Tabangi ang mga Lalaki nga Mouswag sa Espirituwal

“Sukad karon mangisda ka na ug mga tawo nga buhi.”—LUC. 5:10.

1, 2. (a) Unsay sanong sa mga lalaki sa pagsangyaw ni Jesus? (b) Unsay hisgotan niini nga artikulo?

USA ka adlaw samtang nagsangyaw sa Galilea, si Jesus ug ang iyang mga tinun-an misakayg sakayan aron mopahulay sa mingaw nga dapit. Apan daghan ang misunod nila agi sa baybayon, “mga lima ka libong lalaki, gawas sa mga babaye ug mga bata.” (Mat. 14:21) Sa laing okasyon, usa ka panon ang miduol kang Jesus kay gustong maayo ug makadungog sa iyang pagpanudlo. Dihay “upat ka libong lalaki, gawas sa mga babaye ug sa mga bata.” (Mat. 15:38) Dayag nga daghang lalaki ang miadto kang Jesus kay gustong makakat-on. Gani gidahom niya nga daghan pa ang mosanong, kay human ang mga tinun-an milagrosong nakakuhag mga isda, si Jesus miingon kang Simon: “Sukad karon mangisda ka na ug mga tawo nga buhi.” (Luc. 5:10) Gipasabot ni Jesus nga ang ilang pagsangyaw samag pagpangisda. Daghan ang modawat sa kamatuoran, lakip ang daghang lalaki.

² Karon, daghang lalaki usab ang interesado ug misanong sa mensahe sa Bibliya nga atong ginasangyaw. (Mat. 5:3) Apan daghan ang wala mouswag. Unsaon nato sila pagtabang? Bisan tuod ang pagsangyaw ni Jesus wala isentro sa mga lalaki lamang, iyang gihatagag pagtagad ang mga butang nga ilang gikabalak-an. Pinaagi sa iyang panig-ingnan, atong susihon kon sa unsang paagi kita makatabang sa mga lalaki sa pag-atubang sa tulo ka butang nga sagad gikabalak-an karon: (1) panginabuhi, (2) kahadlok kon unsay hunahunaon sa uban, ug (3) pagbating dili takos.

Panginabuhi

3, 4. (a) Unsa ang pangunang gikabalak-an sa daghang lalaki? (b) Nganong mas importante sa ubang lalaki ang pagpangitag kuwarta kay sa espirituwal nga mga butang?

³ Usa ka eskriba ang miingon kang Jesus: “Magtutudlo, mosunod ako kanimo bisan asa ka mopaingon.” Apan dihang si Jesus miingon kaniya nga “ang Anak sa tawo walay dapit nga kapahilunaan sa iyang ulo,” ang eskriba nagduhaduha. Tingali nabalaka kaayo siya kon unsay iyang kaonon ug kon asa siya mopuyo, kay walay gipakita ang Bibliya nga siya nahimong sumusunod ni Kristo.—Mat. 8:19, 20.

⁴ Sagad unahon sa mga lalaki ang materyal nga kasegurohan kay sa espirituwal nga mga butang. Mas importante nila ang pagkuhag taas nga edukasyon ug dakog suweldo nga trabaho. Kay gikinahanglan man ang kuwarta adlaw-adlaw, sila naghunahuna nga mas mapuslanon ang pagpangitag kuwarta kay sa pagtuon sa Bibliya ug pagpakigsuod sa Diyos. Tingali interesado sila sa gitudlo sa Bibliya, apan “ang mga kabalaka niining sistema sa mga butang ug ang malimbongong gahom sa mga bahandi” magtuok sa ilang interes. (Mar. 4:18, 19) Tagda kon giunsa pagtabang ni Jesus ang iyang mga tinun-an sa pagbag-o sa ilang prioridad.

5, 6. Unsay nakatabang kang Andres, Pedro, Santiago, ug Juan sa pagdesisyon kon unsay labing hinungdanong buluhaton kanila?

⁵ Si Andres ug ang iyang igsoong si Simon Pedro maoy mangingisda. Mao man usab ang magsoong si Juan ug Santiago ug ang ilang amahan nga si Zebedeo. Maayo ang dagan sa ilang pangisda mao nga duna silay mga tawong sinuholan. (Mar. 1:16-20) Dihang si  Andres ug Juan unang nakakat-on bahin kang Jesus gikan kang Juan nga Tigbawtismo, sila kombinsido nga si Jesus ang Mesiyas. Gipahibalo ni Andres ang iyang igsoong si Simon Pedro bahin niini, ug lagmit kini usab ang gihimo ni Juan ngadto sa iyang igsoong si Santiago. (Juan 1:29, 35-41) Sa misunod nga mga bulan, silang upat mikuyog kang Jesus sa pagsangyaw sa Galilea, Judea, ug Samaria. Dayon sila mibalik sa pagpangisda. Interesado sila sa espirituwal nga mga butang, apan ang ministeryo dili mao ang labing hinungdanon kanila.

