Hupti ang Imong Pagbati sa Pagkadinalian
Hupti ang Imong Pagbati sa Pagkadinalian
“Iwali ang pulong, magmadali diha niini.”—2 TIM. 4:2.
MAKAPATIN-AW KA BA?
Nganong ang unang siglong mga Kristohanon nagsangyaw uban ang pagkadinalian?
Sa unsang paagi atong mahuptan ang pagbati sa pagkadinalian?
Nganong mas dinalian karon ang pagsangyaw sa Gingharian?
1, 2. Unsang mga pangutana ang motungha bahin sa awhag nga ‘magmadali sa atong pagsangyaw’?
ANG mga tawo kansang trabaho mao ang pagluwas ug kinabuhi sagad molihok uban ang pagkadinalian. Pananglitan, ang mga bombero moadto dayon kon may emerhensiya kay basig may kinabuhi nga nameligro.
2 Ingong mga Saksi ni Jehova, buot natong maluwas ang mga tawo. Busa seryoso natong gituman ang sugo nga isangyaw ang maayong balita sa Gingharian. Siyempre, dili kita matarantar sa pagbuhat niini. Nan unsay gipasabot ni apostol Pablo sa iyang awhag: “Iwali ang pulong, magmadali diha niini”? (2 Tim. 4:2) Unsaon nato pagsangyaw uban ang pagkadinalian? Ug nganong dinalian kaayo ang atong buluhaton?
NGANONG DINALIAN ANG ATONG PAGSANGYAW?
3. Ang pagdawat o pagsalikway sa mensahe sa Gingharian moresulta sa unsa?
3 Kon imong hunahunaon nga ang atong pagsangyaw makaluwas ug kinabuhi, lagmit imong bation nga dinalian kaayo nga ipaambit ang maayong balita sa uban. (Roma 10:13, 14) Ang Pulong sa Diyos nag-ingon: “Dihang ako moingon sa daotan: ‘Ikaw sa pagkatinuod mamatay,’ ug siya mobiya sa iyang sala ug mobuhat sa hustisya ug pagkamatarong, . . . siya sa pagkatinuod mabuhi. Siya dili mamatay. Walay usa sa iyang mga sala nga iyang nahimo ang pagahinumdoman batok kaniya.” (Ezeq. 33:14-16) Sa pagkatinuod, gisultihan sa Bibliya kadtong nagtudlo sa mensahe sa Gingharian: “Pagaluwason mo ang imong kaugalingon ug kadtong mamati kanimo.”—1 Tim. 4:16; Ezeq. 3:17-21.
4. Nganong ang apostasya naghimo sa pagsangyaw sa unang siglo nga dinalian?
4 Aron masabtan kon nganong giawhag ni Pablo si Timoteo nga mosangyaw uban ang pagkadinalian, tagda ang pipila ka konteksto sa atong temang teksto. Atong mabasa: “Iwali ang pulong, magmadali diha niini sa paborableng panahon, sa masamok nga panahon, pamadlong, pagsaway, panambag, uban sa tanang hataas-nga-pailob ug arte sa pagpanudlo. Kay aduna unyay yugto sa panahon nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan; ug ilang ilingiw ang ilang mga dalunggan gikan sa kamatuoran.” (2 Tim. 4:2-4) Gitagna ni Jesus nga motungha ang apostasya. (Mat. 13:24, 25, 38) Busa dinalian para kang Timoteo nga “iwali ang pulong” bisan diha sa kongregasyon aron ang maong apostasya dili makadani sa mga Kristohanon ug makalimbong kanila pinaagi sa bakak nga mga pagtulon-an. Ang ilang kinabuhi nameligro. Komosta karon?
5, 6. Unsang popular nga mga pagtulon-an ang lagmit mahibalag nato sa ministeryo?
5 Karon, ang apostasya gikan sa matuod nga pagsimba miuswag ug mikaylap. (2 Tes. 2:3, 8) Unsang mga pagtulon-an ang naggitik sa dalunggan sa mga tawo karon? Sa daghang dapit, ang ebolusyon gitudlo uban ang samang kasibot nga gibati sa mga tawo para sa ilang relihiyon. Bisan tuod gigamit ang siyensiya sa pagtudlo niini, nahimo kining samag relihiyon nga nag-impluwensiya sa panglantaw sa mga tawo bahin sa Diyos ug sa uban. Ang laing popular nga pagtulon-an mao nga ang Diyos dili interesado kanato, busa dili kinahanglang mainteres kita kaniya. Nganong kini nga mga pagtulon-an madanihon kaayo ug nakaganoy sa minilyon ngadto sa espirituwal nga pagkatulog? Kini nagpasiugdag parehong mensahe, ‘Makahimo kag bisan unsa kay walay maghukom kanimo.’ Kini nga mensahe naggitik gayod sa dalunggan sa daghang tawo.—Basaha ang Salmo 10:4.
