ANG katawhan ni Jehova dunay taas ug makaiikag nga kasaysayan. Makat-onan nato kini dili lang sa atong mga publikasyon kondili gikan usab sa mga letrato, sulat, personal nga mga asoy, ug sa mga butang nga nalangkit sa atong pagsimba, pagsangyaw, ug kasaysayan. Apan unsay kaayohan nga ipreserbar ang maong mga butang ug balikan ang atong kagahapon? Ang mga ulo sa pamilya sa karaang Israel gisugo nga itudlo sa ilang mga anak ang mga balaod ug kahibulongang mga buhat ni Jehova aron “ikabutang nila ang ilang pagsalig diha sa Diyos.”—Sal. 78:1-7.

Ang pagpanukiduki sa mga rekord sa kasaysayan may dakong papel sa pagpalampos sa katuyoan ni Jehova. Pananglitan, dihang ang mga magsusupak misulay sa pagpahunong sa pagtukod sa templo sa Jerusalem, gihimo ang opisyal nga pagsusi sa tipiganan sa mga rekord didto sa Ecbatana, ang kaulohan sa Media. Nakita didto ang dokumento gikan kang Haring Ciro nga nag-awtorisar sa maong pagtukod. (Esd. 6:1-4, 12) Busa ang templo natukod pag-usab sumala sa kabubut-on sa Diyos. Ang magsusulat sa Ebanghelyo nga si Lucas nanukiduki usab sa mga rekord sa kasaysayan aron ‘masubay ang katukma sa tanang butang gikan sa sinugdan.’—Luc. 1:1-4.

Ang Nagamandong Lawas interesado kaayo sa atong teokratikanhong kasaysayan. Bahin sa  panginahanglang ipreserbar, irekord, ug ipasa ang atong espirituwal nga kabilin, usa ka membro sa Nagamandong Lawas ang miingon, “Aron mahibalo kita sa atong padulngan, kinahanglang mahibalo kita sa atong gigikanan.” Busa di pa dugay, gimugna ang departamentong Writing Archives didto sa Brooklyn, New York, ubos sa pagdumala sa Writing Committee.

ATONG “ALBUM SA PAMILYA” UG “MGA KABILIN”

Paglabay sa panahon, makalimtan nato ang atong kagahapon ug makahunahuna nga unta nakatipig kitag mas kompletong rekord sa atong pamilya. Ang Writing Archives naningkamot sa pagpreserbar ug pagrekord sa atong dagaya ug nagkadaghang espirituwal nga kabilin. Ang mga letrato nga giampingan sa Archives mahimong isipon nga bahin sa atong “album sa pamilya.” Lakip usab sa mga mutya nga gitipigan mao ang karaang mga publikasyon, personal nga mga asoy, ug bililhong mga butang. Kini maoy “mga kabilin” nga magtudlo nato bahin sa atong teokratikanhong kasaysayan ug motabang nato nga magmasaligon sa maayong kaugmaon sa atong espirituwal nga pamilya.

Kamo among gidapit sa pagsusi sa Writing Archives pinaagi sa bag-ong seksiyon nga “Gikan sa Among Archives.” Kini mogawas popanahon sa tun-anang edisyon sa Ang Bantayanang Torre. Sa sunod nga gula, plano namong ipatik ang usa ka asoy nga may mga hulagway ug motubag niini nga mga pangutana: Unsa ang Dawn Mobile? Kinsay migamit niini? Kanus-a kini gigamit, ug sa unsang katuyoan?

Samag literal nga album sa pamilya, daghan kitag makat-onan gikan sa koleksiyon sa Writing Archives. Kini nagtudlo bahin kanato ug sa atong espirituwal nga mga “katigulangan”—bahin sa pagtuo ug kaisog niadtong nauna kanato, bahin sa kalipay ug hagit sa pag-alagad kang Jehova, ug bahin sa paggiya ug way hunong nga pagpaluyo sa Diyos sa iyang katawhan. (Deut. 33:27) Masaligon kita nga panalanginan ni Jehova ang mga paningkamot sa pagpreserbar sa kasaysayan sa atong organisasyon aron kita mas magkahiusa ug mapalig-on sa pagtuman sa iyang kabubut-on.

[Kahon/Hulagway sa panid 31]

Dugang Kasayoran

Dihang andamon ang Kristohanong mga literatura, mga DVD, ug ubang materyal nga binase sa Bibliya, ang atong mga magsusulat, tigdibuho, tigdukiduki, ug uban pa naggamit sa mga koleksiyon ug rekord gikan sa atong kasaysayan. Busa ang Writing Archives maampingong nagtigom ug nagpreserbar sa lainlaing materyal bahin sa atong kasaysayan gikan sa mga sangang buhatan, departamento sa Bethel, kongregasyon, indibiduwal, ug sekular nga mga institusyon. Tagda ang trabaho nga nalangkit niini:

Pagkolekta ug Pag-analisar: Ang talagsaong mga butang padayong nadugang sa koleksiyon sa Writing Archives. Daghan niini ang gidonar o gipahulam sa mga indibiduwal kansang mga pamilya matinumanong nag-alagad kang Jehova sulod sa daghang dekada. Pinaagi sa pag-analisar ug pagtandi niini, mas masabtan nato ang atong kasaysayan ug kadtong nagkinabuhi sa maong mga panahon.

Pagrekord: Linibo ang koleksiyon sa Writing Archives, ang uban kapig 100 ka tuig na ang gidugayon. Kini lainlaig porma ug gidak-on, ug kinahanglang himoag rekord aron daling pangitaon ug magamit sa pagpanukiduki.

Pagpasig-uli ug Pagpreserbar: Ang karaang mga libro ug butang giayo ug gipreserbar gamit ang propesyonal nga mga pamaagi sa pagpasig-uli. Ang mga dokumento, letrato, artikulo sa mantalaan, pelikula, ug rekording gihimoag digital format. Busa kini matan-aw pinaagig computer aron dili madaot ang orihinal nga mga dokumento o ubang butang.

Pagtipig ug Pagkuha: Ang mga koleksiyon gitipigan sa hapsay ug maampingong paagi aron dili mawala ug dili madaot sa kahayag ug kaumog. Dunay database nga gihimo karon nga makatabang sa pagpanukiduki ug pagkuha niining bililhong mga mutya sa atong kagahapon.

[Mga hulagway sa panid 32]

1. Poster sa “Photo-Drama of Creation.” 2. Listahan sa subskripsiyon. 3. Sakyanan nga may trompa. 4. Hapin sa Abril 15, 1912 nga Watch Tower. 5. Prison notice ni J. F. Rutherford. 6. Mikropono sa WBBR. 7. Ponograpo. 8. Sudlanag libro. 9. Personal nga nota. 10. Telegrama para kang J. F. Rutherford.