabatog pribilehiyo sa kongregasyon, paningkamotan una niyang makab-ot ang mga kuwalipikasyon nga anaa sa Kasulatan. (1 Tim. 3:1-13; Tito 1:5-9; 1 Ped. 5:1-3) Busa kon ang usa ka lalaki nagtinguha nga mahimong ministeryal o ansiyano apan wala pa ikatudlo, angay niyang hatagag pagtagad kon unsay iyang pauswagon. Kinahanglan niyang basahon kanunay ang Bibliya, magkugi sa pagtuon, mamalandong, tim-os nga moampo, ug magmasiboton sa ministeryo. Pinaagi niini, iyang mapadapat ang tambag ni Pablo kang Timoteo: “Bansaya ang imong kaugalingon nga maoy tumong ang diyosnong pagkamahinalaron.”—1 Tim. 4:7.
17, 18. Unsay mahimo sa usa ka brader kon ang kabalaka, pagbating dili takos, o kawalay tinguha magpugong kaniya sa pagkab-ot ug pribilehiyo?
17 Apan komosta kon ang usa wala mangab-ot ug pribilehiyo tungod sa kabalaka o sa pagbating dili takos? Maayong palandongon niya kon unsa ka dako ang gihimo ni Jehova ug Jesu-Kristo alang kanato. Sa pagkatinuod, si Jehova ‘adlaw-adlawng nagpas-an sa atong luwan.’ (Sal. 68:19) Busa ang atong langitnong Amahan makatabang sa usa ka brader sa pagdawat ug responsabilidad sa kongregasyon. Kon ang usa dili pa ministeryal o ansiyano, angay niyang hinumdoman nga dunay dakong panginahanglan sa hamtong nga mga lalaki sa pag-atiman sa mga kongregasyon. Ang pagpamalandong niini makatabang kaniya sa pagbuntog sa negatibong pagbati. Siya makaampo alang sa balaang espiritu, nga hinumdoman nga ang bunga niini naglakip sa pakigdait ug pagpugong-sa-kaugalingon—mga hiyas nga makatabang sa pagwala sa kabalaka o pagbating dili takos. (Luc. 11:13; Gal. 5:22, 23) Kita makasalig nga panalanginan ni Jehova ang tanang mangab-ot ug pribilehiyo uban ang hustong motibo.
18 Tingali ang usa ka brader walay tinguha nga mokab-ot ug pribilehiyo. Unsay makatabang kaniya? Si apostol Pablo misulat: “[Ang Diyos], alang sa iyang ikahimuot, nagalihok sa sulod ninyo aron kamo magtinguha ug ingon man mobuhat.” (Filip. 2:13) Ang Diyos mao ang nagtabang sa usa nga makabatog tinguha ug kusog sa paghimog sagradong pag-alagad. (Filip. 4:13) Dugang pa, ang usa makaampo sa Diyos nga tabangan siya sa pagbuhat kon unsay matarong.—Sal. 25:4, 5.
19. Unsay gipasalig kanato sa pagpatindog ni Jehova ug “pito ka magbalantay, oo, walo ka duke”?
19 Si Jehova nagpanalangin sa paningkamot sa mga ansiyano sa pagbansay sa uban. Panalanginan usab niya kadtong mosanong ug mangab-ot ug pribilehiyo sa kongregasyon. Ang Bibliya nagpasalig kanato nga ang katawhan sa Diyos makabatog igong gidaghanon sa mga brader nga modumala sa organisasyon. Kini nag-ingon nga si Jehova magpatindog ug “pito ka magbalantay, oo, walo ka duke gikan sa katawhan.” (Miq. 5:5) Pagkadakong panalangin nga daghang brader ang gibansay ug mapaubsanong nangab-ot ug mga pribilehiyo sa pag-alagad alang sa kadayeganan ni Jehova!
Unsay Imong Tubag?
• Sa unsang paagi gitabangan ni Jesus ang iyang mga tinun-an nga mokuwalipikar sa mas dagkong responsabilidad?
• Sa unsang paagi masundog sa mga ansiyano si Jesus sa pagtabang sa mga lalaki sa kongregasyon aron manguna?
• Sa unsang paagi ang pamilya sa usa ka lalaki makatabang kaniya sa pagkab-ot ug pribilehiyo?
• Unsay mahimo sa usa ka lalaki aron siya makakab-ot ug mga pribilehiyo?
[Mga Pangutana sa Pagtuon]
[Mga hulagway sa panid 31]
Unsaon nimo pagbansay ang imong estudyante samtang siya naningkamot nga mouswag?
[Hulagway sa panid 32]
Sa unsang paagi ikapakita sa mga lalaki nga sila nangab-ot ug mga pribilehiyo?
