Matinumanong mga Alagad Kanhi—Gigiyahan sa Espiritu sa Diyos

“Ang Soberanong Ginoong Jehova mismo nagpadala kanako, bisan sa iyang espiritu.”​—⁠ISA. 48:⁠16.

1, 2. Unsay gikinahanglan aron makapasundayag ug pagtuo? Sa unsang paagi kita madasig sa pagtuon sa matinumanong mga alagad kanhi?

BISAG daghan ang nagpasundayag niini sukad sa adlaw ni Abel, “ang pagtuo wala mabatoni sa tanang tawo.” (2 Tes. 3:⁠2) Busa sa unsang paagi mabatonan kining hiyasa, ug unsay makatabang sa usa aron magmatinumanon? Kinahanglan nato ang kahibalo sa Bibliya kay ang “pagtuo mosunod sa butang nga nadungog.” (Roma 10:17) Kini maoy bahin sa bunga sa balaang espiritu sa Diyos. (Gal. 5:​22, 23) Busa aron makapasundayag ug pagtuo, kinahanglan nato ang balaang espiritu.

² Ang tawo wala mahimugso nga may pagtuo. Ang matinumanong mga alagad diha sa Bibliya “may pagbati nga sama kanato.” (Sant. 5:17) Sila nagduhaduha, dili segurado sa ilang katakos, ug may kahuyangan apan sila “nahimong gamhanan” pinaagi sa espiritu sa Diyos sa pag-atubang sa mga pagsulay. (Heb. 11:34) Dihang tun-an nato kon sa unsang paagi ang espiritu ni Jehova nagtabang kanila, kita madasig nga padayong magmatinumanon, ilabina nga daghan kaayo karon ang makapahuyang sa atong pagtuo.

Si Moises Gihatagag Gahom sa Espiritu sa Diyos

3-5. (a) Giunsa nato pagkahibalo nga si Moises gitabangan sa balaang espiritu? (b) Unsay atong makat-onan sa paagi sa paghatag ni Jehova ug espiritu kang Moises?

³ Sa tanang tawo nga nabuhi sa 1513 W.K.P., si Moises ang “labing maaghop.” (Num. 12:⁠3) Siya gihatagag bug-at nga responsabilidad sa pag-atiman sa nasod sa Israel. Sa tabang sa espiritu sa Diyos, si Moises nanagna, naghukom, nagsulat, nanguna, ug naghimog mga milagro. (Basaha ang Isaias 63:​11-14.) Apan kas-a si Moises mireklamo nga bug-at ra kaayo ang iyang buluhaton. (Num. 11:​14, 15) Busa si Jehova ‘nagkuha ug bahin sa espiritu’ nga naa kang Moises ug gibutang kini sa 70 ka lalaki sa pagtabang kaniya. (Num. 11:​16, 17) Bisag daw bug-at kaayo ang iyang buluhaton, sa pagkatinuod siya wala mag-inusara sa pagpas-an niini. Ug ang 70 ka lalaki wala usab magpas-an niini nga silasila ra.

⁴ Si Moises gihatagag igong balaang espiritu sa pagpalampos sa buluhaton. Human sa maong kausaban, nabatonan gihapon ni Moises ang espiritu nga iyang gikinahanglan. Siya wala makulangi, ug ang 70 ka ansiyano wala manobra niini. Si Jehova maghatag sa iyang espiritu sumala sa atong gikinahanglan sa matag kahimtang. “Dili siya mohatag sa espiritu nga sinukod” apan mohatag “gikan sa iyang kabug-osan.”​—⁠Juan 1:16; 3:⁠34.

⁵ Ikaw ba nag-atubang ug mga pagsulay? Kulang na ba ang imong panahon tungod sa nagkadaghang buluhaton? Naglisod ka ba sa pagtagana sa espirituwal ug pisikal nga panginahanglan sa imong pamilya samtang nagdako ang imong galastohan o nagkaluya ang imong panglawas? Duna ka bay bug-at nga responsabilidad sa kongregasyon? Makasalig ka nga pinaagi sa iyang espiritu, ang Diyos makalig-on  kanimo sa pagsagubang sa matag situwasyon.​—⁠Roma 15:⁠13.

Si Bezalel Gitabangan sa Balaang Espiritu

6-8. (a) Unsay nalampos ni Bezalel ug Oholiab tungod sa espiritu sa Diyos? (b) Unsay pamatuod nga si Bezalel ug Oholiab gigiyahan sa espiritu sa Diyos? (c) Nganong ilabinang makapadasig ang kasinatian ni Bezalel?

