Natan—Maunongong Tigpaluyo sa Putling Pagsimba

Dili sayon kombinsihon ang usa ka gamhanang tawo nga daotan ang iyang gihimo ug nga angay siyang magbag-o. Imo ba siyang komprontahon kon nahibalo ka nga may gipapatay siyang tawo aron dili madaot ang iyang dungog?

Si Haring David nakapanapaw kang Bat-seba, ug kini namabdos. Sa pagtabon sa ilang sala, gipapatay ni David ang bana ni Bat-seba ug giminyoan siya. Sulod sa daghang bulan, si David padayong naghari ug wala motug-an sa iyang sala. Apan wala balewalaa ni Jehova ang sala sa hari. Gisugo niya si propeta Natan aron komprontahon si David.

Lisod kadto nga misyon. Hunahunaa nga ikaw si Natan. Dayag nga ang pagkamaunongon kang Jehova ug sa iyang mga sukdanan nagpalihok kang Natan nga pahinumdoman si David sa iyang mga sala. Giunsa kadto paghimo sa propeta ug giunsa niya pagkombinsir si Haring David nga maghinulsol?

MATAKTIKANHONG MAGTUTUDLO

Palihog basaha kadiyot ang 2 Samuel 12:1-25. Handurawa nga ikaw si Natan ug imong gisulti kang David kini nga asoy: “Dihay duha ka tawo sa usa ka siyudad, ang usa dato ug ang lain diyutay lamang ug kahinguhaan. Ang tawong dato may daghan kaayong karnero ug baka; apan ang tawo nga diyutay lamang ug kahinguhaan walay bisan unsa gawas sa usa ka gamay, bayeng nating karnero nga iyang pinalit. Ug siya nagbuhi niini, ug kini nagdako uban kaniya ug uban sa iyang mga anak, ang tanan magkauban. Gikan sa iyang tipik nga pagkaon kini mokaon, ug gikan sa iyang kopa kini moinom, ug sa iyang sabakan kini magpauraray, ug  kini ingon sa usa ka anak nga babaye alang kaniya. Unya miabot ang usa ka bisita sa tawong dato, apan wala siya magkuha ug pipila gikan sa kaugalingon niyang mga karnero ug mga baka aron andamon kini alang sa magpapanaw nga miabot kaniya. Busa iyang gikuha ang bayeng nating karnero sa tawo nga diyutay lamang ug kahinguhaan ug giandam kini alang sa tawo nga miabot kaniya.”—2 Sam. 12:1-4.

Si David—nga magbalantay ug karnero kanhi—nagtuong tinuod kining nahitabo. Matod sa usa ka magsusulat, “Tingali naandan na ni Natan nga moadto kang David aron mangayog tabang alang sa mga dinaogdaog nga walay kapaingnan, ug naghunahuna si David nga kini ang iyang tuyo nianang higayona.” Bisan pag kini ang kahimtang, si Natan nagkinahanglag pagkamaunongon sa Diyos ug kaisog sa pagsulti sa hari. Nasuko pag-ayo si David sa giasoy ni Natan. “Ingon nga si Jehova buhi, ang tawo nga nagbuhat niini angay nga mamatay!” siya mipatugbaw. Unya, pintok siyang gisultihan ni Natan: “Ikaw mismo ang maong tawo!”—2 Sam. 12:5-7.

Matikdi kon nganong ingon niini ang paagi ni Natan sa paghisgot sa problema. Ang usa ka tawo nga nahulog ang pagbati ngadto sa lain sagad dili kaayo makahunahunag tarong bahin sa iyang situwasyon. Kitang tanan may kiling nga ipakamatarong ang atong mga nahimo kon dunay mokuwestiyon niini. Tungod sa ilustrasyon ni Natan, wala tuyoa ni David nga mahukman ang kaugalingon niyang gihimo. Nakita sa hari nga daotan kaayo ang gihimo sa lalaki diha sa asoy ni Natan. Apan ayha pa gipadayag ni Natan nga ang hari ang gitumong sa maong ilustrasyon dihang gihukman na kini ni David. Dayon naamgohan ni David ang kabug-at sa iyang sala. Tungod niini andam na siyang modawat ug disiplina. Siya miadmitir nga “gitamay” niya si Jehova pinaagi sa iyang sala uban kang Bat-seba, ug gidawat ang disiplina.—2 Sam. 12:9-14; Sal. 51, superskripsiyon.

Unsay atong makat-onan niini? Ang tumong sa usa ka magtutudlo sa Bibliya mao ang pagtabang sa iyang mga estudyante nga makahimog hustong konklusyon. Gitahod ni Natan si David, busa mataktikanhon siyang nakigsulti kaniya. Nahibalo si Natan nga si David nahigugma sa pagkamatarong ug hustisya, mao nga migamit siyag ilustrasyon nga magtukmod sa hari sa pagpasundayag niini nga mga hiyas. Kita usab makatabang sa sinserong mga tawo sa pagsabot sa panglantaw ni Jehova. Sa unsang paagi? Pinaagi sa pagtandog sa ilang pagbati sa kon unsay matarong, nga himoon kini sa paagi nga dili sila mobating mas matarong kita o may katungod kita sa pagdiktar kanila kon unsay buhaton. Ang Bibliya, dili ang atong opinyon, mao ang atong sukdanan kon unsay maayo ug daotan.

Labaw sa tanan, ang pagkamaunongon kang Jehova maoy nagtukmod kang Natan sa pagbadlong sa gamhanang hari. (2 Sam. 12:1) Ang samang pagkamaunongon mohatag kanatog kaisog nga mobarog sa matarong nga mga prinsipyo ni Jehova.

