Gigiyahan sa Espiritu sa Diyos—Sa Unang Siglo ug Karon
Gigiyahan sa Espiritu sa Diyos—Sa Unang Siglo ug Karon
“Kining tanan nga mga pagpalihok gihimo sa usa ug mao ra nga espiritu.” —1 COR. 12:11.
1. Unsay atong tun-an niining artikuloha?
MAKAPAUKYAB gayod ang mga hitabo sa Pentekostes 33 K.P.! (Buh. 2:1-4) Pinaagi sa pagbubo sa balaang espiritu niadtong adlawa, ang Diyos mihimog dakong kausaban sa pagpakiglabot sa iyang mga alagad. Sa miaging artikulo, atong gitun-an kon sa unsang paagi ang espiritu sa Diyos mitabang sa matinumanong mga alagad kanhi sa pagtuman sa lisod nga mga asaynment. Apan unsay kalainan sa paglihok sa espiritu sa Diyos sa karaang panahon ug sa unang siglo? Ug sa unsang paagi ang mga Kristohanon makabenepisyo sa paglihok sa balaang espiritu karon? Atong tan-awon.
“Tan-awa! Ang Ulipong Babaye ni Jehova!”
2. Sa unsang paagi nasinatian ni Maria ang paglihok sa balaang espiritu?
2 Si Maria presente sa itaas nga lawak sa Jerusalem dihang gibubo ang balaang espiritu. (Buh. 1:13, 14) Apan kapin sa 30 ka tuig una pa niana, nasinatian niya ang talagsaong paglihok sa espiritu ni Jehova. Gibalhin ni Jehova ang kinabuhi sa iyang Anak gikan sa langit nganhi sa yuta “pinaagi sa balaang espiritu,” mao nga namabdos si Maria bisag siya ulay pa.—Mat. 1:20.
3, 4. Unsang tinamdan ang gipakita ni Maria, ug unsaon nato siya pagsundog?
3 Nganong gipili ni Jehova si Maria? Human sultihi sa manulonda sa kabubut-on ni Jehova labot kaniya, si Maria miingon: “Tan-awa! Ang ulipong babaye ni Jehova! Matuman unta kana kanako sumala sa imong gipahayag.” (Luc. 1:38) Sa pag-ingon niini, gipakita ni Maria ang maayong tinamdan nga nakita nang daan ni Jehova. Andam siyang modawat kon unsay kabubut-on sa Diyos. Wala na siya mangutana kon unsa unyay ikasulti sa mga tawo bahin sa iyang pagmabdos o sa posibleng epekto niini sa iyang pamanhonon. Pinaagi sa pagtawag sa iyang kaugalingon nga ulipon, gipakita ni Maria nga bug-os siyang nagsalig kang Jehova.
4 Nabug-atan ka ba usahay sa mga pagsulay o responsabilidad sa pag-alagad sa Diyos? Kita angayng mangutana: ‘Bug-os ba kong nagsalig nga palamposon ni Jehova ang mga butang sumala sa iyang kabubut-on? Andam ba gyod kong motuman sa gustong ipabuhat ni Jehova kanako?’ Makaseguro ka nga ang Diyos mohatag sa iyang espiritu niadtong bug-os mosalig kaniya ug magpasakop sa iyang pagkasoberano.—Buh. 5:32.
Si Pedro Gitabangan sa Balaang Espiritu
5. Sa unsang paagi nasinati ni Pedro ang paglihok sa balaang espiritu una pa ang Pentekostes 33 K.P.?
5 Sama ni Maria, nasinati ni apostol Pedro ang gamhanang paglihok sa balaang espiritu una pa ang Pentekostes 33 K.P. Si Jesus naghatag kaniya ug sa ubang apostoles ug awtoridad sa paghingilin ug mga demonyo. (Mar. 3:14-16) Bisag ang Bibliya wala maghatag ug daghang detalye, mopatim-aw nga gigamit ni Pedro ang maong awtoridad. Dugang pa, dihang gidapit ni Jesus si Pedro sa paglakaw paingon niya diha sa Dagat sa Galilea, nahimo kana ni Pedro tungod sa balaang espiritu. (Basaha ang Mateo 14:25-29.) Tin-aw nga misalig si Pedro sa balaang espiritu sa paghimog gamhanang mga buhat. Sa dili madugay, kana nga espiritu molihok kang Pedro ug sa ubang tinun-an sa bag-ong mga paagi.
