Ayawg Lingi sa “mga Butang nga Anaa sa Luyo”
Ayawg Lingi sa “mga Butang nga Anaa sa Luyo”
“Walay tawo nga nakabutang na sa iyang kamot sa daro ug molingi sa mga butang nga anaa sa luyo ang angayan sa gingharian sa Diyos.”—LUC. 9:62.
UNSAON NIMO PAGTUBAG?
Nganong angay natong ‘hinumdoman ang asawa ni Lot’?
Unsa ang tulo ka butang nga dili nato sigehag hunahuna?
Sa unsang paagi kita makanunot sa organisasyon ni Jehova?
1. Unsay gipasidaan ni Jesus, ug unsang pangutana ang motungha?
“HINUMDOMI ninyo ang asawa ni Lot.” (Luc. 17:32) Ang maong pasidaan nga gihatag ni Jesu-Kristo duolag 2,000 ka tuig kanhi ilabinang hinungdanon karon. Apan unsay gipasabot ni Jesus? Ang mga Hudiyo nga naminaw kaniya nahibalo kon unsay nahitabo sa asawa ni Lot. Samtang mikalagiw gikan sa Sodoma uban sa iyang pamilya, siya masinupakong milingi ug nahimong haliging asin.—Basaha ang Genesis 19:17, 26.
2. Ngano kahang milingi ang asawa ni Lot, ug unsay resulta niana?
2 Apan nganong milingi ang asawa ni Lot? Gusto ba niyang makita kon unsay nagakahitabo? Milingi ba siya kay dili makatuo nga gilaglag ang maong siyudad o kaha huyang ang iyang pagtuo? O basig gianugonan siya sa mga butang nga iyang gibiyaan sa Sodoma? (Luc. 17:31) Bisag unsa pay rason, siya namatay tungod sa iyang pagsupak. Hunahunaa kana! Siya namatay sa samang adlaw nga gilaglag ang daotang mga tawo sa Sodoma ug Gomora. Dili ikatingala nga si Jesus miingon: “Hinumdomi ninyo ang asawa ni Lot”!
3. Giunsa pagpasiugda ni Jesus nga dili kita angayng molingi sa luyo?
3 Kita usab nagkinabuhi sa panahon nga dili angayng molingi, o magsigeg hunahuna, sa mga butang nga ato nang gibiyaan. Gipasiugda kini ni Jesus dihang gitubag niya ang usa ka lalaking mihangyo nga manamilit una sa iyang pamilya sa dili pa mahimong tinun-an. Si Jesus miingon: “Walay tawo nga nakabutang na sa iyang kamot sa daro ug molingi sa mga butang nga anaa sa luyo ang angayan sa gingharian sa Diyos.” (Luc. 9:62) Estrikto ra ba kaayo o dili makataronganon ang tubag ni Jesus? Dili, kay siya nahibalo nga pasumangil lang kadto sa lalaki aron makalikay sa responsabilidad sa pagkahimong tinun-an. Gihubit ni Jesus ang maong paglangaylangay ingong paglingi sa “mga butang nga anaa sa luyo.” Komosta kon ang usa nga nagdaro molingi sa luyo o mamuhi sa daro aron motan-aw sa likod? Bisan hain niana, siya mabalda ug lagmit madaot ang iyang gihimo.
4. Asa kita angayng magpokus?
4 Angay kitang magpokus sa unahan ug dili sa nangagi. Ang Proverbio 4:25 tin-awng nag-ingon: “Kon bahin sa imong mga mata, ideretso sila pagtan-aw sa unahan, oo, ang imong magilawong mga mata patutoka sa imong atubangan.”
5. Nganong dili kita angayng molingi sa mga butang nga anaa sa luyo?
5 Duna kitay maayong rason nga dili molingi sa mga butang nga anaa sa luyo. Unsa kana? Ania na kita sa “kataposang mga adlaw.” (2 Tim. 3:1) Sa dili madugay, dili lang duha ka daotang siyudad ang laglagon sa Diyos kondili ang tibuok sistema sa mga butang. Unsay makatabang aron dili kita mabalda sama sa nahitabo sa asawa ni Lot? Angay natong mahibaloan kon unsa ang mga butang nga anaa sa atong luyo. (2 Cor. 2:11) Busa atong tagdon kon unsa kining mga butanga ug tinoon kon sa unsang paagi kita makalikay nga mapokus niana.
