Hupti ang Positibong Espiritu sa Kongregasyon
Hupti ang Positibong Espiritu sa Kongregasyon
“Ang dili-takos nga kalulot sa Ginoong Jesu-Kristo magauban sa espiritu nga inyong ginapakita.”—FILIP. 4:23.
SA UNSANG PAAGI KITA MAKAAMOT SA POSITIBONG ESPIRITU SA KONGREGASYON . . .
dihang makig-uban sa mga igsoon?
kon kita masiboton sa ministeryo?
kon atong itaho ang seryosong sala?
1. Nganong gidayeg ang mga kongregasyon sa Filipos ug Tiatira?
ANG unang siglong mga Kristohanon sa Filipos maoy kabos. Apan sila manggihatagon ug nagpakitag dakong gugma sa ilang mga isigkamagtutuo. (Filip. 1:3-5, 9; 4:15, 16) Kanay rason nga sa pagtapos sa iyang sulat kanila, si apostol Pablo miingon: “Ang dili-takos nga kalulot sa Ginoong Jesu-Kristo magauban sa espiritu nga inyong ginapakita.” (Filip. 4:23) Sanglit ang mga Kristohanon sa Tiatira nagpakitag samang espiritu, ang hinimayang si Jesu-Kristo miingon: “Nahibalo ako sa imong mga buhat, ug sa imong gugma ug pagtuo ug ministeryo ug paglahutay, ug nga ang imong ulahing mga buhat mas labaw pa kay sa mga nahauna.”—Pin. 2:19.
2. Sa unsang paagi ang atong tinamdan makaimpluwensiya sa espiritu sa atong kongregasyon?
2 Sa susama, ang matag kongregasyon sa mga Saksi ni Jehova karon nagpakitag usa ka positibong espiritu, o tinamdan. Ang pipila ka kongregasyon nailhan sa ilang kaayo ug kamahigugmaon. Ang uban nailhan sa ilang talagsaong kasibot sa pagsangyaw sa Gingharian ug sa bug-os panahong ministeryo. Dihang kita ingong mga indibiduwal mag-ugmad ug positibong tinamdan, kita makaamot sa panaghiusa ug pag-uswag sa kongregasyon. (1 Cor. 1:10) Apan kon negatibo ang atong tinamdan, kini lagmit makaimpluwensiya sa mga igsoon nga maluya sa espirituwal, mawad-ag kasibot sa ministeryo, ug magkonsentir pa gani sa sala. (1 Cor. 5:1; Pin. 3:15, 16) Unsang espiritu ang gipakita sa inyong kongregasyon? Sa unsang paagi ka makaamot sa positibong espiritu sa kongregasyon?
IPAKITA ANG POSITIBONG ESPIRITU
3, 4. Sa unsang paagi nato madayeg si Jehova diha sa kongregasyon?
3 Si David miawit kang Jehova: “Pagadayegon ko ikaw diha sa dako nga kongregasyon; pagadayegon ko ikaw taliwala sa daghang katawhan.” (Sal. 35:18) Gidayeg sa salmista si Jehova dihang kauban niya ang ubang alagad sa Diyos. Ang senemanang panagkatigom, sama sa Pagtuon sa Bantayanang Torre, naghatag kanatog kahigayonan nga ikapakita ang atong kasibot ug pagtuo pinaagi sa pagkomento. Maayong pangutan-on ang kaugalingon: ‘Gipahimuslan ba gyod nako ang pribilehiyo nga makakomento sa mga tigom? Nangandam ba kog maayo aron makahatag ug makapalig-ong mga komento? Ingong ulo sa pamilya, gitabangan ko ba ang akong mga anak sa pag-andam ug mga komento ug gitudloan sila sa pagtubag sa kaugalingon nilang pulong?’
4 Atong ikapakita nga kita may malig-ong kasingkasing, o kasingkasing nga determinado sa pagbuhat kon unsay matarong, pinaagi sa atong pag-awit. Si David miingon: “Malig-on ang akong kasingkasing, Oh Diyos, malig-on ang akong kasingkasing. Magaawit ako ug magaawit ug mga pagdayeg.” (Sal. 57:7) Ang mga awit nga gigamit sa mga tigom maoy maayong kahigayonan sa ‘pag-awit ug mga pagdayeg’ kang Jehova uban ang malig-ong kasingkasing. Kon dili kita sinati sa ubang awit, nganong dili magpraktis panahon sa pamilyahanong pagsimba? Hinaot determinado kitang ‘moawit kang Jehova sa tibuok natong kinabuhi ug magaawit ug mga pagdayeg kaniya samtang kita buhi.’—Sal. 104:33.