⁶ Ang kasinatian sa katalirongan ni Moises nga si Bezalel nagpakita kon sa unsang paagi molihok ang espiritu sa Diyos. (Basaha ang Exodo 35:​30-35.) Si Bezalel gitudlo nga manguna sa paghimo sa mga kasangkapan sa tabernakulo. May kasinatian na ba siya niini una gihatagan sa maong dakong proyekto? Posible. Apan lagmit ang iyang kinaulahiang trabaho mao ang paghimog tisa para sa mga Ehiptohanon. (Ex. 1:​13, 14) Busa unsaon ni Bezalel pagpalampos kining lisod nga proyekto? Si Jehova ‘nagpuno kaniya sa espiritu sa Diyos sa kaalam, sa pagsabot ug sa kahibalo ug sa tanang matang sa kahanas sa pagbuhat ug pagdisenyog mga galamiton aron sa paghimo sa tanang matang sa binatid nga pagkabuhat nga mga kagamitan.’ Ang katakos ni Bezalel gipauswag pa sa balaang espiritu. Tinuod usab kana kang Oholiab. Lagmit sila hanas kaayo kay napalampos nila ang ilang buluhaton ug nakatudlo pa sa uban.

⁷ Ang laing pamatuod nga si Bezalel ug Oholiab gigiyahan sa espiritu sa Diyos mao ang talagsaong kalig-on sa ilang gihimo. Kini gigamit gihapon mga 500 ka tuig sa ulahi. (2 Cron. 1:​2-6) Dili sama sa mga tiggama karon, si Bezalel ug Oholiab dili interesadong mainila tungod sa ilang gihimo. Buot nilang mapasidunggan si Jehova sa tanan nilang nalampos.​—⁠Ex. 36:​1, 2.

⁸ Karon may buluhaton tingali kita nga nagkinahanglag linaing kahanas, sama sa pagpanukod, pag-imprenta, pag-organisar ug kombensiyon, pag-apod-apod ug hinabang sa mga biktima sa katalagman, ug sa pagpakigsulti sa mga doktor ug kawani sa ospital bahin sa atong baroganan labot sa dugo. Usahay kini gihimo sa hanas nga mga igsoon, apan sagad kini gidumala sa mga boluntaryo nga wala kaayoy kasinatian sa maong buluhaton. Ang espiritu sa Diyos maoy nagpalampos sa ilang mga paningkamot. Nagpanuko ka ba sa pagdawat ug asaynment sa pag-alagad kang Jehova, nga mibating mas kuwalipikado ang uban kay kanimo? Hinumdomi, ang espiritu ni Jehova makapauswag sa imong kahibalo ug katakos ug makatabang kanimo sa pagtuman sa bisan unsang buluhaton nga iyang ihatag.

Si Josue Milampos sa Tabang sa Balaang Espiritu

9. Unsay giatubang sa mga Israelinhon human sa paggula sa Ehipto, ug unsang pangutana ang motungha?

⁹ Gigiyahan usab sa espiritu sa Diyos ang usa ka katalirongan ni Moises ug Bezalel. Wala madugay human sa paggula sa Ehipto, gisulong sa mga Amalekanhon ang katawhan sa Diyos. Ang mga Israelinhon wala pa sukad makiggubat, apan karon kinahanglan na silang makigsangka ingong gawasnong katawhan. (Ex. 13:17; 17:⁠8) Kinahanglang may manguna kanila sa pagpakiggubat. Apan kinsa?

10. Nganong si Josue ug ang mga Israelinhon midaog sa gubat?

¹⁰ Si Josue ang gipili. Apan kon hisgotan ang iyang kanhing trabaho aron mokuwalipikar sa maong asaynment, unsay iyang ikasulti? Nga siya usa ka ulipon nga tighimog tisa? Tigkuhag mana? Tinuod, ang apohan ni Josue nga si Elisama maoy pangulo sa tribo ni Epraim ug lagmit nanguna sa 108,100 ka sundalo sa ilang dibisyon sa Israel. (Num. 2:​18, 24; 1 Cron. 7:​26, 27) Apan gisugo ni Jehova si Moises nga pilion si Josue nga manguna sa kasundalohan sa pagpukan sa kaaway, dili si Elisama o ang anak niini nga si Nun. Halos tibuok adlaw ang panaggubat. Kay si Josue nagmasinugtanon sa Diyos ug nagpagiya sa balaang espiritu, ang Israel midaog.​—⁠Ex. 17:​9-13.