MAAYONG MGA KAHIMTANG SA MIAGI
6. Nganong dili kanunayng kasaligan ang atong paghinumdom sa nangagi?
6 Ang usa ka kapeligrohan mao ang natuis nga panglantaw sa maayong mga kahimtang sa miagi. Ang atong paghinumdom sa nangagi dili kanunayng kasaligan. Mahimong mapagaan nato ang mga problema sa miagi ug mapasobrahan ang mga kalipay, nga mopatim-awng mas maayo ang kinabuhi kaniadto kay sa tinuod nga kahimtang. Tungod niining natuis nga paghinumdom, mangandoy na hinuon kita nga mobalik sa daw maayong mga kahimtang sa miagi. Apan ang Bibliya nagpasidaan kanato: “Ayaw pag-ingon, ‘Ngano man nga ang kanhing mga adlaw mas maayo pa kay niining mga adlawa?’ kay dili maalamon nga mangutana bahin niini.” (Eccl. 7:10, New English Translation) Nganong peligroso ang maong panghunahuna?
7-9. (a) Unsay nahitabo sa mga Israelinhon sa Ehipto? (b) Nganong angayng magmalipayon ang mga Israelinhon? (c) Nganong nagreklamo ug nagbagulbol ang mga Israelinhon?
7 Tagda ang nahitabo sa mga Israelinhon sa adlaw ni Moises. Sa sinugdan sila giisip ingong mga dinapit sa Ehipto. Apan sa wala na si Jose, ang mga Ehiptohanon “nagbutang sa ibabaw [sa mga Israelinhon] ug mga pangulo sa pinugos nga trabaho aron sa paglupig kanila pinaagig mabug-at nga palas-anon.” (Ex. 1:11) Sa ulahi, si Paraon nagsugo nga patyon ang tanang masuso nga lalaki sa mga Israelinhon aron dili sila modaghan. (Ex. 1:15, 16, 22) Busa si Jehova miingon kang Moises: “Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos.”—Ex. 3:7.
8 Mahanduraw ba nimo ang kalipay sa mga Israelinhon samtang migula sa Ehipto ingong gawasnong katawhan? Ilang nakita ang kahibulongang paggamit ni Jehova sa iyang gahom dihang iyang gipahinabo ang Napulo ka Hampak ngadto sa magarbohong si Paraon ug sa iyang katawhan. (Basaha ang Exodo 6:1, 6, 7.) Sa kataposan, giagda sa mga Ehiptohanon ang mga Israelinhon sa pagbiya dayon ug gihatagan pa silag daghan kaayong bulawan ug mga plata mao nga gikaingong “gihukasan [sa katawhan sa Diyos] ang mga Ehiptohanon.” (Ex. 12:33-36) Mas pang nagmalipayon ang mga Israelinhon dihang nakita nilang gilaglag ni Jehova si Paraon ug ang iyang kasundalohan sa Pulang Dagat. (Ex. 14:30, 31) Pagkamakapalig-on sa pagtuo nga makita ang maong talagsaong mga panghitabo!
9 Apan wala magdugay human sila milagrosong giluwas, dili katuohan nga sila nagreklamo ug nagbagulbol. Sa unsa? Sa pagkaon! Wala sila makontento sa gitagana ni Jehova ug mireklamo: “Nahinumdom gayod kami sa mga isda nga among gikaon sa Ehipto nga walay bayad, sa mga pepino ug sa mga sandiya ug sa mga puerro ug sa mga sibuyas ug sa mga ahos! Apan karon ang among kalag nag-uga. Wala nay laing nakita sa among mga mata kondili ang mana.” (Num. 11:5, 6) Oo, natuis pag-ayo ang ilang panglantaw—nga gusto pa gani nilang mobalik sa yuta diin sila naulipon! (Num. 14:2-4) Ang mga Israelinhon milingi sa mga butang nga anaa sa luyo ug nawad-an sa pag-uyon ni Jehova.—Num. 11:10.
10. Unsay atong makat-onan sa panig-ingnan sa mga Israelinhon?
10 Unsay atong makat-onan? Kon duna kitay mga problema, dili kita magsigeg hunahuna sa daw maayong mga butang sa miagi—bisan gani niadtong wala pa kita makakat-on sa kamatuoran. Bisan tuod dili sayop nga mamalandong sa atong nakat-onan sa nangaging mga kasinatian o maghandom sa malipayong kagahapon, kinahanglang balanse ug realistiko ang atong panglantaw sa nangagi. Kay kon dili, mosamot ang atong pagkadili-kontento sa atong presenteng kahimtang ug matental nga mobalik sa atong kanhing pagkinabuhi.—Basaha ang 2 Pedro 2:20-22.
