Unsaon Nimo Pagtambag?

Duna na bay nagpatambag nimo? Pananglitan, gipangutana ka na ba ug sama niini: ‘Unsay akong buhaton? Moadto ba ko sa parti? Kini bang kursoha ang akong kuhaon? Makigdeyt ba ko niining tawhana?’

Ang sinserong mga tawo lagmit mangayog tabang kanimo sa paghimog mga desisyon—mga desisyon nga makaapektar sa ilang relasyon sa ilang mga higala, pamilya, o bisan kang Jehova. Asa nimo ibase ang imong tubag? Unsay imong batasan sa paghatag ug tambag? Gaan man o bug-at ang isyu, “ang kasingkasing sa matarong nagapamalandong aron sa pagtubag,” nag-ingon ang Proverbio 15:28. Tagda ang lima ka prinsipyo sa Bibliya nga makatabang kanimo dihang mohatag ug tambag.

1 Sayra ang Tinuod nga Situwasyon.

“Kon ang usa magahatag ug tubag sa usa ka butang nga wala pa niya madungog, kana maoy kabuangan sa iyang bahin ug usa ka kaulawan.”—PROV. 18:13.

Aron makahatag ug maayong tambag, angay natong masabtan ang mga kahimtang ug panglantaw sa nagpatambag. Sa pag-ilustrar: Kon dunay manawag nimo ug mangutana sa labing maayong agianan paingon sa imong balay, unsay angay nimong mahibaloan aron makatabang? Matudloan mo ba siya sa labing maayong agianan nga dili una sayron ang iyang presenteng lokasyon? Dili gayod! Sa susama, aron makahatag ug hustong tambag, kinahanglang mahibaloan nimo ang presenteng “lokasyon”—ang mga kahimtang ug panglantaw—sa nagpatambag. Aduna bay mga sirkumstansiya nga lagmit makaapektar sa atong itambag? Kon walay hustong kahibalo sa situwasyon, basin mas malibog ang atong gitambagan.—Luc. 6:39.

Sayra Kon Unsa Nay Iyang Napanukiduki. Maalamon usab nga pangutan-on ang nagpatambag: “Sa imong hunahuna, unsang mga prinsipyo sa Bibliya ang mapadapat?” “Unsa kahay mga bentaha ug disbentaha sa imong mga kapilian?” “Unsa na may imong napanukiduki?” “Unsang tabang ang nahatag na kanimo sa mga ansiyano, sa imong mga ginikanan, o sa nag-Bible study nimo?”

Ang mga tubag makatabang kanato sa pagtino kon unsa nay gihimong paningkamot sa usa aron matubag ang iyang mga pangutana. Dugang pa, sa dili pa motambag, tagda kon unsa nay gisulti sa uban. Tingali masabtan usab nato kon ang usa nangita lag magtatambag nga ‘maggitik sa iyang mga dalunggan’ pinaagi sa mga tambag nga gusto niyang paminawan.—2 Tim. 4:3.

  2 Likayi ang Dinalidaling mga Tubag.

“Ang matag usa kinahanglang magmaabtik sa pagpaminaw, magmahinay sa pagsulti.”—SANT. 1:19.

Uban ang maayong intensiyon, kita lagmit motubag dayon. Apan maalamon ba kini, ilabina kon ang atong gihisgotan wala kaayo nato mapanukiduki? Ang Proverbio 29:20 nag-ingon: “Nakakita ka ba ug tawo nga madalidalion sa iyang mga pulong? May paglaom pa ang usa ka hungog kay kaniya.”