⁶ Sa ulahi, gidapit ni Jesus si Pedro ug Andres nga mosunod kaniya ug mahimong “mangingisda ug mga tawo.” Unsay sanong sa duha? “Dihadiha gibiyaan ang mga pukot, sila misunod kaniya.” Sama usab niana ang sanong si Santiago ug Juan. “Dihadiha gibiyaan ang sakayan ug ang ilang amahan, sila misunod kaniya.” (Mat. 4:18-22) Unsay nakatabang nila nga mosulod sa bug-os panahong ministeryo? Dinalidali lang ba kadto nga desisyon? Dili gayod! Sa milabayng mga bulan, sila nakapamati kang Jesus, nakakita sa iyang mga milagro ug kasibot alang sa pagkamatarong, ug sa positibong sanong sa mga tawo. Ingong resulta, mas milig-on ang ilang pagtuo ug pagsalig kang Jehova.

7. Sa unsang paagi nato matabangan ang mga estudyante sa Bibliya nga mosalig kang Jehova?

⁷ Sa unsang paagi nato masundog si Jesus sa pagtabang sa atong mga estudyante sa Bibliya nga mosalig kang Jehova? (Prov. 3:5, 6) Ang paagi sa atong pagtudlo hinungdanon kaayo. Sa dihang magtudlo, atong ikapasiugda ang saad sa Diyos nga panalanginan niya kita kon atong unahon ang Gingharian. (Basaha ang Malaquias 3:10; Mateo 6:33.) Bisag makagamit kitag mga teksto sa pagpakitang si Jehova nagtagana sa iyang katawhan, mahimo usab nato silang tudloan pinaagi sa atong panig-ingnan. Kon ato silang suginlan sa atong mga kasinatian, kini makatabang nila nga mosalig kang Jehova. Ato usab ikapaambit ang makapadasig nga mga kasinatian nga atong nabasa sa atong mga publikasyon. *

8. (a) Nganong hinungdanon nga masinati ug makita sa estudyante nga si Jehova maayo? (b) Unsay atong mahimo aron masinati sa estudyante ang kaayo ni Jehova?

⁸ Aron mabatonan ang lig-ong pagtuo, dili igo ang pagbasa ug pagkadungog kon sa unsang paagi gipanalanginan ni Jehova ang uban. Kinahanglang masinati mismo sa estudyante ang kaayo ni Jehova. Ang salmista miawit: “Tilawi ug tan-awa ninyo nga si Jehova maayo; malipayon ang tawo nga lig-on ug lawas nga modangop kaniya.” (Sal. 34:8) Unsay atong mahimo aron masinati sa estudyante ang kaayo ni Jehova? Ibutang ta nga siya may problema sa panalapi ug naningkamot sab sa pagbuntog sa usa ka bisyo sama sa pagpanigarilyo, pagsugal, o sobrang pag-inom. (Prov. 23:20, 21; 2 Cor. 7:1; 1 Tim. 6:10) Dili ba ang pagtudlo kaniya sa pag-ampo alang sa tabang sa Diyos sa pagbuntog sa maong bisyo makatabang niya nga masinati ang kaayo ni Jehova?  Tagda usab ang resulta kon atong dasigon ang estudyante nga unahon ang espirituwal nga mga butang pinaagi sa paggahig panahon alang sa pagtuon sa Bibliya kada semana ug sa pagpangandam ug pagtambong sa mga tigom. Dihang makita niya nga gipanalanginan ni Jehova ang iyang mga paningkamot, mas molig-on ang iyang pagtuo.

Kahadlok kon Unsay Hunahunaon sa Uban

9, 10. (a) Nganong gitago ni Nicodemo ug ni Jose nga taga-Arimatea nga sila mga tinun-an ni Jesus? (b) Nganong ang pipila ka lalaki karon nagpanuko sa pagsunod kang Kristo?

⁹ Tungod sa pagpit-os sa uban, ang pipila ka lalaki nagpanuko sa bug-os nga pagsunod kang Kristo. Kay nahadlok kon unsay isulti o buhaton sa mga Hudiyo, gitago ni Nicodemo ug ni Jose nga taga-Arimatea nga sila mga tinun-an ni Jesus. (Juan 3:1, 2; 19:38) Sila may rason nga mahadlok. Gidumtan pag-ayo sa mga lider sa relihiyon si Jesus. Gani, si bisan kinsa nga magpakitag pagtuo kaniya ipalagpot gikan sa sinagoga.—Juan 9:22.

