Ayaw Wad-a ang Imong Kalipay Tungod sa Sakit

HANDURAWA nga pagmata nimo sa buntag nangandoy ka nga matapos dayon ang adlaw. Apan kinahanglang atubangon nimo kini uban ang pisikal o emosyonal nga kasakit. Gani basin makaingon ka sama kang Job: “Mas palabihon pa nako ang kamatayon kay sa tanan nakong pag-antos.” (Job 7:​15, The New English Bible) Komosta kon magpadayon ang maong kahimtang, tingali sa daghang katuigan?

Kana ang kahimtang ni Mepiboset, ang anak sa higala ni Haring David nga si Jonatan. Dihang siya singko anyos pa, siya “nahulog ug nabakol.” (2 Sam. 4:⁠4) Ang iyang kasakit misamot pa dihang siya giakusahan sa ulahi nga nagluib sa hari ug dayon nawad-an sa iyang kabtangan. Apan siya kanunayng nagpakitag maayong ehemplo sa pagsagubang sa balatian, pagbutangbutang, ug kahigawad. Wala niya tugoting makawala kini sa iyang kalipay.​—⁠2 Sam. 9:​6-10; 16:​1-4; 19:​24-30.

Si apostol Pablo maoy laing panig-ingnan. Siya kas-a misulat bahin sa “tunok sa unod” nga iyang giantos. (2 Cor. 12:⁠7) Kini tingali usa ka dugay nang balatian o ang mga tawo nga supak sa iyang pagkaapostol. Bisag hain niini, ang problema nagpabilin ug kinahanglang antoson niya ang pisikal o emosyonal nga kasakit nga dala niini.​—⁠2 Cor. 12:​9, 10.

May mga alagad sa Diyos karon nga nag-antos tungod sa dugay nang sakit o emosyonal nga kapit-os. Sa edad nga 18, si Magdalena nadayagnos nga may systemic lupus erythematosus, diin ang immune system moatake sa kaugalingong mga organo sa lawas. “Nahadlok kaayo ko,” siya miingon. “Paglabay sa panahon, migrabe ang akong kahimtang ug misamot pa kay dili ko mahilisan, luasan kanunay, ug may mga problema sa thyroid.” Sa laing bahin, dili daling mamatikdan ang gisagubang ni Izabela. Matod niya: “Sukad sa pagkabata, naa koy depresyon. Tungod niini ako atakehon sa nerbiyos, maglisod ug ginhawa, ug sakitag tiyan. Sagad luya kaayo ko.”

Pagdawat sa Limitasyon

Ang sakit makapahugno sa imong kinabuhi. Kon mahitabo kana, maayong susihon nimo ang imong kahimtang. Tingali dili sayon ang pagdawat sa mga limitasyon. Si Magdalena miingon: “Nagkagrabe ang akong sakit. Sagad dili ko makabangon. Kay mosugmatsugmat man ang akong sakit, maglisod kog plano. Ang nakapahigawad kaayo nako kay limitado na lang ang akong mahimo sa pag-alagad kang Jehova.”

Si Zbigniew miingon: “Paglabay sa mga tuig, ang rheumatoid arthritis nakapaluya sa akong lawas ug anam-anam nga nagdaot sa akong mga lutahan. Usahay kon grabe ang pagpanghubag, dili nako mahimo bisan ang sayon kaayong buluhaton. Naguol kaayo ko.”

 Pipila ka tuig kanhi, si Barbara nadayagnos nga may tumor sa utok. “Nakasinati kog kalit nga mga kausaban,” siya miingon. “Ako mawad-ag kusog, kanunay sakitag ulo, ug dili maka-concentrate. Tungod sa bag-o nakong mga limitasyon, gisusi ko pag-usab ang akong kahimtang.”

Silang tanan maoy dedikadong mga alagad ni Jehova. Panguna kanila ang pagbuhat sa iyang kabubut-on. Sila bug-os misalig sa Diyos ug nakadawat sa iyang tabang.​—⁠Prov. 3:​5, 6.

Si Jehova Motabang​—⁠Sa Unsang Paagi?

