“Temporaryong mga Pumoluyo” sa Daotang Kalibotan
“Temporaryong mga Pumoluyo” sa Daotang Kalibotan
“Diha sa pagtuo kini silang tanan . . . nagpahayag sa dayag nga sila mga estranyo ug temporaryong mga pumoluyo sa yuta.”—HEB. 11:13.
1. Unsay giingon ni Jesus bahin sa baroganan sa iyang mga sumusunod maylabot sa kalibotan?
“SILA ania sa kalibotan,” si Jesus miingon bahin sa iyang mga tinun-an. Apan siya nagpatin-aw: “Sila dili bahin sa kalibotan, ingon nga ako dili bahin sa kalibotan.” (Juan 17:11, 14) Busa tin-awng gipakita ni Jesus ang baroganan sa iyang matuod nga mga sumusunod maylabot “niini nga sistema sa mga butang,” kansang diyos mao si Satanas. (2 Cor. 4:4) Bisag nagpuyo niining daotang kalibotan, sila dili bahin niini. Sila samag “langyaw ug temporaryong mga pumoluyo” niining sistemaha.—1 Ped. 2:11.
Nagkinabuhi Ingong “Temporaryong mga Pumoluyo”
2, 3. Nganong ikaingon nga si Enoc, Noe, ug Abraham ug Sara nagkinabuhi ingong “estranyo ug temporaryong mga pumoluyo”?
2 Sukad pa sa sinugdan, ang matinumanong mga alagad ni Jehova lahi kaayo sa mga tawo sa kalibotan. Sa wala pa ang Lunop, si Enoc ug Noe “naglakaw uban sa matuod nga Diyos.” (Gen. 5:22-24; 6:9) Sila maisogong nagwali sa mga paghukom ni Jehova sa daotang kalibotan ni Satanas. (Basaha ang 2 Pedro 2:5; Judas 14, 15.) Kay naglakaw uban sa Diyos diha sa dili diyosnong kalibotan, si Enoc “nakapahimuot sa Diyos” ug si Noe “walay-ikasaway taliwala sa iyang mga katalirongan.”—Heb. 11:5; Gen. 6:9.
3 Agig pagsunod sa sugo sa Diyos, gibiyaan ni Abraham ug Sara ang haruhayng kinabuhi sa Ur sa mga Caldeanhon ug misugot nga magbalhinbalhig puyo sa usa ka langyawng yuta. (Gen. 11:27, 28; 12:1) Si apostol Pablo misulat: “Tungod sa pagtuo si Abraham, sa gitawag siya, misugot sa pag-adto sa usa ka dapit nga gitino nga iyang pagadawaton ingon nga panulondon; ug siya milakaw, bisan pag wala mahibalo kon asa siya paingon. Tungod sa pagtuo siya mipuyo ingon nga usa ka langyaw sa yuta sa saad nga samag diha sa langyaw nga yuta, ug mipuyo sa mga tolda uban kang Isaac ug kang Jacob, ang kauban niyang mga manununod sa mao ra nga saad.” (Heb. 11:8, 9) Bahin sa maong matinumanong mga alagad ni Jehova, si Pablo miingon: “Sa pagtuo kini silang tanan nangamatay, bisan ug wala sila makabaton sa katumanan sa mga saad, apan sila nakakita niini sa halayo ug nahinangop niini ug nagpahayag sa dayag nga sila mga estranyo ug temporaryong mga pumoluyo sa yuta.”—Heb. 11:13.