MGA SAKRIPISYO SA MIAGI
11. Giunsa paglantaw sa pipila ang ilang mga sakripisyo sa miagi?
11 Ikasubo, ang pipila nagmahay sa mga sakripisyo nga ilang gihimo sa miagi. Lagmit may kahigayonan unta kang makakuhag taas nga edukasyon, mainila, o madato, apan imo kining gipalabay. Gibiyaan sa daghang igsoon ang dagkog suweldo nga trabaho sa natad sa negosyo, kalingawan, edukasyon, o esports. Milabay ang mga panahon, ug wala gihapon moabot ang kataposan. Imo bang gihanduraw kon unsa ka na unta karon kon wala ka pa mohimog mga sakripisyo?
12. Unsay pag-isip ni Pablo sa mga butang nga iyang gibiyaan?
12 Si apostol Pablo dakog gisakripisyo aron mahimong sumusunod ni Kristo. (Filip. 3:4-6) Unsay iyang pag-isip sa mga butang nga iyang gibiyaan? Siya miingon: “Ang mga butang nga kaniadto maoy ganansiya alang kanako, kini giisip ko nga kapildihan tungod kang Kristo.” Ngano? Siya mipadayon: “Sa pagkatinuod giisip ko usab ang tanang butang nga kapildihan tungod sa pagkalabaw ug bili sa kahibalo ni Kristo Jesus nga akong Ginoo. Tungod kaniya nadawat ko ang kapildihan sa tanang butang ug giisip kini nga mga basura, aron akong maangkon si Kristo.” * (Filip. 3:7, 8) Sama nga ang usa nga maglabayg basura dili mahinugon sa iyang gilabay, si Pablo wala magmahay sa bisan unsang sekular nga kahigayonan nga iyang gibiyaan. Wala na niya isipa nga hinungdanon pa kadto.
13, 14. Unsaon nato pagsundog si Pablo?
13 Unsay angay natong buhaton kon magsige kitag hunahuna sa gipalabay nga mga kahigayonan? Sundoga si Pablo. Sa unsang paagi? Hunahunaa kon unsa ka bililhon ang imong nabatonan karon. Nakabaton kag maayong relasyon uban kang Jehova ug siya nahibalo nga matinumanon ka. (Heb. 6:10) Duna bay ikatanyag ang kalibotan nga makatupong sa espirituwal nga mga panalangin nga atong nabatonan karon ug matagamtam pa sa umaabot?—Basaha ang Marcos 10:28-30.
14 Dayon gihisgotan ni Pablo kon unsay makatabang kanato nga makapabiling matinumanon. Siya miingon nga iyang ‘gikalimtan ang mga butang sa luyo ug nangab-ot sa mga butang sa unahan.’ (Filip. 3:13) Gihisgotan dinhi ni Pablo ang duha ka butang nga angay natong himoon. Una, angay natong kalimtan ang mga butang nga atong gibiyaan, nga dili mag-usik ug kusog ug panahon sa pagsigeg hunahuna niana. Ikaduha, sama sa usa ka magdadagan nga duol na sa dag-anan, kinahanglan kitang mopadayon, nga magpokus sa mga butang sa unahan.
15. Unsay kaayohan kon atong pamalandongon ang panig-ingnan sa matinumanong mga alagad sa Diyos?
15 Kon atong pamalandongon ang panig-ingnan sa matinumanong mga alagad sa Diyos—kaniadto o karon—kita mas madasig nga mopadayon sa unahan inay molingi sa mga butang nga anaa sa luyo. Pananglitan, kon si Abraham ug Sara kanunay pang naghandom sa Ur, “sila may kahigayonan unta sa pagbalik.” (Heb. 11:13-15) Apan wala sila mobalik. Sa unang higayon nga si Moises mibiya sa Ehipto, mas daghan ang iyang gibiyaan didto kay sa gibiyaan sa mga Israelinhon sa ulahi. Apan walay rekord nga gusto niyang mabatonan pag-usab ang maong mga butang. Hinunoa, ang Bibliya nag-ingon nga “giisip niya ang pagpakaulaw sa Kristo ingong bahandi nga labaw pa kay sa mga bahandi sa Ehipto; kay siya nagtutok man ngadto sa pagbayad sa ganti.”—Heb. 11:26.
NEGATIBONG MGA KASINATIAN SA MIAGI
16. Sa unsang paagi tingali kita maapektohan sa miaging mga kasinatian?
16 Hinuon dili tanang kasinatian sa miagi ang daw positibo. Tingali kanunay kitang maguol sa nangaging mga sala o kasaypanan. (Sal. 51:3) Lagmit nasakitan gihapon ta sa bug-at nga tambag nga atong nadawat. (Heb. 12:11) Ang mga inhustisya—tinuod man kini o sa hunahuna lang—tingali mopatigbabaw sa atong kaisipan. (Sal. 55:2) Unsay makatabang kanato aron dili magsigeg hunahuna niini nga mga kasinatian? Atong hisgotan ang tulo ka pananglitan.