Paneguroa una nga ang imong itambag bug-os nahiuyon sa kaalam sa Diyos. Pangutan-a ang kaugalingon, ‘Ang ako bang panghunahuna naimpluwensiyahan sa panghunahuna ug “espiritu sa kalibotan”?’ (1 Cor. 2:12, 13) Hinumdomi nga ang maayong intensiyon lagmit dili pa igo. Human masayri ang lisod nga asaynment ni Jesus, si apostol Pedro mitambag kaniya: “Magmaluloton ka sa imong kaugalingon, Ginoo; dili gayod mahitabo kanimo kini nga dulnganan.” Unsay atong makat-onan sa reaksiyon ni Pedro? Kon dili magbantay, bisan ang sinserong tawo makatambag nga “dili [binase] sa mga hunahuna sa Diyos, kondili nianang sa mga tawo.” (Mat. 16:21-23) Pagkahinungdanon nga mamalandong una sa dili pa mosulti! Total, ang atong kasinatian limitado kaayo kon itandi sa kaalam sa Diyos.—Job 38:1-4; Prov. 11:2.

3 Mapaubsanong Ipadapat ang Pulong sa Diyos.

“Ako walay ginahimo sa akong kaugalingong pagbuot; apan sumala sa gitudlo kanako sa Amahan gisulti ko kining mga butanga.”—JUAN 8:28.

Moingon ka ba, “Kon ako pa nimo . . . ”? Bisan pag dali ra kaayong tubagon ang nagpatambag, maayong sundogon ang pagkamapaubsanon ug pagkamakasaranganon ni Jesus. Mas dako ang iyang kaalam ug kasinatian kay sa ubang tawo; apan, siya miingon: “Wala ako magasulti pinasukad sa akong kaugalingong pagbuot, apan ang Amahan . . . naghatag kanakog sugo kon unsay akong isugilon ug isulti.” (Juan 12:49, 50) Ang mga pagtulon-an ug tambag ni Jesus kanunayng gibase sa kabubut-on sa iyang Amahan.

Pananglitan, atong mabasa sa Lucas 22:49 nga ang mga tinun-an ni Jesus nangutana kon sila ba makig-away dihang dakpon na siya. Gani usa ka tinun-an ang nanigbas. Matikdi ang samang asoy sa Mateo 26:52-54 nga bisan sa maong kahimtang, si Jesus nangatarongan sa maong tinun-an base sa kabubut-on ni Jehova. Kay nahibalo sa mga prinsipyo sa Genesis 9:6 ug sa mga tagna sa Salmo 22 ug Isaias 53, si Jesus nakahatag ug maalamong instruksiyon nga nakaluwas gayod ug mga kinabuhi ug nakapahimuot kang Jehova.

  4 Gamita ang Imong Teokratikanhong Librarya.

“Kinsa ba gayod ang matinumanon ug maalamong ulipon nga gitudlo sa iyang agalon ibabaw sa iyang mga sulugoon sa panimalay, sa paghatag kanila sa ilang pagkaon sa hustong panahon?”—MAT. 24:45.

Si Jesus nagtudlog kasaligang ulipon nga matang sa pagtaganag hinungdanong espirituwal nga pagkaon. Kon mohatag kag tambag ug instruksiyon bahin sa importanteng mga butang, ikaw ba mogahig panahon aron makapanukiduki pag-ayo sa binase sa Bibliya nga mga publikasyon?

Ang Watch Tower Publications Index ug ang Watchtower Library * adunay daghan ug tin-awng impormasyon nga daling mabatonan. Gamita gayod kini! Linibo ka ulohan ang gihisgotan, nga may mga artikulo aron tabangan ang usa nga nangitag tambag. Hanas ka ba sa pagtabang sa uban sa pagsusi sa mga prinsipyo sa Bibliya ug sa pagpangatarongan base sa Pulong sa Diyos? Maingon nga ang mapa makatabang sa usa sa pagtino sa iyang lokasyon ug makagiya kaniya sa iyang destinasyon, ang mga himan sa pagpanukiduki makatabang usab kaniya nga makita ang dalan nga iyang gisubay ug mahibalo kon unsaon pagpabilin sa dalan paingon sa kinabuhi.

