Mga Pangutana Gikan sa mga Magbabasa

Posible bang mapalagpot sa kongregasyon ang usa ka Kristohanon nga nagbatasan sa pagtan-awg pornograpiya?

▪ Oo. Mao nga kinahanglang likayan gayod ang tanang matang sa pornograpiya—sinulat man kini ug mga hulagway—diha sa mga magasin, pelikula, video, ug Internet.

Ang pornograpiya makita bisan asa sa tibuok kalibotan. Tungod sa Internet, kini mikaylap pag-ayo ug midaghan ang nabiktima niini. Bisag dili tuyoon, ang ubang batan-on ug tigulang makakitag pornograpikong mga Web site. Ang uban tinuyong nagtan-aw niini ug wala ra mahasol kay sila sekreto mang makabasa ug makatan-aw niini diha sa ilang balay o opisina. Nganong angayng mabalaka niini ang mga Kristohanon?

Ang pangunang hinungdan makita sa pasidaan ni Jesus: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mat. 5:28) Siyempre, dili daotan ang normal nga seksuwal nga relasyon sa mga magtiayon, gani usa kini ka tinubdan sa ilang kalipay. (Prov. 5:15-19; 1 Cor. 7:2-5) Apan dili kini ang gipasiugda sa pornograpiya. Ang gipasiugda niini mao ang gidiling pagpakigsekso nga makapukaw sa imoral nga panghunahuna nga labot niini nagpasidaan si Jesus. Sa pagkatinuod, ang pagbasa o pagtan-awg pornograpiya supak gayod sa sugo sa Diyos: “Busa, patya ang inyong mga sangkap sa lawas nga anaa sa yuta maylabot sa pakighilawas, kahugawan, seksuwal nga gana, makadaot nga tinguha, ug  hakog nga pangibog, nga maoy idolatriya.”—Col. 3:5.

Komosta kon ang usa ka Kristohanon kas-a o kaduha nakatan-awg pornograpiya? Kini mahimong ipakasama sa peligrosong kahimtang nga kas-a nasinatian sa salmistang si Asap: “Kon bahin kanako, hapit na gayong matipas ang akong mga tiil, diriyot nang maligas ang akong mga lakang.” Unsaon sa Kristohanon sa pagbaton ug hinlong tanlag atubangan sa Diyos kon siya nagtan-awg mga larawan sa mga lalaki o babayeng hubo o sa lalaki ug babaye nga nagsekso? Si Asap wala usab magmalinawon: “Ako gihampak sa tibuok nga adlaw, ug ako gitul-id sa matag buntag.”—Sal. 73:2, 14.

Angayng ilhon sa Kristohanon nga may problema sa pornograpiya nga nagkinahanglan siyag espirituwal nga tabang. Kini nga tabang mabatonan diha sa kongregasyon: “Bisan pag ang usa ka tawo makahimog sayop nga lakang sa dili pa niya himatngonan kini, kamo nga may espirituwal nga mga katakos paningkamoti nga ipasibo pag-usab ang maong tawo diha sa espiritu sa kalumo, samtang ang matag usa kaninyo magbantay sa iyang kaugalingon.” (Gal. 6:1) Ang usa o duha ka ansiyano makatabang kaniya, lakip ang ‘pag-ampo sa pagtuo nga mag-ayo sa usa nga naluya, ug ang iyang sala mapasaylo.’ (Sant. 5:13-15) Nakita niadtong malamposong nakabuntog sa pornograpiya nga ang pag-ampo sa Diyos nakatabang kanila, sama sa gihimo ni Asap.—Sal. 73:28.

Apan si apostol Pablo miingon nga ang ubang nakasala wala maghinulsol “sa ilang kahugawan ug pagpakighilawas ug malaw-ayng panggawi.” * (2 Cor. 12:21) Si Propesor Marvin R. Vincent misulat nga ang Gregong pulong nga gihubad dinhi nga “kahugawan” nagtumong sa “kahugawan nga ngil-ad kaayo.” Ang ubang matang sa pornograpiya dili kay mga hulagway lang sa mga tawong hubo o sa lalaki ug babaye nga nagsekso. Adunay mangil-ad ug makaluod nga pornograpiya nga naglakip sa homoseksuwalidad (panagsekso sa parehong lalaki o babaye), ginurupong panagsekso, bestialidad, pornograpiya sa bata, babayeng gitabangag lugos, linuog nga pagpanamastamas sa babaye, paggapos sa gikasekso, o sadistikong pagpaantos. Ang uban sa panahon ni Pablo nga anaa “sa kangitngit sa kaisipan . . . nawad-an na sa tanang moral nga pagbati [ug] gitugyan ang ilang kaugalingon sa malaw-ay nga panggawi sa pagbuhat sa tanang matang sa kahugawan uban ang kadalo.”—Efe. 4:18, 19.

Gihisgotan usab ni Pablo ang “kahugawan” diha sa Galacia 5:19. Ang usa ka eskolar nga taga-Britanya miingon nga kini “tingali [nagpasabot] ilabina sa tanang dili kinaiyanhong kaulag.” May Kristohanon bang molalis nga ang gihisgotan dinhi nga makaluod ug law-ay kaayong pornograpiya maoy “dili kinaiyanhong kaulag” ug mangil-ad? Matod ni Pablo sa Galacia 5:19-21 nga “kadtong nagabuhat” sa maong kahugawan “dili makapanunod sa gingharian sa Diyos.” Busa, kon ang usa dugay nang nagsigeg tan-awg makaluod ug law-ay kaayong pornograpiya ug dili maghinulsol ug magbag-o, siya kinahanglang ipalagpot gikan sa kongregasyon aron mapreserbar ang kahinlo niini.—1 Cor. 5:5, 11.

Ikalipay nga ang pipila nga naanad sa pagtan-awg makaluod nga matang sa pornograpiya miduol sa mga ansiyano ug natabangan nga makahimog gikinahanglang kausaban. Si Jesus nag-awhag sa mga Kristohanon sa karaang Sardis: “Magpadayon sa paghinumdom sa imong nadawat ug sa imong nadungog, ug magpadayon sa pagtuman niini, ug maghinulsol. Tino nga gawas lamang kon ikaw momata, . . . dili mo gayod mahibaloan kon unsang taknaa ako moanha kanimo.” (Pin. 3:2, 3) Ang usa posibleng maghinulsol ug masakmit gikan sa kalayo, pagaingnon pa.—Jud. 22, 23.

Apan mas maayo nga ang tagsatagsa kanato dili gayod magpaduol sa maong kapeligrohan. Oo, kinahanglang determinado kita sa paglikay sa tanang matang sa pornograpiya!

[Footnote]

[Blurb sa panid 30]

Angayng ilhon sa Kristohanon nga may problema sa pornograpiya nga nagkinahanglan siyag espirituwal nga tabang