5, 6. Sa unsang paagi kita mahimong maabiabihon ug manggihatagon sa uban? Unsay epekto niini sa kongregasyon?
5 Ang atong pag-abiabi sa mga igsoon maoy laing paagi nga makaamot sa mahigugmaong espiritu sa kongregasyon. Sa kataposang kapitulo sa iyang sulat sa mga Hebreohanon, si Pablo miawhag: “Himoa nga magpadayon ang inyong inigsoong gugma. Ayaw kalimti ang pagkamaabiabihon.” (Heb. 13:1, 2) Ang pagtaganag pagkaon sa mga nagapanawng magtatan-aw ug sa ilang asawa o sa bug-os panahong mga alagad diha sa kongregasyon maoy maayo kaayong paagi sa pagkamaabiabihon. Hunahunaa usab ang mga balo, nag-inusarang mga ginikanan, o uban pa nga pwede nimong dapiton panagsa sa pagpangaon o sa pamilyahanong pagsimba.
6 Gisultihan ni Pablo si Timoteo nga dasigon ang uban “nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.” (1 Tim. 6:17-19) Gidasig ni Pablo ang iyang mga isigkamagsisimba nga magmanggihatagon. Bisag lisod ang ekonomiya, ikapakita gihapon nato ang pagkamanggihatagon. Pananglitan, kon duna kay sakyanan, mahimo nimong pasakyon ang ubang igsoon paingon sa teritoryo o sa tigom. Apan komosta kadtong nakabenepisyo niini? Makaamot sila sa positibong espiritu sa kongregasyon kon sila magpakitag apresasyon, tingali pinaagi sa paghatag kutob sa ilang maarangan aron makatabang sa pagpagasolina. Dugang pa, dili ba ang paggahig mas dakong panahon uban sa mga igsoon makapabati nilang sila gikinahanglan ug gimahal? Dihang kita magbuhat ug maayo ngadto sa “atong kabanay sa pagtuo” ug andam mogamit sa atong panahon ug kahinguhaan alang kanila, dili lang molalom ang atong gugma kanila apan makaamot usab kita sa positibong espiritu sa kongregasyon.—Gal. 6:10.
7. Sa unsang paagi ang dili pagbutyag sa personal nga mga butang sa uban makatabang sa paghupot sa maayong espiritu sa kongregasyon?
7 Ang panaghigalaay ug ang dili pagbutyag ug kompidensiyal nga mga butang makapalig-on usab sa gugma taliwala sa mga igsoon. (Basaha ang Proverbio 18:24.) Ang tinuod nga higala makamaong motagog sekreto. Kon ang atong mga igsoon motug-an sa ilang gihunahuna ug gibati ug misalig nga dili nato kana isulti sa uban, ang gugma nga anaa na sa atong taliwala mas molig-on. Hinaot nga atong huptan ang mahigugmaon, samag pamilya nga espiritu sa kongregasyon pinaagi sa pagkahimong kasaligan nga higala kinsa makatagog kompidensiyal nga mga butang.—Prov. 20:19.
MAGMASIBOTON SA MINISTERYO
8. Unsang tambag ang nadawat sa mga taga-Laodicea, ug ngano?
8 Si Jesus miingon sa kongregasyon sa Laodicea: “Ako nahibalo sa imong mga buhat, nga ikaw dili bugnaw ni init. Ako nanghinaot nga ikaw unta bugnaw o kaha init. Busa, tungod kay ikaw dagaang lamang ug dili init ni bugnaw, isuka ko ikaw gikan sa akong baba.” (Pin. 3:15, 16) Ang mga taga-Laodicea walay kasibot sa ministeryo. Ang maong tinamdan lagmit nakaapektar usab sa ilang relasyon sa mga igsoon. Busa sila mahigugmaong gitambagan ni Jesus: “Ang tanan nga akong gimahal akong ginabadlong ug ginadisiplina. Busa magmasiboton ug maghinulsol.”—Pin. 3:19.