TIGPALUYO SA PUTLING PAGSIMBA

Mopatim-aw nga si David ug Natan suod nga managhigala, kay ginganlan ni David ang usa niya ka anak ug Natan. (1 Cron. 3:1, 5) Sa unang higayon nga gihisgotan si Natan sa Bibliya, kauban niya si David. Sila parehong nahigugma kang Jehova. Ang hari may pagsalig sa opinyon ni Natan kay gisulti man niya sa propeta ang iyang tinguha sa pagtukod ug templo para kang Jehova. “‘Karon tan-awa,’” miingon si David, “‘Ako nagpuyo sa usa ka balay nga sedro samtang ang arka sa matuod nga Diyos nagpuyo sa taliwala sa mga tabil sa tolda.’ Niana si Natan miingon sa hari: ‘Ang tanan nga anaa sa imong kasingkasing—lakaw, buhata, tungod kay si Jehova nagauban kanimo.’”—2 Sam. 7:2, 3.

Ingong matinumanong magsisimba ni Jehova, maikagong gipaluyohan ni Natan ang plano ni David sa pagtukod sa unang templo alang sa putling pagsimba. Apan nianang higayona, gipadayag ni Natan ang iyang kaugalingong opinyon imbes maghulat kon unsay isulti ni Jehova. Nianang gabhiona, gisugo sa Diyos ang propeta sa paghatod ug lahing mensahe sa hari: Dili si David ang magtukod sa templo ni Jehova kondili usa sa iyang mga anak. Apan gipahibalo ni Natan nga ang Diyos maghimog usa ka pakigsaad kang David aron ang iyang trono “matukod nga malig-on hangtod sa panahong walay tino.”—2 Sam. 7:4-16.

 Ang opinyon ni Natan bahin sa pagtukod sa templo wala mahiuyon sa kabubut-on sa Diyos. Apan ang mapainubsanong propeta wala magbagulbol. Siya mipahiuyon sa katuyoan ni Jehova ug mikooperar niini. Pagkamaayong panig-ingnan alang kanato kon tul-iron kita ni Jehova! Ang iyang mga nahimo sa ulahi ingong propeta nagpakita nga giuyonan gihapon siya ni Jehova. Gani mopatim-aw nga giinspirar ni Jehova si Natan ug si Gad nga bisyonaryo sa pagsugo kang David sa pag-organisar ug 4,000 ka musikero alang sa pag-alagad sa templo.—1 Cron. 23:1-5; 2 Cron. 29:25.

TIGDEPENSA SA PAGKAHARI

Si Natan nahibalo nga si Solomon maoy mopuli sa tigulang na nga si David ingong hari. Busa milihok dayon si Natan sa dihang gisulayan ni Adonias ang pag-ilog sa trono sa panahon nga nagkaluya na si David. Gipakita na usab ni Natan ang pagkamataktikanhon ug pagkamaunongon. Una, giaghat niya si Bat-seba nga pahinumdoman si David sa iyang panumpa nga himoong hari ang ilang anak nga si Solomon. Dayon si Natan miduol sa hari aron sa pagpangutana kon iya bang gipili si Adonias sa pagpuli kaniya. Kay nakaamgo nga seryoso ang situwasyon, gisugo ni David si Natan ug ang ubang maunongong mga alagad sa pagdihog ug pagproklamar kang Solomon ingong hari. Napakyas ang kudeta ni Adonias.—1 Hari 1:5-53.

MAPAINUBSANONG HISTORYANO

Si Natan ug Gad ang giilang magsusulat sa 1 Samuel kapitulo 25-31 ug sa 2 Samuel. Maylabot sa inspiradong kasaysayan sa maong mga basahon, kini ang giingon: “Kon bahin sa mga kalihokan ni David nga hari, ang mga una ug ang kataposan, kini sila nahisulat lakip sa mga pulong ni Samuel nga tigpatin-aw sa panan-awon ug lakip sa mga pulong ni Natan nga manalagna ug lakip sa mga pulong ni Gad nga bisyonaryo.” (1 Cron. 29:29) Ang Bibliya usab naghisgot nga si Natan nagsulat bahin sa “mga kalihokan ni Solomon.” (2 Cron. 9:29) Busa si Natan lagmit aktibo gihapon sa mga kalihokan sa palasyo bisan human sa kamatayon ni David.

Kadaghanan sa atong nahibaloan kang Natan lagmit gisulat mismo sa propeta. Apan ang wala niya paghisgot sa pipila ka impormasyon bahin kaniya nagpakitang siya mapainubsanong historyano nga wala mangambisyong mainila. Sa Bibliya, wala hisgoti ang kagikan o personal nga kinabuhi ni Natan.

GIPALIHOK SA PAGKAMAUNONGON KANG JEHOVA

Sa atong nabasa sa Bibliya bahin kang Natan, tataw nga siya mapainubsanon apan maisogong tigdepensa sa mga kahikayan sa Diyos. Si Jehova nagsangon kaniyag bug-at nga mga responsabilidad. Palandonga ang mga hiyas ni Natan, sama sa pagkamaunongon ug halalom nga apresasyon sa mga sukdanan sa Diyos. Paningkamoting masundog kini.

Hinuon, dili man tingali ka sugoon sa pagbadlong ug mananapawng mga hari o sa pagpahunong ug mga kudeta. Apan sa tabang sa Diyos, ikaw mahimong magmaunongon ug makapangupot sa iyang matarong nga mga sukdanan. Ikaw mahimo usab nga maisogon, apan mataktikanhon, nga magtutudlo sa kamatuoran ug tigpaluyo sa putling pagsimba.

[Hulagway sa panid 25]

Ingong tigdepensa sa pagkahari, si Natan mataktikanhong nakigsulti kang Bat-seba