Pasidaan Alang sa mga Israelinhon
4. Unsay gipasidaan ngadto sa mga Israelinhon una nakapahiluna sa ilang yuta?
4 Ang kaliwat ni Abraham nga mga Israelinhon midaghan ug sa ulahi nahimong nasod nga may balaod ug kaugalingong yuta. (Gen. 48:4; Deut. 6:1) Ang mga Israelinhon dili angayng malimot nga si Jehova ang tinuod nga Tag-iya sa ilang yuta. (Lev. 25:23) Sila samag gipapuyo lang nga obligadong mosunod sa gusto sa Tag-iya. Ilang hinumdoman usab nga “dili sa tinapay lamang mabuhi ang tawo.” Dili nila angayng kalimtan si Jehova tungod sa materyal nga kadagaya. (Deut. 8:1-3) Una nakapahiluna sa ilang yuta, sila gipasidan-an: “Mahitabo nga sa dihang ikaw dad-on ni Jehova nga imong Diyos ngadto sa yuta nga iyang gipanumpa sa imong mga katigulangan nga si Abraham, Isaac ug Jacob nga ihatag kanimo, dagko ug maanindot nga mga siyudad nga dili ikaw ang nagtukod, ug mga balay nga puno sa tanang maayong butang ug nga dili ikaw ang nagpuno, ug kinubkob nga mga atabay nga dili ikaw ang nagkubkob, mga parasan ug kaolibohan nga dili ikaw ang nagtanom, ug ikaw makakaon ug mabusog, magmatngon ka nga dili ka mahikalimot kang Jehova.”—Deut. 6:10-12.
5. Nganong gisalikway ni Jehova ang Israel, ug unsang bag-ong nasod ang iyang gipili?
5 Natinuod gayod ang gipasidaan ni Jehova. Sa adlaw ni Nehemias, ang usa ka grupo sa mga Levihanon naulaw sa paghinumdom sa gihimo sa mga Israelinhon dihang nakapuyo na sa Yutang Saad. Dihang nakabaton nag nindot nga mga balay ug daghang pagkaon ug bino, “sila nangaon ug natagbaw ug nanambok.” Sila mirebelde sa Diyos ug gipamatay pa gani ang mga propeta nga nagpasidaan kanila. Busa gitugyan sila ni Jehova sa ilang kaaway. (Basaha ang Nehemias 9:25-27; Os. 13:6-9) Sa ulahi, ilalom sa pagmando sa Roma, gipatay sa way-pagtuong mga Hudiyo ang gisaad nga Mesiyas! Si Jehova misalikway kanila ug mipilig usa ka bag-ong nasod, ang espirituwal nga Israel.—Mat. 21:43; Buh. 7:51, 52; Gal. 6:16.
“Dili Bahin sa Kalibotan”
6, 7. (a) Unsaon nimo pagpatin-aw ang giingon ni Jesus bahin sa baroganan sa iyang mga sumusunod maylabot sa kalibotan? (b) Nganong angayng bulag ang matuod nga mga Kristohanon sa sistema ni Satanas?
6 Ingon sa gipakita sa sinugdan niining artikuloha, ang Ulo sa Kristohanong kongregasyon nga si Jesu-Kristo tin-awng nagpakita nga ang iyang mga sumusunod angayng dili bahin sa kalibotan ni Satanas. Una pa sa iyang kamatayon, si Jesus miingon sa iyang mga tinun-an: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.”—Juan 15:19.
7 Samtang mikaylap ang mga Kristohanon sa lainlaing dapit, sagopon na ba nila ang binuhatan sa kalibotan ug mahimong bahin niini? Dili. Bisag asa sila nagpuyo, sila angayng bulag sa sistema ni Satanas. Mga 30 ka tuig human mamatay si Kristo, si apostol Pedro misulat sa mga Kristohanon nga nagpuyo sa mga dapit nga ilalom sa pagmando sa Roma: “Mga hinigugma, ako nagtambag kaninyo ingong mga langyaw ug temporaryong mga pumoluyo nga magpadayon kamo sa pag-ayad sa unodnong mga tinguha, nga maoy nagapakigsangka batok sa kalag. Hupti ninyo ang maayong panggawi taliwala sa mga nasod.”—1 Ped. 1:1; 2:11, 12.