11. Sa unsang paagi kita molampos sa atong pag-alagad sama kang Josue?

¹¹ Sa ulahi, si Josue nga “napuno sa espiritu sa kaalam” mipuli kang Moises. (Deut. 34:⁠9)  Ang balaang espiritu wala maghatag kaniyag katakos sa pagpanagna o paghimog mga milagro sama kang Moises. Apan kini nagtabang kang Josue sa pagpanguna sa Israel sa pagpakiggubat aron mailog ang Canaan. Karon, kita tingali mobating dili eksperyensiyado o kuwalipikado sa usa ka buluhaton diha sa atong pag-alagad. Apan sama kang Josue, molampos kita kon sundon pag-ayo ang instruksiyon sa Diyos.​—⁠Jos. 1:​7-9.

“Ang Espiritu ni Jehova Milimin Kang Gideon”

12-14. (a) Unsay gipadayag sa kadaogan sa 300 ka sundalo batok sa dakong kasundalohan sa Midian? (b) Giunsa paglig-on ni Jehova si Gideon? (c) Unsang tabang ang gihatag sa Diyos karon?

¹² Human mamatay si Josue, padayong gipakita ni Jehova ang iyang gahom sa paglig-on sa mga matinumanon. Ang basahon sa Mga Maghuhukom napunog mga asoy bahin sa mga tawo nga “gikan sa maluya nga kahimtang nahimong gamhanan.” (Heb. 11:34) Pinaagi sa balaang espiritu, ang Diyos nagtabang kang Gideon sa pagpakiggubat alang sa Israel. (Maghu. 6:34) Gamay ra ang sundalo ni Gideon kon itandi sa mga Midianhon​—⁠usa batok sa upat ka Midianhon. Apan alang kang Jehova daghan ra kaayo ang sundalo ni Gideon. Kaduha niya sugoa si Gideon nga kunhoran pa ang iyang mga sundalo hangtod nga mius-os kini sa gidaghanong usa ka Israelinhon batok sa 450 ka Midianhon. (Maghu. 7:​2-8; 8:10) Giuyonan ni Jehova ang maong gidaghanon. Busa kon modaog ang mga Israelinhon, walay makapanghambog nga tungod kini sa ilang kusog o kaalam.

¹³ Andam na si Gideon ug ang iyang kasundalohan. Kon apil ka nianang gamayng grupo, mobati ka bang luwas kay gipapauli na ang mga hadlokan ug dili mabinantayon, o mabalaka ka sa kon unsay mahitabo? Makaseguro kita nga si Gideon misalig kang Jehova. Iyang gituman ang gisugo kaniya! (Basaha ang Maghuhukom 7:​9-14.) Si Jehova wala masuko dihang si Gideon nangayog ilhanan nga Siya magpaluyo kaniya. (Maghu. 6:​36-40) Hinuon, gipalig-on niya ang pagtuo ni Gideon.

¹⁴ Walay limitasyon ang gahom ni Jehova sa pagluwas. Siya makaluwas sa iyang katawhan sa bisan unsang lisod nga situwasyon. Mahimo gani niyang gamiton bisan kadtong daw huyang o walay mahimo. Usahay mobati kitang daghan kaayo ang kaaway o wala nay makatabang nato. Dili nato dahomon nga ang Diyos milagrosong maghatag ug ilhanan sama sa nadawat ni Gideon, apan siya makahatag natog giya ug paghupay pinaagi sa Bibliya ug sa kongregasyon nga giniyahan sa iyang espiritu. (Roma 8:​31, 32) Ang mahigugmaong mga saad ni Jehova maglig-on sa atong pagtuo ug magkombinsir nato nga siya gayod ang atong Magtatabang!

“Ang Espiritu ni Jehova Mikunsad Kang Jepte”

15, 16. Nganong ang anak ni Jepte andam mosakripisyo, ug sa unsang paagi kini makadasig sa mga ginikanan?

¹⁵ Tagda ang laing pananglitan. Dihang ang mga Israelinhon kinahanglang makiggubat sa mga Ammonhanon, ang espiritu ni Jehova “mikunsad kang Jepte.” Kay gustong makadaog aron madayeg si Jehova, si Jepte nanaad nga kon modaog sila batok sa Ammon, ang unang mogula sa iyang balay inig-uli niya iyang ihatag kang Jehova. Sa iyang pag-uli human makadaog, ang iyang anak nga babaye ang unang misugat kaniya. (Maghu. 11:​29-31, 34) Nakurat ba niini si Jepte? Lagmit wala, kay usa ra ang iyang anak. Gituman niya ang iyang panaad pinaagi sa pagpadala sa iyang anak sa Shilo aron moalagad sa sangtuwaryo ni Jehova. Ingong maunongong magsisimba, ang anak ni Jepte nahibalo nga angayng tumanon sa iyang amahan ang iyang panaad. (Basaha ang Maghuhukom 11:36.) Ang espiritu ni Jehova nagpalig-on kanila.