17. (a) Nganong gibati ni Pablo nga siya “usa ka tawong ubos pa kay sa labing ubos sa tanang balaan”? (b) Unsay nakatabang kang Pablo nga dili maapektohan sa negatibong panghunahuna?
17 Miaging kasaypanan. Gihubit ni Pablo ang iyang kaugalingon ingong “usa ka tawong ubos pa kay sa labing ubos sa tanang balaan.” (Efe. 3:8) Nganong kini ang iyang gibati? “Tungod kay gilutos ko ang kongregasyon sa Diyos,” siya miingon. (1 Cor. 15:9) Mahanduraw ba nimo ang gibati ni Pablo dihang nahimamat niya ang pipila nga iyang gilutos kanhi? Apan inay tugotan kining negatibong panghunahuna nga mag-apektar kaniya, si Pablo nagpokus sa dili takos nga kalulot nga gipakita kaniya. (1 Tim. 1:12-16) Tungod niana, siya nagpadayon sa iyang ministeryo. Ang iyang makasasalang binuhatan sa miagi maoy lakip sa mga butang nga buot na niyang kalimtan. Sanglit dili na nato mabag-o ang mga kasaypanan sa miagi, mausik lang ang atong kusog kon magsige kitag hunahuna niana. Hinunoa, angay natong hinumdoman kanunay ang kaluoy nga gipakita ni Jehova kanato ug gamiton ang atong kusog sa pag-alagad kaniya karon.
18. (a) Unsay mahitabo kon magsige kitag hunahuna nga may kayugot sa tambag nga atong nadawat? (b) Sa unsang paagi nato masunod ang awhag ni Solomon bahin sa pagdawat ug tambag?
18 Bug-at nga tambag. Komosta kon magsige kitag hunahuna nga may kayugot sa tambag nga atong nadawat? Kini makapaguol ug makapaluya kanato. (Heb. 12:5) Kon gisalikway dayon nato ang tambag o kaha gidawat nato kini ug sa ulahi mihunong, pareho ra ang resulta. Wala kita makabenepisyo sa tambag. Mas maayo gayod nga sundon ang awhag ni Solomon: “Hawiri ang disiplina; ug ayaw kini buhii. Ampingi kini, kay kini maoy imong kinabuhi.” (Prov. 4:13) Sama sa drayber nga nagsunod sa mga karatula sa karsada, dawaton nato ang tambag, ipadapat kini, ug padayong moalagad.—Prov. 4:26, 27; basaha ang Hebreohanon 12:12, 13.
19. Unsaon nato pagsundog ang pagtuo ni Habacuc ug Jeremias?
19 Mga inhustisya—tinuod man kini o sa hunahuna lang. Usahay basin mobati kita sama kang propeta Habacuc, kinsa mituaw kang Jehova alang sa hustisya. Wala siya makasabot kon nganong gitugotan ni Jehova nga mahitabo ang inhustisya. (Hab. 1:2, 3) Hinungdanon gayod nga atong sundogon ang pagtuo sa maong propeta, kinsa miingon: “Apan, alang kanako, ako magasadya kang Jehova; magmalipayon ako sa Diyos sa akong kaluwasan.” (Hab. 3:18) Sama usab kang Jeremias, kon atong huptan ang “mahulatong tinamdan” uban ang bug-os nga pagtuo kang Jehova, ang Diyos sa hustisya, kita makasalig nga tul-iron niya ang tanang butang sa hustong panahon.—Lam. 3:19-24.
20. Sa unsang paagi nato mapamatud-an nga atong ‘gihinumdoman ang asawa ni Lot’?
20 Kita nagkinabuhi sa kulbahinam nga panahon. Ang talagsaong mga butang nagakahitabo na karon ug daghan pa ang mahitabo sa unahan. Hinaot kitang tanan padayong monunot sa organisasyon ni Jehova. Sundon nato ang tambag sa Bibliya nga motan-aw sa unahan ug dili molingi sa mga butang nga anaa sa luyo. Pinaagi niini, mapamatud-an nato nga atong ‘gihinumdoman ang asawa ni Lot’!
[Footnote]
^ par. 12 Ang orihinal nga pulong dinhi nga gihubad ug “basura” nagpasabot usab sa mga butang nga “gisalibay ngadto sa mga iro” ug “kinalibang.” Ang usa ka eskolar sa Bibliya nag-ingon nga ang paggamit ni Pablo niini nga pulong nagpakita sa “bug-os nga pag-ayad sa butang nga walay pulos ug makaluod nga ang usa dili na gani gustong motan-aw niini.”
[Mga Pangutana sa Pagtuon]