¹⁰ Sa pipila ka dapit karon, kon ang usa ka lalaki magpakitag interes sa Diyos, sa Bibliya, o sa relihiyon, siya lagmit biaybiayon sa iyang mga katrabaho, higala, o paryente. Sa ubang dapit, mahimong peligroso pa gani ang pagbalhig relihiyon. Ang pagpamit-os ilabinang lisod kon ang usa ka lalaki nagserbisyo sa militar o aktibo sa politika o sa komunidad. Pananglitan, usa ka lalaki sa Germany miingon: “Tinuod man ang inyong gitudlo bahin sa Bibliya. Pero kon mag-Saksi ko karon, seguradong ugma mahibaloan kana sa uban. Unsa na lay hunahunaon sa akong mga katrabaho, silingan, ug sa asosasyon nga giapilan sa among pamilya? Di nako na makaya.”

11. Sa unsang paagi gitabangan ni Jesus ang iyang mga tinun-an nga mabuntog ang kahadlok sa tawo?

¹¹ Bisag dili talawan ang mga apostoles ni Jesus, sila usahay mobatig kahadlok sa tawo. (Mar. 14:50, 66-72) Sa unsang paagi sila gitabangan ni Jesus nga mouswag bisan pa sa grabeng pagpamit-os? Si Jesus nag-andam kanila sa pag-atubang sa umaabot nga pagsupak. Siya miingon: “Malipayon kamo sa dihang pagadumtan kamo sa mga tawo, ug sa dihang ipaniglain kamo nila ug pakaulawan ug isalikway ang inyong ngalan ingon nga daotan tungod sa Anak sa tawo.” (Luc. 6:22) Gipasidan-an ni Jesus ang iyang mga sumusunod nga sila pakaulawan. Apan kini nga pakaulaw maoy “tungod sa Anak sa tawo.” Gipasaligan usab sila ni Jesus nga ang Diyos magpaluyo kanila kon sila mosalig Kaniya alang sa tabang ug kusog. (Luc. 12:4-12) Dugang pa, gidapit ni Jesus ang mga bag-ohan nga makig-uban sa iyang mga tinun-an ug makighigala kanila.—Mar. 10:29, 30.

12. Sa unsang mga paagi atong matabangan ang mga bag-ohan sa pagbuntog sa kahadlok sa tawo?

¹² Kinahanglan usab natong tabangan ang mga estudyante sa Bibliya sa pagbuntog sa kahadlok sa tawo. Mas daling atubangon ang pagsupak kon kini dahomon. (Juan 15:19) Pananglitan, mahimo natong tabangan ang estudyante  sa pag-andam ug simple, praktikal, binase sa Bibliya nga tubag sa mga pangutana ug pagsupak sa iyang mga katrabaho ug sa uban. Gawas pa sa atong pagpakighigala kaniya, ato siyang ipailaila sa ubang igsoon sa kongregasyon, ilabina niadtong pareho niyag situwasyon o interes. Labaw sa tanan, ato siyang tudloan nga moampo nga regular ug kinasingkasing. Kini makatabang niya nga masuod sa Diyos ug himoon si Jehova nga iyang Dalangpanan ug Bato.—Basaha ang Salmo 94:21-23; Santiago 4:8.

Pagbating Dili Takos

13. Nganong ang ubang lalaki dili makigbahin sa espirituwal nga kalihokan?

¹³ Ang ubang lalaki dili makigbahin sa espirituwal nga kalihokan kay sila dili maayong mobasa o maglisod sa pagpahayag sa ilang hunahuna o maulawon. Ang pipila dili komportable nga mopaambit sa ilang opinyon o pagbati atubangan sa mga tawo. Busa malisdan sila sa pagtuon, pagkomento sa tigom, o pagsangyaw. “Sa bata pa ko,” matod sa usa ka brader, “magdali kog adto sa pultahan, magpakaaron-ingnong nagpindot sa doorbell, ug molakaw dayon, nga manghinaot nga walay nakakita o nakadungog nako. . . . Mora kog kahilantanon sa paghunahuna pa lang nga mosangyaw.”