8. Giunsa paghubit sa usa ka historyano ang relasyon tali sa unang mga Kristohanon ug sa kalibotan?
8 Sa pagpamatuod nga ang unang mga Kristohanon nagkinabuhi ingong “langyaw ug temporaryong mga pumoluyo” sa Imperyo sa Roma, ang historyanong si Kenneth Scott Latourette misulat: “Ang mga Kristohanon sa unang tulo ka siglo kanunayng gilutos ug sagad kini grabe kaayo . . . Lainlain ang mga akusasyon. Kay wala makigbahin sa paganong mga seremonyas, ang mga Kristohanon gitawag nga mga ateyista. Kay milikay sa kadaghanang kalihokan sa katilingban—sa paganong mga pista, publikong mga kalingawan nga giisip sa mga Kristohanon nga punog paganong mga patuotuo, buhat, ug imoralidad—sila mayubitong gitawag nga mga tigdumot sa tawhanong rasa.”
Wala Bug-os Gamita ang Kalibotan
9. Ingong matuod nga mga Kristohanon, unsay pamatuod nga kita dili “mga tigdumot sa tawhanong rasa”?
9 Unsay kahimtang karon? Sama sa unang mga Kristohanon, kita usab dili bahin “niining daotang sistema sa mga butang.” (Gal. 1:4) Busa kita masaypan sa kadaghanan ug gidumtan pa gani sa uban. Apan dili gayod kita “mga tigdumot sa tawhanong rasa.” Tungod sa atong gugma sa isigkatawo, kita namalaybalay aron masangyawan ang tanan sa “maayong balita sa gingharian [sa Diyos].” (Mat. 22:39; 24:14) Gihimo nato kini kay kombinsido kita nga ang pagmando sa Gingharian ni Jehova ubos ni Kristo hapit nang magtapos sa pagmando sa tawo ug pulihan kinig usa ka matarong nga bag-ong kalibotan.—Dan. 2:44; 2 Ped. 3:13.
10, 11. (a) Sa unsang paagi kita limitadong naggamit sa kalibotan? (b) Unsa ang pipila ka paagi nga ang mabinantayong mga Kristohanon dili bug-os maggamit sa kalibotan?
10 Kay duol na ang kataposan sa kalibotan ni Satanas, nahibalo ang mga alagad ni Jehova nga dili karon ang panahon nga mangagpas ug haruhayng kinabuhi. Atong sundon ang gisulti ni apostol Pablo: “Isulti ko kini, mga igsoon, ang panahong nabilin mubo na. Sukad karon kadtong . . . nanagpamalit manig-ingon kanilang wala magapanag-iya, ug kadtong nagagamit sa kalibotan manig-ingon kanilang wala magagamit niini sa bug-os; kay ang talan-awon niining kalibotana nagakausab.” (1 Cor. 7:29-31) Apan sa unsang paagi gigamit sa mga Kristohanon karon ang kalibotan? Sila naggamit sa modernong teknolohiya ug komunikasyon sa pagpakaylap sa kahibalo sa Bibliya sa tibuok kalibotan diha sa ginatos ka pinulongan. Sila limitadong naggamit sa kalibotan alang sa panginabuhi. Sila mopalit sa gikinahanglang mga butang nga anaa sa kalibotan. Apan ilang gilikayan ang bug-os nga paggamit sa kalibotan. Sa ato pa, ang salapi, kabtangan, ug trabaho dili mao ang labing importante kanila.—Basaha ang 1 Timoteo 6:9, 10.