6. Pinaagi sa espiritu sa Diyos, unsay nahimo ni Pedro panahon ug human sa Pentekostes 33 K.P.?
6 Sa Pista sa Pentekostes 33 K.P., si Pedro ug ang uban gihatagag milagrosong katakos sa pagsulti sa mga pinulongan niadtong miduaw sa Jerusalem. Dayon si Pedro mibarog ug namulong sa panon. (Buh. 2:14-36) Tinuod siya usahay madalidalion o hadlokan, apan ang balaang espiritu naghatag kaniyag kaisog sa pagpamatuod bisan pag gilutos ug gihulga. (Buh. 4:18-20, 31) Pinaagi niini, siya gihatagag linaing kahibalo. (Buh. 5:8, 9) Ug gihatagan pa gani siyag gahom sa pagbanhaw.—Buh. 9:40.
7. Unsang mga pagtulon-an ni Jesus ang nasabtan lang ni Pedro human siya dihogi?
7 Una pa ang Pentekostes, nasabtan na ni Pedro ang daghang kamatuoran nga gitudlo ni Jesus. (Mat. 16:16, 17; Juan 6:68) Apan may pipila ka pagtulon-an ni Jesus nga dili pa tin-aw kaniya. Pananglitan, wala niya masabti nga si Kristo banhawon ingong espiritu sa ikatulong adlaw ug nga ang Gingharian atua sa langit. (Juan 20:6-10; Buh. 1:6) Bag-o kaniya ang ideya nga ang mga tawo mahimong espiritu ug magmando sa usa ka langitnong Gingharian. Dihang siya gidihogan sa balaang espiritu ug gihatagag langitnong paglaom, ayha pa niya nasabtan ang maong mga pagtulon-an ni Jesus.
8. Unsang kahibalo ang nabatonan sa mga dinihogan ug “ubang mga karnero”?
8 Human dihogi sa balaang espiritu ang mga tinun-an ni Jesus, nasabtan nila ang mga pagtulon-an nga wala nila masabti kaniadto. Ang balaang espiritu nag-inspirar sa mga magsusulat sa Kristohanon Gregong Kasulatan sa pagpatin-aw sa talagsaong mga bahin sa katuyoan ni Jehova alang sa atong kaayohan. (Efe. 3:8-11, 18) Karon, ang mga dinihogan ug “ubang mga karnero” parehong nagtuon ug nakasabot niini nga mga kamatuoran. (Juan 10:16) Gipabilhan mo ba ang kahibalo ug pagsabot sa Pulong sa Diyos nga imong nabatonan tungod sa balaang espiritu?
Si Pablo “Napuno sa Balaang Espiritu”
9. Unsay nalampos ni Pablo pinaagi sa balaang espiritu?
9 Mga usa ka tuig human sa Pentekostes 33 K.P., may lain pang nakadawat sa gasa sa balaang espiritu. Siya si Saulo, nga sa ulahi nailhang si Pablo. Ang espiritu naglihok diha kaniya sa mga paagi nga kita makabenepisyo karon. Siya giinspirar sa pagsulat sa 14 ka basahon sa Bibliya. Ug sama kang Pedro, ang espiritu sa Diyos nagtabang kang Pablo sa pagsabot ug sa pagsulat nga tin-aw bahin sa paglaom nga imortal ug dili madunot nga kinabuhi sa langit. Pinaagi sa balaang espiritu, si Pablo nang-ayo, nanghingilin ug mga demonyo, ug nagbanhaw pa ganig patay! Apan ang gahom nga nadawat ni Pablo nagtabang kaniya sa pagbuhat sa mas importanteng butang. Ang mga alagad sa Diyos karon nakadawat ug gahom aron mahimo ang samang butang, bisag dili sa milagrosong paagi.
10. Sa unsang paagi ang balaang espiritu nakaapektar sa katakos sa pagsulti ni Pablo?
10 Si Pablo, nga “napuno sa balaang espiritu,” maisogong nakigsulti sa usa ka barangan. Pagkadakog epekto niini sa prokonsul sa Cipro nga naminaw kanila! Siya midawat sa kamatuoran, “kay siya nahingangha sa pagtulon-an ni Jehova.” (Buh. 13:8-12) Tin-aw nga nahibalo si Pablo sa kahinungdanon sa balaang espiritu kon bahin sa pagsulti sa kamatuoran. (Mat. 10:20) Sa ulahi, iyang gihangyo ang kongregasyon sa Efeso nga mag-ampo alang kaniya aron hatagan siyag “katakos sa pagsulti.”—Efe. 6:18-20.
