Sila Maisogong Nagmantala sa Pulong sa Diyos!

Kaisog atubangan sa pagsupak. Kini nga hiyas dayag diha sa matuod nga mga Kristohanon, ingon sa gipakita sa mga librong “Bug-os nga Pagpamatuod” sa Gingharian sa Diyos ug Mga Saksi ni Jehova—Mga Magmamantala sa Gingharian sa Diyos. Sama sa atong mga isigkamagtutuo sa unang siglo, kita moampo kang Jehova alang sa iyang espiritu aron tabangan ta nga maisogong ikapahayag ang iyang pulong.—Buh. 4:23-31.

Bahin sa atong pagsangyaw panahon sa Gubat sa Kalibotan I, usa ka brader ang misulat: “Ang mga alagad sa Diyos masibotong nanagtag sa ikapitong tomo sa Studies in the Scriptures, nga nag-ulohang The Finished Mystery. Wala damha ang gidaghanon sa napanagtag. Ang Kingdom News No. 1 giluwatan sa 1918. Dayon misunod ang Kingdom News No. 2, nga nagpatin-aw kon nganong gipahunong sa awtoridad ang pagpanagtag sa The Finished Mystery. Kini gisundan sa Kingdom News No. 3. Kini nga mga basahon kaylap nga gipanagtag sa matinumanong mga dinihogan. Gikinahanglan ang pagtuo ug kaisog sa pagpanagtag sa Kingdom News.”

Ang bag-ong mga magmamantala karon sagad bansayon alang sa ministeryo, pero dili ingon niana kaniadto. Sa paghinumdom sa iyang unang pagsangyaw sa kanataran niadtong 1922, usa ka brader nga taga-Poland nga nagpuyo na sa Amerika ang misulat: “Bisag wala koy kahibalo sa pagtanyag ug literatura ug dili kaayo kamaong mo-Iningles, ako nanuktok sa opisina sa usa ka doktor. Giablihan kini sa usa ka nars. Dili gyod nako kadto makalimtan kay ako gikulbaan pag-ayo. Samtang gibuksan ko ang bag, ang tanang libro nangahulog sa tiilan sa nars. Wa na ko mahinumdom sa akong giingon apan nakapahimutang kog libro kaniya. Sa akong pagbiya, nakabaton kog kaisog ug gibati nga gipanalanginan ni Jehova. Niadtong adlawa, daghan kog napanagtag nga pulyeto sa maong dapit negosyohanan.”

“Sa mga 1933, daghang brader ang naggamit ug mga sakyanan nga may trompa sa pagwali sa mensahe sa Gingharian,” matod sa usa ka sister. Dihay higayon nga siya ug ang usa ka magtiayon misangyaw sa bukirong bahin sa California, U.S.A. “Gidala sa brader ang sakyanan sa mas ibabaw pa, ug kami nagpabilin sa lungsod sa ubos,” siya nahinumdom. “Dihang gipatokar niya ang girekord nga mensahe, ang tingog niini morag gikan sa langit. Gipangita pag-ayo sa mga tawo ang brader, apan wala nila siya makit-i. Human sa pagpatokar, among gisangyawan ang mga tawo. Miuban pa ko sa laing duha ka sakyanan nga may trompa ug sa tinuoray lang ang kadaghanan dili gustong mamati sa mensahe. Apan wala silay mahimo kay madunggan nila diha sa ilang mga balay ang mga pakigpulong nga gikan sa mga sakyanan. Nahibalo gyod si Jehova sa hustong pamaagi nga gamiton  sa hustong panahon. Kadto nagkinahanglan gyod ug kaisog sa among bahin, apan kanunayng nagmalamposon ang katuyoan niini, ug nahimaya ang ngalan ni Jehova.”

Sa dekada sa 1930 ug sa sayong bahin sa dekada sa 1940, ang mga ponograpo ug girekord nga mga pakigpulong sa Bibliya maoy gigamit sa pagsangyaw. Usa ka sister ang nahinumdom: “Dihay batan-ong sister nga nagsangyaw sa balaybalay gamit ang ponograpo. Sa gipatokar niya kini sa usa ka pultahan, ang lalaki nga tag-iya sa balay nasuko pag-ayo ug gipatiran ang ponograpo paingon sa gawas. Walay bisan usa nga rekording ang nadaot. Tulo ka lalaki nga naniudto diha sa ilang giparking nga trak ang nakakita niini. Ilang gitawag ang sister aron ipatokar kini para nila, ug sila mikuhag mga basahon gikan kaniya. Ang dili maayong pagtratar nagbunga gihapon.” Gikinahanglan ang kaisog sa pag-atubang sa maong mga pagsulay.

Ang samang sister midugang: “Nahinumdom ko sa pagsugod sa pagpanagtag ug magasin diha sa kadalanan niadtong 1940. Kaniadto diha pay mga information march. Ang mga igsoon manglakaw nga magsunod daplin sa dalan ug magdalag mga plakard nga may mabasang ‘Ang Relihiyon Maoy Lit-ag ug Panglimbong’ ug ‘Alagara ang Diyos ug si Kristo nga Hari.’ Sa samang higayon, ang libreng mga tract giapod-apod ngadto sa mga tawo. Nagkinahanglag kaisog ang pagduyog niini nga buluhaton, apan tungod niini ang ngalan ni Jehova ug ang iyang katawhan nailhan sa publiko.”

“Lisod kaayo ang pagpanagtag ug magasin sa gagmayng lungsod,” miingon ang laing sister. “Kaniadto, grabe kaayong gisupak ang mga Saksi. . . . Gikinahanglan gyod ang kaisog sa pagtindog sa usa ka kanto nga magkupot sa mga magasin ug isinggit ang mga eslogan nga gamiton. Apan halos kada Sabado namo ning gihimo. Usahay mahigalaon ang mga tawo. Sa ubang higayon libotan mig masuk-anong mga grupo, ug usahay molakaw na lang mi aron dili mapasakitan.”

Bisan pa sa paglutos panahon sa Gubat sa Kalibotan II, ang mga Saksi ni Jehova maisogong nagpadayon sa pagsangyaw. Sa 43 ka adlaw nga kampanya sukad sa Disyembre 1, 1940, hangtod sa Enero 12, 1941, mga 50,000 ka magmamantala sa Amerika ang nanagtag ug halos walo ka milyong pulyeto.

Daghang tigulang na sa organisasyon sa Diyos ang makahinumdom pa sa nangaging mga pagsulay diin kinahanglan silang magmaisogon. Ang pipila nahinumdom nga sulod sa katuigan, ang ilang kaisog nabanaag diha sa kanunayng gibalikbalik nga panultihon, Padayon kitang magsangyaw nga masiboton hangtod sa kataposan! Kon unsang matanga sa pamaagi ang gamiton sa pagpakaylap sa mensahe sa Diyos una pa laglagon kining daotang sistema, wala pa kita mahibalo. Apan uban sa tabang sa Diyos, padayon natong imantala ang pulong ni Jehova uban ang pagtuo ug kaisog.

[Blurb sa panid 9]

Gikinahanglan kanunay ang kaisog sa pagsangyaw sa Gingharian