9. Sa unsang paagi ang atong tinamdan sa ministeryo makaapektar sa espiritu sa kongregasyon?
9 Aron mahuptan ang positibong espiritu sa kongregasyon, angay kitang magmasiboton sa pagsangyaw. Ang kongregasyon giorganisar aron pangitaon ang sinserong mga tawo sa teritoryo ug tudloan sila sa kamatuoran. Busa sama kang Jesus, kinahanglang madasigon kitang makigbahin sa paghimog tinun-an. (Mat. 28:19, 20; Luc. 4:43) Dihang mas masiboton kita sa ministeryo, mas magkahiusa kita ingong “mga isigkamagbubuhat sa Diyos.” (1 Cor. 3:9) Samtang mapanid-an nato ang uban diha sa ministeryo nga nagdepensa sa ilang pagtuo ug nagpakitag gugma kang Jehova ug sa kamatuoran, kita mas mahigugma ug motahod kanila. Ang pag-alagad usab nga “abaga sa abaga” diha sa ministeryo makapahiusa sa kongregasyon.—Basaha ang Sofonias 3:9.
10. Sa unsang paagi ang atong paningkamot nga mouswag sa ministeryo makaapektar sa mga igsoon sa kongregasyon?
10 Ang atong mga paningkamot nga mouswag sa ministeryo duna usay maayong epekto sa uban. Kon magpakita kitag dakong interes sa mga tawo sa teritoryo ug maningkamot pag-ayo nga maabot ang ilang kasingkasing, mosamot ang atong kadasig sa ministeryo. (Mat. 9:36, 37) Kon madasigon kita, madasig usab ang atong kauban. Si Jesus nagpadala sa iyang mga tinun-an sa pagsangyaw nga tinagurha inay nga mag-inusara. (Luc. 10:1) Kadto wala lang nakadasig ug nakabansay kanila apan nakapasamot usab sa ilang kasibot sa ministeryo. Dili ba malipay kitang makig-uban sa masibotong mga magmamantala? Ang ilang kadasig makatabang nato nga padayong mosangyaw.—Roma 1:12.
PAGBANTAY BATOK SA PAGBAGULBOL UG PAGTAGOG SALA
11. Unsang tinamdan ang naugmad sa ubang Israelinhon sa adlaw ni Moises, ug unsay resulta niini?
11 Pipila pa lang ka semana human nahimong bag-ong nasod, ang mga Israelinhon misugod sa pagbagulbol, o pagreklamo. Kini miresulta sa pagrebelde batok kang Jehova ug sa iyang mga hawas. (Ex. 16:1, 2) Diyutay ra sa mga Israelinhon nga mibiya sa Ehipto ang nakasulod sa Yutang Saad. Bisan gani si Moises wala tugoting makasulod sa maong yuta tungod sa iyang reaksiyon sa daotang tinamdan sa mga Israelinhon! (Deut. 32:48-52) Unsay atong mahimo karon aron malikayan ang negatibong tinamdan?
12. Unsay makatabang kanato aron dili mahimong bagulbolan?
12 Angay kitang magbantay nga dili mahimong bagulbolan. Ang pagkamapaubsanon ug pagtahod sa awtoridad makatabang kanato nga malikayan ang maong tinamdan. Apan angayng mag-amping usab kita sa pagpilig mga kauban. Ang dili maayong kalingawan o paggugol ug sobrang panahon sa mga katrabaho o eskolmet nga wala magsunod sa mga sukdanan ni Jehova makadaot kanato. Angay natong limitahan ang pagpakig-uban sa mga tawong may negatibo o independenteng tinamdan.—Prov. 13:20.
13. Ang makadaot nga impluwensiya sa pagbagulbol motultol sa unsang laing kadaot sa espirituwal diha sa kongregasyon?
13 Ang makadaot nga impluwensiya sa pagbagulbol motultol sa laing kadaot sa espirituwal. Pananglitan, kini makatugaw sa kalinaw ug panaghiusa sa kongregasyon. Dugang pa, ang pagreklamo batok sa mga isigkamagtutuo dili lang makapasakit kanila apan mahimong mosangpot pa sa pagbutangbutang ug pagpasipala. (Lev. 19:16; 1 Cor. 5:11) Ang pipila ka bagulbolan sa unang siglo nga kongregasyon “nagsalikway sa pagkaginoo ug nagsulti nga mapasipalahon labot sa mga mahimayaon.” (Jud. 8, 16) Ang maong pagbagulbol batok sa responsableng mga lalaki sa kongregasyon wala gayod uyoni sa Diyos.
14, 15. (a) Unsay epekto diha sa kongregasyon kon tugotang magpadayon ang seryosong sala? (b) Unsay angay natong buhaton kon nahibalo kita nga ang usa may tinagong sala?