Ayaw hunahunaa nga nasakit ka kay wala ka uyoni sa Diyos. (Lam. 3:33) Tagda ang giantos ni Job bisag siya “walay-ikasaway ug matul-id.” (Job 1:⁠8) Ang Diyos dili mosulay kang bisan kinsa ug daotang mga butang. (Sant. 1:13) Ang tanang sakit​—⁠lakip nianang sa emosyon​—⁠maoy makapasubong kabilin sa atong unang ginikanan, si Adan ug Eva.​—⁠Roma 5:⁠12.

Apan dili pasagdan ni Jehova ug ni Jesus ang mga matarong. (Sal. 34:15) Ilabina sa malisod nga mga gutlo sa atong kinabuhi, mapasalamaton kita nga ang Diyos maoy ‘atong dalangpanan ug salipdanan.’ (Sal. 91:⁠2) Busa dihang magsagubang ug lisod nga mga kahimtang, unsay makatabang aron dili mawala ang imong kalipay?

Pag-ampo: Sama sa matinumanong mga alagad sa Diyos kanhi, ikatugyan mo ang imong mga palas-anon sa atong langitnong Amahan diha sa pag-ampo. (Sal. 55:22) Pinaagi niana, imong masinati “ang kalinaw sa Diyos nga labaw sa tanang panghunahuna.” Kini ‘magbantay sa imong kasingkasing ug gahom sa pangisip.’ (Filip. 4:​6, 7) Ang pagsalig sa Diyos pinaagi sa pag-ampo nakatabang kang Magdalena sa pagsagubang sa iyang nagkagrabeng sakit. Siya miingon: “Dihang ipahungaw ko ang akong pagbati kang Jehova, ako mahupayan ug mobalik ang akong kalipay. Mas nasabtan ko karon kon nganong mosalig sa Diyos adlaw-adlaw.”​—⁠2 Cor. 1:​3, 4.

Sa pagtubag sa imong mga pag-ampo, si Jehova makahatag kanimog kusog pinaagi sa  iyang balaang espiritu, iyang Pulong, ug sa Kristohanong panag-igsoonay. Ayaw dahoma nga milagrosong wad-on sa Diyos ang imong sakit. Apan makasalig ka nga siya mohatag kanimog kaalam ug kusog sa pagsagubang sa matag suliran. (Prov. 2:⁠7) Siya makalig-on kanimo, nga maghatag ug “gahom nga labaw sa kasarangan.”​—⁠2 Cor. 4:⁠7.

Pamilya: Ang mahigugmaon ug mabinationg panimalay makatabang sa pagsagubang sa sakit. Apan hinumdomi nga nag-antos usab ang imong mga minahal. Lagmit sama nimo, sila mibating walay mahimo. Bisan pa niana, wala ka nila pasagdi niining malisod nga panahon. Ang pag-ampo nga magkauban makatabang nimo sa pagpabiling kalmado.​—⁠Prov. 14:⁠30.

Si Barbara miingon bahin sa iyang anak nga babaye ug sa ubang batan-ong sister sa kongregasyon: “Gitabangan ko nila aron makasangyaw. Ang ilang kasibot nakadasig ug nakapalipay nako.” Gipabilhan pag-ayo ni Zbigniew ang pagpaluyo sa iyang asawa. “Siya ang nag-atiman sa halos tanang buluhaton sa balay. Siya ang mag-ilis nako ug magdala sa akong bag para sa tigom ug sa pagsangyaw.”

Isigkamagtutuo: Dihang kauban nato ang mga isigkamagtutuo, kita madasig ug mahupayan. Apan komosta kon dili ka makatambong sa mga tigom tungod sa imong sakit? Si Magdalena miingon: “Giseguro sa kongregasyon nga makabenepisyo gihapon ko sa mga tigom pinaagi sa pagrekord niini. Sagad tawgan ko sa mga igsoon kon unsa pay ilang ikatabang. Padad-an sab ko nilag makapadasig nga mga sulat. Ang ilang paghinumdom ug kahangawa nakatabang nako sa paglahutay.”

Si Izabela, nga may depresyon, miingon: “Sa kongregasyon, daghan kog ‘amahan’ ug ‘inahan’ nga maminaw ug mosabot nako. Ang kongregasyon mao ang akong pamilya, diin ako mobatig kalinaw ug kalipay.”

