Nahinumdom Ka Ba?

Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

• Kinsa si Olivétan, ug nganong angay kitang mainteres sa iyang gibuhat?

Ang Pranses nga si Pierre Robert nailhan sa maong ngalan. Panahon sa Repormasyon sa ika-16 nga siglo, iyang gihubad ang Bibliya ngadto sa French. Gigamit niya ang terminong “magtatan-aw” inay nga “obispo,” ug “kongregasyon” inay nga “simbahan.” Sa ubay-ubayng teksto, iyang gihubad ang ngalan sa Diyos ingong “Jehova.”​—⁠9/1, panid 18-20.

• Unsay gipasabot sa Diyos dihang miingon siya sa mga Levihanon: “Ako mao ang imong bahin”?

Ang ubang tribo sa Israel nakadawat ug pahat sa yuta, apan ang “bahin” sa mga Levihanon mao si Jehova. (Num. 18:20) Wala silay yutang panulondon, apan nakadawat silag linaing pribilehiyo sa pag-alagad. Bisan pa niana, si Jehova nag-atiman sa ilang materyal nga panginahanglan. Karon, kadtong may pribilehiyo sa pagpauswag sa intereses sa Gingharian makasalig nga ang ilang mga panginahanglan itagana.​—9/15, panid 7-8, 13.

• Giunsa nato pagkahibalo kon kanus-a nalaglag sa mga Babilonyanhon ang karaang Jerusalem?

Ang klasikal nga mga historyano naghatag ug lainlain ug nagkasumpaking mga detalye bahin sa mga hari sa Babilonya ug sa ilang pagmando. Apan ang mga eskolar nagkauyon nga gisakop ni Ciro II ang Babilonya sa 539 W.K.P., usa ka hinungdanong petsa. Ang mga Hudiyo gibuhian, ug nakabalik sa ilang yutang natawhan sa 537 W.K.P. Ang Bibliya nag-ingon nga ang ilang pagkadestiyero maoy 70 ka tuig. Busa ang Jerusalem lagmit nalaglag gayod sa 607 W.K.P. (2 Cron. 36:​21, 22; Jer. 29:10; Dan. 9:​1, 2)​—⁠10/1, panid 26-31.

• Unsay makatabang nato sa pagdesisyon kon ang usa ka kalingawan mapuslanon ba o dili?

Aron matino kon ang usa ka kalingawan mapuslanon ug makapahimuot sa Diyos, maayong mangutana: Unsa ang nalangkit niini? Kanus-a ko maglingawlingaw? Kinsa ang akong mga kauban?​—10/15, panid 9-12.

• Nganong sayop ang aborsiyon?

Giisip sa Diyos ang kinabuhi ingong sagrado, ug ang embryo sa tawo ingong buhing linalang. (Sal. 139:16) Ang pagpatay sa wala pa matawong bata maoy pagbuno, kay gipakita sa Balaod nga ang usa manubag kon siya makahimog kadaot sa wala pa matawong bata. (Ex. 21:​22, 23)​—⁠11/1, panid 6.

• Sa unsang paagi ang asoy sa Proverbio 7:​6-23 makatabang nato sa paglikay sa pornograpiya?

Ang asoy naghisgot sa usa ka batan-ong lalaki nga naglakaw sa dalan diin nahibalo siya nga may nagpuyong pampam. Nadani siya niini. Karon, angay gayong likayan ang mga site sa Internet nga may law-ayng mga hulagway, ug hinungdanong moampo alang sa tabang sa Diyos sa dili pa makatan-aw sa maong mga hulagway.​—11/15, panid 9-10.

• Giunsa nato pagkahibalo nga ang yuta dili matapos sa 2012?

Tungod sa siklo sa karaang kalendaryo sa Maya, ang uban miingon nga ang kalibotan matapos sa 2012. Apan dili kana mahitabo, kay gilalang ni Jehova ang yuta aron puy-an. Ang Bibliya nag-ingon nga ang yuta magpabilin hangtod sa hangtod. (Eccl. 1:4; Isa. 45:18)​—⁠12/1, panid 10.

• Kinsa sa mga magsusulat sa Bibliya ang presente sa Pentekostes 33 K.P.?

Mopatim-aw nga unom ka magsusulat sa Kristohanon Gregong Kasulatan ang presente. Tulo ka apostoles ang atua​—⁠si Mateo, Juan, ug Pedro. Didto usab ang duha ka igsoon ni Jesus sa inahan​—⁠si Santiago ug Judas. Ug lagmit presente usab ang batan-ong si Marcos.​—⁠12/1, panid 22.