11 Ang mabinantayong mga Kristohanon dili bug-os maggamit sa kalibotan maylabot sa hataas nga edukasyon. Daghan ang nag-isip sa hataas nga edukasyon ingong tulay alang sa popularidad ug haruhayng kinabuhi. Apan kitang mga Kristohanon nagkinabuhi ingong temporaryong pumoluyo ug dunay lahing tumong. Atong gilikayan ang paghunahunag “dagkong mga butang.” (Jer. 45:5; Roma 12:16) Ingong sumusunod ni Jesus, atong sundon ang iyang pasidaan: “Bukha kanunay ang inyong mga mata ug pagbantay batok sa tanang matang sa hakog nga pangibog, tungod kay bisag ang usa ka tawo adunay kadagaya ang iyang kinabuhi wala magagikan sa mga butang nga iyang gipanag-iya.” (Luc. 12:15) Busa ang batan-ong mga Kristohanon gidasig sa pagkab-ot ug espirituwal nga mga tumong. Mokuha lang silag igong edukasyon nga makasuportar kanila samtang nagpokus sa pag-andam sa ilang kaugalingon sa pag-alagad kang Jehova sa ‘tibuok nilang kasingkasing, kalag, kusog, ug kaisipan.’ (Luc. 10:27) Pinaagi niini, sila mahimong “dato ngadto sa Diyos.”—Luc. 12:21; basaha ang Mateo 6:19-21.
Likayi nga Mabug-atan sa mga Kabalaka sa Kinabuhi
12, 13. Sa unsang paagi ang pagsunod sa giingon ni Jesus sa Mateo 6:31-33 magpalahi kanato sa mga tawo sa kalibotan?
12 Ang mga alagad ni Jehova lahi sa mga tawo sa kalibotan maylabot sa ilang tinamdan sa materyal nga mga butang. Bahin niini, giingnan ni Jesus ang iyang mga sumusunod: “Ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ Kay kining tanan mao ang mga butang nga maikagong ginapangagpas sa mga nasod. Kay ang inyong langitnong Amahan nahibalo nga gikinahanglan ninyo kining tanang butanga. Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang igadugang ra kaninyo.” (Mat. 6:31-33) Daghan sa atong mga igsoon ang nakasinati nga gitagan-an sa atong langitnong Amahan ang ilang panginahanglan.
13 “Ang pagkadiyosnon uban ang pagkakontento maoy dakong ganansiya.” (1 Tim. 6:6, New International Version) Sukwahi kaayo kana sa tinamdan sa kalibotan karon. Pananglitan, dihang magminyo ang mga batan-on, daghan ang nagdahom nga mabatonan dayon nila ang tanan nilang gusto—balay o apartment nga kompletog gamit, nindot nga kotse, ug bag-ong mga gadyet. Apan ang mga Kristohanon nga nagkinabuhi ingong temporaryong pumoluyo dili magtinguha sa mga butang nga labaw sa ilang maarangan. Sa pagkatinuod, dalayegon nga daghan ang nagsakripisyo sa ilang haruhayng kinabuhi aron makagahin ug mas dakong panahon ug kusog sa pag-alagad kang Jehova. Ang uban nag-alagad ingong payunir, Bethelite, nagapanawng magtatan-aw, o misyonaryo. Gipabilhan gayod nato ang ilang kinasingkasing nga pag-alagad kang Jehova!
14. Unsay atong makat-onan sa sambingay ni Jesus bahin sa magpupugas?
14 Sa sambingay ni Jesus bahin sa magpupugas, siya miingon nga “ang kabalaka niining sistema sa mga butang ug ang malimbongong gahom sa mga bahandi” makatuok sa pulong sa Diyos diha sa atong kasingkasing nga tungod niini kita dili mamunga. (Mat. 13:22) Ang pagkinabuhing kontento ingong temporaryong pumoluyo niining kalibotana motabang nato nga dili malit-agan niini. Hinunoa, kini motabang nato sa paghupot ug “yano” nga mata, nga napokus sa Gingharian sa Diyos ug nag-una sa intereses niini sa atong kinabuhi.—Mat. 6:22.
“Ang Kalibotan Nagakahanaw”
15. Unsay gisulti ni apostol Juan nga makaapektar sa panglantaw ug panggawi sa matuod nga mga Kristohanon bahin sa kalibotan karon?