14 Komosta kon nahibalo ka nga ang usa may tinagong sala, sama sa paghuboghubog, pagtan-awg pornograpiya, o pagkinabuhing imoral? (Efe. 5:11, 12) Kon balewalaon nato ang seryosong sala, kana makababag sa pag-agos sa balaang espiritu ni Jehova ug makadaot sa kalinaw sa tibuok kongregasyon. (Gal. 5:19-23) Maingon nga gitangtang sa unang siglong mga Kristohanon sa Corinto ang pagkadaotan, tangtangon usab nato karon ang bisan unsang makadaot nga impluwensiya sa kongregasyon aron mahuptan ang positibong espiritu niini. Unsay imong mahimo aron makaamot sa kalinaw sa kongregasyon?
15 Sumala sa nahisgotan na, hinungdanon nga dili ibutyag ang kompidensiyal nga mga butang, ilabina dihang ang uban motug-an kanato sa ilang gibati ug gihunahuna. Sayop ug makapasakit gayod kon ibutyag nato ang sekreto sa usa! Apan kon ang usa nakahimog seryosong sala, kinahanglang mahibaloan kana sa mga ansiyano sa kongregasyon. Sila ang may responsabilidad sa pag-atiman niana. (Basaha ang Levitico 5:1.) Busa kon nahibalo kita nga ang usa ka igsoon nakahimog seryosong sala, angay nato siyang dasigon nga motug-an sa mga ansiyano ug mangayog tabang. (Sant. 5:13-15) Apan kon dili niya kana buhaton sulod sa rasonableng gidugayon, kita na ang angayng motug-an niana.
16. Sa unsang paagi ang pagtaho sa seryosong sala makatabang sa paghupot sa espiritu sa kongregasyon?
16 Ang Kristohanong kongregasyon maoy espirituwal nga dalangpanan, ug angay nato kining panalipdan pinaagi sa pagtaho sa seryosong sala. Kon matabangan sa mga ansiyano ang nakasala nga makaamgo, maghinulsol, ug modawat ug pagtul-id, ang espiritu sa kongregasyon dili na mameligro. Apan komosta kon siya dili mahinulsolon ug dili modawat sa mahigugmaong tambag sa mga ansiyano? Nan, siya ipalagpot. Niining paagiha, ang daotang impluwensiya matangtang ug mahuptan ang espiritu sa kongregasyon. (Basaha ang 1 Corinto 5:5.) Busa ang matag usa kanato angayng mohimog tukmang aksiyon, mokooperar sa lawas sa mga ansiyano, ug panalipdan ang atong mga igsoon.
HUPTI ANG “PAGKAUSA SA ESPIRITU”
17, 18. Unsay makatabang kanato aron “mahuptan ang pagkausa sa espiritu”?
17 Pinaagi sa “pagdeboto sa ilang kaugalingon sa ginatudlo sa mga apostoles,” ang unang mga sumusunod ni Jesus nakatabang sa kongregasyon nga magkahiusa. (Buh. 2:42) Ilang gipabilhan ang Kasulatanhong tambag ug instruksiyon gikan sa mga ansiyano. Sanglit ang mga ansiyano karon nakigkooperar sa matinumanon ug maalamong ulipon, ang tanan sa kongregasyon nadasig ug natabangan nga magpabiling nahiusa. (1 Cor. 1:10) Kon atong sundon ang binase sa Bibliya nga instruksiyon gikan sa organisasyon ni Jehova ug ang paggiya sa mga ansiyano, atong gipakita nga kita ‘matinuorong nanglimbasog nga mahuptan ang pagkausa sa espiritu diha sa nagahiusa nga bugkos sa pakigdait.’—Efe. 4:3.
18 Nan, maningkamot gayod kita nga mahuptan ang positibong espiritu sa kongregasyon. Sa pagbuhat niana, makaseguro kita nga ‘ang dili-takos nga kalulot sa Ginoong Jesu-Kristo magauban sa espiritu nga atong ginapakita.’—Filip. 4:23.
[Mga Pangutana sa Pagtuon]
[Hulagway sa panid 19]
Nakaamot ka ba sa positibong espiritu pinaagi sa pag-andam ug makapadasig nga mga komento?
[Hulagway sa panid 20]
Sinatia ang atong mga alawiton aron makaamot ka sa positibong espiritu