6 Apan dunay laing mga paagi nga gigitik ang dalunggan sa mga tawo. Ang uban nga mosimba gihapon ganahang makadungog nga bisag unsay ilang buhaton, ang Diyos nahigugma kanila. Ang mga pari ug mga pastor naggitik sa dalunggan sa uban pinaagi sa pagpatuo kanila nga ang mga seremonya, Misa, pista, ug mga imahen gipanalanginan sa Diyos. Ang maong mga maninimba walay kalibotan nga peligroso ang ilang kahimtang. (Sal. 115:4-8) Apan kon ato silang pukawon sa espirituwal aron masabtan ang tinuod nga mensahe sa Bibliya, sila makabenepisyo sa Gingharian sa Diyos.
UNSAY KAHULOGAN SA PAGSANGYAW UBAN ANG PAGKADINALIAN?
7. Sa unsang paagi atong ikapakita ang pagkadinalian?
7 Ang usa ka maayong siruhano magpokus gayod sa iyang pag-opera tungod kay kinabuhi ang nalangkit. Sa atong ministeryo, atong mapakita ang pagkadinalian pinaagi sa pagpokus sa atong buluhaton, sama sa paghunahuna kon unsang mga topiko, pangutana, o impormasyon ang makapainteres sa mga tawo. Kini usab magpalihok kanato nga ipahaom ang atong eskedyul aron duawon ang mga tawo dihang sila mas madinawaton kanato.—Roma 1:15, 16; 1 Tim. 4:16.
8. Unsay sagad nga nalangkit sa paglihok uban ang pagkadinalian?
8 Ang pagbati sa pagkadinalian naglakip usab sa pagtakdag mga prioridad. (Basaha ang Genesis 19:15.) Pananglitan, gipaadto ka sa imong doktor sa iyang opisina ug siya miingon: “Dili maayo ang resulta sa imong test. Dinalian ang imong situwasyon. Duna na lang kay usa ka bulan aron matabang pa ang imong sakit.” Lagmit dili ka mosutoy ug biya sa iyang opisina nga samag bombero nga moresponde ug emerhensiya. Apan tingali gusto nimong masayran ang iyang mga rekomendasyon, mouli, ug pamalandongon pag-ayo ang imong mga prioridad.
9. Nganong makaingon kita nga si Pablo nagsangyaw sa Efeso uban ang pagkadinalian?
9 Makakat-on kita sa pagbati ni Pablo sa pagkadinalian diha sa iyang gisulti sa mga ansiyano sa Efeso bahin sa iyang pagsangyaw sa maayong balita sa distrito sa Asia. (Basaha ang Buhat 20:18-21.) Sukad sa iyang pag-abot, puliki siya sa pagsangyaw sa mga tawo sa balaybalay. Dugang pa, sulod sa duha ka tuig “adlaw-adlaw [siyang] naghatag ug mga pakigpulong diha sa awditoryum sa eskuylahan sa Tirano.” (Buh. 19:1, 8-10) Ang pagbati ni Pablo sa pagkadinalian dayag nga nakaapektar sa iyang rutina. Ang awhag nga ‘magsangyaw nga dinalian’ wala ihatag aron pabug-atan ta sa atong buluhaton. Bisan pa niana, angay natong himoong prioridad ang buluhatong pagsangyaw.
10. Nganong mapasalamaton kita nga ang mga Estudyante sa Bibliya misangyaw uban ang pagkadinalian?
10 Ang panig-ingnan sa gamayng grupo sa mga Estudyante sa Bibliya nga misugod sa pagsangyaw una pa ang 1914 nag-ilustrar kon unsay gipasabot nga mobatig pagkadinalian. Bisag pipila lang sila ka libo, ilang gipabilhan ang kadinalian sa panahon ug masibotong nagsangyaw sa Gingharian. Duna silay mga wali nga gipatik sa gatosan ka mantalaan ug nagpasalida sa “Photo-Drama of Creation.” Niining paagiha, ilang nasangyawan ang minilyon. Kon wala pa sila mobatig pagkadinalian, daghan kanato ang dili makadungog sa mensahe sa Gingharian.—Basaha ang Salmo 119:60.