15 Ang usa ka hinungdanong rason nga kitang matuod nga mga Kristohanon magkinabuhi ingong “langyaw ug temporaryong mga pumoluyo” niining kalibotana mao ang atong pagtuo nga mubo na lang ang panahon niini. (1 Ped. 2:11; 2 Ped. 3:7) Kini makaapektar sa atong mga desisyon, tinguha, ug gipangagpas. Gitambagan ni apostol Juan ang mga isigkamagtutuo nga dili higugmaon ang kalibotan o ang mga butang sa kalibotan kay “ang kalibotan nagakahanaw ingon man ang tinguha niini, apan siya nga nagabuhat sa kabubut-on sa Diyos magpabilin hangtod sa kahangtoran.”—1 Juan 2:15-17.
16. Unsaon nato pagpakita nga kita gilain ingong katawhan?
16 Si Jehova miingon sa mga Israelinhon nga kon sila magmasinugtanon kaniya, sila mahimong iyang “linaing katigayonan gikan sa tanang ubang mga katawhan.” (Ex. 19:5) Dihang nagmatinumanon, sila nalahi sa ubang nasod labot sa pagsimba ug pagkinabuhi. Mao usab karon, si Jehova naglain ug usa ka katawhan gikan sa kalibotan ni Satanas. Kita giingnan: ‘Isalikway ang pagkadili-diyosnon ug ang kalibotanong mga tinguha ug pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang, samtang kita nagpaabot sa makalilipay nga paglaom ug sa mahimayaong pagpadayag sa dakong Diyos ug sa atong Manluluwas, si Kristo Jesus, kinsa mihatag sa iyang kaugalingon alang kanato aron sa pagluwas kanato gikan sa tanang matang sa pagkamalapason ug sa paghinlo alang sa iyang kaugalingon ug usa ka katawhan nga iyaha lamang gayod, nga masiboton sa maayong mga buhat.’ (Tito 2:11-14) Kini nga “katawhan” gilangkoban sa mga dinihogan ug sa milyonmilyong “ubang mga karnero” ni Jesus, kinsa nagpaluyo kanila.—Juan 10:16.
17. Nganong ang mga dinihogan ug ubang karnero dili magmahay nga nagkinabuhi ingong temporaryong mga pumoluyo niining daotang kalibotan?
17 Ang “makalilipay nga paglaom” sa mga dinihogan mao ang pagmando uban ni Kristo sa langit. (Pin. 5:10) Dihang maangkon na sa ubang karnero ang kinabuhing dayon sa yuta, sila dili na temporaryong mga pumoluyo sa usa ka daotang kalibotan. Sila makabatog nindot nga mga balay ug dagayang pagkaon ug ilimnon. (Sal. 37:10, 11; Isa. 25:6; 65:21, 22) Dili sama sa mga Israelinhon, sila dili gayod malimot nga kining tanan gikan kang Jehova, “ang Diyos sa tibuok yuta.” (Isa. 54:5) Ang mga dinihogan ug ubang karnero dili gayod magmahay nga sila nagkinabuhi ingong temporaryong mga pumoluyo niining daotang kalibotan.
Unsay Imong Tubag?
• Sa unsang paagi ang matinumanong mga alagad kanhi nagkinabuhi ingong temporaryong mga pumoluyo?
• Sa unsang paagi ang unang mga Kristohanon nagkinabuhi sa ilang panahon?
• Sa unsang paagi ang matuod nga mga Kristohanon limitadong naggamit sa kalibotan?
• Nganong dili kita magmahay nga nagkinabuhi ingong temporaryong pumoluyo niining daotang kalibotan?
[Mga Pangutana sa Pagtuon]
[Hulagway sa panid 18]
Gilikayan sa unang mga Kristohanon ang mapintas ug imoral nga kalingawan