14. Nganong wala maayo sa mga tinun-an ni Jesus ang batang gidemonyohan?

¹⁴ Hunahunaa ang gibati sa mga tinun-an ni Jesus dihang wala nila maayo ang batang gidemonyohan. Ang amahan sa bata miduol kang Jesus ug miingon: “[Ang akong anak] patolon ug masakiton, kay subsob siya nga mahulog ngadto sa kalayo ug subsob ngadto sa tubig; ug gidala ko siya sa imong mga tinun-an, apan wala sila makaayo kaniya.” Gipagawas ni Jesus ang demonyo, ug naayo ang bata. Sa ulahi, ang mga tinun-an miduol kang Jesus ug nangutana: “Nganong wala kami makahingilin niini?” Si Jesus mitubag: “Tungod sa kagamay sa inyong pagtuo. Kay sa pagkatinuod ako magaingon kaninyo, Kon kamo adunay pagtuo nga ang gidak-on ingon sa lugas sa mustasa, sultihan ninyo kining bukira, ‘Balhin gikan dinhi paingon didto,’ ug mobalhin kini, ug walay mahimong imposible alang kaninyo.” (Mat. 17:14-20) Ang pagtuo kang Jehova gikinahanglan aron mahimo ang mga butang nga daw imposibleng buhaton. Unsay mahitabo kon ang usa mawad-ag pagtuo ug mosalig na lang sa iyang katakos? Siya mapakyas, ug lagmit mobating dili na takos moalagad kang Jehova.

15, 16. Unsay atong ikatabang sa estudyante aron mabuntog ang pagbating dili takos?

¹⁵ Ang usa ka maayong paagi sa pagtabang niadtong mibating dili takos mao ang pagdasig kaniya nga mosalig kang Jehova, dili sa kaugalingon. Si Pedro misulat: “Ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon; samtang inyong itugyan kaniya ang tanan ninyong mga kabalaka.” (1 Ped. 5:6, 7) Angay natong tabangan ang atong estudyante nga maugmad ang iyang espirituwalidad. Ang espirituwal nga tawo nagpabili sa espirituwal nga mga butang. Siya nahigugma sa Pulong sa Diyos ug nagpasundayag sa “bunga sa espiritu” sa iyang kinabuhi. (Gal. 5:22, 23) Siya kanunayng moampo. (Filip. 4:6, 7) Dugang pa, siya mosalig sa Diyos alang sa kaisog ug kusog aron masagubang ang lainlaing situwasyon o matuman ang bisan unsang buluhaton.—Basaha ang 2 Timoteo 1:7, 8.

¹⁶ Ang ubang estudyante tingali nagkinahanglag tabang aron mouswag ang ilang  pagbasa ug pagpakigsulti. Ang pipila lagmit mobating dili takos moalagad sa Diyos tungod sa ilang daotang binuhatan una pa nila mailhi si Jehova. Bisag unsa pay kahimtang, ang atong gugma ug pailob dakog ikatabang kanila. Si Jesus miingon: “Ang mga tawong himsog wala magkinahanglan ug mananambal, kondili ang mga masakiton.”—Mat. 9:12.

Tabangi ang Daghan Pang Lalaki

17, 18. (a) Unsay atong himoon aron mas daghang lalaki ang masangyawan? (b) Unsay tun-an sa sunod?

¹⁷ Atong tinguha nga daghan pang lalaki ang modawat sa mensahe sa Bibliya. (2 Tim. 3:16, 17) Busa unsaon nato pagkaplag ug mas daghang lalaki diha sa atong ministeryo? Pinaagi sa pagsangyaw sa gabii, sa Sabado ug Dominggo sa hapon, o sa mga pista opisyal dihang daghang lalaki ang naa ra sa balay. Kon posible, mahimo natong estoryahon ang ulo sa panimalay, mga katrabaho nga lalaki, ug ang dili magtutuong mga bana sa atong mga sister sa kongregasyon.

¹⁸ Samtang atong sangyawan ang tanan, makasalig kita nga kadtong nangita sa kamatuoran mamati sa atong mensahe. Mapailobon natong tabangan ang tanang interesado. Apan unsaon nato pagtabang ang bawtismadong mga lalaki sa pagkab-ot ug pagkuwalipikar alang sa pribilehiyo diha sa kongregasyon? Tubagon kini sa sunod artikulo.

[Footnote]

Unsay Imong Tubag?

• Sa unsang paagi matabangan ang mga lalaki nga unahon ang espirituwal nga mga butang?

• Unsaon nato pagtabang ang mga bag-ohan sa pagsagubang sa pagpamit-os?

• Unsay makatabang sa uban aron mabuntog ang pagbating dili takos?

[Mga Pangutana sa Pagtuon]

[Hulagway sa panid 25]

Nangita ka bag kahigayonan nga masangyawan ang mga lalaki?

[Hulagway sa panid 26]

Unsaon nimo pag-andam ang imong estudyante sa Bibliya sa pag-atubang sa mga pagsulay?