¹⁶ Nganong ang anak ni Jepte andam mosakripisyo?  Walay duhaduha ang iyang pagtuo napalig-on tungod sa kasibot ug debosyon sa iyang amahan. Mga ginikanan, makita sa inyong mga anak ang inyong panig-ingnan. Ang inyong mga desisyon magpadayag nga kamo nagtuo sa inyong gisulti. Maobserbahan nila ang inyong sinserong pag-ampo, epektibong pagpanudlo, ug maayong panig-ingnan sa pag-alagad kang Jehova. Kini makatabang kanila nga tinguhaon usab ang pag-alagad kang Jehova. Makapalipay gayod kini kaninyo!

“Ang Espiritu ni Jehova Milihok” Kang Samson

17. Unsay nahimo ni Samson tungod sa espiritu sa Diyos?

¹⁷ Tagda ang laing pananglitan. Dihang ang Israel nabihag sa mga Filistehanon, “ang espiritu ni Jehova nagpalihok” kang Samson sa pagluwas sa Israel. (Maghu. 13:​24, 25) Ang Diyos naghatag kang Samson ug talagsaong kusog. Dihang nakombinsir sa mga Filistehanon ang ubang Israelinhon sa pagdakop kang Samson, “ang espiritu ni Jehova milihok diha kaniya, ug ang mga pisi sa iyang mga bukton nahimong sama sa mga hilo nga lino nga nasunog sa kalayo, mao nga ang iyang mga gapos nangalugtas gikan sa iyang mga kamot.” (Maghu. 15:14) Bisan pag sa ulahi nawad-ag kusog tungod sa iyang sayop nga desisyon, si Samson nahimong kusganon “tungod sa pagtuo.” (Heb. 11:​32-34; Maghu. 16:​18-21, 28-30) Tungod sa maong kahimtang, ang espiritu ni Jehova milihok kang Samson sa talagsaong paagi. Kini nga asoy makadasig gayod kanato. Sa unsang paagi?

18, 19. (a) Unsay gipasalig kanato sa kasinatian ni Samson? (b) Unsay imong nakat-onan sa matinumanong mga alagad niini nga artikulo?

¹⁸ Kita misalig sa samang balaang espiritu nga nagtabang kang Samson. Gihimo nato kini samtang atong gituman ang buluhaton nga gihatag ni Jesus sa iyang mga sumusunod, nga mao, ‘ang pagwali ngadto sa katawhan ug paghatag ug bug-os nga pamatuod.’ (Buh. 10:42) Tingali malisdan kita sa pagtuman niini nga buluhaton. Pagkamapasalamaton nato nga si Jehova naggamit sa iyang espiritu aron atong matuman ang lainlaing buluhaton nga iyang gisugo! Kita mouyon sa giingon ni propeta Isaias:  “Ang Soberanong Ginoong Jehova mismo nagpadala kanako, bisan sa iyang espiritu.” (Isa. 48:16) Oo, ang Diyos nagpadala kanato pinaagi sa iyang balaang espiritu! Tumanon nato ang buluhaton uban ang pagsalig nga pauswagon ni Jehova ang atong katakos sama sa iyang gihimo kang Moises, Bezalel, ug Josue. Atong gamiton “ang espada sa espiritu, nga mao, ang pulong sa Diyos,” ug mosalig nga siya mohatag kanatog kusog sama sa iyang gihimo kang Gideon, Jepte, ug Samson. (Efe. 6:​17, 18) Kon mosalig kita kang Jehova sa pagbuntog sa mga kababagan, kita mahimong kusganon sa espirituwal sama nga si Samson nahimong kusganon sa pisikal.

¹⁹ Tin-aw nga gipanalanginan ni Jehova kadtong maisogong mibarog sa matuod nga pagsimba. Samtang magpagiya kita sa balaang espiritu sa Diyos, mas molig-on ang atong pagtuo. Busa maayong tun-an usab nato ang pipila ka makaiikag nga hitabo diha sa Kristohanon Gregong Kasulatan. Atong makita sa sunod artikulo kon sa unsang paagi ang espiritu ni Jehova naglihok sa matinumanong mga alagad sa unang siglo, una pa ug human sa Pentekostes 33 K.P.

Nganong nadasig ka sa paglihok sa espiritu sa Diyos kang . . .

• Moises?

• Bezalel?

• Josue?

• Gideon?

• Jepte?

• Samson?

[Mga Pangutana sa Pagtuon]

[Blurb sa panid 22]

Ang espiritu sa Diyos maghimo kanatong kusganon sa espirituwal sama nga si Samson nahimong kusganon sa pisikal

[Hulagway sa panid 21]

Mga ginikanan, ang inyong kasibot dakog epekto sa inyong mga anak