AYAW WAD-A ANG IMONG PAGBATI SA PAGKADINALIAN
11. Nganong ang pipila nawad-an sa ilang pagbati sa pagkadinalian?
11 Tungod sa kabaldahan, ang usa tingali malimot kon unsa ka hinungdanon ang pagsangyaw. Ang sistema ni Satanas gidisenyo aron malinga kita sa personal nga mga pangagpas ug sa dili hinungdanong mga butang. (1 Ped. 5:8; 1 Juan 2:15-17) Ang pipila nga kanhi prioridad nila ang pag-alagad kang Jehova nawad-an sa ilang pagbati sa pagkadinalian. Pananglitan, ang unang siglong Kristohanon nga si Demas maoy “isigkamagbubuhat” ni Pablo, apan sa ulahi siya nalinga sa kalibotan. Imbes padayong palig-onon ang iyang igsoon panahon sa kalisdanan, gibiyaan niya si Pablo.—Filem. 23, 24; 2 Tim. 4:10.
12. Unsang kahigayonan ang bukas karon, ug unsang mga kahigayonan ang pagabuksan kanato sa walay kataposan?
12 Aron mahuptan ang pagbati sa pagkadinalian, angay natong suklan ang tentasyon sa pagbuhat ug mga butang nga magbalda kanato gikan sa pagsangyaw. Paningkamotan nato nga “makapangupot pag-ayo sa tinuod nga kinabuhi.” (1 Tim. 6:18, 19) Sa walay duhaduha nagtuo ka nga ang kinabuhing walay kataposan sa yuta ilalom sa Gingharian sa Diyos magtaganag daghang kahigayonan nga mapahimuslan ang makalingawng mga kalihokan. Apan sa pagkakaron, duna kitay kahigayonan sa pagtabang sa uban nga maluwas sa Armagedon ug kini dili na mahitabo pag-usab.
13. Karon nga kita mga Kristohanon na, sa unsang paagi nato mahuptan ang pagbati sa pagkadinalian?
13 Sanglit ang kadaghanang tawo sa atong palibot natulog sa espirituwal, unsay makatabang kanato nga dili mawala ang pagbati sa pagkadinalian? Hinumdomi nga kita kanhi samag natulog sa kangitngitan. Apan kita gipukaw, ug si Kristo misidlak kanato, ingon sa gipunting ni Pablo. Kita karon adunay pribilehiyo nga mahimong mga tigdala sa kahayag. (Basaha ang Efeso 5:14.) Human kana hisgoti, si Pablo misulat: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” (Efe. 5:15, 16) Taliwala sa maong pagkadaotan, atong ‘paliton ang panahon’ alang sa mga kalihokang makapabilin natong nagmata sa espirituwal.
KITA NAGKINABUHI SA KULBAHINAM NGA MGA PANAHON
14-16. Nganong mas dinalian karon ang pagsangyaw sa Gingharian?
14 Kanunayng dinalian ang Kristohanong ministeryo, apan ilabina gayod karon. Sukad sa 1914, nadayag ang mga bahin sa ilhanan nga gitagna sa Bibliya. (Mat. 24:3-51) Ang paglungtad sa tawo gihulga na pag-ayo. Bisan pa sa di pa dugayng mga kasabotan, ang gamhanang mga nasod duna gihapoy mga 2,000 ka nukleyar nga hinagiban nga andam nang gamiton. Ang mga awtoridad nagtaho nga daghang nukleyar nga materyales ang “nawala.” Ang pipila ba niini atua sa mga terorista? Ang mga tigpaniid nag-ingon nga ang katawhan dali ra kaayong puohon pinaagig gubat nga sugdan sa usa ka terorista. Apan dili lang gubat ang hulga sa paglungtad sa tawo.
15 “Ang pagkausab sa klima mao ang kinadak-ang hulga sa panglawas sa tibuok kalibotan sa ika-21 nga siglo,” sumala sa taho sa The Lancet ug sa University College London sa 2009. Kini nag-ingon: “Ang epekto sa pagkausab sa klima makaapektar sa panglawas sa kadaghanang populasyon sa mosunod nga mga dekada ug mas magpameligro sa kinabuhi ug kahimsog sa binilyong tawo.” Daghang dapit ang mahimong madaot tungod sa pagtaas sa lebel sa dagat, hulaw, baha, sakit, bagyo, ug gubat gumikan sa nagakahurot nga kahinguhaan. Oo, ang mga gubat ug kalamidad naghulga sa katawhan.
16 Ang uban lagmit naghunahuna nga ang hulga sa nukleyar nga gubat motultol sa mga hitabo nga magtuman sa “ilhanan.” Apan ang kadaghanan wala makasabot sa tinuod nga kahulogan sa ilhanan. Nakita na kini sulod sa mga dekada, nga nagpailang ang presensiya ni Kristo ania na ug ang kataposan niining sistema sa mga butang tulin nga nagsingabot. (Mat. 24:3) Daghang bahin sa ilhanan ang dayag na kaayo karon. Panahon na nga ang mga tawo momata gikan sa espirituwal nga pagkatulog. Ang atong ministeryo makatabang sa pagpukaw kanila.