11. Sa unsang paagi si Pablo gigiyahan sa espiritu sa Diyos?
11 Ang balaang espiritu nagtabang kang Pablo sa pagsulti, apan usahay kini nagdili kaniya sa pagsulti diha sa pipila ka dapit. Sa iyang misyonaryong mga panaw, si Pablo gigiyahan sa espiritu sa Diyos. (Buh. 13:2; basaha ang Buhat 16:6-10.) Karon gigamit gihapon ni Jehova ang iyang espiritu sa paggiya sa buluhatong pagsangyaw. Sama ni Pablo, ang tanang masinundanong alagad ni Jehova maningkamot sa pagmantala sa kamatuoran uban ang kaisog ug kasibot. Bisag ang paggiya sa Diyos dili kaayo dayag karon kon itandi sa adlaw ni Pablo, makaseguro kita nga si Jehova naggamit sa iyang balaang espiritu aron ang mga takos makadungog sa kamatuoran.—Juan 6:44.
‘Nagkadaiyang Paglihok’
12-14. Ang espiritu ba sa Diyos molihok sa samang paagi sa tanan niyang alagad? Ipatin-aw.
12 Makapadasig gayod kanato ang mga asoy kon sa unsang paagi gipanalanginan ni Jehova ang kongregasyon sa mga dinihogan sa unang siglo. Hinumdomi ang gipamulong ni Pablo sa kongregasyon sa Corinto bahin sa milagrosong mga gasa sa espiritu: “Karon adunay nagkadaiyang mga gasa, apan adunay mao ra nga espiritu; ug adunay nagkadaiyang mga pag-alagad, apan adunay mao ra nga Ginoo; ug adunay nagkadaiyang mga pagpalihok, apan mao ra nga Diyos nga naghimo sa tanang pagpalihok diha sa tanang tawo.” (1 Cor. 12:4-6, 11) Oo, ang balaang espiritu molihok diha sa lainlaing alagad sa Diyos alang sa espesipikong katuyoan. Sa pagkatinuod, ang balaang espiritu naggiya sa “gamayng panon” ug sa “ubang mga karnero” ni Kristo. (Luc. 12:32; Juan 10:16) Apan dili kini kanunayng molihok sa samang paagi sa matag membro sa kongregasyon.
13 Pananglitan, ang mga ansiyano gitudlo pinaagi sa balaang espiritu. (Buh. 20:28) Apan dili tanang dinihogan nag-alagad ingong ansiyano. Unsay atong ikahinapos niini? Nga ang espiritu sa Diyos naglihok sa lainlaing paagi sa matag membro sa kongregasyon.
14 Ang espiritu nga nagtisok diha sa mga dinihogan nga sila maoy sinagop nga mga anak sa Diyos mao ang samang espiritu nga gigamit ni Jehova sa pagbanhaw sa iyang bugtong nga Anak ngadto sa imortal nga kinabuhi sa langit. (Basaha ang Roma 8:11, 15.) Kini ang samang espiritu nga gigamit ni Jehova sa paglalang sa uniberso. (Gen. 1:1-3) Kini usab ang gigamit ni Jehova sa paghatag ug katakos kang Bezalel sa paghimo sa linaing mga kasangkapan sa tabernakulo. Kini usab ang naghatag ug talagsaong kusog kang Samson ug ang nagpaposible kang Pedro sa paglakaw sa tubig. Busa ang pagkabaton sa espiritu sa Diyos lahi sa pagkadinihogan sa espiritu. Ang pagdihog maoy usa lang ka espesyal nga paagi sa paglihok sa espiritu, ug ang Diyos ang mopili kon kinsay iyang dihogan.
15. Ang pagdihog ba sa espiritu magpadayon hangtod sa hangtod? Ipatin-aw.
15 Ang balaang espiritu sa Diyos dugay nang naglihok sa lainlaing paagi diha sa iyang matinumanong mga alagad, oo, sulod na sa libolibo ka tuig una pa sugdi ang pagdihog sa espiritu. Sa Pentekostes 33 K.P., gisugdan kanang bag-ong paglihok sa espiritu, apan dili kana magpadayon hangtod sa hangtod. Ang pagdihog sa espiritu matapos, apan ang balaang espiritu padayong maglihok sa katawhan sa Diyos aron ilang mabuhat ang iyang kabubut-on sa walay kataposan.