Kadtong nag-antos ug lainlaing pagsulay dili maayong ‘magpalain sa kaugalingon.’ Hinunoa, ikalipay nila ang pagpakig-uban sa kongregasyon. (Prov. 18:⁠1) Sa ingon, madasig  nila ang uban. Tingali sa sinugdan nagduhaduha ka sa pagsulti sa mga igsoon kon unsay imong panginahanglan. Apan ang mga igsoon gustong masayod niini aron ikapakita nila ang ilang ‘dili-sinalingkapaw nga inigsoong pagbati.’ (1 Ped. 1:22) Mahimo nimong sultihan sila nga nagkinahanglan kag kasakyan paingon sa tigom, gusto kang mouban sa pagsangyaw, o gusto kang may kaestorya. Siyempre dili ta mamugos, hinuon pabilhan nato ang ilang tabang.

Magmapositibo: Ang yawi aron masagubang ang sakit ug dili mawad-ag kalipay sagad nagdepende kanimo. Ang pagkamasulub-on ug kawalay kalipay motultol sa negatibong panghunahuna. Ang Bibliya nag-ingon: “Ang espiritu sa usa ka tawo makaagwanta sa iyang balatian; apan kon bahin sa masulub-on nga espiritu, kinsa ang makaantos niana?”​—⁠Prov. 18:⁠14.

Si Magdalena miingon: “Naningkamot ko nga dili magpokus sa akong mga problema. Pahimuslan nako ang mga adlaw nga maayo ang akong gibati. Madasig ko dihang magbasag mga kasinatian niadtong nagmatinumanon bisan sa grabeng sakit.” Si Izabela napalig-on nga si Jehova nahigugma ug nagpabili kaniya. Siya miingon: “Mibati kong may bili ug may rason nga mabuhi alang kaniya. Duna sab koy maanindot nga kaugmaon.”

Si Zbigniew miingon: “Tungod sa akong sakit, nakakat-on ko nga magmapaubsanon ug magmasinundanon. Kini nagtudlo nako sa pagpakitag hait nga salabotan, maayong panghukom, ug tim-os nga pagpasaylo. Malipayon na ko sa pag-alagad kang Jehova ug wala na mobatig kaluoy sa kaugalingon. Gani nadasig ko nga pauswagon ang akong espirituwalidad.”

Hinumdomi nga nakita ni Jehova ang imong paglahutay. Siya nakasabot sa imong pag-antos ug nahingawa kanimo. Dili niya ‘kalimtan ang imong buhat ug ang gugma nga imong gipakita alang sa iyang ngalan.’ (Heb. 6:10) Hunahunaa kanunay ang iyang saad: “Dili ko gayod ikaw pagabiyaan ni sa bisan unsang paagi pagatalikdan.”​—⁠Heb. 13:⁠5.

Kon maluya ka, palandonga ang maanindot nga paglaom nga mabuhi sa bag-ong kalibotan. Hapit na nimong makita ang mga panalangin nga ipahinabo sa Gingharian sa Diyos dinhi sa yuta!

[Kahon/Mga hulagway sa panid 28, 29]

Nagpadayon sa Pagsangyaw Bisag May Sakit

“Di na ko kalakaw kon way kauban, maong ubanan ko sa akong asawa o ubang igsoon sa pagsangyaw. Nagsag-ulo kog mga presentasyon ug teksto sa Bibliya.”​—⁠Jerzy, dili makakita.

“Gawas sa pagsangyaw pinaagig telepono, tigpadala kog mga sulat ug nakigsinulatay sa pipila ka interesado. Samtang naa sa ospital, kanunay kong ibutang ang Bibliya ug mga publikasyon duol sa katre. Kini nakatabang sa pagsugod ug mga panaghisgot.”​—⁠Magdalena, may systemic lupus erythematosus.

“Ganahan kong mamalaybalay, pero kon dili ko makahimo, mosangyaw ko pinaagig telepono.”​—⁠Izabela, may depresyon.

“Malipay kong magbalikduaw ug mokuyog sa mga pagtuon sa Bibliya. Kon maayo ang akong paminaw, mamalaybalay ko.”​—⁠Barbara, may tumor sa utok.

“Gaan ra nga bag ang akong dad-on inigsangyaw. Ayha ra ko mouli kon di na nako kaya ang kasakit sa akong mga lutahan.”—Zbigniew, may rheumatoid arthritis.

[Hulagway sa panid 30]

Ang mga bata ug hamtong makahatag ug pagdasig