Daghang ansiyano ang nagbansayg mga magmamantala sa pagsusig mga artikulo gamit ang Index o ang Watchtower Library, sa ingon nagtabang sa mga igsoon sa pagdesisyon base sa Kasulatan. Kini nakatabang sa mga magmamantala dili lang sa pagsulbad sa ilang problema nianang higayona kondili sa pag-ugmad usab sa batasan sa pagpanukiduki ug sa pagsalig sa espirituwal nga mga tagana ni Jehova. Niining paagiha, ilang ‘mabansay ang ilang mga gahom sa pagsabot aron sa pag-ila sa maayo ug sa daotan.’—Heb. 5:14.

5 Likayi ang Paghimog Desisyon Para sa Uban.

“Ang matag usa magpas-an sa iyang kaugalingong luwan.”—GAL. 6:5.

Ang matag usa kinahanglang mopili kon unsang tambag ang iyang sundon. Gitugotan kita ni Jehova sa pagdesisyon kon sundon ba nato ang iyang mga prinsipyo o dili. (Deut. 30:19, 20) Ang pipila ka situwasyon nalangkit sa ubay-ubayng prinsipyo sa Bibliya, ug sa kataposan, ang usa nga nangayog tambag kinahanglang mohimog kaugalingong desisyon. Depende sa isyu o edad sa nagpatambag, angay natong suknaon ang kaugalingon, ‘Ako ba ang angayng motubag niining pangutanaha?’ May mga butang nga mas maayong iduol sa mga ansiyano o kon batan-on ang nangutana, sa iyang mga ginikanan.

[Footnote]

[Kahon/Hulagway sa panid 8]

Proyekto sa Pamilyahanong Pagsimba

Ingong proyekto sa pagtuon, nganong dili panukidukion ang tubag sa mga gipangutana kanimo di pa dugay? Unsang mga artikulo ug mga prinsipyo sa Bibliya ang imong magamit sa pagtabang niadtong nangutana? Ibutang ta nga may igsoon nga nangutana nimo bahin sa pagpakigdeyt uban sa tuyo nga magminyo. Dihang mogamit ug Index o Watchtower Library, pangitaa una ang pangunang nalangkit nga ulohan. Pananglitan, sa Index mahimo nimong tan-awon ang “Dating” o “Marriage.” Dayon susiha ang mga sub-ulohan alang sa nalangkit nga mga artikulo. Dihang susihon ang pangunang ulohan, matikdi kon dunay ipatan-aw usab nga laing mga ulohan, nga basin maghisgot sa ulohan nga mas direktang nalangkit sa imong gipanukiduki.

[Kahon sa panid 9]

Mapasalamaton kita sa mga tagana ni Jehova pinaagi sa iyang organisasyon kay kita makahatag ug makadawat sa labing maayong tambag. Ang Ecclesiastes 12:11 nag-ingon: “Ang mga pulong sa mga maalamon sama sa mga igtutugsok sa baka, ug ingon sa mga lansang nga gipadulot kadtong mga nagtigom sa mga tudling-pulong; kini sila gihatag gikan sa usa ka magbalantay.” Sama sa “mga igtutugsok sa baka”—talinis nga mga tungkod para giyahan ang igguguyod nga mga hayop—ang mahigugmaon ug maalamong tambag maggiya sa sinserong mga tawo sa hustong dalan. Ang “mga lansang nga gipadulot” magpalig-on sa tinukod. Sa susama, ang maayong tambag makapalig-on sa uban. Ang mga maalamon malipay kaayong magkonsiderar sa ‘tinigom nga mga tudling-pulong’ nga nagbanaag sa kaalam sa ilang “magbalantay,” si Jehova.

Sundoga ang Magbalantay dihang maghatag ug tambag. Pagkadakong pribilehiyo nga makapamati ug makahatag ug tambag dihang kita may kahigayonan! Kon binase kini sa mga prinsipyo sa Bibliya, ang atong tambag makaayo ug makahatag ug dumalayong kaayohan niadtong mamati niini.