16. Unsay ginahimo karon sa mga alagad sa Diyos sa tabang sa iyang espiritu?
16 Unsay ginahimo karon sa mga alagad ni Jehova sa tabang sa balaang espiritu? Ang Pinadayag 22:17 nagtubag: “Ang espiritu ug ang pangasaw-onon nagpadayon sa pag-ingon: ‘Umari ka!’ Ug si bisan kinsa nga nagpatalinghog paingna: ‘Umari ka!’ Ug si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.” Kay gipalihok sa espiritu sa Diyos, ang mga Kristohanon karon nagdapit kang “bisan kinsa nga may tinguha” sa pag-inom sa tubig sa kinabuhi. Ang mga dinihogan maoy nanguna niini nga pagdapit, ug miduyog kanila ang ubang mga karnero. Kining duha ka grupo nakigtambayayong sa samang balaang espiritu sa pagpalampos niini nga buluhaton. Silang tanan nagpahinungod kang Jehova pinaagi sa pagpabawtismo “sa ngalan sa Amahan ug sa Anak ug sa balaang espiritu.” (Mat. 28:19) Ug silang tanan nagpagiya sa espiritu sa Diyos, nga nagpasundayag sa bunga niini. (Gal. 5:22, 23) Sa tabang sa balaang espiritu, sila naningkamot sa pagkinabuhing hinlo uyon sa sukdanan sa Diyos.—2 Cor. 7:1; Pin. 7:9, 14.
Padayong Pangayoa ang Balaang Espiritu
17. Unsay pamatuod nga anaa kanimo ang espiritu sa Diyos?
17 Sa langit man o sa yuta ang imong paglaom, si Jehova makahatag nimog “gahom nga labaw sa kasarangan” aron imong mahuptan ang integridad ug madawat ang ganti. (2 Cor. 4:7) Tingali biaybiayon ka tungod sa imong padayong pagsangyaw. Apan hinumdomi nga ‘kon gipakaulawan ka tungod sa ngalan ni Kristo, ikaw malipayon, tungod kay ang espiritu sa himaya, bisan ang espiritu sa Diyos, anaa kanimo.’—1 Ped. 4:14.
18, 19. Sa unsang paagi si Jehova motabang kanimo pinaagi sa balaang espiritu, ug unsay imong determinasyon bahin niini?
18 Ang balaang espiritu maoy gasa sa Diyos niadtong sinsero nga nagapangayo niini. Kini makapauswag sa imong katakos ug sa imong tinguha nga moalagad sa Diyos kutob sa maarangan. “Ang Diyos mao ang usa nga, alang sa iyang ikahimuot, nagalihok sa sulod ninyo aron kamo magtinguha ug ingon man mobuhat.” Ang balaang espiritu, uban sa atong tim-os nga paningkamot nga ‘mangupot nga hugot sa pulong sa kinabuhi,’ magtugot kanato “sa pagpanlimbasog sa [atong] kaugalingong kaluwasan uban ang kahadlok ug pagpangurog.”—Filip. 2:12, 13, 16.
19 Nan uban ang bug-os nga pagsalig sa espiritu sa Diyos, magmakugihon sa pagtuman sa imong asaynment, magmahanas niini, ug pangayog tabang kang Jehova. (Sant. 1:5) Siya motabang kanimo sa pagsabot sa iyang Pulong, pagsagubang sa mga problema, ug sa pagsangyaw sa maayong balita. “Padayon sa pagpangayo, ug kini igahatag kaninyo; padayon sa pagpangita, ug kamo makakaplag; padayon sa pagpanuktok, ug kini pagabuksan kaninyo,” ug lakip niini ang pagdawat sa balaang espiritu. (Luc. 11:9, 13) Busa, padayon sa pag-ampo kang Jehova nga mahisama ka sa matinumanong mga alagad kanhi kinsa gigiyahan sa balaang espiritu.
Makapatin-aw Ka Ba?
• Sama ni Maria, unsang tinamdan ang atong ikapakita nga magdalag panalangin?
• Sa unsang paagi si Pablo gigiyahan sa espiritu sa Diyos?
• Sa unsang paagi ang mga alagad sa Diyos karon gigiyahan sa espiritu?
[Mga Pangutana sa Pagtuon]
[Hulagway sa panid 24]
Ang espiritu sa Diyos nagtabang kang Pablo nga maisogong makigsulti sa usa ka barangan
[Hulagway sa panid 26]
Ang balaang espiritu motabang sa mga Kristohanon karon, sa langit man o sa yuta ang ilang paglaom
