Oo, Kini ang Tun-anang Edisyon!

Among gibag-o ang tun-anang edisyon aron kini mas nindot tan-awon ug mas makatabang sa imong pagtuon sa bililhong kamatuoran sa Pulong ni Jehova.—Sal. 1:2; 119:97.

Upat na ka tuig nga among gisugdan pagpatik ang duha ka edisyon sa Ang Bantayanang Torre, usa para sa publiko ug ang lain para kanatong mga Saksi ni Jehova ug sa mga gitun-an sa Bibliya nga tigtambongan na.

Bahin sa tun-anang edisyon, usa ka dugay nang alagad ni Jehova ang misulat: “Nindot kaayo ug makapatandog—kana ang akong impresyon sa unang tun-anang edisyon sa Ang Bantayanang Torre. Ang paagi sa pagpatin-aw niini sa kamatuoran nakapatandog gayod kanako. Salamat kaayo niining bag-ong tagana.” Ang laing igsoon misulat: “Maghinamhinam kong mobasa sa tun-anang edisyon uban sa akong Reference Bible.” Segurado nga ingon usab niana ang inyong gibati.

Sa inyo nang nahibaloan, ang magasing Ang Bantayanang Torre gipatik sukad pa sa 1879. Kini naposible sa tabang ni Jehova. (Zac. 4:6) Sulod sa 133 ka tuig, kadaghan na gibag-o ang hapin sa magasin. Sugod sa 2012, ang hapin sa tun-anang edisyon adunay drowing nga nagpakita ug esena sa pagsangyaw. Kini magpahinumdom kanato sa sugo sa Diyos nga bug-os magpamatuod sa Gingharian ni Jehova. (Buh. 28:23) Sa panid 2, makita nimo ang letrato nga gibasehan sa drowing, nga may mubong kahubitan kon unsay gihimo ug kon diin kini. Niining tibuok tuig, kita mapahinumdoman nga ang katawhan ni Jehova nagsangyaw sa maayong balita “sa tibuok gipuy-ang yuta.”—Mat. 24:14.

Unsa pay gibag-o sa magasin? Ang kahon sa repaso gibalhin sa sinugdan sa tun-anang artikulo. Kini magpasiugda sa pangunang mga punto nga angay nimong pangitaon samtang magbasa ug magtuon ka sa artikulo. Siyempre, ang magdumala sa Pagtuon sa Bantayanang Torre padayong maggamit niini nga mga pangutana sa pagrepaso sa materyal sa kataposan sa pagtuon. Mamatikdan usab nimo nga ang mga numero sa panid ug parapo gipadak-an.

Sumala sa gipatin-aw niini nga gula, ang usa ka bag-ong artikulo nga “Gikan sa Among Archives” gidugang aron ipakita ang talagsaong kaugmaran sa modernong adlaw nga buluhaton sa mga Saksi ni Jehova. Dugang pa, dunay mga kasinatian nga sa popanahon mogula ubos sa ulohang “Sila Kinabubut-ong Nagtanyag sa Kaugalingon.” Kini tin-awng maghubit sa kalipay ug katagbawan nga nasinati sa mga igsoon sa ilang pag-alagad sa mga dapit nga mas dako ang panginahanglan sa mga magmamantala sa Gingharian.

Hinaot makabenepisyo ka pag-ayo sa imong pagtuon sa Pulong sa Diyos uban sa tabang niini nga magasin.

Mga Magpapatik

[Hulagway sa panid 3]

1879

[Hulagway sa panid 3]

1895

[Hulagway sa panid 3]

1931

[Hulagway sa panid 3]

1950

[Hulagway sa panid 3]

1974

[Hulagway sa panid 3]

2008