“Pwede Mi Nimong Kuhaag Picture?”

Human sa ikaduhang adlaw sa distritong kombensiyon, si Josué, nga usa ka Bethelite sa Mexico, ug ang iyang mga higalang Saksi, nanuroy sa siyudad sa Querétaro. May magtiayong turista nga taga-Colombia nga si Javier ug Maru ang mihangyo kang Josué nga kuhaan silag picture. Kay pormal man ang ilang pamesti ug nag-badge sa kombensiyon, nangutana ang magtiayon kon gikan ba sila ug graduwasyon o laing espesyal nga okasyon. Si Josué miingon nga nanambong silag kombensiyon sa mga Saksi ni Jehova ug gidapit nila ang magtiayon sa pagtambong sa Dominggo.

Ang magtiayon miingon nga maulaw silang motambong kay wala silay pormal nga sinina. Bisan pa niana, gihatag ni Josué ang iyang ngalan ug ang numero sa telepono sa sangang buhatan nga iyang gialagaran.

Upat ka bulan sa ulahi, nakurat si Josué nga gitawgan siya ni Javier. Mitambong gyod diay si Javier ug Maru sa kombensiyon ug gusto silang may mga Saksi nga moduaw nila sa Mexico City, diin sila nagpuyo niadtong tungora. Wala madugay nasugdan silag pagtuon sa Bibliya ug mitambong dayon sa mga tigom. Napulo ka bulan sa ulahi, sila nahimong mga magmamantala. Bisag namalhin sila sa Toronto, Canada, sila padayong miuswag sa espirituwal ug nabawtismohan.

Sa ulahi, si Josué nakadawat ug sulat gikan kang Javier nga nag-asoy kon unsay nakaaghat niya sa pagdawat sa kamatuoran. “Sa wala pa motambong sa kombensiyon, naghisgot mi sa akong asawa nga nagkinahanglan mig espirituwal nga giya. Dihang among nakita nga desente kaayo ang inyong pamesti, nagtuo mi nga mitambong mog espesyal kaayo nga miting. Didto sa kombensiyon, nakadayeg kaayo mi sa mahigugmaong pagtabang kanamo nga makakitag kalingkoran, sa tabang aron masundan ang gibasang Bibliya, ug sa panggawi niadtong nanambong. Wala ra nila tagda ang among pamesti ingong turista.”

Natinuod gayod kang Josué ang giingon sa maalamong hari nga si Solomon: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon, dinhi man o didto, o kon silang duha sama nga mahimong maayo.” (Eccl. 11:6) Makapugas ka ba ug binhi pinaagi sa pagpahimulos sa mga kahigayonan nga madapit ang uban sa pagtambong sa umaabot nga kombensiyon o pakigpulong publiko? Basin ikaw ang gamiton ni Jehova sa pagdani niadtong gigutom ug giuhaw sa espirituwal, sama ni Javier ug Maru.—Isa. 55:1.

[Hulagway sa panid 32]

Wala ngadto sa tuo: Alejandro Voeguelin, Maru Pineda, Alejandro Pineda, Javier Pineda, ug Josué Ramírez didto sa sangang buhatan sa Mexico