Dihang miabot ang bug-os panahong magwawali nga si Charlotte White sa Louisville, Kentucky, U.S.A., nga nagdalag maleta nga de-ligid, gitan-aw siya sa mga tawo.

TUIG kadto sa 1908, ug si Sister White gitan-aw sa mga tawo tungod sa usa ka bag-ong imbensiyon—ang Dawn-Mobile. “Ang mga tawo naghisgot-hisgot bahin niini,” siya miingon, “ug nahimo kong sentro sa atensiyon.”

Nakita sa mga Estudyante sa Bibliya (tawag kaniadto sa mga Saksi ni Jehova) ang panginahanglan nga ipaambit ang bililhong mga kamatuoran nga ilang nakat-onan sa ilang makugihong pagtuon sa Kasulatan. Daghan ang nakakat-on sa Bibliya pinaagi sa serye sa mga librong Millennial Dawn (sa ulahi gitawag ug Studies in the Scriptures). Ang mga Kristohanon nga andam ug makaarang sa pagpanaw miadto sa lagyong mga lugar—sa kalungsoran, kabaryohan, ug kabanikanhan—aron itanyag ang maong mga libro ngadto sa uban nga buot mobasa.

Sa 1908, si Sister White ug ang ubang masibotong magmamantala sa Gingharian nagtanyag sa maong unom ka tomo nga libro sa kantidad nga $1.65 (U.S.). Imbes ibilin kini dayon, ilang paorderon ang mga tawo ug mobalik sa ulahi—sagad sa tingsuweldo—aron ihatod kini ug kolektahon ang gamayng kantidad ingong hulip sa pag-imprenta niini. Usa ka magsusupak ang mireklamo nga gamay ra kaayo ang idonar sa mga tawo para sa maong mga libro!

Si Malinda Keefer nahinumdom nga sa usa ka semana makakuha siyag order nga 200 hangtod sa 300 ka libro. Apan ang dakong interes alang sa mga librong Dawn nagpatungha sab ug problema. Hunahunaa lang, ang ikaunom nga tomo may 740 ka panid!  ‘Ang 50 ka libro motimbang ug 18 kilos,’ matod sa The Watch Tower, busa ang paghatod “lisod kaayo,” ilabina sa mga sister.

Aron masulbad ang problema sa paghatod sa mga librong Dawn, si Brader James Cole nag-imbentog matikloptiklop, duhay-ligid nga himan diin ang maleta iroska diha niini. Kay dili na man magdalag bug-at nga kinarton nga mga libro, ang imbentor miingon: “Dili na gyod malisa ang akong abaga.” Iyang gipresentar ang bag-ong himan ngadto sa nalipayng tumatambong sa kombensiyon sa mga Estudyante sa Bibliya sa Cincinnati, Ohio niadtong 1908. Sa matag tumoy sa balabag nga tubo dunay tabon nga gikulitag Dawn-Mobile, tungod kay mga tomo man sa Millenial Dawn ang sulod sa maleta. Kon maanad na, sayon na lang ang pagdala sa maleta nga punog libro ug pwedeng usa ra ka kamot ang gamiton sa pagduso niini. Pwede kining patas-an o pamub-an depende sa nagdala, ug pwede kining ipaligid bisan sa dili sementadong dalan. Human ug sangyaw, ang mga ligid pwedeng itiklop sa kilid sa maleta aron daling mabitbit pagpauli, magbaktas man o magsakay.

Ang mga sister nga naa sa bug-os panahong pag-alagad libreng makabatog Dawn-Mobile. Apan ang uban makabaton niini sa kantidad nga $2.50 (U.S.). Si Sister Keefer, nga anaa sa hulagway, hanas na kaayong mogamit ug Dawn-Mobile, nga makaduso niini pinaagi lang sa usa ka kamot ug makadala pag bag nga punog libro sa pikas kamot. Kay nakakaplag ug daghang interesado sa usa ka minahang lungsod sa Pennsylvania, U.S.A., siya sagad katulo o kaupat moagi sa usa ka tulay sa adlaw nga ihatod ang mga libro.

Sa ulahing bahin sa dekada sa 1980, naimbento sa usa ka piloto sa ayroplano ang de-ligid nga maleta nga kasagarang makita nato sa mga erport ug sa kadalanan sa siyudad. Apan mga usa ka gatos ka tuig kanhi, ang masibotong mga Estudyante sa Bibliya lagmit nalingaw nga ginatan-aw sila sa mga tawo samtang nagdala sa ilang Dawn-Mobile sa pagsabwag sa bililhong mga binhi sa kamatuoran sa Bibliya.

[Blurb sa panid 32]

Si Sister Keefer sagad katulo o kaupat moagi sa usa ka tulay sa adlaw nga ihatod ang mga libro

[Blurb sa panid 32]

Nasulbad ang problema sa paghatod sa mga librong Dawn