17, 18. (a) Sa unsang paagi ang pagkinabuhi sa kataposang mga adlaw makaapektar kanato? (b) Unsay makapausab sa panglantaw sa mga tawo bahin sa mensahe sa Gingharian?
17 Mubo na lang ang nahibiling panahon aron pamatud-an ang atong gugma kang Jehova ug taposon ang buluhatong pagsangyaw niining kataposang mga adlaw. Ang giingon ni Pablo sa unang siglong mga Kristohanon sa Roma mas importante karon: “Kamo nasayod sa panahon, nga takna na aron kamo momata gikan sa pagkatulog, kay karon ang atong kaluwasan mas duol na kay sa dihang kita nahimong mga magtutuo.”—Roma 13:11.
18 Ang gitagnang mga hitabo sa kataposang mga adlaw makapaamgo sa mga tawo sa ilang espirituwal nga panginahanglan. Ang pipila nainteres sa mensahe sa Gingharian tungod sa kapakyasan sa tawhanong gobyerno sa pagsulbad sa kalisod sa ekonomiya, hulga sa nukleyar nga gubat, krimen, o pagkadaot sa kalikopan. Ang uban nakaamgo sa ilang espirituwal nga panginahanglan tungod sa panghitabo diha sa ilang pamilya, sama sa sakit, diborsiyo, o kamatayon sa usa ka minahal. Kon kita mosangyaw, atong matabangan ang maong mga tawo.
GIPALIHOK SA PAGBATI SA PAGKADINALIAN
19, 20. Sa unsang paagi ang pagbati sa pagkadinalian nagtukmod sa daghang Kristohanon sa pag-usab sa ilang paagi sa pagkinabuhi?
19 Daghang Kristohanon nga mibatig pagkadinalian ang nagpauswag sa ilang ministeryo. Pananglitan, ang batan-ong magtiayon nga taga-Ecuador midesisyon sa pagpayano sa ilang kinabuhi human makatambong sa espesyal nga asembliya sa 2006, nga may temang “Hupting Yano ang Imong Mata.” Ilang gilista ang mga butang nga wala nila kinahanglana, ug sulod sa tulo ka bulan sila mibalhin gikan sa tuloy lawak nga apartment ngadto sa usay lawak nga puy-anan, gibaligya ang pipila ka butang, ug gibayran ang tanang utang. Dayon sila nag-oksilyare payunir ug misanong sa sugyot sa magtatan-aw sa sirkito nga moalagad sa kongregasyon nga mas dako ang panginahanglan.
20 Usa ka brader sa Amerika ang misulat: “Dihang mitambong mi sa akong asawa ug asembliya sa 2006, bawtismado na mi sulod sa 30 ka tuig. Samtang namauli, among gihisgotan kon unsaon pagpadapat ang tambag sa pagpayano sa among kinabuhi. (Mat. 6:19-22) Duna miy tulo ka balay, yuta, mahalong mga kotse, motor boat, ug motor home. Kay mibati nga nag-usik lang mig panahon ug kusog para sa materyal nga mga butang, midesisyon mi nga mosulod sa bug-os panahong ministeryo. Sa 2008 miduyog mi sa among anak nga babaye sa pagregular payunir. Makapalipay gayod ang suod nga pagpakig-uban sa mga igsoon! Nakaalagad mi diin dunay mas dakong panginahanglan. Ang pagbuhat ug labaw pa para kang Jehova mas nakapasuod namo kaniya. Ilabinang makapatagbaw nga makita ang mga tawo nga nalipay tungod sa pagkadungog ug pagkasabot sa kamatuoran sa Pulong sa Diyos.”
21. Unsang kahibalo ang magpalihok kanato?
21 Kita nahibalo nga ang “adlaw sa paghukom ug sa kalaglagan sa mga tawong dili-diyosnon” hapit nang magtapos niining daotang sistema. (2 Ped. 3:7) Ang atong kahibalo sa Pulong sa Diyos magpalihok kanato sa pagwali nga masiboton sa nagsingabot nga dakong kasakitan ug sa mosunod nga bag-ong kalibotan. Padayon natong ipakita ang tim-os nga pagbati sa pagkadinalian aron dad-ag tinuod nga paglaom ang katawhan. Pinaagi sa bug-os nga pagpakigbahin niining dinaliang buluhaton, atong gipakita ang tinuod nga gugma alang sa Diyos ug sa isigkatawo.
[Mga Pangutana sa Pagtuon]
